نفرت کی لہر کا سامنا کر رہے بنگالی مسلمان

’’جب میں نے خاردار تار دیکھی، تو ایسا لگا جیسے سب کچھ ختم ہو گیا ہو… مجھے لگا کہ میں کبھی اپنے وطن واپس نہیں جا سکوں گا۔ میرے دادا کے دادا مرشد آباد میں ہی رہا کرتے تھے۔ میری نانی بھگوان گولا [بلاک] کے اسی گاؤں میں رہتی تھیں جہاں آج ہمارا گھر ہے۔‘‘

بظاہر پریشان دکھائی دے رہے ۳۶ سالہ محبوب شیخ ہمیں اپنے گھر، بالیا حسن نگر میں ہم سے بات کرتے ہوئے مرشد آباد ضلع سے اپنے خاندان کی تاریخی وابستگی کے بارے میں بتاتے ہیں۔ محض ایک مہینہ قبل انہیں ’بنگلہ دیشی درانداز‘ قرار دے کر زبردستی سرحد پار دھکیل دیا گیا تھا۔

’’ووٹر کارڈ، راشن کارڈ، آدھار کارڈ – میرے پاس سب کچھ ہے۔ میں نے محنت مزدوری کر کے تھوڑی سی زمین بھی خریدی ہے۔ اب وہ مجھے بنگلہ دیشی کیسے کہہ رہے ہیں؟‘‘ مہاجر مزدور محبوب شیخ سوال کرتے ہیں۔

یہ سوال پوچھنے والے محبوب تنہا نہیں ہیں۔ ملک بھر میں مرشد آباد سے تعلق رکھنے والے تعمیراتی مزدور، گھریلو ملازمین، ریہڑی والے اور خوانچہ والے سب یہی سوال کرتے ہیں: ہمارے ضلع سے تعلق رکھنے والے بنگالی بولنے والے مسلمان مہاجر مزدوروں کو مختلف ریاستوں میں کیوں نشانہ بنایا جا رہا ہے؟

’’اب تک کسی نے [ہمارے ہندوستانی ہونے پر] سوال نہیں اٹھایا تھا،‘‘ کانڈی کے گوکڑن گاؤں سے تعلق رکھنے والی ۵۲ سالہ بشاکھا منڈل (بدلا ہوا نام) کہتی ہیں۔ ’’لیکن اب ہر جگہ [ہم] بنگالی مسلمان مزدوروں کے ساتھ جو مشکلات پیش آ رہی ہیں، اُنہیں دیکھ کر ہم فکر مند کیسے نہ ہوں۔‘‘ وہ دہلی میں تین دہائیوں سے بطور گھریلو ملازمہ کام کر رہی ہیں۔ پانچ گھروں میں کام کر کے وہ ہر ماہ ۲۵ ہزار روپے کماتی ہیں۔ اُن کے پاس اصلی ووٹر کارڈ اور راشن کارڈ موجود ہیں۔ اس کے علاوہ آدھار کارڈ اور دہلی کے پتہ سے منسلک ایک بینک اکاؤنٹ بھی ہے۔

انگریزوں کے ذریعہ دار الحکومت کولکاتا منتقل کرنے سے قبل تک مرشد آباد غیر منقسم بنگال کا انتظامی مرکز تھا، اور ایک زمانے میں اپنی خوشحالی کے لیے مشہور تھا۔ آج یہ ضلع مغربی بنگال میں مہاجر مزدوروں کا سب سے بڑا مرکز بن چکا ہے۔ مئی ۲۰۲۵ تک، یہاں سے تقریباً چار لاکھ مزدور مغربی بنگال کی ’مہاجر مزدور فلاحی اسکیم‘ میں رجسٹر ہو چکے تھے۔ [دلچسپ بات یہ ہے کہ ان اعداد و شمار پر مبنی دستاویز اب حکومت کی ویب سائٹ سے غائب ہو چکی ہے]۔ مختلف مزدور تنظیموں کے خود مختار تخمینوں کے مطابق مرشد آباد میں ایسے مزدوروں کی تعداد دس لاکھ سے بھی زیادہ ہو سکتی ہے۔ ریاستی محکمہ تعلیم کے ایک افسر نے نام ظاہر نہ کرنے کی شرط پر بتایا: ’’کسی سرکاری اعداد و شمار میں اس کا ذکر کبھی نہیں ہوگا…لیکن حقیقت یہ ہے کہ ہر روز بے شمار کم عمر بچے بھی مزدوری کے لیے یہاں سے باہر جا رہے ہیں۔‘‘

