कठवा अऊ कंठ के धनी कलाकार

त्रिपुरा के ये सधारन शहर धरमनगर, के सब्बो के नजर मं रहेइय्या एकठन बोरो कालीबाड़ी दिघी नांव के तरिया हवय, जेकर मंझा मं भगवान शिव के एकठन बड़े मूर्ति बने हवय. ये ह शहर के सबले खास जगा आय. शहर के सोर-सराबा के बीच, ये ह अइसने सांत जगा हवय जिहां हरेक संझा इहाँ के लोगन मन अऊ सैलानी मन घुमेइया मन दू घड़ी चैन पाय बर आथें. कभू-कभू गाड़ी-घोड़ा के पों-पों अऊ भीड़-भड़क्का के बीच ले एकठन सुग्घर गुरतुर धुन के अवाज आथे, जेन ला सुन के लोगन मन ओती खिंचे चले जाथें.

तरिया तीर बइठे 60 बछर के ये सियान, लंबा घेंच वाले ल्यूट सही दिखेइय्याइया बाजा मं सबके मनभावन लोकगीत बजावत हवय. अपन आंखी मन ल मूंद के, वोह एक हाथ ले तार मन ल छ़ेड़त हवय अऊ दूसर हाथ पातर फिंगरबोर्ड मं चलावत हवय. ओकर चरों कोती जुरे कुछू आतुर मइनखे मन न तो ओकर बाजा ल जानत हवंय, न वो धुन ला, अऊ न माली समाज के ये कलाकार के नांव ला जानत हवंय, जेन मन त्रिपुरा मं अनुसूचित जाति के रूप मं सूचीबद्ध हवंय.

फेर सिरिफ 5 कोस दूरिहा, उत्तरी त्रिपुरा जिला के सरला (कदमतला ब्लॉक मं) के नान कन ग्राम पंचायत मं, हर कोनो रतीश मालाकार ला दोतारा बजेइय्या के रूप मं चिनथें.

हमन सब्बो वोला जानथन. वो ह अइसने मइनखे आय जेकर नांव ले लोगन मन हमर गाँव ला जानथें, 26 बछर के इहाँ के एक झिन रिक्सा चलेइय्या हमन ला गरब ले बताथे. फेर रतीश हिचकत कहिथे, मंय कोनो पेशेवर संगीतकार नो हों. मंय बढ़ई अंव. ये घर के लकरी के जम्मो काम मंय खुदेच करे हवं.” हमन ओकर दू खोली वाले ईंटा अऊ माटी के घर के भीतरी बइठे हवन, जेन ह सुनसान चाय बगीचा के बीच मं एक ठन ऊंच जगा मनन बने हवय. “संगीत मोला सुकून देथे. जब घलो मोर करा कोनो काम बूता नइ रहय, त मंय दोतारा बनाथों अऊ वोला बजाथों.”

रतीश हमन ला एक ठन अइसने तार वाले बाजा ला दिखाथे, जेकर सांस्कृतिक महत्तम अऊ इतिहास भारी गहिर हवय. दोतारा, दोतर धन स्वराज – ये बाजा बांग्लादेश, पश्चिम बंगाल, असम अऊ उत्ती बिहार के कतको सदी जुन्ना परंपरा मन के अटूट हिस्सा रहे हवय. ये ह बाउल जइसने आध्यात्मिक लोक संगीत मं, गाँव-देहात मं भवाइया अऊ भाटियाली जइसने लोकगीत मन मं,अऊ संगे संग कथा कहिनी सुने के परंपरा मं घलो देखे जा सकथे. रतीश कहिथे, “लोगन मन येला दोतारा (दू तार वाले) कहिथें, फेर अधिकतर बाजा मं कम से कम चार तार होथे, अऊ कभू-कभू त छै ठन घलो. मोला येला स्वराज कहे जियादा भाथे.

“जब घलो मंय नाप जोख धन कोनो दीगर समस्या मं उलझ जाथों, त काम छोडके थोकन सुस्ता लेथों अऊ बाजा बजाथों. येकर ले मोला अपन धियान फिर ले एक जगा राखे मं मदद मिलथे.” रतीश, बनत खेप ले नवा दोतारा के एक ठन ला धरथे अऊ हमन ला ओकर अलग अलग हिस्सा ला बताथे: रेज़ोनेटर (बती), रेज़ोनेटर ला तोपेइय्या झिल्ली, घेंच (धोर), चार ले छै तार, अऊ ट्यूनिंग पेग. ये बाजा ला बनाय के के तरीका अऊ येकर डिज़ाइन, बखत के संग अऊ अलग अलग जगाके हिसाब ले बदलत रहे हवय.

