मसीन के मार झेलत टम्टा तमेर के हाथ

नवीन कुमार टम्टा ला अवेइय्या मन के वो मन के काम के फोटू अऊ वीडियो देय के आदत परगे हवय. पचास बछर ले जियादा उमर के, ये सियान एक नामी तमेर (तांबा कारीगर)आंय - उत्तराखंड के अल्मोड़ा मं तांबा ले कलाकृति अऊ घर बउरे के जिनिस मन के बढ़िया ले बढ़िया डिज़ाइन बनाथें.

टम्टा तमेर मन पुरखौती ले ये बूता करत आवत हवंय, कहे जाथे के वो मन सैकड़ों बछर पहिली राजस्थान ले हिमालय के कुमाऊँ इलाका मं आय रहिन. वो मन के पहिली बस्ती लोहाघाट के गोसनी गाँव के तीर मं रहिस. बाद मं, चंपावत ले अल्मोड़ा रजधानी बने के बाद, तमेर मन के कुछेक परिवार इहाँ आके बस गीन.

लंबा बखत तक ले, तमेर मन के काम घर भर के काम रहिस. कारीगर प्रदीप टम्टा कहिथे, “सब्बो हँसी-ठिठोली करत गोठियावत रहंय. वो मन मं होड़ घलो लगे रहय. हर कोनो बढ़िया ले बढ़िया काम करय.”

माईलोगन मन ये काम के जरूरी हिस्सा रहिन. वो मन लकठा के जंगल मन ले भठ्ठी बर लकरी संकेल के लावंय, बने जिनिस मन ला चमकावंय, भठ्ठी के पंखा चलायेंव अऊ जोड़ बर पाउडर बनावंय. कतको माईलोगन मन रांधे अऊ अपन परिवार के काम के बीच-बीच मं डिज़ाइन अऊ दीगर बारीक काम घलो करंय, जइसने हथौड़ा चलाय के पहिली तांबा के चादर ला तिपोवंय.

तांबा के बने जिनिस मन कुमाऊं इलाका के संस्कृति अऊ परंपरा के हिस्सा आंय – घड़े (गुंडी ),ढोल (ड्रम), थारी अऊ दीगर जिनिस मन के हमेसा लेवाली रहे हवय. नवीन टम्टा कहिथे, “पहले पूजा में थाली लगती थी, बाजा लगता था शादी हो तो बड़े बड़े बर्तन लगते थे पर अब सब बदल गया (पहिली पूजा मं थारी बउरे जावत रहिस, बाजा लगत रहिस अऊ बिहाव मं बड़े-बड़े बरतन के जरूरत परत रहिस फेर अब सब्बो कुछु बदल गे हवय).”

इहाँ के लोगन मन ला वो जमाना सुरता हवय जब टम्टा मोहल्ला मं 30-40 तमेर परिवार मन के हथौड़ा चले के आवाज झूलझुलहा चार बजे ले सुरु होके बनेच रतिहा तक ले चलत रहय. एक झिन बासिंदा मुचमुचावत कहिथे,“सोने भी नहीं देते थे (हमन ला सूते घलो नइ देवत रहिन).”

टम्टा के काम करेइय्या मन अब बनेच कम होगे हवंय, अऊ नवीन कुमार अल्मोड़ा के बचे-खुचे तमेर मन ले एक झिन आंय. कभू फरत-फूलत ये दलित कला समाज के कुछेक मरद लोगन मन अऊ संग काम करेइय्या तक ले रहिगे हवय. अऊ मसीन ले बने तांबा के कलाकृति अऊ घर बउरे के जिनिस मन ओकर कला ला पाछू छोड़त जावत हवंय. वो ह बताथे, “एक जमाना रहिस जब हमन दिन भर मं चार बरतन बेचत रहेन. आज महिना भर मं अतक बरतन मुस्किल ले बेचे सकथन.”

बारीक काम अऊ जियादा बखत लगे के बाद घलो, हाथ ले बने तांबा के सामान वजन के हिसाब ले बेचे जाथे: 500 ग्राम के एक ठन गुंडी (घड़ा) 1,000 रूपिया मं बिकाथे, फेर बजार मं उहिच वजन के सिरिफ तांबा 750 रूपिया मं मिलथे. अतकेच वजन के मसीन ले बने गुंडी, जेन ह रामपुर अऊ मुरादाबाद के फेक्टरी मं बनथे करीबन 500 रूपिया के छूट मं बिकाथे, काबर के थोक मं बनाय के सेती ये फेक्टरी मन मुनाफा कम कर लेथें.