محبوب کے چھوٹے بھائی ۳۳ سالہ مجیبر شیخ اور اُن کے والد حسین شیخ، جن کی عمر چھ کی دہائی میں ہے، دونوں نے مہاجر مزدور کے طور پر کام کیا ہے۔ حسین آج بھی کولکاتا میں راج مستری کے طور پر کام کرتے ہیں۔ مجیبر اب بطور ڈرائیور کام کرتے ہیں۔ ماضی میں وہ محبوب کے ساتھ دہلی اور ممبئی میں راج مستری کا کام کر چکے ہیں۔ دونوں بھائیوں کا بچپن غربت سے مسلسل جدو جہد کرتے ہوئے گزرا ہے۔ محبوب یاد کرتے ہوئے کہتے ہیں، ’’ایک وقت تھا جب میں دوسروں کی بکریاں چرایا کرتا تھا۔ میں زیادہ پڑھ نہیں سکا۔ ہمارا کنبہ بہت ہی غریب تھا۔ غربت کا بوجھ اس قدر تھا کہ ہمیں بچپن سے ہی کام کرنا پڑا۔‘‘

روزگار کی تلاش میں محبوب ۱۷ سال کی عمر میں گھر سے نکلے تھے۔ ان کے ساتھ وراثت میں ملی راج مستری کی مہارت تھی۔ وہ دہلی، پنجاب، تمل ناڈو، راجستھان اور دیگر ریاستوں میں کام کر چکے ہیں۔ اب مہاجر مزدوروں کے کام کے مقامات پر ہونے والی خوفناک تبدیلیوں کو دیکھ کر محبوب حیران ہیں۔ میڈیا رپورٹوں اور ذاتی بیانات میں کئی ایسے واقعات درج ہیں، جن میں محبوب جیسے مہاجر مزدوروں کو سطحی بہانوں پر بنگلہ دیش میں دھکیلا جا رہا ہے۔

یہاں شکوک و شبہات اور بد اعتمادی صاف طور پر محسوس کی جا سکتی ہے۔ اس میں حیرت کی کوئی بات نہیں ہے، کیونکہ گزشتہ ایک سال سے زیادہ عرصے سے انہیں مرکزی اور ریاستی حکومتوں کی قانون نافذ کرنے والے اداروں کے ذریعہ نشانہ بنایا جا رہا ہے۔ ’’ہمارے نام آپ جیسے نہیں ہیں، اسی لیے ہمیں ذلیل کیا جاتا ہے،‘‘ مجیبر ہمیں بتاتے ہیں۔ گزشتہ ایک سال کے دوران مغربی بنگال سے تعلق رکھنے والے مسلم مہاجر مزدوروں کو پکڑ کر انہیں ’بنگلہ دیشی‘، ’روہنگیا‘، ’گھس پیٹھیا‘ (درانداز) یا ’غیر قانونی‘ قرار دے کر بدنام کیا گیا۔

ان سبھوں نے اس بات کو تسلیم کیا اور اس موضوع پر بات کی کہ گزشتہ دہائی میں زبان، مذہب، ذات پات یا علاقائی شناخت کی بنیاد پر نفرت میں اضافہ ہوا ہے، جن میں اب مزید شدت آچکی ہے۔ مسلم مہاجر مزدور سب سے زیادہ کمزور طبقہ ہیں، جو بنیاد پرست تنظیموں اور بعض سیاسی رہنماؤں کی جانب سے پھیلائی جانے والی نفرت انگیز تقریروں کا سب سے زیادہ نشانہ بن رہے ہیں۔

’’ہمیں زندگی اور کام میں سے کسی ایک کا انتخاب کرنا پڑ رہا ہے،‘‘ دیارجلی باغیچہ کے لوگوں نے اس رپورٹر سے شکایت کی۔ ۳۲ سالہ نجمہ بی بی، جو یہاں بغیر پلاسٹر والے دو کمروں کے اینٹوں کے مکان میں رہتی ہیں، کانپور، اتر پردیش میں کام کرنے والے اپنے شوہر رفیق الاسلام کے لیے خوفزدہ ہیں۔ ’’اگر وہ چند گھنٹوں بعد بھی میری کال نہیں اٹھاتے تو میرا دل ڈوب جاتا ہے،‘‘ وہ کہتی ہیں۔

محبوب اپنے گھر والوں کے ساتھ عید الاضحی (جون کے شروع میں) کا تہوار منانے کے لیے اس سال مئی میں بالیا حسن نگر واپس آئے تھے۔ راج مستری کے اس گھرانے نے اپنا دو منزلہ مکان ایک ایک اینٹ کر کے کئی سالوں کی مدت کے دوران کھڑا کیا ہے۔ اس میں پانچ کمرے ہیں اور گراؤنڈ فلور پر مستقبل میں دکان کھولنے کے لیے کچھ جگہ چھوڑ دی گئی ہے۔ مکان کے اس حصہ میں ابھی تک پلاسٹر نہیں چڑھی ہے جہاں محبوب اپنی اہلیہ، ۳۰ سالہ گھریلو خاتون سُرنا بی بی اور اپنے تین بچوں کے ساتھ رہتے ہیں۔ ان کا بڑا بیٹا ۱۶ سالہ بَکول شیخ، جس نے اسکول چھوڑ دیا ہے، ایک قریبی دکان میں کام کر رہا ہے۔ چھوٹے بیٹے، ۱۲ سالہ ساغر شیخ اور ۷ سالہ ریحان شیخ ایک مقامی اسکول میں زیر تعلیم ہیں۔ قربانی کے مقدس تہوار اور محبوب کی وطن واپسی کے موقع پر، ان کے کنبے نے قربانی کا انتظام بھی کیا تھا۔

