حیدر آباد کے چوڑی کاریگر

پرانے شہر میں کسی سے بھی دریافت کریں کہ حیدر آبادی لاکھ کی چوڑیاں کہاں بنتی ہیں، تو وہ آپ کو شہر کے لاڈ بازار (لاکھ بازار) میں ’عثمان کا کاریگری‘ کی جانب بھیج دے گا۔ دستکاری کی اس مشہور دکان کے آگے کوئی سائن بورڈ نہیں ہے۔ ہلکے زنگ آلود دھاتی شٹر کے کھلنے کے بعد تین دیواروں والا ایک کمرہ نمودار ہوتا ہے، جس میں لاکھ کے کاریگر شیخ عقیل اور شیخ حجیل بیٹھے ہیں، ان کے درمیان دھات کی ایک چھوٹی سی میز حائل ہے۔

دونوں بھائی ایک دہائی سے زیادہ عرصے سے چوڑیاں بنانے کا کام کر رہے ہیں، اور انفرادی طور پر روزانہ تقریباً۵۰۰ تک چوڑیاں بنا سکتے ہیں۔ تکمیل کے مختلف مراحل سے گزرتی ہوئی لاکھ کی چوڑیاں چاروں طرف بکھری پڑی ہیں۔ ’’گلابی رنگ سب سے مقبول ہے،‘‘ شوخ گلابی رنگ میں رنگے لاکھ کا ایک بلاک اٹھاتے ہوئے عقیل کہتے ہیں۔ گلابی کے علاوہ، سیاہ، سنہری اور فیروزی بھی ان رنگین چوڑیوں کے لیے پسندیدہ رنگ ہیں، جن پر آئینے کی طرح چمکدار موتیاں جڑی جاتی ہیں، اور جو شفاف سیلوفین کے ڈبوں میں رکھی جاتی ہیں۔

چارمینار کے قریب لاڈ بازار کی تنگ گلیوں میں واقع اس دکان اور ورکشاپ سے پرانی لکڑی اور پیتل کی خوشبو آ رہی ہے۔ جب عقیل اور حجیل کام کرنے لگتے ہیں تو قریبی مسجد سے اذان اور باہر کھیل رہے بچوں کی آوازیں دور سے آتی ہوئی محسوس ہوتی ہیں۔ اپنی عمر کی تیس کی دہائی کے وسط میں موجود ان بھائیوں نے صرف یہی کام کیا ہے۔ وہ خاموشی سے کام کرنے کو ترجیح دیتے ہیں، اور اپنے ہنر کو انہماک کے ساتھ جاری رکھے ہوئے ہیں۔

وہ پاری کو بتاتے ہیں کہ ان کی دکان کا نام ان کے ایک رشتہ دار ’عثمان‘ کے نام پر ہے۔ ’’وہ اس دکان کے مالک ہیں، لیکن یہاں کام نہیں کرتے۔ صرف میرے بھائی اور میں یہ کام کرتے ہیں،‘‘ عقیل بتاتے ہیں اور ساتھ ہی یہ بھی کہتے ہیں کہ وہ اس دکان کا کوئی کرایہ نہیں ادا کرتے۔

حیدرآباد کے پرانے شہر کے علاقے میں پیدا ہوئے اور یہیں پرورش پانے والے ان دونوں بھائیوں نے چوڑیاں بنانے کا فن اپنے والد سے سیکھا تھا۔ ان کے والد کو آندھرا پردیش کے وجیہ نگرم ضلع میں ایک کاریگر نے تربیت دی تھی۔ اگرچہ تمام بہن بھائیوں (پانچ بیٹوں اور دو بیٹیوں) نے یہ ہنر سیکھا، لیکن صحت کے مسائل کی وجہ سے ۲۰۱۷ میں والد کی موت کے بعد صرف عقیل اور حجیل نے اس خاندانی روایت کو جاری رکھا ہے۔

ان میں سے کسی نے بھی کوئی باضابطہ تعلیم حاصل نہیں کی ہے۔ ’’پڑھائی کا کیافائدہ؟ نوکریاں کہاں ہیں یہاں؟‘‘ حجیل بیانیہ انداز میں سوال کرتے ہیں۔