रतीश के परिवार मं – जेन ह कतको पीढ़ी ले बढ़ई के काम करत आवत हवय – कोनो घलो कभू पहिली कोनो घलो बाजा बनाय नइ रहिन. किसोर उमर मं, रतीश ह स्कूल छोड़ दे रहिस अऊ अपन परिवार ला सहारा देय बर अपन ददा के संग कमा करे लगे रहिस. “कभू कभू हमन लकठा के बजार कदमतला धन चुराइबारी जावत रहेन. एक दिन मोर भेंट कलाकार मन के एक ठन मंडली ले होईस जेन मन अलग अलग किसम के तार वाले बाजा बजावत रहिन. वो मन ले एक ठन बजा मोला जियादा भा गीस, ओकर नांव दोतारा रहिस.” बस, उहिच घड़ी वो ह खुदेच एक ठन दोतारा बनाय के फइसला करिस.

“बाद मं, धरमनगर मं एक झिन सूरदास दोतारा बजेइय्या ह मोला येकर नाप सिखाइस. साल 1982 मं, 20 बछर के उमर मं, मंय इहाँ के एक झिन बेचेइय्या ले बिसोय नरम कुमा कठवा ले अपन पहिला बाजा बनायेंय, वो ह कहिथे. वो बखत वोला सेंडपेपर (रेगमल) के बारे मं कोनो जानकारी नइ रहिस. वो ह एक ठन मोठ कपड़ा मं पिसे कांच ले वो बाजा ला चिकना करत रहिस. “मंय एक ठन टूटे ढोलक के चमड़ा लेंय, कबाड़ मं परे लोहा के पुर्जा लेंय अऊ वोला फिर ले काम के लायक बनायें. पिक भैंसा के सींग ले बनाय गे रहिस.अब हमर करा सिरिफ प्लास्टिक के पिक होथे.” रतीश ला हरेक छोटे बड़े बात सुरता हवय.

“तारो मन बर, मंय अलग-अलग मोठ के बाजा तार बउरथों” रतीश कहिथे, अऊ धरमनगर के एक ठन बाजा के सामना वाले दूकान ले बिसोय काँसा, स्टील अऊ ताँबा के तार बहिर निकारथे.“ येकर सुर मोर कान के भरोसे रहिथे. मंय खुस येला बजाके सुर निकारथों.” अऊ ये काम मं कतको घंटा लग सकथे. वइसे वो ह अपन जिनगी के सुरु मं दोतारा बनाय अऊ बजाय सीख ले रहिस, फेर हेलेच मं वो ह येला बेचे सुरु करे हवय, जेकर ले वो ह दू पइसा जोर सके अऊ बखत मं काम आवय – सबले जियादा भार ओकर 52 बछर के घरवाली ज्योत्सना के आय.

बीते कुछेक बछर मं वोला कैंसर होय के पता चलिस. हमन वोला इलाज बर असम के सिलचर [करीबन 40 कोस दूरिहा] ले जाथे, अक्सर महीना मं एक बेर ले जियादा. मंय इलाज बर करीबन पांच लाख रूपिया खरचा कर चुके हवंव. अऊ काबर के मोला ये रकम उधार लेगे ला परिस, ते पायके मं भरी करजा मं बूड़े हवंव. इहाँ तक ले लकरी बर अपन कटहर के रुख बेंचे के बाद घलो. “आखिरी रुख 4,000 रूपिया मं बेचाइस,” रतीश कहिथे.

जब बढ़ई के काम मिलथे, त रतीश ला रोजी मं 500 रूपिया मिलथे. महीन मं वो ह जियादा ले जियादा 7,000 रूपिया कमा पाथे. फेर कतको पईंत अइसने घलो होथे जब वोला दू धन तीन महीना तक कोनो काम नइ मिलय. “ येकरे सेती मंय धरमनगर जाके बाजा बेचे सुरू कर देंय. पइसा कमई के हमर करा बस इहीच जरिया रहिस. मोर करा कों जमा पूंजी घलो नइ ये. मोर सबले बड़े बेटा शहर के एक ठन सोनार के दूकान मं काम करथे अऊ जतक होय सके, मोर मदद करथे, रतीश बताथे. ओकर चार लइक हवंय – तीन बेटा अऊ एक बेटी- जेन मन ज्योत्सना ला अस्पताल ले जाय के जम्मो इंतजाम करथें. सबले छोटे बेटी रिमिता, 17 बछर के हवय अऊ ये बखत हाई स्कूल मं पढ़त हवय.