لیکن ایسا ہوا نہیں۔ ’’تھانے کے تعمیراتی مقام سے بار بار آنے والی کالوں نے انہیں واپس بلا لیا۔‘‘ گھر اور تہوار کو چھوڑ کر محبوب واپس مہاراشٹر چلے گئے اور اپنا کام دوبارہ شروع کر دیا۔

جب وہ ۹ جون کو ایک مقامی اسٹال پر چائے پی رہے تھے تو پولیس نے بغیر وضاحت کے انہیں اٹھایا اور میرا روڈ، تھانے میں شری ایل آر تیواری کالج آف انجینئرنگ کے قریب اپنی ایک چوکی پر لے گئے۔ رات گئے انہیں میرا روڈ تھانہ منتقل کر دیا گیا، جہاں ان سے شہریت ثابت کرنے والی دستاویزات طلب کی گئیں۔

’’تم بنگلہ دیشی ہو، ٹھیک ہے؟‘‘ افسروں نے مجھ سے ہندی میں دریافت کیا۔ میں نے کہا، ’’میرا تعلق مغربی بنگال سے ہے،‘‘ اور انہیں اپنا آدھار اور پین کارڈ دکھایا۔ انہوں نے کہا، ’’یہ آج کل پانچ روپے میں خریدے جاسکتے ہیں،‘‘ محبوب نے اس رپورٹر کو بتایا۔

کسی طرح انہوں نے چوری چھپے بالیا حسن نگر میں اپنے گھر والوں کو فون کیا جنہوں نے فوراً مہیش استھلی کی مقامی گرام پنچایت سے رابطہ کیا اور تمام ضروری دستاویزات میرا روڈ پولس اسٹیشن کو بھیج دیے۔ محبوب کہتے ہیں، ’’چار دنوں تک میں نے بے پناہ ذہنی اذیتیں برداشت کیں۔ دن میں مجھے اسٹیشن کے باہر بٹھایا گیا اور راتوں کو پولیس کیمپ میں رکھا گیا۔‘‘

میرا روڈ پولیس محبوب کے ان الزامات کی تردید کرتی ہے کہ پولیس کی جانب سے کوئی غلطی سرزد ہوئی ہے۔ سینئر انسپکٹر میگھنا بُراڈے نے کہا کہ ان سے ’’غلطی سرزد نہیں ہوئی۔‘‘ اور یہ کہ محبوب شیخ اور دیگر کی حراست پولیس کمشنر کے حکم کے تحت عمل میں آئی تھی۔

تاہم، محبوب کے لیے ۱۳ جون کو خوفناک ثابت ہونا تھا۔

’’اس دن ہمیں لوہے کی جالیوں سے ڈھکی ہوئی ایک بڑی پولیس وین میں اٹھایا گیا۔ بہت سی گاڑیاں ہمیں پائلٹ کر رہی تھیں، جیسے ہم کوئی اہم رہنما یا وزیر تھے،‘‘ محبوب کہتے ہیں۔ ’’کار آخر میں پنویل کے قریب کسی سیکورٹی کیمپ میں جاکر رکی۔‘‘

اسی گاڑی نے ۱۴ جون کو محبوب سمیت تقریباً ۳۰ لوگوں کو پونے ہوائی اڈے تک پہنچایا۔ دوپہر ۲ بجے انہیں جلدی جلدی ایک ہوائی جہاز میں سوار کیا گیا۔ جہاز سے اترتے ہی محبوب نے محسوس کیا کہ یہ مغربی بنگال کا باگ ڈوگرہ ہوائی اڈہ ہے۔ ’’انہوں نے گنتی کی اور ہمیں چھوٹے گروپوں میں منقسم کیا،‘‘ وہ کہتے ہیں۔ ’’میں نے سنا تھا کہ مجرموں کے گنتی ہوتی ہے۔ لیکن ہمارا شمار مجرموں کی طرح کیوں کیا جا رہا؟ ہمارے اندر شک پیدا ہوا…‘‘ ہوائی اڈہ سے انہیں سلی گوڑی بی ایس ایف کیمپ لے جایا گیا اور وہاں سے ایک نامعلوم منزل کی طرف ایک نیا سفر شروع ہوا۔

’’گاڑی تقریباً ۵-۶ گھنٹے تک مسلسل چلتی رہی۔ پھر انہوں نے ہمیں ایک جنگل کے بیچ میں بی ایس ایف کے ایک چھوٹے کیمپ میں اتار دیا۔ وہاں موجود چند افسروں نے ہم سے پوچھا، ’’تم کہاں کے رہنے والے ہو؟‘‘ میں نے اپنا پتہ بتا دیا، فوراً ہی وحشیانہ انداز میں مار پیٹ شروع ہو گئی۔ یہاں تک کہ انہوں نے ہمارے گلے پر بھری ہوئی بندوقیں تان دیں۔ اس کے بعد بی ایس ایف کے افسروں سے تصویریں کلک کر کے ہمیں جنگل کے راستے چلنے کے لیے کہا۔

