نہ گولی نہ بندوق، احتجاج کے لیے بس چھاتے

کیرالہ کے کوزی کوڈ (یا کالی کٹ) میں مانسون کی بارش ہو رہی ہے، لیکن یہ بارش اُس بزرگ آدمی کو پریشان نہیں کرتی جو رات کو ضلع کلکٹر کے دفتر کے باہر سوتا ہے۔ ان کے اوپر لگا کپڑے کا ٹینٹ صرف نام کا ہے۔ دن میں وہ قریب میں واقع ملا پورم میں تحریک پر آمادہ آدیواسی خاندانوں کے درمیان کندھے سے کندھا ملا کر بیٹھے دکھائی دیتے ہیں۔ تقریباً ۷۰ دنوں سے نیلمبور علاقہ کے ۶۰ آدیواسی خاندان ریاستی حکومت کے ذریعہ برسوں پہلے وعدہ کی گئی زمین کا مطالبہ لے کر غیر میعادی دھرنے پر بیٹھے ہیں۔

دھرنے کے کنوینر اور یہاں ہر وقت موجود رہنے والے ۹۶ سالہ آئینور واسو اس تحریک کی نظریاتی ریڑھ ہیں، جنہیں پیار سے سب ’گرو‘ واسو کہتے ہیں۔ ان کا لاغر جسم اور میٹھی آواز پختہ یقین سے بھری ہوئی ہے۔ جس عمر میں زیادہ تر لوگ آرام چاہتے ہیں، واسو اب بھی مظلوموں کی لڑائی لڑ رہے ہیں۔ ’’حکومت ان آدیواسی خاندانوں کو تکنیکی وجوہات کا بہانہ بنا کر دھوکہ دے رہی ہے،‘‘ اپنی جھریوں کے پیچھے سے چمکتی آنکھوں کے ساتھ وہ کہتے ہیں۔ ’’زمین ان کا حق ہے، کوئی خیرات نہیں۔‘‘

یہ تحریک آئی ٹی ڈی پی (مربوط قبائلی ترقیاتی پروجیکٹ) کے دفتر کے سامنے سال ۲۰۲۳-۲۴ میں منعقد ۳۱۴ دنوں کی بھوک ہڑتال کا اگلا مرحلہ ہے، جس میں نیلمبور کے انھیں آدیواسی خاندانوں نے حصہ لیا تھا۔

اُس وقت ضلع کلکٹر نے تحریری یقین دہانی کرائی تھی کہ ان ۶۰ خاندانوں میں سے ہر ایک کو چھ مہینے میں ۵۰ سینٹ زمین دی جائے گی۔ لیکن ۱۵ مہینے گزر جانے پر جب وعدے بہانوں میں بدل گئے، تو یہ خاندان پھر سڑکوں پر لوٹ آئے۔ اور گرو واسو، جنہیں کبھی ’خطرناک نکسلی‘ کہا گیا تھا، اس بار بھی ستیہ گرہ پنڈال کی سخت زمین پر راتیں گزار رہے ہیں۔

حالیہ برسوں میں یہ ان کی پہلی جدوجہد نہیں ہے۔ سال ۲۰۲۳ میں انہیں کوزی کوڈ ضلع میں پولیس کی کارروائی کے خلاف احتجاجی مظاہرہ کے سبب دو مہینے کی جیل ہوئی تھی۔ یہ معاملہ ۲۰۱۶ کا تھا، جب انہوں نے کوزی کوڈ میڈیکل کالج کے لاشوں والے کمرے کے باہر نیلمبور کے جنگلات میں مبینہ فرضی مڈبھیڑ میں مارے گئے ماؤ نواز کوپّم دیو راجن اور اجیتا کی موت کی جانچ کا مطالبہ کرتے ہوئے دھرنہ دیا تھا۔

انہوں نے گرفتاری کے بعد ضمانت لینے سے انکار کر دیا تھا۔ جیسا کہ پہلے بھی ہو چکا تھا، اس بار بھی جیل ان کے حوصلہ کو توڑ نہیں پائی، بلکہ بری ہونے کے بعد ریاستی تشدد پر ان کا حملہ مزید تلخ ہو گیا۔

کئی تحریکوں اور گرفتاریوں کے علاوہ، واسو آج کیرالہ میں ’چھاتا بنانے والے بزرگ‘ کے طور پر زیادہ مشہور ہیں۔ جمہوری تحریکوں کے درمیان جب انہیں وقت ملتا ہے، تو وہ اپنے تین ساتھیوں کے ساتھ مل کر چھاتا بناتے ہیں، جو مانسون کے موسم کی ایک لازمی ضرورت ہے۔ اور یہ چھاتے انہیں تقریباً آدھی صدی سے پناہ دے رہے ہیں۔