हाथ ले बने एक ठन टम्टा वाटर फ़िल्टर 4,000 रूपिया मं बिकाथे, फेर मसीन ले बने फिल्टर के दाम ओकर आधा होथे. हाथ ले बने फुलवाले तांबा के थारी 700-1000 रूपिया मं बिकाथे, फेर मसीन ले बने थारी 300 रूपिया मं मिल जाथे. वइसे, टम्टा कारीगर मन के कहना आय के ओकर मन के काम मसीन ले बने फिल्टर के बनिस्बत तीन गुना जियादा बखत तक ले टिकथे अऊ येला तिपोके येला अऊ बउरे जाय सकथे.

नवीन कहिथे, “आज के ग्राहेक मन बरतन मं जियादा पइसा खरचा करे ले हिचकथें. मसीन ले बने सामान आसानी ले मिलथें, सस्ता अऊ चमकत घलो रहिथें.” मसीन ले बने जिनिस मन मं जोड़ घलो नइ होवय, अऊ ग्राहेक मन कहिथें के वो मन ला चिकना अऊ सफई पसंद हवय.

ये बखत भेंट मं देय के नान-नान जिनिस मन के लेवाली बढ़े हवय – फूलदान, दीया, कंगन अऊ मुंदरी, जेन ह जियादा दाम के नइ होवय अऊ सैलानी मन येला पसंद घलो करथें. बरतन अऊ बाजा मन के लेवाली मं घटती ह टम्टा कारीगर परिवार मन ला नुकसान पहुंचाय हवय, जेकर ले वो मन के अवेइय्या बखत डोलत हवय.

पारी ह नवीन ले ओकर तमेर साल मं भेंट करिस, ये डोंगरी कस्बा के एक ठन सांकर गली मं बने टीना अऊ लकरी के छितका कुरिया, जेन ह कभू अंगरेज मन के चौकी होवत रहिस. छानी मं छेदा अऊ भोरका परे हवय: दू ठन भठ्ठी ले निकरेइय्या आगि अऊ धुंवा ह वोला करिया कर दे हवय. उत्तराखंड मं हालेच मं होय भारी झड़ी ले ओकर भठ्ठी ला नुकसान पहुंचे हवय, जेन ह सइकिल के चक्का अऊ पंखा ले बने भठ्ठी आय. वो ह येकर सूखाय ला अगोरत हवय जेकर ले वो ह काम करे सकय.

टम्टा ताँबा कारीगर (तमेर) तीनों एक-दूसर के करीबी रिस्तेदार आंय. 15 बछर के उमर ले काम सुरु करेइय्या नवीन बताथे के वो अऊ ओकर (परिवार के) चचेरा भाई, 47 बछर के प्रदीप कुमार टम्टा के संग मिलके काम सिखिन. प्रदीप कहिथे, “बचपना मं आगि देख के, धुंवा देख के हमर उछाह बढ़ जावत रहिस. हमन जाने ला चाहत रहन के काय होवत हे.”

नवीन ला ये कला के हुनर के मान करत राज सरकार ह साल 2021 मं शिल्परतन से सम्मानित करे रहिस, अऊ उत्तराखंड के टम्टा जिनिस मन ला साल 2021 मं जीआई (भौगोलिक संकेतक) टैग देय गे रहिस. टम्टा कारीगर मन सोचे रहिन के येकर ले वो मन के बेवसाय पहिली कस हो जाही अऊ वो मन के कला फिर ले चल निकरही, फेर कुछु नइ बदलीस. नवीन टम्टा कहिथे, “हमन ला जीआई टैग त मिल गे, फेर येला काय करबो? सरकार ला हमर मदद करे ला चाही, गर वो मन कच्चा माल हमन ला दिलवाय त बढ़िया होही.” संगे संग, ये घलो कहिथे के सरकार लंबा बखत ले समाज ला कतको लाभ देय के वादा करत हवय, फेर ये ह कभू पूरा नइ होइस.

एक ठन अऊ चिंता कच्चा माल उपर लगेइय्या भारी जीएसटी (वस्तु एवं सेवा कर) अऊ सामान के भारी लागत, जेकर सेती तमेर मन ला गुजरा करे मुस्किल हो जाथे. “ साल 2010 मं हमन रोजके 1,000 रूपिया कमावत रहेन, जेकर ले 500-600 रूपिया के नफा होवत होवत रहिस. ये बढ़िया रहिस,” हरि प्रसाद टम्टा, जेन ह क़रीबी रिस्तेदार अऊ एक माहिर कारीगर आंय, कहिथे. “आज घलो ये [आमदनी] बदले नइ ये. हमन कतक कमाबो अऊ कतक बचाय सकबो?” वो ह गुजारा बर बढ़त खरचा ला बतावत कहिथे.