’’کہاں جانا ہے؟ اور کیسے جانا ہے؟ ہمیں بالکل اندازہ نہیں تھا۔ ہمیں خدشہ تھا کہ اگر ہمیں دیکھ لیا گیا تو بی ایس ایف یا بارڈر گارڈ بنگلہ دیش (بی جی بی) ہمیں فوراً گولی مار دیں گے۔ خوف نے ہمارے دلوں میں گھر کر لیا تھا۔ رات کے لیے جنگل ہی ہمارا ٹھکانہ بن گیا تھا،‘‘ اس صدمے کو محبوب یاد کرتے ہیں۔

دن نکلنے کے بعد تناؤ میں مزید اضافہ ہو گیا۔ انہوں نے آخری بار پونے ہوائی اڈے پر کچھ کھایا تھا۔ اس کے بعد ۲۴ گھنٹے گزر چکے تھے اور منہ میں دانہ تک نہیں گیا تھا۔ محبوب کہتے ہیں، ’’ایسا لگتا تھا کہ ہم گر جائیں گے اور وہیں مر جائیں گے۔ ہمارے چاروں طرف صرف درخت ہی درخت تھے۔ ہم ایک گروپ میں چل رہے تھے۔‘‘ وہ کچھ لمحہ توقف کے بعد پھر کہتے ہیں، ’’تقریباً دن کے ۲ بجے کا وقت تھا جب ہم بنگلہ دیش کی ایک چھوٹی سی بستی میں پہنچے تھے۔ ہم نے لوگوں کو بتایا کہ ہم ہندوستانی ہیں، انہوں نے ہمیں نہانے کا مشورہ دیا، اور کھانے کے لیے چاول دیے۔ [ان کی مدد سے] میں نے اپنے گھر والوں سے آئی ایم او ایپ [ایک موبائل ایپ جو چیٹس اور بین الاقوامی کالوں کی سہولت فراہم کرتی ہے] کے ذریعے رابطہ کیا۔ میں رو رہا تھا۔ میرا گلا رندھ گیا تھا۔ میں بمشکل تمام کچھ بول پا رہا تھا‘‘

محبوب نے واپس آنے کی تمام امیدیں چھوڑ دی تھیں۔ اس دوران ان کے بھائی مجیبر سلی گوڑی اور رائے گنج سمیت کئی مقامات پر بھاگ دوڑ کرتے رہے، دروازے دروازے جا کر مدد کی تلاش کر تے رہے۔ پنچایت دفتر سے لے کر ضلع انتظامیہ تک، یہاں تک کہ ریاستی سطح کے سرکاری افسران تک سے مدد طلب کی۔ آخرکار، محبوب گھر واپس آنے میں کامیاب رہے۔ ’’ان کی واپسی کے بعد بھی سرکاری لوگ [محکماتی وابستگی نامعلوم] زمین کے دستاویزات کی تصدیق کے لیے ہمارے گھر آئے۔‘‘

یہ راحت عارضی ثابت ہوئی اور ان کی پریشانیوں کا ازالہ نہیں کر سکی۔ محبوب کی باتوں سے ہمیں مہاجرت کی مجبوریوں کا علم ہوا۔ ’’گھر میں بیکار بیٹھنے کا مطلب ہے صفر آمدنی۔ میں وہاں [دوسری ریاستوں] میں روزانہ ۸۰۰-۱۲۰۰ روپے کما سکتا ہوں۔ اضافی آمدنی کے لیے ڈبل شفٹوں میں بھی کام کر سکتا ہوں…‘‘ لیکن خوف نے ان کے اعتماد کو متزلزل کر دیا ہے۔ ’’میں پونے، ممبئی اور تھانے جیسے شہروں میں برسوں سے راج مستری کے طور پر کام کرتا آ رہا ہوں، میرے خواب و خیال میں بھی نہیں تھا کہ مجھے ایسا وقت دیکھنا پڑے گا۔‘‘

اس رپورٹر کو دیکھ کر ناظم الدین منڈل بمشکل تمام اپنے غصہ پر قابو پا سکے۔ مرشد آباد کے ہریہر پاڑہ بلاک کے اس باشندہ کی میڈیا سے اتنی ہی ناراضگی ہے جتنی کہ حکومت اور انتظامیہ سے۔ جب سے ہندوستانی ریاستی حکام کے ذریعہ ناظم الدین کو بنگلہ دیش میں چھوڑے جانے کا ویڈیو وائرل ہوا ہے، صحافی اکثر تَرتی پور گاؤں کے اس ۳۵ سالہ راج مستری سے سرحد پار دھکیلے جانے کے بارے میں سوالات کرتے رہے ہیں۔ ’’تمہیں اس سے کیا لینا دینا؟‘‘ ان کا غصہ پھوٹ پڑتا ہے۔ ’’آپ [ہم پر ڈھائے جانے والے] تشدد کے بارے میں کیوں نہیں لکھ سکتے؟ کیوں ہمیں بنگلہ دیشی کہا جا رہا ہے؟ اب وقت آگیا ہے کہ میڈیا آواز اٹھائے۔‘‘

