گنّا مزدوروں کی تکلیف دہ زندگی

جب سیتا سسانے نے اپنے خاوند پر نگاہ ڈالی تو ان کا دوپہر کا کھانے کا وقفہ ایک خوفناک خواب میں بدل گیا۔

انہوں نے دیکھا کہ ان کے شوہر کیشو کا منہ ایک طرف کو ٹیڑھا ہو گیا تھا۔ وہ تیزی سے ان کی طرف لپکیں۔ کیشو کے کپڑے پیشاب سے گیلے ہو چکے تھے۔

’’میں نے ان کا نام لے کر پکارا، لیکن انہوں نے کوئی جواب نہیں دیا،‘‘ برسوں بعد سیتا یاد کرتے ہوئے کہتی ہیں۔ ہم مہاراشٹر کے بیڈ ضلع کے اہرواہے گاؤں میں واقع ان کی ایک کمرے کی جھونپڑی میں بیٹھے ہیں۔

اس دن اس جوڑے نے اپنی صبح کولہاپور کی ایک شوگر فیکٹری کے لیے گنا کاٹنے اور اسے ٹریکٹروں پر لادنے میں گزاری تھی۔ ان کے دو بیٹے بھی مغربی مہاراشٹر کے انہی کھیتوں میں ان کے ساتھ کام کر رہے تھے۔

پو پھٹنے کے وقت سے شروع ہونے والی کمر توڑ مشقت دوپہر کے آدھے گھنٹہ کے کھانے کے وقفہ کے سوا غروب آفتاب تک جاری رہتی تھی۔ پینتالیس سالہ سیتا کھیت میں ایک چادر بچھا دیتی تھیں اور اپنی عارضی جھونپڑی میں صبح جلدی جلدی تیار کیا ہوا کھانا اس پر نکال کر رکھ دیتی تھیں۔ چار پلیٹیں لگاتیں اور پہلی پلیٹ اپنے ۵۵ سالہ شوہر کیشو کو دیتیں، جو بظاہر اپنی ہی دنیا میں گم رہتے تھے۔ اور پھر اچانک ان کا چہرہ ٹیڑھا ہوگیا تھا۔

’’میں گھبرا گئی اور انہیں قریب ترین ڈسپنسری میں لے گئی،‘‘ سیتا اکتوبر ۲۰۲۳ کی اس خوفناک دوپہر کو یاد کرتے ہوئے کہتی ہیں۔ فالج کے حملے کی تشخیص میں ڈاکٹر نے تاخیر نہیں کی۔ کیشو کو فوری طور پر ہسپتال میں داخل کرانا تھا۔

تاہم، وہ اتنی آسانی سے وہاں سے نکل نہیں سکتے تھے۔ دیگر تمام غریب مہاجر مزدوروں کی طرح، اس کنبے نے بھی ڈیڑھ لاکھ روپے کی پیشگی رقم لے رکھی تھی، جسے چھ ماہ کی کٹائی کے سیزن کے دوران کاٹے گئے گنے کے وزن کے حساب سے منہا کرنا تھا۔

’’جس ٹھیکیدار نے ہمیں کام پر رکھا تھا، وہ ہمیں جانے نہیں دے رہا تھا،‘‘ دلت گھرانے سے تعلق رکھنے والی سیتا بتاتی ہیں۔ انہوں نے ٹھیکیدار سے منت سماجت کی، یا یوں کہیں کہ رحم کی بھیک مانگی، لیکن وہ ٹس سے مس نہ ہوا۔ ان کے دونوں بیٹوں، ۲۳ سالہ سوربھ اور ۲۱ سالہ سورج، کو ان کے ساتھ کام جاری رکھنے پر مجبور کیا گیا، جبکہ کیشو کھیتوں میں نصب ایک عارضی خیمہ میں لاچار پڑے رہے۔

دراصل مہاجرگنا مزدور، بندھوا مزدوری کی انتہائی انسانیت سوز صورت حال میں مبتلا ہیں۔ عموماً غریب اور مظلوم طبقات سے تعلق رکھنے کے باعث ان کے پاس بہتر رہائش اور کام کے بہتر حالات کے مطالبے کا اختیار نہ ہونے کے برابر ہوتا ہے۔ ان کے بنیادی انسانی حقوق کو نظر انداز کر دیا جاتا ہے، یہاں تک کہ کوئی معذور شخص بھی اس سے مستثنیٰ نہیں ہوتا ہے۔