ہر سال مئی اور جون میں جب کیرالہ مانسون کی تیاری میں مصروف ہو جاتا ہے، کوزی کوڈ کے پوٹّ مال میں واقع ان کا کرایے والا دو کمروں کا گھر ایک ورکشاپ میں تبدیل ہو جاتا ہے۔ رنگ برنگے کپڑوں کے رول، اسٹیل کے ڈھانچے اور دھاگے کی ریلیں کمرے میں بکھری ہوتی ہیں، اور سوئی اور کپڑے کی مترنم آواز ہوا میں گونجتی رہتی ہے۔

واسو اپنے برانڈ ’ماری وِلّو‘ (قوس قزح) کے نام سے ہر سال تقریباً ۲۰۰۰ چھاتے سلتے ہیں۔ اس کام میں کبھی کبھی ان کے دور دراز کے کچھ رشتہ دار مدد کرتے ہیں۔ اسی ماری وِلّو چھاتوں سے حاصل ہونے والی آمدنی سے وہ کھانا، کرایہ، دواؤں کا خرچ اٹھاتے ہیں اور ان تحریکوں میں تعاون کرتے ہیں جن کے لیے وہ اب بھی لڑ رہے ہیں۔

یہ چھاتے بازار کے دیگر برانڈ سے ۵۰-۷۰ روپے سستے ہیں، لیکن معیار کے معاملے میں ان سے کہیں بھی کم نہیں ہیں۔ ’’چھاتے میرے لیے کافی ہیں،‘‘ وہ مطمئن لہجہ میں اور فخر کے ساتھ کہتے ہیں، اور اس موضوع پر تفصیل سے گفتگو کرنے سے پرہیز کرتے ہیں۔ ’’چھ مہینے کام کرنے سے میرا سال بھر کا گزارہ ہو جاتا ہے۔ مجھے خیرات نہیں چاہیے، مجھے عزت والی زندگی چاہیے۔‘‘ ان کے کمرے کی دیواروں پر ماؤ، مارکس، لینن اور اینگلس کی تصویریں آویزاں ہیں۔

کوزی کوڈ کے بہت سے لوگوں کے لیے ماری ولو چھاتا خریدنا صرف خریداری سے جڑا نہیں ہے۔ ’’واسو ویٹّن سے خریدا ہر چھاتا ان کی آزادی اور ایمانداری کو ہمارا سلام ہے،‘‘ سینٹ جوزف کالج، دیوگیری کی لکچرر دیپا تھامس کہتی ہیں۔

اسکولی بچوں کو ان کے رنگین چھاتے پسند ہیں؛ کارکن انہیں اتحاد کی علامت مانتے ہیں۔

مانسون کو اپنے کاروبار کی بنیاد بنانے سے بہت پہلے، واسو مالابار کے جنگلات اور باغات میں بھٹکنے والے ایک نوجوان نکسلی کارکن تھے۔

سال ۱۹۷۷ میں جب وہ جیل سے رہا ہوئے، تو کوئی اس ’سابق ’نکسلی‘ کو کام دینے کو تیار نہیں تھا۔ تب انہوں نے اس ہنر کو پھر سے آزمانے کا فیصلہ کیا جو انہوں نے ۱۹۵۵ میں سیکھا تھا، جب نوجوان کمیونسٹ کے طور پر انہوں نے پارٹی کے لیے بینڈ سیٹ خریدنے کے لیے فنڈ اکٹھا کرنے کی خاطر چھاتے بنائے تھے۔

جو کام تحریک کو سہارا دینے کے لیے شروع ہوا تھا، وہ اب معاش کا ذریعہ بن گیا۔ واسو غیر شادی شدہ ہیں اور اکیلے رہتے ہیں۔ ان کی بہن اور اس کی فیملی پاس میں ہی رہتی ہے۔ بہنوئی چھاتا بنانے کے کام میں ان کی مدد کرتے ہیں، جنہیں ان کے دوست اور حامی خریدتے ہیں۔

سال ۱۹۶۰ کی دہائی کے آخر میں جب نکسل باڑی کی گونج کیرالہ تک پہنچی، تو کوزی کوڈ کے نوجوان اور بے چین ٹریڈ یونین کارکن واسو نے مسلح انقلاب کی اپیل پر وہ راستہ اختیار کر لیا۔

کُنّیکّل نارائنن اور منداکنی نارائنن جیسے لیڈروں کے ساتھ مل کر انہوں نے باغات کے مزدوروں، بیڑی بنانے والوں اور بٹائی دار کسانوں کو سی پی آئی (ایم ایل) کے جھنڈے تلے متحد کیا۔ وہ بندوق بردار دستہ کے لیڈر نہیں تھے؛ ان کا کام متحد کرنا، انقلابی لٹریچر کی تبلیغ، پیغام پہنچانا اور خفیہ اکائیاں تیار کرنا تھا۔

سال ۱۹۷۰ میں، وہ تیرونیلّی مہم کی تیاریوں میں شامل تھے، جس میں نکسل رہنما اے ورگیس، جنہیں ’کیرالہ کا چے گویرا‘ کہا جاتا تھا، فرضی مڈبھیڑ میں مارے گئے۔ ورگیس کی موت کے کچھ ہی دنوں بعد پولیس نے واسو کو ’خطرناک انتہا پسند‘ بتا کر گرفتار کر لیا۔ تشدد کا کوئی ثبوت نہ ہونے کے باوجود، انہوں نے سات سال سے زیادہ عرصہ کنّور سنٹرل جیل میں گزارا، جہاں انہیں قید تنہائی اور اذیتیں برداشت کرنی پڑیں۔