موجودہ صورتحال پر زیادہ تر میڈیا کی خاموشی ناظم الدین کو مزید پریشان کرتی ہے۔ انہیں واضح طور پر دکھائی دے رہا ہے کہ خبروں کے نام پر کچھ میڈیا ہاؤس دراصل بنگلہ بولنے والے مسلم مزدوروں کے بارے میں شکوک و شبہات کو بڑھاوا دے رہے ہیں۔

’’دھکیلے جانے‘‘ کے تجربہ نے ناظم الدین کو ذہنی طور پر جھنجھوڑ کر رکھ دیا ہے۔ اب کسی دور دراز ریاست میں کام کے لیے جانے سے قبل اپنی بیوی اور دسویں جماعت میں پڑھنے والی بیٹی کو گھر پر چھوڑنے کا خیال ہی انہیں خوفزدہ کر دیتا ہے۔ وہ کہتے ہیں، ’’میں اس سے پہلے میرا روڈ پولیس اسٹیشن میں کام کر چکا ہوں۔‘‘ وہاں انہوں نے راج مستری اور کچھ مرمت کا کام کیا تھا۔ ’’اب اسی تھانے کی پولیس مجھے رات کی خاموشی میں کرایے کے کمرے سے اٹھا کر لے گئی اور مجھے ’بنگلہ دیشی‘ قرار دیا۔ یہ کیسا نظام ہے؟‘‘ مہاراشٹر پولیس نے ان کی پیدائش کے سرٹیفکیٹ پر سوال اٹھائے۔ ناظم الدین کہتے ہیں، ’’میں ۳۵ سال پہلے ہریہر پاڑہ میں پیدا ہوا تھا۔ میرے باپ دادا بھی وہیں پیدا ہوئے تھے۔ میرے والدین نے کبھی باضابطہ تعلیم حاصل نہیں کی۔ انہوں نے میرا برتھ سرٹیفکیٹ بھی نہیں بنوایا۔ غربت نے سب کچھ مشکل بنا دیا۔ میں خود بھی پرائمری اسکول کی تعلیم مکمل نہ کر سکا۔‘‘

ان کا سامان اب بھی میرا روڈ (مہاراشٹر) کے کمرے میں پڑا ہے۔ انہیں نہیں معلوم کہ وہ ٹھیکیدار سے اپنی واجب الادا اجرت کیسے وصول کریں گے۔ پولیس کی جانب سے ضبط کیا گیا ان کا موبائل فون ابھی تک واپس نہیں کیا گیا ہے۔ ’’کسی نئی جگہ پر کام حاصل کرنا واقعی مشکل ہے۔ کہیں بھی پانچ سال تک کام کرنے کے نتیجہ میں وہاں کچھ تعلقات بن جاتے ہیں اور آسانی ہو جاتی ہے۔ انہیں اس طرح کیسےمحروم جا سکتا ہے؟‘‘ وہ غصے سے پوچھتے ہیں۔

ناظم الدین کے دو بھائی کیرالہ اور تمل ناڈو میں مزدوری کرتے ہیں۔ یہاں کام کرنے والے عام طور پر کہتے ہیں کہ جنوبی ہند کی ریاستیں بنگالی مہاجر مزدوروں کے لیے مقابلتاً زیادہ محفوظ ہیں۔ مہاراشٹر، گجرات یا دہلی سے واپس آنے پر مجبور بہت سے مزدور اب جنوب میں اجرت کا کام تلاش کرنے کی کوشش کر رہے ہیں۔

ناظم الدین کا کہنا ہے کہ مرشد آباد کے بیل ڈانگا-1 کے قاضی ساہا سے تعلق رکھنے والے مینر الشیخ اور بردھمان ضلع کے منتیشور سے تعلق رکھنے والے مصطفی کمال شیخ بھی ان کے ساتھ مصیبت میں مبتلا تھے۔ ’’۱۳جون کو ہمیں سلی گوڑی کے راستے بنگلہ دیش ڈپورٹ کیا گیا اور ۱۵ کو بچا لیا گیا۔‘‘

’’اس کے بعد…پھر سے باہر جانا آسان نہیں ہوگا۔ لیکن ہمارے گاؤں میں رہنے کا مطلب ہے [کام دستیاب ہونے کی صورت میں] یومیہ ۵۰۰ روپے کی کمائی اور ۲۵۰ روپے کا خرچ۔ [دوسری ریاستوں میں] ہوسکتا ہے کہ روزانہ کے اخراجات ۳۰۰ روپے ہوں، لیکن مزدوری ۸۰۰ روپے یومیہ ہوتی ہے۔ ہم اپنے اہل خانہ کے لیے ۵۰۰ روپے بھیج سکتے ہیں،‘‘ ناظم الدین بتاتے ہیں۔ ’’ہمیں اپنی ذمہ داری پر [باہر] کام پر واپس جانا ہی ہوگا۔‘‘