دکان کی دیوار پر آویزاں غیر دستخط شدہ پینٹنگ میں دکھایا گیا ہے کہ سات افراد ایک ہی مقام پر چوڑیاں بنا رہے ہیں۔ ’’یہ [پینٹنگ] تقریباً چھ سال قبل بنائی گئی تھی، جب ہمارے پاس ملازمین تھے۔ وہ اچھے دن تھے…لاکھ کی چوڑیوں کی زیادہ مانگ تھی،‘‘ عقیل کہتے ہیں۔ وہ اپنے پشت والے حصہ کی طرف اشارہ کرتے ہیں جہاں دیگر کاریگر بیٹھے تھے۔ اب وہ جگہ خالی ڈبوں سے بھری پڑی ہے، جن میں چوڑیاں بھری جانی ہیں۔

’’راجستھان جیسے دوسرے خطوں سے مشین سے بنی لاکھ کی چوڑیوں کی سپلائی نے مانگ کم کر دی ہے،‘‘ عقیل بتاتے ہیں۔

لاکھ ایک درخت کا گوند ہوتا ہے۔ اسے بعض کیڑوں کی کاشت کے ذریعہ بھی حاصل کیا جاتا ہے۔ یہ تین رنگوں – سیاہ، بھورے اور ہلکے سنہرے رنگ میں آتا ہے۔ دونوں بھائی پرانے شہر کے قریب مقامی بازاروں سے گہرے سیاہ اور زرد سنہری قسم کے لاکھ خریدتے ہیں۔ ایک کلو لاکھ کی قیمت ۲۲۰ روپے ہوتی ہے اور ایک کلو لاکھ سے اوسط سائز کی تقریباً ۲۵ درجن چوڑیاں بن سکتی ہیں۔ ان دونوں رنگوں کو مساوی تناسب میں ملا کر سخت لاکھ تیار کیا جاتا ہے۔

حیدرآباد کی سخت گرمی، جب درجہ حرارت ۴۰ ڈگری سینٹی گریڈ سے تجاوز کر جاتا ہے، ان لاکھ کی چوڑیاں بنانے والوں کو پریشان نہیں کرتی۔ انہیں چوڑیاں بنانے کے لیے گرم کوئلوں پر کام کرنا پڑتا ہے۔ حجیل اپنی کوئلہ بھٹی (گرم کوئلوں کے لیے اتھلے مرکز والا ایک دھاتی میز) تیار کرتے ہیں۔

اس کام کا سب سے اہم جزو لاکھ کے گہرے بھورے رنگ کے ایک لمبے ٹکڑے کو ملائم کرنے کے لیے حجیل اسے گرم کوئلے پر رکتھے ہیں۔ جیسے ہی یہ ٹکڑا پگھلتا ہے، وہ رنگین بلاک کا انتخاب کرتے ہیں اور بڑے احتیاط سے اسے ملائم ہو چکے لاکھ پر ڈال دیتے ہیں۔ اب رنگین لاکھ کو ایک لمبے پتلے بیلن ادارشکل میں پھیلا دیا جاتا ہے۔

یہ اشارہ ہے کہ اب گرم لاکھ کو جلدی سے کاٹ کر چھڑی سے الگ کر لیا جائے۔ اب عقیل کی باری آتی ہے۔ وہ لاکھ کو مروڑتے ہیں اور اسے پیتل کے کڑوں کے گرد لپیٹ دیتے ہیں، جنہیں دو وزنی دھات کی پلیٹوں کے درمیان گرم کر کے دبایا جاتا ہے۔ کاریگروں کا کہنا ہے کہ اس عمل سے پیتل کی چوڑیوں میں موجود کسی بھی قسم کے گھماؤ یا ٹیڑھے پن کو دور کرنے میں مدد ملتی ہے۔ پیتل ممبئی سے منگایا جاتا ہے، جو چوڑیوں کو ایک مضبوط ڈھانچہ فراہم کرتا ہے۔

’’پیتل کا فریم لاکھ کو مضبوطی فراہم کرتاہے۔ اس کے بغیرلاکھ آسانی سے ٹوٹ جائے گا،‘‘ عقیل گرم لاکھ کی تار کو ہاتھ چلاتے ہوئے مزید کہتے ہیں۔ کڑے کے ساتھ لاکھ جوڑنے کے بعد، وہ چوڑی کے سائز کو تبدیل کرنے کے لیے ایک ’رولر‘ کا استعمال کرتے ہیں۔