گھنٹے دنوں میں بدل گئے، اور کیشو کی ناگفتہ بہ حالت دیکھ کر ان کے اہل خانہ ناامید ہو گئے۔ تین دن بعد وہ ایک سمجھوتے پر پہنچے: ’’میں کھیت میں ہی رک گیا،‘‘ سورج بتاتے ہیں، ’’جبکہ میرا بھائی اور میری ماں میرے والد کو اٹھا کر گھر لے گئے۔‘‘

دراصل سورج کو رہن رکھ کر اس بات کو یقینی بنایا گیا تھا کہ کنبہ واپس آجائے گا، پیشگی رقم لے کر فرار نہیں ہوگا۔

’’ایسے حالات میں آپ یہی چاہتے ہیں کہ کاش آپ غریب نہ ہوتے،‘‘ سورج کہتے ہیں۔ ’’ہم ٹھیکیداروں کے رحم و کرم پر ہیں۔‘‘

برازیل کے بعد ہندوستان دنیا میں چینی پیدا کرنے والا دوسرا سب سے بڑا ملک ہے۔ ملک کی مجموعی چینی پیداوار کا تقریباً ۳۵ فیصد حصہ مہاراشٹر سے آتا ہے۔ ریاست میں چینی کے ۲۰۰ سے زیادہ کارخانے ہیں، جن میں سے بیشتر تر مختلف سیاسی پارٹیوں سے وابستہ سیاسی طبقے کے زیر انتظام چلائے جاتے ہیں۔

یہ صنعت ان ستم رسیدہ مہاجر مزدوروں کے بل بوتے پر چل رہی ہے، جو روزگار کے مواقع کی کمی اور اپنے گاؤوں میں بڑھتے ہوئے زرعی بحران کے باعث ایسا کرنے پر مجبور ہیں۔

چینی کے کارخانے ٹھیکیداروں کو ایک بڑی پیشگی رقم دیتے ہیں، جو اس کارخانے کے لیے گنا کاٹنے والے مزدوروں کا انتظام کرتے ہیں۔

مہاراشٹر کے تقریباً ۱۰ لاکھ مزدور نومبر سے شروع ہونے والے چھ ماہ کے سیزن میں گنے کے کھیتوں میں سخت مشقت کرتے ہیں۔ انتہائی ابتر حالاتِ کار میں ان کے کام کے اوقات روزانہ ۱۴ سے ۱۶ گھنٹے تک ہوتے ہیں۔ انہی کھیتوں میں قائم عارضی خیمے ان کی رہائش گاہ ہوتے ہیں۔ انہیں بیت الخلاء، غسل خانوں، بجلی اور بعض صورتوں میں پینے کے صاف پانی تک بھی نہ ہونے کے برابر رسائی حاصل ہوتی ہے یا بالکل رسائی نہیں ہوتی۔

تاہم روزمرہ کی بنیادی سہولیات کی کمی سے قطع نظر، لمبے وقت تک شدید جسمانی مشقت کی وجہ سے گنا مزدوروں کے لیے بڑا چیلنج خود کو چوٹوں سے محفوظ رکھنا ہوتا ہے۔ مسکولواسکیلیٹل ڈس آرڈرز (ایم ایس ڈی) ان میں تیزی سے عام ہو رہے ہیں، کیونکہ وہ دن بھر بھاری وزن اٹھانے، جھکنے، کاٹنے اور مڑنے کا کام کرتے ہیں۔ یہ ایسی چوٹیں ہوتی ہیں جو جوڑوں، پٹھوں، اعصاب اور ہڈیوں کو متاثر کرتی ہیں اور بار بار کے کھنچاؤ سے آہستہ آہستہ ظاہر ہوتی ہیں۔

جب ایم ایس ڈی طویل مدتی شکل اختیار کر لے اور کسی شخص کی نقل و حرکت، کام کرنے یا روزمرہ کی ذاتی نگہداشت کے امور انجام دینے کی صلاحیت کو محدود کر دے، تو اسے مسکولواسکیلیٹل معذوری کے طور پر درجہ بند کیا جاتا ہے۔ گنے کے مزدوروں کو اس معذوری کا شکار ہونے کا شدید خطرہ لاحق رہتا ہے۔

