‘तांबा के काम त दलिद्दर काम बा’

नवीन कुमार टम्टा काम करत समय उनकी संघे फोटो आ वीडियो लेवे वाला लोगन के आदी बाड़ें. उमिर के पचासवां फेंटा में पहुंचल ठठेरा, नवीन के बहुते नाम बा. उ उत्तराखंड के अल्मोड़ा में ताम्बा के कलाकृति आ चीजन पर बारीक़ कारीगरी करे खातिर जानल जालें.

टम्टा ताम्बा के कारीगरन के पुरान वंश से आवेलें. एह वंश के बारे में मानल जाला कि ई सौ बरिस पहिले राजस्थान के हिमालय के कुमाऊं क्षेत्र से आईल रहलें. उनकर पहिला बसाव लोहाघाट के गोसनी गांव में भइल. बाद में, जब राजधानी चम्पावत से बदल के अल्मोड़ा भईल त ठठेरन के कुछ परिवार एइजा आ गईल.

लम्बा समय ले ताम्रशिल्पियन के काम ए लोगन के पारिवारिक धंधा रहल. “हर केहू हंसी मजाक आ बातचीत करे. आपस में होड़ो रहत रहे. ओ होड़ वाला माहौल में भी सब केहू बेहतर काम करे,” कारीगर प्रदीप टम्टा कहेलन.

महिला लोग भी ए प्रक्रिया के अटूट हिस्सा रहली. उ लोग पास के जंगल से भट्टी खातिर लकड़ी एकट्ठा करें, तैयार चीजन पर पालिश करें, भट्ठी के पंखा घुमावें आ वेल्डिंग खातिर पाउडर तैयार करें. बहुत से महिला लोग खाना पकावत आ परिवार के देखभाल करत के ही डिजाईनिंग आ अउरी बारीक काम भी कईली. जईसे धातु के चादर के हथौड़ा मारे से पहिले गरम करे के काम.

ताम्बा के चीज कुमाऊं इलाका के पहचान आ परंपरा के हिस्सा रहल ह – घड़ा, ढोल, थाली आ अन्य चीज हमेशा से मांग में रहली हं सन. “पहले पूजा में थाली लगती थी, बाजा लगता था, शादी हो तो बड़े बड़े बरतन लगते थे पर अब सब बदल गया (पहिले पूजा में थाली, बाजा मंगावल जाए आ बड़े बड़े बरतनन के उपयोग होत रहे. बाकिर अब सब बदल गईल बा),” नवीन टम्टा कहेलन.

इलाका के लोग पुरनका किस्सा सुनावेला. एक समय रहे, टम्टा मोहल्ला में 30-40 ठठेरा परिवार के हथौड़ा मारे के आवाज सबेरे 4 बजे शुरू होखे आ राती के देरी ले चलत रहे. “सोने भी नहीं देते थे (उ लोग हमनी के सुत्ते भी ना देवे),” ओहिजे रहे वाला एगो आदमी मुस्कियात के कहेला.

टम्टा काम करे वालन के संख्या तब से अब ले बहुत कम हो गईल बा. नवीन कुमार अल्मोड़ा के कुछ आखिरी बचल मुट्ठी भर ठठेरन में बाड़ें. एक समय पर समृद्ध रहल ई दलित समुदाय अब कुछ आदमियन आ उनकी सहायकन ले सीमित रहि गईल बा. मशीन से बनल ताम्बा के बरतन आ घरेलू सामान उनकरी शिल्प के पीछे छोड़ देलें बा. “एगो समय रहे जब हमनी के दिन में चार गो बरतन बनावल आ बेचल जाए. आज हमनी के एतना मुश्किल से महीना भर में बेच पावल जाला,” उ बतावेलन.

बारीक काम आ बनावे में लगे वाला लम्बा समय के बावजूद हाथ से बनल ताम्बा के चीज वजन के हिसाब से बेचल जाला; 500 ग्राम के ताम्बा के घड़ा 1000 रुपिया में बिकेला जबकि ओतने वजन के ताम्बा बाजार में 750 रुपिया में मिली. एही वजन के मशीन से बनल घड़ा छूट पर 500 रुपिया में मिल जाई जवन रामपुर आ मुरादाबाद के कारखानन में बनावल जाला आ भारी मात्रा में बनवला पर जेपर मुनाफा ढेर हो जाला.

