हैदराबाद: लाड बजार के अंतिम लहठी कारीगर

रउआ आपन पुरान सहर में जाएम आ केहू से पूछम कि लाख से बनल हैदराबादी लहठी सब कहंवा बनावल जाला, त शहर के लाड बजार (लाख बजार) में ‘उस्मान का कारीगरी’ के पता बता देवल जाई. एह नामी दोकान में कवनो बोर्ड नइखे लागल. तनी-मनी जंग लागल शटर जब खुलेला, त तीन ठो देवाल से घेराइल एगो कोठी लउकेला. ओह में लाख कारीगर शेख अखिल आ शेख हजील लोग बइठल मिली. ओह लोग के बीच में लोहा के एगो छोट टेबुल रखल बा.

दुनो भाई लोग दसियों बरिस से जादे समय से लहठी बना रहल बा. दुनो लोग अकेले-अकेले एक दिन में 500 लहठी बना लेवेला. ओह लोग के चारों ओरी लाख के अधूरा बनल लहठी सब छितराइल बा. “गुलाबी सबले पसंदीदा रंग बा,” अखिल बतावेलन. एगो गहिर गुलाबी रंग में रंगल लाख के टुकड़ा उठाके देखावेलन. एकरा अलावे गुलाबी, करियर, गोल्डन आ फिरोजी रंग के लहठी भी बहुते पसंद कइल जाला. एह पर सीसा के चमके वाला टुकड़ा सब जड़ के एगो आर-पार लउके वाला बक्सा में धइल जाला.

चारमीनार लगे लाड बजार के सांकर-सांकर गली में लागल एह दोकान से पुरान लकड़ी आ पीतल के गंध आवत रहेला. अखिल आ हजील लोग काम सुरु कर देले बा. काम सुरु होखते लगे के मस्जिद से आवत अजान के आवाज आ बाहिर खेल रहल लइकन सब के हो-हल्ला दब जाला. मोटा-मोटी 35 के हो चुकल दुनो भाई लोग आज ले बस इहे एगो काम कइले बा. ऊ लोग आपन कलाकारी में डूबल चुपचाप काम कइल पसंद करेला.

ऊ लोग पारी के बतइलक कि दोकान के नाम ‘उस्मान’ के नाम पर धइल गइल बा. उस्मान ओह लोग के एगो रिस्ता में लागेलन. “दोकान के मालिक उहे बानी. बाकिर ऊ इहंवा काम ना करस. इहंवा खाली हम आउर हमार भाई काम करेला,” अखिल बतइलन. ऊ बतइलन कि उनका किराया ना भरे पड़ेला.

दुनो भाई लोग हैदराबाद के पुरान इलाका में जन्मल आ पलाइल-पोसाइल बा. ऊ लोग लहठी बनावे के हुनर आपन बाऊजी से सिखलस. बाऊजी के ई लुर आंध्र प्रदेस के विजयनगरम जिला के एगो कारीगर से मिलल रहे. अइसे त, सभे भाई-बहिन- पांच ठो लइका आ दू ठो लइकी लोग ई लुर सिखले रहे. बाकिर तबियत खराब रहे चलते 2017 में बाऊजी के गुजरला के बाद खाली अकील आ हजीले आपन परिवार के परंपरा जारी रखलन.

दुनो लोग में से केहू स्कूल नइके गइल. “पढ़े से का फायदा? नौकरी कहंवा बा इहंवा?” अजील सवाल करेलन.

देवाल पर एगो बेनाम पेंटिंग टांगल बा. एह में सात ठो लोग एके जगहा लहठी बनावत लउक रहल बा. “ई पेंटिंग कोई छव बरिस पहिले बनावल गइल रहे, जब हमनी लगे कारीगर लोग होखत रहे. केतना नीमन दिन रहे... लाख के चूड़ी के बहुते मांग रहत रहे,” अखिल कहेलन. ऊ ओह ओरी इसारा करत बाड़न, जहंवा मजूर लोग बइठत रहे. उहंवा अब खाली बक्सा सब पड़ल बा, जे भराए के इंतिजारी ताकत बा.

“राजस्थान जइसन इलाका सब में मसीन से बनल लहठी आवे चलते एकर मांग गिर गइल बा,” अखिल बतावेलन.

लाख- गाछ के राल आ कुछ खास कीड़ा से भी मिलेला. ई तीन रंग में आवेला- करियर, भुअर आ तनी गोल्डन. अखिल आ हजील लोग पुरान सहर लगे के बजार से गहिर करियर आ हल्का सुनहरा रंग के लाख कीन के लावेला. एक किलो लाख के दाम 220 रुपइया होखेला. कारीगर लोग एतना में औसत आकार के कोई 25 दरजन लहठी तइयार कर सकेला. दुनो रंग के लाख के बराबर हिस्सा में मिलावे से ई ठोस रूप ले लेवेला.