سال ۲۰۱۶ کی ایک تحقیق کے مطابق، اہلیہ نگر (سابقہ احمد نگر) میں سروے کیے گئے گنے کے تقریباً ۵۰ فیصد مزدور کمر کے نچلے حصے کے درد میں مبتلا تھے۔ یہ ایم ایس ڈی کی واحد سب سے بڑی وجہ ہے، جس سے دنیا بھر میں تقریباً ۷ء۱ ارب افراد متاثر ہیں۔

’’گنا کاٹتے وقت گنا مزدور مسلسل جھکے رہتے ہیں،‘‘ بیڈ ضلع کے کاٹھوڑا گاؤں سے تعلق رکھنے والے ۴۲ سالہ گنا مزدور شنکر واگھمارے بتاتے ہیں۔ ’’ہم گنے کے بھاری بنڈل اٹھانے کے لیے باقاعدگی سے جھکتے رہتے ہیں، جس سے ہماری کمر کے نچلے حصے پر شدید دباؤ پڑتا ہے۔‘‘

گنے کی کٹائی کے علاوہ اس سے وابستہ دیگر کام بھی ان کی کمر کے نچلے حصے کے درد کو مزید بڑھا دیتے ہیں۔ گھر سے روانہ ہوتے وقت بھاری گھریلو سامان ٹریکٹر پر لادنا، اور شدید تھکن کی حالت میں ٹریکٹر پر چڑھنا اور اترنا بھی خطرات سے خالی نہیں ہوتا۔ واگھمارے کہتے ہیں، ’’ایک جگہ سے دوسری جگہ منتقل ہوتے ہوئے ٹریکٹر میں تنگ جگہ پر بیٹھ کر دو دن اور دو رات کا سفر میری کمر کی اکڑن کو مزید بڑھا دیتا ہے۔ کام کے مقام پر پہنچ کر خیمہ لگانا، سامان اتارنا اور گنے کے کھیتوں میں قائم عارضی خیمے میں رہنا میری تکلیف کو مزید بڑھا دیتا ہے۔‘‘

بہتوں کو تو ایم ایس ڈی کا انتظار بھی نہیں کرنا پڑتا۔ دن میں ۱۲ سے ۱۴ گھنٹے دھاردار درانتی سے کام کرنے کے دوران ذرا سی لغزش یا غلفت کسی دائمی چوٹ کا باعث بن سکتی ہے، اور انسان کو عمر بھر کے لیے معذور بنا سکتی ہے۔

گنے کے کھیتوں میں نابالغوں کے حوالے سے ٹاٹا ٹرسٹ کے ’آشا‘ پروجیکٹ کی قیادت کرنے والے سماجی کارکن پریش جے شری منوہر کے مطابق، گنا مزدوروں کے بچوں کو اس قسم کی چوٹوں کا خطرہ زیادہ رہتا ہے۔

’’کئی والدین اپنے بچوں کو گنے کے کھیتوں میں ساتھ لے آتے ہیں کیونکہ گھر پر ان کی دیکھ بھال کرنے والا کوئی نہیں ہوتا،‘‘ منوہر کہتے ہیں۔ ’’بچے کھیتوں کے کاموں میں ہاتھ بٹانے لگتے ہیں، لیکن وہ درانتی کے استعمال میں ماہر نہیں ہوتے اور خود کو شدید طور پر زخمی کر بیٹھتے ہیں۔ ان میں سے کئی بغیر جوتوں کے کام کرتے ہیں، اس لیے ان کے پیروں میں شدید چوٹیں آتی ہیں۔‘‘ سانپ اور بچھو کے ڈسنے کا تو ذکر ہی الگ ہے۔

دیہی مہاراشٹر میں ۲۰۱۳ کی اس تحقیق کے مطابق، تین میں سے دو سے زیادہ مزدوروں کو گنے کاٹنے کے خنجر یا گنے کے ڈنٹھل سے چوٹ لگی تھی۔