हाथ से बनल एगो टम्टा वाटर फिल्टर 4000 रुपिया में मिली. उहंई मशीन से बनल एकरी आधा दाम में मिल जाई. हाथ से बनल एगो नक्काशीदार ताम्बा के प्लेट 700-1000 रुपिया में मिली जबकि मशीन से बनल इहे प्लेट 300 रुपिया में मिल जाई. बाकिर टम्टा शिल्पकारन के कहनाम बा कि उनकर काम मशीन के काम से तीन गुना अधिक चलेला. काहें कि एकर उमिर बढ़ावे खातिर एके गरम कर के ठोकल-पीटल जाला.

“आज के तारीख में ग्राहक लोग बरतनन पर अधिक खर्चा कईल ना चाहेलें. मशीन से बनल सस्ता आ अधिक चमकदार सामान बाजार में उपलब्ध बा,” नवीन कहेलन.

मशीन से बनल सामानन में जोड़ भी ना होला आ ग्राहकन के कहनाम बा कि उ लोग चिक्कन आ बारीक काम वाला चीज लिहल पसंद करेला.

हाल के समय में भेंट में देवे लायक छोट सामानन जैसे – फूलदान, दिया, ब्रेसलेट आ अंगूठी वगैरह के मांग बढ़ल बा, ई सस्ता होला आ पर्यटक लोग एके बहुत पसंद करेला. बरतनन आ सामान के स्थानीय मांग में गिरावट से टम्टा शिल्पकारन के परिवारन के चोट पहुंचल बा जेसे उनकर भविष्य अस्थिर हो गईल बा.

पारी के मुलाकात नवीन से उनकी वर्कशॉप में भईल. ए पहाड़ी नगर में ई टिन के जर्जर शेड एगो पतला गली में बा जवन कबो अंग्रेजन के चउकी रहे. छत पर छेद आ दरार पड़ल बा; दू गो भट्टियन से निकले वाला धुआं आ धातु के गलावे वाला आग एतना सालन में एके करिया कर दिहले बा. हाले में उत्तराखंड में भारी बारिश उनकरी साइकिल के टायर आ पंखा से बनावल ए कामचलाऊ भट्टी के नुकसान पहुंचवलस ह. उ एकरी सुखला के इंतजार कर रहल बाड़ें ताकि काम शुरू कर सकें.

टम्टा ताम्बा के तीनों शिल्पकार के आपस में रिश्तेदारी बा. पनरह बरिस के उमिर में काम करे शुरू करे वाला नवीन बतावेलन कि ऊ आ उनकर चचेरा भाई 47 बरिस के प्रदीप कुमार टम्टा एक संघे काम सीखल लोग. “बचपन में आग देख कर धुआं देख के बड़ी उत्सुकता होती थी कि क्या हो रहा है (बचपन में आग आ धुआं देख के बहुत उत्सुकता होखे. हमनी के जानल चाहीं जा कि का हो रहल बा),” प्रदीप कहेलन.

नवीन टम्टा आपन शिल्प कौशल खातिर 2021 में राज्य सरकार से शिल्परत्न पुरस्कार से सम्मानित भइलन. सन् 2021 में उत्तराखंड के टम्टा उत्पादन के जीआई (भौगोलिक संकेतक) टैग से नवाजल गइल. टम्टा कलाकारन के लागल कि एसे व्यापार में तेजी वापस आई आ ओ लोगन के शिल्प के फिर से उद्धार होखी बाकिर कुछु ना भईल. “हमनी के जीआई टैग मिलल बाकिर एकर का करीं जा? सरकार के हमनी के मदद करे के चाहीं. अगर उ लोग हमनी के कच्चा माल देवें त बढ़िया रही,” नवीन टम्टा कहेलन. उनका दुख बा कि उनकरी समुदाय के सरकार ओर से लम्बा समय से कई लाभन के आश्वासन दिहल जाता जवन आज ले पूरा नईखे भईल.

एगो अउरी परेसान करे वाला बात बा. कच्चा माल पर भारी जीएसटी (वस्तु आ सेवा कर) आ सामान महंगा होखे चलते शिल्पकारन के बाजार में बनल रहल मुश्किल हो गईल बा. “हमनी के 2010 में हर दिन 1000 रुपिया कमाईं जा जेमे से 500-600 रुपिया मुनाफा रहे. ई बढ़िया रहे,” नजदीकी रिश्तेदार आ शिल्पकार हरी प्रसाद टम्टा कहेलन. “आज आमदनी में कवनो बदलाव नईखे भईल. हमनी के केतना कमा सकेनी जा आ केतना बचा सकेनी जा?” उ रोजमर्रा के चीज के दाम बढ़ला से भइल कठिन हालात ओर इशारा करत के कहेलन.