جیل ہی ان کی یونیورسٹی بن گئی۔ وہاں انہوں نے مارکس، اینگلس، لینن اور امبیڈکر کو پڑھا، قیدیوں کو پڑھنا لکھنا سکھایا، اور اٹوٹ عزت نفس کی علامت بن کر ابھرے۔ ’’ریاست نے ان کے جسم کو بھلے ہی قیدی بنا لیا ہو، لیکن ان کے خیالات کو قید نہیں کر پایا،‘‘ ان کے ایک پرانے دوست یاد کرتے ہیں۔

سال ۱۹۷۷ میں رہا ہونے کے بعد کوئی انہیں نوکری دینے کو تیار نہیں ہوا۔

تب چھاتا بنانے کے ہنر نے انہیں سہارا دیا۔ جیل نے ان کی زندگی پر امٹ چھاپ چھوڑی تھی: وہ غیر مفاہمتی بنے رہے اور اقتدار کے تئیں مشکوک رہنے لگے۔ یہاں تک کہ وہ بائیں بازو کی پارٹیوں کو بھی شک کی نظروں سے دیکھنے لگے۔

رہائی کے بعد واسو مسلح انقلاب کی طرف نہیں لوٹے، بلکہ ٹریڈ یونین کی جدوجہد میں اتر گئے۔ سال ۱۹۸۰ کی دہائی میں، انہوں نے ماوور کی گوالیار ریان فیکٹری کے مشتعل مزدوروں کی قیادت کی۔ بڑلا کی ملکیت والی یہ اکائی آلودگی اور استحصال کے لیے بدنام تھی، اور یہ کیرالہ کے سب سے مشتعل مزدوروں کی لڑائی کا پلیٹ فارم بن گئی۔

یہیں انہیں ’’گرو واسو‘‘ نام ملا – گرو یعنی گوالیار ریان آرگنائزیشن آف ورکرز۔ ان کی قیادت میں مزدوروں نے چھنٹنی اور بندی کے خلاف تاریخی لڑائی لڑی اور فیکٹری کو دوبارہ کھلوایا۔

حالانکہ، جب انہوں نے دیکھا کہ یہی فیکٹری چالیار ندی کو زہر بنا رہی ہے اور گاؤوں میں کینسر پھیلا رہی ہے، تو انہوں نے پارٹی بدل لی اور فیکٹری کی مستقل بندی کے لیے تحریک چھیڑ دی۔ یہ ایک انوکھی تبدیلی تھی: جو لیڈر کبھی فیکٹری کھلوانے کے لیے لڑا تھا، وہی بعد میں کیرالہ کا سرکردہ ماحولیاتی کارکن بن گیا۔

’’ان کے چھاتے بھی ان کی سیاست کی توسیع ہیں – عزت نفس، خود انحصاری اور عزم مصمم کی علامت،‘‘ کے اجیتا کہتی ہیں، جو خود سابق نکسل وادی ہیں اور بعد میں فیمنسٹ لیڈر بنیں۔

ان کے معمولی سے گھر کی دیواریں ان کی کہانی بیان کرتی ہیں۔ ایک پرانے ٹی وی کے اوپر مارکس، ماؤ، لینن، اینگلس، چے گویرا اور بی آر امبیڈکر کی تصویریں آویزاں ہیں۔ ’’میں مانتا ہوں کہ مارکس تاریخ کے سب سے بڑے مفکر ہیں،‘‘ واسو کہتے ہیں۔ ’’لیکن ہندوستان کے تناظر میں امبیڈکر زیادہ اہم ہیں۔‘‘

معاشی طور پر آزاد اور اب بھی مزدوروں، آدیواسیوں اور طلباء کے ساتھ کندھے سے کندھا ملا کر کھڑے واسو کی زندگی عزم اور اصول کی مثال ہے۔ ان کے چھاتے صرف استعمال کی چیزیں نہیں، بلکہ احتجاج سے بُنی زندگی ہیں۔ نیلمبور کے جنگلات سے لے کر ملاپورم کے ستیہ گرہ پنڈالوں تک، ماوور کی فیکٹری کے دروازوں سے لے کر کوزی کوڈ کی بارش میں بھیگی گلیوں تک – یہ سفر عزم کی سوئی سے سلا گیا ہے۔

جب ان سے پوچھا گیا کہ لوگ اب بھی ان کے چھاتے کیوں خریدتے ہیں، تو وہ مسکراتے ہیں، ’’کیوں کہ وہ میرے اعتماد پر بھروسہ کرتے ہیں۔ اور اس لیے بھی، کیوں کہ چھاتے اچھے ہیں۔‘‘

ترجمہ نگار: قمر صدیقی