ان واضح جسمانی چیلنجوں کے علاوہ، کچھ ایسے بنیادی سماجی و ثقافتی اصول بھی ہیں جن کے دور رس اثرات ہوتے ہیں۔ چونکہ گنے کی کٹائی اور اسے ٹریکٹر پر لادنا دو افراد کا کام ہے، اس لیے ٹھیکیدار عام طور پر میاں بیوی کے جوڑوں کو کام پر رکھنے کو ترجیح دیتے ہیں جو ایک اکائی کے طور پر کام کرتے ہیں۔ اس سے اجرت (مزدوری) کی تقسیم پر آپس میں جھگڑے کا امکان کم سے کم ہو جاتا ہے۔

لیکن ایسے معاملات کم عمری کی شادی کی ترغیب دیتے ہیں۔ دولہے کے اہل خانہ کے لیے یہ آمدنی کا ایک اضافی ذریعہ ہو جاتا ہے، جبکہ دلہن کے گھر والوں کی خاطر کھلانے کے لیے ایک پیٹ کم ہو جاتا ہے۔ کم عمری کی شادیاں عوامی صحت کا ایک بڑا تشویشناک مسئلہ ہیں، جو کم عمری کے حمل کا باعث بنتی ہیں جس سے نومولود بچوں میں ذہنی معذوری کا خطرہ لاحق ہوتا ہے۔

ریاست میں چینی کی صنعت میں آئی تیزی نے پورے مہاراشٹر سے گنا کاٹنے والے مزدوروں کو گزشتہ ۷۰ سالوں سے اپنی طرف متوجہ کیا ہے۔ یہ ایسا پیشہ ہے جس میں ہمیشہ سے ہی چوٹ لگنے کا خطرہ رہا ہے۔ سماجی کارکنوں اور ٹریڈ یونینوں نے مسلسل مزدوروں کے تحفظ کا مسئلہ اٹھایا ہے، لیکن یہ تحفظ عموماً کاغذات تک ہی محدود ہے۔

اکتوبر ۲۰۲۴ میں مہاراشٹر کی ریاستی حکومت نے ایک ایسی فلاحی اسکیم نافذ کی، جس کا خاص مقصد گنا کاٹنے والے ان مزدوروں کو معاوضہ فراہم کرنا ہے، جو کام کی جگہ پر معذوری یا موت کا باعث بننے والے حادثات کا شکار ہو جاتے ہیں۔

سال ۲۰۲۴ اور ۲۰۲۶ کے درمیان کے سرکاری ریکارڈ سے ظاہر ہوتا ہے کہ ۱۸۶ گنا کاٹنے والے مزدور حادثات میں جاں بحق ہوئے، ۱۱2 شدید زخمی ہوئے اور چھ افراد معذوری کا شکار ہوئے۔ ریاستی حکومت نے ان کو اور ان کے اہل خانہ کو معاوضہ کی مد میں ۱۰ کروڑ روپے سے زائد رقم جاری کی ہے۔

یہ محض دو سالوں کے دوران پیش آنے والے ۳۰۴ شدید حادثات ہیں – یعنی اوسطاً ہر ماہ ۱۲ حادثے۔

تاہم، گنا کاٹنے والے مہاجر مزدوروں کے ساتھ کام کرنے والے سماجی کارکنوں کے مطابق یہ تعداد حقیقت سے کہیں کم ہے، کیونکہ معاوضے کے حصول کے لیے درکار دستاویزات حاصل کرنا انتہائی دشوار ہوتا ہے۔

سماجی انصاف اور خصوصی امداد کے محکمہ کے تحت کام کرنے والی گنا مزدوروں کی فلاحی کارپوریشن (جو بی جے پی کے آنجہانی رہنما گوپی ناتھ منڈھے کے نام سے منسوب ہے) معاوضے کی تفصیلات تو فراہم کرتی ہے، لیکن مذکورہ عرصے کے دوران ریاست میں رجسٹرڈ گنا کاٹنے والے مزدوروں کی تعداد اور مسترد کی جانے والی معاوضے کی درخواستوں کی تعداد کے اعداد و شمار فراہم نہیں کرتی۔