مرشد آباد ضلع میں مستقل کام، خواہ وہ صرف قابل گزارہ اجرت پر ہی مبنی کیوں نہ ہو، کی کمی ہے۔ منریگا کے تحت ۱۰۰ دن کے روزگار کی ضمانت ابھی تک غیر یقینی کی حالت میں ہے۔ ایسے میں محنت کش طبقہ کے لوگوں کے لیے ہجرت ہی واحد راستہ نظر آتا ہے۔ مرشد آباد ہندوستان کے سب سے پس ماندہ اضلاع میں سے ایک ہے۔ یہ ضلع زیادہ تر دیہی علاقوں پر مشتمل ہے۔ اس ضلع کے تقریباً ۸۰ فیصد لوگ ۲۱۶۶ گاؤں میں رہتے ہیں۔ یہاں کی شرح خواندگی ۶۶ فیصدہے، جو ریاست کی اوسط شرح خواندگی ۷۶ فیصد (مردم شماری۲۰۱۱) سے کافی کم ہے۔ دو تہائی آبادی مسلمانوں پر مشتمل ہے۔ یقیناً یہی لوگ – جو طبقاتی، علاقائی اور مذہبی بنیادوں پر محرومی کا شکار ہیں – مزدوروں کی ہجرت کا سب سے بڑا حصہ بنتے ہیں۔

ہبس پور پنچایت کے تحت آنے والی ایک بستی دیارجلی باغیچہ کی صورتحال اس حقیقت کو بیان کرتی ہے۔ یہاں۶۰ فیصد سے زیادہ گھرانوں میں، کم از کم ایک رکن مہاجر مزدور ہے۔ یہاں سے تعلق رکھنے والے لطف الحق، عین الحق اور رزاق حسین شیخ، جو کبھی قلی کے طور پر کام کرتے تھے، اپنی ملازمتیں چھوڑ کر اڑیسہ چلے گئے تاکہ سڑک پر پھیری لگا کر بہتر اجرت حاصل کر سکیں۔ انہوں نے ہمیں فون پر بتایا کہ مہاجن (ساہوکار) انہیں مختلف گھریلو اور اسٹیشنری کی چیزیں ادھار دیتے ہیں۔ وہ ان اشیاء کو اپنی سائیکلوں یا موٹر سائیکلوں پر لوڈ کرکے مختلف گاؤوں میں گھوم گھوم کر فروخت کرتے ہیں۔ مہاجن کے حصہ کی کٹوتی کے بعد انہیں روازانہ اوسطاً ۷۰۰-۸۰۰روپے کی آمدنی ہو جاتی ہے۔ وہ چھوٹے سے کرایے کے کمروں میں گروہوں میں ایک ساتھ رہتے ہیں۔

ان تارکین وطن کے اہل خانہ نے دیارجلی باغیچہ میں ہمیں بتایا کہ ستمبر ۲۰۲۴ سے مرشد آباد سے تعلق رکھنے والے سفری بنگالی مسلمان سیلرز (فروخت کنندگان) پر حملے کیے گئے ہیں اور اڑیسہ میں حراست میں لیا گیا ہے۔ وہ بھی بنگلہ دیش اور مرشد آباد کے شمشیر گنج میں ہندوؤں کے خلاف تشدد کے بہانے۔ لیکن جس حقیقت سے تارکین وطن خوفزدہ ہیں وہ اس طرح کے واقعات میں اڑیسہ پولیس کی بڑھتی ہوئی شمولیت ہے۔

جب وہاں کی پولیس نے لطف الحق کے کاغذات کی صداقت پر سوال اٹھائے تو دیارجلی باغیچہ میں ان کے اہل خانہ نے بھگوان گولا پولیس اسٹیشن سے مدد طلب کی۔ لطیبل اور دیگر کو تھانوں کے درمیان دستاویزات کے تبادلے کے بعد ہی رہا کیا گیا تھا، لیکن وہ ابھی تک اڑیسہ میں پھنسے ہوئے ہیں۔ لطیبل جو جھارسوگوڈا کے ایک کیمپ میں چار دنوں سے قید تھے، ہمیں فون پر بتایا، ’’پولیس نے کہا کہ وہ اب بھی ہندوستانی شہریت سے متعلق ہماری دستاویزات کی تصدیق کر رہے ہیں اور ہمیں ایک ماہ تک اپنی آبائی ریاست واپس نہ جانے کی ہدایت دی گئی ہے۔‘‘

مہاراشٹر، اڑیسہ، اتر پردیش اور دہلی جیسی دور دراز ریاستوں میں مزدوری کرنے والے محنت کشوں کے اہلِ خانہ اب شدید پریشانی کا شکار ہیں۔ دیارجلی باغیچہ میں ہماری ملاقات عین الحق کی کمزور مگر تیز نظروں والی ۶۰ سالہ ماں مدینہ بی بی سے ہوئی۔ جب وہ ہم سے بات کرتی ہیں تو ان کے ماہر ہاتھ نہایت نفاست سے خوبصورت ڈیزائن والے کانتھا (روایتی کڑھائی والے لحاف) بُننے میں مصروف رہتے ہیں۔ لوگ ان سے کانتھا بنواتے اور سلواتے ہیں، اور اجرت کے طور پر فی کانتھا صرف ۲۰ سے ۳۰ روپے ادا کرتے ہیں۔ یہ رقم خواہ کتنی ہی معمولی کیوں نہ ہو، یہ ان کے گھر کا گزارہ ممکن بناتی ہے۔ ان کا بیٹا اور نواسے سب اڑیسہ میں مزدوری کر رہے ہیں۔ جب وہ ان کے مصائب اور ہراسانی کا ذکر کرتی ہے تو اپنے آنسو روک نہیں پاتیں۔