पहिले अधिकांश कच्चा माल उहे इलाका में लगे के बागेश्वर से मिल जात रहे, चूंकि ओ समय कारीगर लोगन के संख्या अधिक रहे त उ लोग सामान सीधे ले आवत रहे. लेकिन अब मांग कम हो गईला आ कारीगरन के संख्या गिर गईला के वजह से ओ लोगन के बिचौलियन से सामान कीने के पड़ेला. “हमनी के थोक विक्रेता से ताम्बा के रोल कीनेनी जा आ उ कुल कमीशन लेलें सन; उ 1000 रुपिया में बेचेला जवन 700 होखे के चाहीं. हमनी के चिपवुड (पाईन के पेड़ से मिले वाला लकड़ी जवन भट्टी खातिर इंधन के रूप में उपयोग होला) भी कीनत बानी जा काहें कि जंगल जाए वाला केहू नईखे,” हरी प्रसाद कहेलन.

गीता टम्टा कारखाना में काम करे वाली अंतिम बचल एकमात्र महिला बाड़ी. उ लगभग 21 बरिस पहिले ए परिवार में बियाह के बाद से काम करे शुरू कईली. उ बतावेली कि मेहरारू लोग संघे मिल के जंगल जाईल करें. “पहिली बेर लकड़ी खातिर गईनी त हमरा कुछु पता ना रहे. बाकी मेहरारू लोग समझवली कि कवन लकड़ी बीने के बा, लकड़ी कईसे बान्हे के बा. उ लोग हमके सब कुछ सिखावल,” उ एगो नया दुल्हिन के रूप में बनल शुरुआती रिश्तन के याद करत बतावेली.

महिला लोगन के भागीदारी से बच्चा लोग भी काम वाली जगह पर आ गईल. प्रदीप टम्टा बतावेलन कि जब महिला लोग ए काम से दूर भइली त शिल्प में परिवार आ समुदाय वाली भावना पर असर पड़ल. आमदनी पर भी असर पड़ल; अब अकेले काम करे वाला कारीगर लोगन के कहनाम बा कि कारीगरी में लागे वाला समय बढ़ गईल बा. अइसहीं कीमत भी बढ़ गईल बा काहें कि लकड़ी भी बाजार से कीनल जाला.

“सब बदल गईल. मेहरारू लोग भी सबके संघे काम करे त हमनी के बहुत मजा आवे. अब हमही एकमात्र बाचल बानी, कुछ लोग घर में नौकरानी के काम करे लागल बा आ बाकी लोग जवन कर सके उ करे में लागल बा,” उ कहेली.

टम्टा परिवार के बहुत सा मेहरारू लोग नियमित आमदनी के तलाश में घरन आ होटलन में सहायक आ नौकरानी बन गईल बा. गीता खुद अपनी बच्चन के स्कूल के फीस देवे खातिर दूसरी के बच्चन के देखभाल कईली. अल्मोड़ा के एगो पर्यटक स्थल के रूप में उभरला आ होटल उद्योग में अचानक तेजी अइला से स्थानीय महिला लोगन के सहायक आ सफाई कर्मचारी के रूप में काम जादे मिले लागल बा.

नयका उमिर के लोगन में केहू में ई काम के जारी रखला में रुचि नईखे. नवीन के कहनाम बा कि अगर राज्य के दखल ना होखी त भविष्य पूरी तरह से अन्हारे में बा. “हमनी के युवा लईकन के ई सिखावल चाहतानी जा बाकिर केहू ई काम मुफ्त में ना करी.”

हमनी के कैमरा निकालत देख के उ कहेलन, “आओ आओ फोटो लोगे या वीडियो बनाओगे? जो भी करोगे हमारा क्या भला उससे? जो होगा भला वो तुम्हारा होगा (आईं आईं, का लेब फोटो कि वीडियो? जवनो लेब ओसे आपके भला होखी हमनी के ना).”

स्टोरी मृणालिनी मुखर्जी फाउंडेशन (एमएमएफ) के मदद से तइयार भइल हवे.

अनुवाद: विमल चन्द्र पाण्डेय