منوہر کا کہنا ہے کہ اصل مسئلہ دراصل یہ زبانی معاہدہ ہے۔ ’’ستم ظریفی یہ ہے کہ شوگر فیکٹری اور ٹھیکیدار کے درمیان ہونے والا معاہدہ کاغذ پر ہوتا ہے،‘‘ وہ مزید کہتے ہیں۔ ’’لیکن ٹھیکیدار اور مزدوروں کے درمیان ایسا کوئی تحریری معاہدہ نہیں ہوتا۔ اس کا مطلب ہے کہ مزدوروں کو کوئی تحفظ حاصل نہیں ہوتا ہے۔‘‘

کولہا پور واپس پہنچ کر سیتا اور سوربھ نے کیشو کو اٹھایا اور اسٹیٹ ٹرانسپورٹ کی بس سے انہیں بیڈ لے گئے۔ یہ ۴۰۰ کلومیٹر سے زیادہ کا سفر تھا۔ کیشو نہ تو حرکت کر سکتے تھے اور نہ ہی بول سکتے تھے۔ ان کے جسم کا بایاں حصہ مکمل طور پر مفلوج ہو چکا تھا۔

’’میں کولہاپور میں کسی کو نہیں جانتی تھی،‘‘ سیتا کہتی ہیں۔ ’’میں نے سوچا کہ اگر میں انہیں بیڈ کے کسی ہسپتال میں داخل کراتی ہوں، تو وہ گھر کے قریب ہوں گے۔‘‘

ڈاکٹر نے ۱۵ سے ۲۰ دنوں تک ان کا علاج کیا۔ فالج کے حملے کے بعد کیشو کو ہسپتال لانے میں بہت دیر ہو چکی تھی۔ ایسا قرض دہندہ کی وجہ سے ہوا تھا جس نے انہیں تین دن تک کھیتوں سے جانے نہیں دیا تھا، اس دوران ان کی صحت یابی کا اہم ترین وقت ضائع ہو گیا۔ ان کے دماغ کو ایسا نا قابلِ تلافی نقصان پہنچا جسے اگر انہیں پہلے لایا جاتا تو روکا جا سکتا تھا۔

ٹھیکیدار نے کیشو کی بیماری کے باوجود انہیں روکے رکھا۔ اس کے اس طرز عمل نے آگے چل کر کیشو کو ایک خود مختار اور محنت کش مزدور سے ایک ایسے شخص میں بدل دیا جسے ہمہ وقت دوسروں کی دیکھ بھال کی ضرورت تھی۔

سیتا انہیں گھر لے آئیں لیکن اس سے پہلے کہ اس نئی حقیقت کو سمجھ پاتیں، انہیں کولہاپور سے ایک کال موصول ہوئی۔

’’ٹھیکیدار نے مجھے یاد دلایا کہ میں نے جو پیشگی رقم لی تھی، اس کے عوض مجھے ابھی اور گنے کاٹنے ہیں،‘‘ وہ کہتی ہیں۔ ان کا دوسرا بیٹا سورج وہاں مسلسل کام میں لگا رہا۔

اس فیملی کے پاس کبھی اپنی زرعی زمین نہیں تھی، اور نہ ہی اتنی نقد رقم تھی کہ وہ پیشگی رقم واپس لوٹا سکتے۔ دو دہائیوں سے بھی زیادہ عرصے سے گنا کاٹنے کا کام ہی ان کی آمدنی کا واحد ذریعہ رہا ہے۔ سیتا اپنے شوہر کو بیڈ میں تنہا نہیں چھوڑ سکتی تھیں کیونکہ ان کی دیکھ بھال کرنے والا وہاں کوئی اور نہیں تھا۔

جب تمام راستے بند ہو گئے، تو سیتا اور سوربھ نے کیشو کو اٹھایا – سیتا نے ان کے پیر پکڑے جبکہ سوربھ نے کندھوں سے پکڑ کر اوپر اٹھایا۔ انہیں اسٹیٹ ٹرانسپورٹ کی بس کے ذریعے واپس کولہاپور لے جایا گیا۔