’’جب انہوں نے کہا کہ میرا بیٹا اور پوتا سب کے سب بنگلہ دیشی ہیں، تو میں کیسے بے چین نہیں ہوتی؟‘‘ مدینہ بی بی پوچھتی ہیں۔ ’’میرا دوسرا بیٹا عین الحق اور میرے بڑے بیٹے کے دو بیٹے – عامر اور رزاق حسین – اڑیسہ میں رہتے ہیں۔ پولیس نے انہیں چار دنوں تک حراست میں رکھا۔ ان دنوں میں تو مجھے نیند ہی نہیں آئی۔‘‘

عین الحق کی اہلیہ شیولی بی بی کی جو فون کال موصول ہوئی اس نے پورے خاندان کو خوفزدہ کر دیا۔ آدھار کارڈ اور ثانوی بورڈ کے امتحان کے ’ایڈمٹ کارڈ‘ جیسی دستاویزات کو تلاش کر کے جمع کرنا تھا۔ عین الحق کے والد معین الشیخ، جن کی عمر چھ کی دہائی کے اواخر میں ہے، یہ تمام کاغذات پولیس اسٹیشن لے گئے۔ ’’وہاں، انہوں نے مجھے دیر ہونے پر تھپڑ بھی مارا۔ لیکن میں کیا کر سکتا تھا؟ میں اپنے بیٹے کی حالت کے بارے میں سوچ کر بالکل بے حس اور بدحواس ہو گیا تھا…‘‘ بزرگ شخص یاد کرتے ہوئے کہتے ہیں۔

پریشان حال مدینہ بی بی بتاتی ہیں، ’’ثانوی امتحان کے بعد، میرے بیٹے [عینل] نے کہا، ’مجھے اپنا پیٹ بھرنے کے لیے کام کرنا ہی ہوگا۔‘ وہ اینٹوں کے ایک بھٹہ پر چھوٹا موٹا کام کرتا تھا اور مہینہ کے ۸۰۰ روپے کماتا تھا۔ بعد میں ایک گودام میں بوجھ اٹھانے کا کام کیا۔ وہاں بھی زیادہ سے زیادہ مہینہ کے صرف ۱۰ ہزار روپے ملتے تھے۔ ہم قرض کے بوجھ کے تلے دبے ہوئے تھے۔ اسی وجہ سے وہ باہر گیا… اب دو سال ہو چکے ہیں۔ ہم تو محض زندہ رہنے کی کوشش کر رہے ہیں،‘‘ وہ کہتی ہیں۔ ’’[میرے] سسر، یہاں تک کہ ان کے والد، سبھی کا تعلق ہندوستان سے ہے… پھر بھی، خوف میرا پیچھا نہیں چھوڑ رہی ہے۔‘‘

سات جولائی کوبھگوان گولا کے چرل بنگولا گاؤں سے تعلق رکھنے والے امیر الشیخ (جن کی عمر ۳۰-۳۵ کے آس پاس ہے) کو بھی مغربی بنگال کے ۳۰ دیگر تارکین وطن مزدوروں کے ساتھ اڑیسہ کے جھارسوگوڈا کے لکھن پور تھانے میں حراست میں لیا گیا تھا۔ خبر ملتے ہی اہل خانہ نے بھگوان گولا پولیس اسٹیشن اور مقامی دکشن ہنومنت نگر گرام پنچایت دفتر کے درمیان بھاگ دوڑ شروع کر دی۔ آخرکار حراست میں لیے گئے مزدوروں کو چار دن بعد اڑیسہ کے لکھن پور پولیس اسٹیشن سے رہا کر دیا گیا۔ ’’میں نے اڑیسہ میں بطور ہاکر ۱۰ سال تک کام کیا ہے۔ لیکن اب سب کچھ بدل گیا ہے۔ لوگوں کو پہلے بھی مارا پیٹا جاتا تھا، لیکن اس بار ہم پر سیدھے سیدھے بنگلہ دیشی ہونے کا لیبل چسپاں کیا جا رہا ہے،‘‘ گھبرائے ہوئے امیرل فون پر کہتے ہیں۔ پھر بھی، چرل بنگولا میں مقیم اپنے اہل خانہ کی کفالت کے لیے انہیں اڑیسہ میں رہنے کے سوا کوئی چارہ نہیں ہے۔

