موہٹے میں ہے توہم پرستی کا بول بالا

قرض میں ڈوبے ہونے کے باوجود کیرو دہیفلے نے مئی ۲۰۲۵ کے پہلے ہفتہ میں اپنے پورے گاؤں موہٹے کے لیے دعوت کا اہتمام کیا۔ تقریباً ۳۰۰۰ لوگ ان کے ٹین کی چھت والے کچے مکان کے سامنے ایک ایکڑ کھیت میں جمع ہوئے اور تہوار کے موقع پر تیار کی گئی شاندار سبزی خور ضیافت سے لطف اندوز ہوئے۔

خرچ: ڈیڑھ لاکھ روپے۔

یہ اتنی بڑی رقم ہے جو ۷۰ سالہ دہیفلے کے پاس موجود نہیں تھی۔ انہوں نے یہ پیسہ ایک نجی ساہوکار سے تین فیصد ماہانہ (یعنی ۳۶ فیصد سالانہ) سود پر قرض لیا۔ خراب موسمِ سرما کی فصل کے بعد یہ بوجھ ان کے گلے کی پھانس بن سکتا ہے۔ انہوں نے پیاز کی کاشت کی تھی لیکن قحط کے باعث فصل سوکھ گئی اور انہیں ۳۵ ہزار روپے کا نقصان ہوا۔

گزر بسر کی جدوجہد کے باوجود دہیفلے نے کبھی یہ سوچا بھی نہیں کہ وہ دعوت کا اہتمام نہ کریں۔ ’’ورنہ دیوی مجھے آشیرواد نہ دیتی اور میری مرادیں پوری نہ کرتیں،‘‘ وہ کہتے ہیں۔

موہٹے گاؤں اہِلّیہ نگر (سابقہ احمد نگر) ضلع کے پاتھرڈی تعلقہ میں آتا ہے۔ دہیفلے کا گھر مشہور موہٹا دیوی مندر سے اترتی ہوئی ایک گھماؤدار سڑک پر واقع ہے۔ یہ عظیم الشان چار منزلہ عمارت ہے، جس کی ۲۰۰۹ سے ۲۰۱۳ کے درمیان قریب ۲۰ کروڑ روپے کی لاگت سے تزئین و آرائش کی گئی تھی۔ یہ مندر مہاراشٹر کی سب سے مقبول ہندو زیارت گاہوں میں سے ایک ہے، جہاں ہر سال تقریباً ۲۵ لاکھ عقیدت مند آتے ہیں۔

لیکن زائرین اُس دیوی کے رکھوالوں کے مشکوک ماضی سے انجان بنے رہتے ہیں جس کی وہ پوجا کرتے ہیں۔ مندر ٹرسٹ چلانے والے بابا سنگین تنازعات میں الجھے ہوئے ہیں۔ مگر زائرین کو یہ کہہ کر تسلی دی جاتی ہے کہ اس سے کوئی فرق نہیں پڑتا، کیونکہ موہٹا دیوی اپنے عقیدت مندوں کو برکت دینے کے لیے مشہور ہے۔

دہیفلے کے دو بیٹے ہیں جو عمر کی تیسری دہائی کے آخر میں ہیں۔ دونوں شادی شدہ ہیں اور الگ الگ شہروں میں چھوٹے موٹے کام کر کے بمشکل گزر بسر کر رہے ہیں۔ ’’میں نے دعوت رکھی، تاکہ اُن کی زندگی میں ترقی ہو۔ مجھے یقین ہے کہ دیوی اُنہیں ویسے ہی آشیرواد دے گی جیسے اُس نے مجھے اور میری بیوی کو دیا،‘‘ دہیفلے کہتے ہیں۔

تقریباً ۳۰ سال پہلے، وہ اپنے گاؤں کے کنویں سے پانی بھرتے وقت توازن کھو بیٹھے اور اندر جا گرے، جس سے انہیں اتنا شدید زخم آیا کہ وہ ایک مہینہ تک کوما میں رہے۔ دو سال پہلے وہ آم توڑنے کے لیے ایک درخت پر چڑھے ہی تھے کہ اچانک گر پڑے۔ دونوں حادثات ان کی جان لے سکتے تھے۔ دہیفلے کا ماننا ہے کہ وہ آج زندہ ہیں تو صرف دیوی کے آشیرواد سے۔

ان کی بیوی اندو، جو لگ بھگ دہیفلے کی ہی عمر کی ہیں، کمزور گھٹنوں کی وجہ سے برسوں تک پریشان رہیں۔ پھر اُنہیں مندر ٹرسٹ میں بطور باورچن نوکری مل گئی۔ وہ چھ دن کے کام کے عوض ماہانہ ۷۰۰۰ روپے کماتی ہیں – یعنی تقریباً اُتنا ہی جتنا مہاراشٹر میں کوئی مزدورمنریگاکے تحت کما سکتا ہے۔ ’’اب وہ روزانہ دو کلو میٹر پہاڑی راستہ چڑھ کر مندر پہنچتی ہے۔ اگر یہ دیوی کا کرشمہ نہیں تو پھر اور کیا ہے؟‘‘ دہیفلے کہتے ہیں۔

موہٹے گاؤں کے لوگ بڑی تعداد میں موہٹا دیوی کے عقیدت مند ہیں اور ہر سال گرمیوں میں لگاتار چار مہینے تک کوئی نہ کوئی مالی طور پر مشکلات کا شکار کسان خاندان باقی گاؤں کے لیے دیوی کے اعزاز میں دعوت کا اہتمام کرتا ہے۔