’’میرے شوہر دن بھر لیٹے رہتے جبکہ ہم تینوں گنے کے کھیتوں میں کام کرتے،‘‘ سیتا یاد کرتی ہیں۔ ’’مجھے دوپہر کے کھانے کے وقفہ کے دوران انہیں کھانا کھلانا پڑتا تھا۔ وہ جہاں سوتے تھے، وہیں پیشاب پاخانہ بھی کر دیتے تھے۔ دن بھر کی کمر توڑ محنت کے بعد میں ان کی صفائی بھی کرتی تھی۔"

سیتا جیسے مزدور بے بسی کا شکار ہیں کیونکہ ریاست نے اپنے ڈیٹا بیس میں مزدوروں کی صرف ایک چھوٹی تعداد کو ہی رجسٹر کیا ہے۔ ’’نتیجتاً ان میں سے اکثر معاوضہ حاصل کرنے سے محروم رہ جاتے ہیں،‘‘ بیڈ میں مقیم اور گنا کاٹنے والے مزدوروں کے حقوق کے لیے سالہا سال سے آواز اٹھانے والی سماجی کارکن منیشا ٹوکلے بتاتی ہیں۔ معاوضہ کے لیے درکار لازمی دستاویزات میں شوگر فیکٹری یا ٹھیکیدار کی طرف سے جاری کردہ رجسٹریشن کارڈ یا سرٹیفکیٹ شامل ہے۔ مزدوروں کو میڈیکل سرٹیفکیٹ اور موقع کے پنچ نامہ کے ساتھ ساتھ درج کرائی گئی پولیس شکایت بھی جمع کرانی ہوتی ہے۔

’’ٹھیکیدار کبھی مزدوروں کا خیال نہیں رکھتے،‘‘ ٹوکلے کہتی ہیں۔ ’’وہ صرف اس بات میں دلچسپی رکھتے ہیں کہ جتنا ممکن ہو سکے ان کا استحصال کیا جائے۔ وہ بھلا کیوں سرٹیفکیٹ جاری کرنے لگے؟ علاوہ ازیں، جب کوئی حادثہ پیش آتا ہے تو مزدور اپنے گاؤں سے بہت دور ہوتے ہیں۔ مقامی پولیس یا گاؤں کی پنچایت ان کے ساتھ تعاون نہیں کرتی۔‘‘

ٹوکلے کے مطابق، سب سے بڑا مسئلہ یہ ہے کہ شوگر فیکٹری کا اپنے مزدوروں سے براہِ راست کوئی معاملہ ہی نہیں ہوتا۔ ’’سب کچھ ٹھیکیدار کے ذریعے ہوتا ہے، جس کی وجہ سے فیکٹریاں انسانی حقوق کی خلاف ورزیوں کی جوابدہی سے بری ہو جاتی ہیں،‘‘ وہ وضاحت کرتی ہیں۔ ’’ان کے انشورنس کے کاغذات بھی ٹھیکیدار ہی جمع کرواتا ہے۔ اگر وہ دعویٰ دائر نہ کرے، تو مزدوروں کو کچھ نہیں ملتا۔ ہونا یہ چاہیے کہ شوگر فیکٹری اپنے لیبر کے شعبہ سے کسی شخص کو مہاجر مزدوروں کے مسائل سے نمٹنے کے لیے مقرر کرے۔ لیکن اس کا مطلب اور زیادہ انسانی حقوق فراہم کرنا ہوگا، اور ایسا کوئی نہیں کرنا چاہتا۔‘‘

مہاراشٹر کے سابق شوگر کمشنر شیکھر دیشمکھ کا کہنا ہے کہ رجسٹرڈ مزدور نسبتاً بہتر حالت میں ہیں۔ اکثر و بیشتر ان کا تعلق مراعات یافتہ ذات سے ہوتا ہے۔ ’’سماجی بہبود کا محکمہ ان کے انشورنس کا پریمیم ادا کر رہا ہے،‘‘ وہ بتاتے ہیں۔ ’’لیکن معاوضے کی اسکیم ابھی ابتدائی مرحلہ میں ہے۔ اسے مزید منظم اور ہموار کرنے کی ضرورت ہے تاکہ یہ زیادہ سے زیادہ مہاجر مزدوروں تک پہنچ سکے۔ شوگر فیکٹریوں نے مزدوروں کو رجسٹر کرنے میں کوئی خاص پہل نہیں دکھائی ہے، کیونکہ تکنیکی طور پر مزدور ان کی ذمہ داری نہیں ہیں۔‘‘