गवेइय्या के एकेच सहारा ओकर संगीत आय. “मंय कोनो गीत धन धुन चुनथों अऊ खुदेच बजावत रहिथों. मोला कभू कोनो नइ सिखाइस. जब मंय दोतारा बजाथों, त मोला बखत के कोनो सुरता नइ रहय. मंय कभू सोचे नइ रहेंय के येकर ले पइसा कमाहूँ. ये त बस पांच बछर पहिली के बात आय, जब मंय तंगी ले गुजरत रहंय, वो बखत कोनो मोला दोतारा बनाके बेचे के सुझाव दिस.” अब तक ले वो ह 13 ठन दोतारा बेच चुके हवय. एक ठन दोतारा बनाय ले ओला 5,000 रूपिया तक मिल जाथे. “ एक ठन दोतारा बनाय मं 2000 के समान लागथे. फेर मंय अपन बनाय पहिला दोतारा ला कभू नइ बेचेंय. ओकर ले मोर भारी गहिर मया हवय.” ये बतावत रतीश के चेहरा मं उछाह छलक परथे.

अब वोला ग्राहेक मिले लगे हवंय. 45 बछर के साइंस के टीचर सुरेंद्र नाथ कहिथें, “मोला संगीत ले भारी मय हवय अऊ रतीश खुदेच सुग्घर बजाथे. जब मोला पता चलिस के वो ह दोतारा बनाथे, त मंय तुरते ओकर ले अपन बर एक ठन बनाय बर कहेंय.” वो ह रतीश के पहिला ग्राहेक रहिस. वो ह रतीश ला अऊ घलो दोतारा बनाय बर प्रोत्साहित करिस अऊ वोला इहाँ के एक ठन क्लब मं बजाय बर घलो बलायेंय.

फेर, समाज मं मिले ये पहिचान ले रतीश के परिवार जियादा खुस नइ ये. रतीश के सास, 70 बछर के शारदा मलाकार, जेन ह अपन बेटी ला देखे आय रहिस, कहिथे, “बिहाव के बखतेच हमन ला पता चलिस के वोला बजाय के शौक हवय. हमन ओकर ले कभू-कभार बजाय बर कहिथन, ये सोचके के दिन भर बूता करे के बाद वो ह थक गे होही. अपन बेटी के बिहाव करे बखत हमर चिंता थिर आमदनी अऊ पक्का घर रहिस.”

रतीश जानथे के ये ह एक ठन अइसने विरासत आय जेन ला वो ह अपन लइका मन ला कभू सौंपे सकही. “ये ह मोर संगेच नंदा जाही. मोर कोनो घलो लइका मन के ये कला मं कोनो रूचि नइ ये. वो मन मं येकर बर न त कोनो ताकत हवय, न सबर अऊ न कोनो रूचि.” फेर ये डहर चेत न राखे ह सिरिफ ओकर परिवार भर तकेच ले नइ ये. ओकर जइसने तजुरबा वाले कलाकार मन बर बने कोनो सरकारी योजना वोला मदद नइ करे हवय. वो ह कहिथे, “मंय कलाकार/ कारीगर मन बर बने तीन अलग-अलग पेंसन योजना बर अरजी देय हवंव, जेन मं शिल्पी भत्ताअऊ बढ़ई भत्ता घलो हवय. फेर मोला अब तक ले कुछु घलो मिले नइ ये.”

“मंय ये त नइ कहंव के मोला नांव के चाह नइ ये, फेर भगवान करतिस के मंय अऊ जियादा काबिल होथें. तब मंय संगीत मं अपन जिनगी ला चुनथें. जब मोर दाई जींयत रहिस, त वो ह मोला गाये बर कहय. मंय दोतारा बजावंव अऊ भजन गावंव. वो बखत बस अतकेच काफी रहय...”

अनुवाद: निर्मल कुमार साहू