’’صرف اس سال میں، مرشد آباد سے تعلق رکھنے والے ۵۰۰۰ سے زیادہ تارکین وطن مزدوروں کو اڑیسہ میں پولیس نے ہراساں کیا ہے،‘‘ آصف فاروق کہتے ہیں۔ وہ مغربی بنگال کے تارکین وطن مزدوروں کے حقوق کے لیے لڑنے والی تنظیم – پریجئی شرمک ایکیہ منچو (پی ایس اے ایم) کے سکریٹری ہیں۔ ’’اڑیسہ کے مختلف علاقوں بشمول جھارسوگوڈا اور پارادیپ میں، مرشد آباد سے تعلق رکھنے والے کئی مزدوروں کو چار سے پانچ دنوں سے پولیس کیمپوں میں حراست میں رکھا گیا ہے اور ان کی شہریت ثابت کرنے کے لیے پوچھ گچھ کی جا رہی ہے۔‘‘

مرکزی اور ریاستی حکومتوں کے درمیان سیاسی کشمکش، جو دونوں جانب کے لیڈروں کی تقریروں سے نمایاں ہے، کسی طرح سے مددگار ثابت نہیں ہو رہی ہے۔ مرکزی وزارت محنت کی طرف سے مہینوں پہلے ایک پریس ریلیز میں ہندوستان میں تارکین وطن مزدوروں کی فلاح و بہبود کے لیے مرکزی حکومت کی جانب سے شروع کیے گئے منصوبوں اور اسکیموں کی تعریف کی گئی تھی۔ لیکن ان کے خلاف تشدد پر نہ تو کوئی سرکاری بیان جاری ہوا اور نہ ہی اس کی مذمت کی گئی۔

بارڈر سیکورٹی فورس نے متعدد ہندوستانی ریاستوں میں مبینہ طور پر غیر مجاز بنگلہ دیشی دراندازوں کے خلاف جاری کریک ڈاؤن کے دوران غیر قانونی طرز عمل کے الزامات پر کوئی سرکاری بیان جاری نہیں کیا ہے۔ بھگوان گولا گاؤں کے لوگوں کا کہنا ہے ’’نچلے درجے کے [بی ایس ایف] جوان کہتے ہیں کہ ’ہم صرف اوپر والوں (اعلیٰ حکام) کی ہدایت کے مطابق کام کر رہے ہیں‘۔‘‘

ریاستی حکومت نے شہریوں کے حقوق کا دفاع کرنے اور لوگوں کو سرحد پار دھکیلنے کے معاملہ سے نمٹنے کا وعدہ کیا ہے۔ پی ایس اے ایم کے آصف فاروق کا خیال ہے کہ ’’مغربی بنگال حکومت متاثرین کو تحفظ فراہم کرنے اور انہیں واپس لانے کی کوشش کر رہی ہے۔‘‘ اور ’’اپریل سے، ہم نے مزدوروں کے لیے ایک ہیلپ لائن شروع کی ہے۔‘‘

تنظیم نے کلکتہ ہائی کورٹ میں ایک مفاد عامہ کی عرضی بھی دائر کی ہے جس میں بنگالی مہاجر مزدوروں کو ہراساں کرنے کے خلاف فوری کارروائی کی درخواست کی گئی ہے۔ اور مغربی بنگال مائیگرنٹ ورکرز یونین (ڈبلیو پی ایم ڈبلیو یو) نے مرشد آباد ضلع ہیڈکوارٹر بہرام پور میں ایک جلوس نکالا، جس میں دیگر ریاستوں میں مزدوروں کے لیے سیکورٹی کا مطالبہ کیا گیا۔ ڈبلیو پی ایم ڈبلیو یو کے ضلعی سکریٹری کمال حسین کا کہنا ہے کہ ’’متعلقہ اضلاع کے اراکین پارلیمنٹ کو ان ریاستوں کا دورہ کرنا چاہیے اور جہاں تارکین وطن مزدوروں پر حملے ہو رہے ہیں وہاں مداخلت کرنی چاہیے۔‘‘

دریں اثنا، مرکز اور ریاست کہ رسہ کشی نے اس سوال کو پس پشت ڈال دیا ہے کہ کیا مرشد آباد میں معقول روزگار ہوتا، اور زراعت کے شعبے میں سنجیدہ مداخلت ہوتی تو لوگوں کو یہاں سے ہجرت کرنی پڑتی؟

ادھر بالیا حسن نگر میں، خوفزدہ محبوب شیخ، حیران ہیں کہ اب وہ اپنے کنبے کی کفالت کیسے کریں گے۔ ’’[تعمیراتی] کمپنی مجھے [ممبئی سے] دوبارہ کام شروع کرنے کے لیے بلا رہی ہے، لیکن وہ کوئی ذمہ داری لینے کو تیار نہیں ہیں…‘‘

مایوسی نے اس ماہر راج مستری کو اپنی گرفت میں لے لیا ہے۔ ’’اب مجھے کام کہاں ملے گا؟ میرے پاس اس کا کوئی جواب نہیں ہے…‘‘

خاکہ نگاری: لابانی جنگی

یہ اسٹوری سب سے پہلے بنگالی زبان میں رپورٹ کی گئی تھی۔

ترجمہ نگار: شفیق عالم