خواتین کی تنظیموں اور صحت کارکنوں کے اتحاد، ’مکام‘ نے ۲۰۲۰ میں مہاراشٹر کے گنا کاٹنے والے مزدوروں پر ایک رپورٹ جاری کی تھی۔ اس رپورٹ میں شامل ۱۰۰۰ خاتون مزدوروں میں سے ۸ فیصد نے بتایا تھا کہ گنا کاٹنے کے دوران ان کی فیملی میں کوئی نہ کوئی حادثہ پیش آیا تھا۔

اگر ریاست میں تقریباً ۱۰ لاکھ مزدور ہیں، تو اس حساب سے چوٹ کا شکار ہونے والے گنا کاٹنے والوں مزدوروں کی تعداد ۸۰ ہزار کے قریب ہونی چاہیے، نہ کہ محض برائے نام ۳۰۴، جنہیں ریاست نے معاوضہ فراہم کیا ہے۔

’’اس حادثہ کے بعد میں لنگڑا کر چل رہا ہوں،‘‘ شنکر واگھمارے بیڈ کے گاؤں کاٹھوڑا میں ٹن کی چھت اور اینٹوں کی دیواروں والے اپنے گھر میں لیٹے ہوئے کہتے ہیں۔ ’’میں اپنی کمر کو تکلیف دیے بغیر جھک بھی نہیں سکتا۔‘‘

چار سال قبل ۴۲ سالہ شنکر واگھمارے اپنا سامان اتارتے وقت ٹریکٹر سے پھسل کر سیدھے اپنی دمچی کی ہڈی کے بل نیچے گرے تھے، جس سے ان کی ریڑھ کی ہڈی میں چوٹ آئی تھی۔ ریاستی حکومت کی فلاحی اسکیم کے تحت اپنے گاؤں سے آنے اور جانے کے دوران حادثے کا شکار ہو کر زخمی ہونے والے گنا مزدور بھی معاوضے کی اہلیت رکھتے ہیں۔

لیکن واگھمارے اس بات سے ناواقف ہیں کہ ریاست نے گنا مزدوروں کے لیے معاوضہ کی ایک اسکیم شروع کی ہے۔ دلت برادری سے تعلق رکھنے والے واگھمارے کے پاس معمولی سی زرعی زمین ہے، جس سے بنیادی طور پر صرف ان کے گزر بسر کے لیے ہی پیداوار ہو پاتی ہے۔ ان کے پاس نقد رقم کا واحد ذریعہ مزدوری ہے۔

حادثہ کے اگلے سال، واگھمارے نے اپنے بیٹے کو اپنی بیوی کے ساتھ کھیتوں میں کام کے لیے بھیج دیا۔ گزشتہ دو سالوں سے انہوں نے دوبارہ کام پر جانا شروع کر دیا ہے۔

’’میری بیوی کو زیادہ محنت طلب کام کرنے پڑتے ہیں اور میں اس کی مدد کرتا ہوں،‘‘ وہ کہتے ہیں۔ ’’لیکن ہر سیزن کے بعد میری چوٹ مزید بگڑتی چلی جاتی ہے، اور میرے لیے لنگڑائے بغیر چلنا مزید دشوار ہو جاتا ہے۔‘‘

مناسب بستر اور سر پر چھت کی عدم موجودگی میں، نسبتاً کم محنت والا کام بھی واگھمارے کو جلد یا بدیر عضلاتی اور ہڈیوں کے مرض (ایم ایس ڈی) کے باعث ہونے والی معذوری کی طرف تیزی سے دھکیل رہا ہے۔ وہ اس بات سے بخوبی واقف ہیں، لیکن کہتے ہیں، ’’میرے پاس کوئی متبادل نہیں ہے۔‘‘

دیشمکھ کا کہنا ہے کہ ریاست کو فیکٹریوں کے قریب خاص طور پر گنا کاٹنے والوں کے لیے رہائشی کالونیاں تعمیر کرنے کی پہل کرنی چاہیے تھی جس سے انہیں مناسب آرام مل پاتا، ’’لیکن ایسا کبھی نہیں ہوا۔‘‘