اسکول کے بلیک بورڈ ڈسٹر کی شکل کے لکڑی کے ایک ہتھے کا استعمال لاکھ میں موجود ہوا کے بلبلوں اور پیچ کو ہٹانے کے لیے کیا جاتا ہے۔ اس کے بعد چوڑی کو ٹھنڈا ہونے کے لیے ایک طرف رکھ دیا جاتا ہے، اور اب کاریگر اگلی چوڑی پر کام شروع کر دیتا ہے۔

اس کے بعد چوڑیوں کو پرانے شہر کی خواتین کاریگروں کے پاس بھیج دیا جاتا ہے، جو ان پر موتی اور شیشے جڑتی ہیں۔ ’’ہماری دو بہنیں بھی یہ کام کرتی ہیں، ہم نگ اور گوند جیسے خام مواد فراہم کرتے ہیں، اور خواتین انہیں چوڑیوں پر سجاتی ہیں،‘‘ حجیل کہتے ہیں۔ خواتین کاریگروں کو ایک درجن چوڑیوں کے لیے ۸۰ سے ۱۵۰ روپے ادا کیے جاتے ہیں۔

اپنے فروخت شدہ ہر ایک درجن چوڑیوں پر یہ دونوں بھائی تقریباً ۱۰۰ روپے کا منافع کماتے ہیں۔ اس لحاظ سے جب مانگ کم رہتی ہے تو ان کی کمائی۴۰۰۰ روپے ماہانہ اور شادی کے موسم میں قدرے زیادہ ہوتی ہے۔

لاڈ بازار، جسے حیدر آباد میں چوڑی بازار کے نام سے بھی جانا جاتا ہے، سے تعلق رکھنے والے کئی دکاندار انہیں چوڑیوں کے آرڈر دیتے ہیں۔ ’’تقریباً چھ سات سال پہلے، ہمیں کسی عام مہینہ میں تقریباً ۱۰۰ درجن چوڑیوں کے آرڈر مل جاتے تھے،‘‘ عقیل کہتے ہیں۔ ’’شادی کے دنوں میں یہ تعداد بہت زیادہ پہنچ جاتی تھی، تقریباً ۳۰۰ درجن ماہانہ،‘‘ حجیل مزید کہتے ہیں۔

دونوں بھائیوں کو کبھی مہینہ میں ۳۰۰ درجن چوڑیوں کے آرڈر ملتے تھے، اب محض ۴۰ درجن کے ملتے ہیں۔ ’’شادی کے موسم میں یہ تعداد ایک ماہ میں ۱۰۰ درجن تک پہنچ جاتی ہے،‘‘ حجیل بتاتے ہیں۔

حیدرآبادی لاکھ چوڑیوں کو مارچ ۲۰۲۴ میں جغرافیائی نشان (جی آئی) کا ٹیگ ملا، جس کے بعد لاڈ بازار میں اس کی قیمت میں معمولی اضافہ ہوا۔ تاہم، اس سے بھائیوں کی کمائی میں کوئی بہتری نہیں آئی۔ عقیل کہتے ہیں، ’’صرف جی آئی ٹیگ کی وجہ سے میڈیا کے لوگوں کا یہاں آنا جانا بڑھا ہے۔‘‘

’’ہم نے ہمیشہ اپنی ذاتی دکان کھولنے پر غور کیا، لیکن حیدرآباد میں کہیں بھی کوئی جگہ کرائے پر لینے کے لیے ہمارے پاس پیسے نہیں ہیں،‘‘ عقیل کہتے ہیں۔

ان کے ہنر کی مانگ میں کمی کے باوجود، ان بھائیوں کا کہنا ہے کہ وہ اس کام کو کبھی نہیں چھوڑنا چاہتے۔ ’’ہم صرف یہی کام جانتے ہیں،‘‘ حجیل فخریہ لہجے میں کہتے ہیں۔

اس کہانی کو رنگ دے کی ایک گرانٹ کا تعاون حاصل ہے۔

ترجمہ نگار: شفیق عالم