हैदराबाद के जरत गरमी में तापमान 40 डिग्री से ऊपर चल जाला. बाकिर लहठी बनावे वाला एह कारीगर लोग के कवनो फरक ना पड़े. ऊ लोग के लहठी बनावे खातिर गरम कोयला संगे काम करे पड़ेला. हजील कोयला भट्ठी (लोहा के टेबुल के बीच में कोयला रखे खातिर बनल एगो खाली जगह) तइयार करेलन.

लहठी बनावे में सबले बड़ भूमिका निभावे वाला हजील लाख के गहिर भुअर रंग के छड़ी उठा के एकरा नरम करे खातिर गरम कोयला में डाल देवेलन. जब ई पिघले लागेला, त ऊ चुनल रंग के टुकड़ा सब उठा के बहुते सरिया-सरिया (संभाल) के मुलायम लाख लगावेलन. रंगाइल लाख के अब एगो लमहर आ पातर बेलना के आकार के लच्छा जेका खींचल जाला.

एकरा बाद, गरम लाख के बड़ा चटकवाही (फुरती) से काटके छड़ी से अलग कइल जाला. फेरु अखिल के बारी आवेला. ऊ लच्छा के किनारे ओरी अइंठेलन आउर एकरा पीतल के कुछ लहठी के चारों ओरी लपेट देवेलन. एकरा गरम करके धातु के दु ठो भारी भारी प्लेट के बीच में दबाके आकार देवल जाला. कारीगल लोग के हिसाब से, अइसन करे से पीतल के चूड़ी में कवनो दाग चाहे टेढ़ापन ना रह जाला. पीतल मुंबई से लावल जाला, जेकरा से लहठी के ठोस आकार मिलेला.

“पीतल के चूड़ी से लहठी के आधार मिलेला, ना त ई आसानी से टूट जाई,” अखिल लाख के गरम लच्छा पर हाथ चलावत कहलन. चूड़ी पर लाख लगइला के बाद, ओकरा आकार देवे खातिर ‘रूलर’ के काम में लावल जाला.

लकड़ी के हट्ठा (स्कूल के ब्लैकबोर्ड के डस्टर जइसन) के मदद से हवा के बुलबुला निकालल जाला आ ओकरा बराबर कइल जाला. लहठी के ठंडाए खातिर अलगे रख देवल जाला. आ कारीगल लोग अगिला लहठी बनावे में जुट जाला.

अब एह लहठी के पुरान सहर के महिला कारीगल लोग लगे भेजल जाई. ऊ लोग लहठी पर सीसा के दाना वगैरह सजाई. एकरे लाख के चूड़ी कहल जाला. “हमार दू गो बहिन लोग इहंवा काम करेला. हमनी पत्थर आउर गोंद जइसन कच्चा माल दे दिहिला, आउर औरत लोग लहठी के सजा देवेला,” हजील बतइलन. मेहरारू कारीगर के एक दरजन लहठी सजावे खातिर 80 से 150 रुपइया मिलेला.

हर एक दरजन लहठी के बिक्री पर भाई लोग के मोटा-मोटी 100 रुपइया के फायदा होखेला. ऊ लोग महीना में कोई 4,000 रुपइया कमा लेवेला, जब लहठी के मांग ओतना ना रहे. लगन के सीजन में ई कमाई तनी आउर बढ़ जाला.

लाड बजार के तमाम दोकानदार लोग उनका ऑर्डर देवेला. एकरा हैदराबाद के चूड़ी बजार के नाम से जानल जाला. हजील बतावेलन, “कोई छह-सात बरिस पहिले ले, हमनी के महीना में 100 दरजन लहठी के ऑर्डर मिल जात रहे. आउर ई कवनो सादी-बियाह के सीजन के बात ना रहे,” अखिल बतावेलन. “सादी-बियाह के सीजन में त बहुते ऑर्डर आवत रहे. महीना के लगभग 300 दरजन लहठी के.”

दुनो भाई लोग के अब महीना में मुस्किल से 40 दरजन लहठी के ऑर्डर मिलेला. “सादी के सीजन में ई गिनती 100 दरजन ले चल जाला,” हजील बतावेलन.

हैदराबाद के लहठी के मार्च 2024 में जीआई टैग मिलल रहे. तब्बे से लाड बजार में एकर दाम में इजाफा हो गइल बा. अइसे त, दुनो भाई लोग के कमाई तनिको नइखे बढ़ल. “जीआई टैग से बस एतना भइल कि अब मीडिया के लोग जादे आवे लागल बा. कबो-कबो त छात्र लोग के टोली बातचीत करे आ जाला. ऊ लोग हमनी के बस समय जियान करेला,” अखिल कहेलन.

“हमनी आपन दोकान खोले के सोचत बानी. हैदराबाद में कहूं कवनो जगह किराया पर लेवे खातिर हमनी लगे पइसा नइखे,” ऊ कहलन.

लहठी के मांग गिरे के बादो, भाई लोग के ई काम कबो छोड़े के नइखे सोचले. “हमनी के त बस इहे काम आवेला,” हजील कहेलन.

स्टोरी रंग दे ओरी से मिलल अनुदान के मदद से लिखल गइल बा.

अनुवाद: स्वर्ण कांता