مہاراشٹر اور کرناٹک کی سرحد پر واقع ایک گاؤں کے رہائشی حیرت زدہ تھے۔ ان کی حیرت کی وجہ یہ تھی کہ کوئی صبح سویرے گاؤں کے مندر کے باہر رنگین چاک سے ایک خوبصورت رنگولی بنا جاتا تھا۔

تقریباً ایک ہفتہ تک اس معاملے کے جاری رہنے کے بعد چند لوگوں نے اس معمہ کو حل کرنے کا فیصلہ کیا۔ انہوں نے دریافت کیا کہ سیتا سسانے بڑی باریک بینی اور مہارت سے اس روایتی ہندوستانی فن کے ذریعے مقامی مندر کو سجا رہی تھیں۔

کولہاپور سے واپسی کے دو ماہ بعد، مئی ۲۰۲۴ میں اپنے گھر پر کیشو کی موت ہو گئی۔ اس ہولناک تجربہ کے بعد، جس نے ان کی زندگی کو درہم برہم کر دیا تھا، فیملی نے اپنا ٹھیکیدار بدل لیا۔ نئے ٹھیکیدار نے انہیں کرناٹک کے گنے کے ایک کھیت میں مزدوری دلا دی، جہاں وہ تینوں گنا کٹائی کا وہی محنت طلب کام کرتے ہیں۔

’’گنا کے کھیتوں میں جانے سے پہلے، میں رنگولی بنایا کرتی تھی،‘‘ وہ پاری کو بتاتی ہیں۔ ’’میں نے بچپن میں اسے خود ہی بنانا سیکھا تھا۔ اس سے مجھے سکون ملتا تھا۔‘‘

مقامی لوگ ان کی مہارت سے اس قدر متاثر ہوئے کہ انہوں نے گنا کٹائی کے سیزن کے اختتام پر انہیں خراج تحسین پیش کیا۔ اپنے چہرے پر ایک اداس مسکراہٹ کے ساتھ وہ اس دل کو چھو لینے والے لمحہ کو یاد کرتی ہیں۔ خوشی کے اس مختصر لمحہ کو یاد کرتے ہوئے بھی صاف محسوس ہوتا ہے کہ ان کے ذہن میں کوئی اور بات ہے جو ان کو اندر ہی اندر بے چین کیے ہوئے ہے۔

’’مجھے اپنے رشتہ داروں سے لی گئی رقم واپس کرنی ہے،‘‘ وہ کہتی ہیں۔

کیشو کو فالج کا دورہ پڑنے سے کچھ ہی عرصہ پہلے اس فیملی نے اپنے خستہ حال گھر کی جگہ اینٹوں کی دیواروں والا ایک پکا مکان تعمیر کر لیا تھا۔ اس پر زیادہ خرچ نہیں آیا تھا، لیکن کیشو کے علاج کے بل جمع ہونا شروع ہوئے تو اخراجات میں تیزی سے اضافہ ہونے لگا۔ مزید یہ کہ کولہاپور کے ٹھیکیدار نے سیتا کی ۲۰ دن کی اجرت بھی کاٹ لی، کیونکہ اس دوران وہ اپنے بیمار شوہر کی تیمارداری میں مصروف تھیں۔ ان تمام اخراجات کو ملا کر اب ان پر ۳ لاکھ روپے کا قرض چڑھ چکا ہے۔ جن رشتہ داروں سے انہوں نے قرض لیا ہے، انہوں نے ابھی تک رقم واپس کرنے کے لیے ان پر کوئی دباؤ نہیں ڈالا ہے۔

’’لیکن پھر بھی یہ ایک ذلت آمیز احساس ہے جس کے ساتھ جینا پڑ رہا ہے،‘‘ سورج کہتے ہیں۔ ’’یہ مسلسل آپ کو آپ کی غربت کا احساس دلاتا رہتا ہے۔‘‘

اس اسٹوری کو انٹرنیشنل فاؤنڈیشن فار ڈس ایبلٹی انکلوژن (آئی ایف ڈی آئی) کی ’جرنلزم فیلوشپ آن ڈس ایبلٹی انکلوژن‘ کی معاونت حاصل ہے۔