पहिली अधिकतर कच्चा माल तीर के बागेश्वर लेच मँगवाय जावत रहिस, अऊ बनेच कारीगर होय सेती, वो मन सीधा मंगवा लेवत रहिन. फेर लेवाली घटे अऊ करीगर के कमी सेती, वो मन ला दलाल ले समान बिसोय ला परथे. हरि प्रसाद कहिथे. “हमन तांबा के रोल थोक बेपारी ले बिसोथन, अऊ वो मन दलाली ले जाथें: वो ह 700 के कीमत वाले सामान ला 1,000 रूपिया मं बेचथे. हमन चिपवुड [चीड़ रुख के लकरी जेन ला भठ्ठी मं बारे जाथे] घलो बिसोवत हवन काबर के जंगल बनेच कम लोगन मन जाथें.”

तमेर साल मं अब तक ले घलो काम करेइय्या गीता टम्टा अकेल्ला माईलोगन आंय, जऊन ह करीबन 21 बछर पहिली, ये परिबार मं अपन बिहाव के बाद काम करे सुरु करे रहिस. वो ह बताथे के सब्बो माइलोगन मन एक संग जंगल जावत रहिन. “जब मंय पहिली पईंत लकरी लेगे बर गे रहंय, त मोला कुछु घलो जानत नइ रहेंय. दीगर माईलोगन मन मोला सिखाइन के कइसने लकरी ला संकेलना हे, लकरी ला कइसने बाँधना हे. वो मन मोला सब्बो कुछु सिखाइन,” वो ह नवा बहुरिया के बखत के अपन रिस्ता ला भारी मया ले सुरता करत कहिथे.

माइलोगन मन के काम करे ले लइका मन घलो काम करे लगिन. प्रदीप टम्टा कहिथे के जब माईलोगन मन काम करे छोड़ दीन, त ये कला मं परिवार अऊ समाज के जुड़ाव घलो कम हो गीस. अऊ वो मन के आमदनी उपर घलो असर परिस: अब अकेल्ला काम करत, कारीगर मन के कहना आय के ये कला मं बखत जियादा लगत हवय. संगे संग, दाम घलो बढ़ गे हवय, काबर के लकरी अब बजार ले बिसोय ला परथे.

“सब्बो कुछु बदलगे हवय. जब माईलोगन मन सबके संग काम करत रहंय, त हमन सब्बो ला मजा आवत रहिस. अब मंय अकेल्ला बांचे हवं. कुछु मन घर मं काम करे सुरु कर दे हवंय, जेन ला वो मन करे सकथें, वोला करथें,” वो ह बतावत कहिथे.

टम्टा परिवार के कतको माईलोगन मन थिर आमदनी बर घर अऊ होटल मन मं बूता करत हवंय. गीता अपन लइका मन के स्कूल फीस भरे बर दीगर मन के लइका मन के देखरेख करिस. अल्मोड़ा के एक ठन पर्यटन स्थल के रूप मं उभरे अऊ होटल के कारोबार ह अचानक जोर ले बढ़े सेती इहाँ के माइलोगन मन ला हेल्पर अऊ साफ़ सफई के काम-बूता मिले लगे हवय.

नवा पीढ़ी ले कोनो घलो ये काम ला आगू बढ़ाय मं मन नइ करेय. नवीन कहिथे के गर राज सरकार आगू नइ आही, त हमर भविष्य अंधियार मं पर जाही. “हमन नवा पीढ़ी ला सिखाय ला चाहत हवन, फेर कोनो घलो ये काम फोकट मं नइ करय.”

हमन ला कैमरा निकारत देख, वो ह कहिथे, “आओ आओ फोटो लोगे या वीडियो बनाओगे? जो भी करोगे हमारा क्या भला उससे? जो होगा भला, वो तुम्हारा होगा [आवव,आवव फोटू खिंचहूँ धन वीडियो बनाहू? जेन घलो हमर काय भला होही ओकर ले? जेन भला होही, वो ह तुंहरेच मन के होही]. "

ये कहिनी ला मृणालिनी मुखर्जी फाउंडेशन (एमएमएफ) के फ़ेलोशिप के मदद मिले हवय.

अनुवाद: निर्मल कुमार साहू