توہم پرستی کے خاتمہ کے لیے کام کرنے والی تنظیم ’اندھ شردّھا نرمولن سمیتی (اے این آئی ایس)‘ کے حمید دابھولکر کہتے ہیں کہ عام طور پر لوگ ایک انجانی طاقت سے خوفزدہ رہتے ہیں اور خود کو محفوظ محسوس کرنا چاہتے ہیں۔ اُن کے مطابق، ’’وہ بابا جو خود کو بھگوان کا رکھوالا بتاتے ہیں، معصوم شہریوں کی کمزوری اور لاعلمی کا فائدہ اٹھاتے ہیں۔ نفسیاتی نقطہ نظر سے دیکھا جائے تو کچھ بابا یا مندر ٹرسٹ آپ کے مسائل کو باہر لے جا کر ایک جادوئی علاج کا وعدہ کرتے ہیں۔ یہ ایک پرکشش طریقہ ہے جس کے لیے ہم فطری طور پر کمزور ہیں اور یہی کمزوری اُنہیں دھوکہ دہی کرنے کا موقع فراہم کرتی ہے۔‘‘

سال ۲۰۱۵ میں موہٹا مندر کے ٹرسٹ، جس کا سرکاری نام ’شری جگدمبا دیوی ساروَجنک ٹرسٹ‘ ہے، نے فیصلہ کیا کہ دیوی کے بتوں کے نیچے ۹۱ سونے کے بنے اوزار دفن کیے جائیں۔ اس منصوبہ کی تجویز میں کہا گیا کہ اس کا مقصد یہ ہے کہ ’’کائنات سے آنے والی توانائی کی باریک لہروں کو جذب کرکے عقیدت مندوں کو آشیرواد دیا جائے۔‘‘ توانائی کی ان لہروں سے عقیدہ کو مزید مضبوط بنانے اور زائرین کے تجربے کو بہتر کرنے کا دعویٰ کیا گیا، جس سے ’’مندر میں زیادہ چندہ‘‘ آنے کی توقع ظاہر کی گئی۔

یہ تجویز اُس وقت منظور ہوئی جب ٹرسٹ میں عدلیہ کے دو افراد شامل تھے– نتن تربھون (جو اُس وقت جوڈیشل مجسٹریٹ تھے) اور ناگیش نہاوکر (جو ضلعی عدالت کے جج تھے)۔

مندر ٹرسٹ کا آئین اس طرح بنایا گیا ہے کہ احمد نگر کا ضلعی جج اس کا چیئرمین ہوتا ہے۔ لہٰذا ہر تین سال یا اس کے آس پاس ٹرسٹ کا چیئرمین بدلتا رہتا ہے۔

وہ سونے کے اوزار، جو بتوں کے نیچے دفن کیے گئے تاکہ مندر کی توانائی کو ’’مزید بڑھایا‘‘ جا سکے، تقریباً دو کلو وزنی تھے اور ۲۰۲۵ میں ان کی مالیت دو کروڑ روپے کے قریب تھی۔ اس کام کو انجام دینے کے لیے ٹرسٹ نے مقامی بابا پردیپ جادھو کا انتخاب کیا، جنہوں نے اپنی فیس ۲۵ لاکھ روپے بتائی۔ یہ منظور بھی ہوگئی، حالانکہ ٹرسٹ کے اپنے ضابطہ کے مطابق ۲۰ ہزار روپے سے زیادہ لاگت والے کسی بھی کام کے لیے ٹینڈر جاری کرنا لازمی ہے۔ مگر چونکہ یہ کام ’’غیر معمولی‘‘ قرار دیا گیا، اس لیے اس شرط کو نظرانداز کر دیا گیا۔ جادھو نے ان اوزاروں پر منتر پڑھا، جس کے بعد ٹرسٹ نے انہیں زمین میں دفن کر دیا۔

پورا معاملہ بے ضابطگیوں، بدعنوانی اور توہم پرستی کے فروغ سے بھرا ہوا تھا۔ اس میں عدلیہ کے دو افراد کا ٹرسٹ اور اس عمل کا حصہ ہونا معاملے کو مزید سنگین بنا رہا تھا۔ اس اسکینڈل کو سب سے پہلے مراٹھی اخبار لوک مت میں شائع ہونے والی سلسلہ وار رپورٹوں نے بے نقاب کیا۔ اس کے بعد ۲۰۱۷ میں اے این آئی ایس نے چیریٹی کمشنر کے دفتر میں شکایت درج کرائی۔ صرف دو سال بعد اُس وقت کے ایک ٹرسٹی، نام دیو گرڈ نے بمبئی ہائی کورٹ کی اورنگ آباد بنچ سے ٹرسٹ کے کام کاج کے خلاف کارروائی کی درخواست کی۔ عدالت نے دونوں شکایتوں کو یکجا کر کے ۲۰۲۱ میں پولیس تحقیقات کا حکم دیا۔

نام دیو گرڈ، جو ڈھائی ایکڑ کھیت کے مالک ہیں، کہتے ہیں، ’’میں نے مندر ٹرسٹ کے کام کاج میں مالی بے ضابطگیاں دیکھیں۔ سب کچھ مشکوک لگ رہا تھا۔ میں نے بار بار میٹنگوں میں بدعنوانی کے بارے میں سوال اٹھائے مگر مجھے نظرانداز کر دیا گیا۔ میں نے کہا کہ یہاں کے عقیدت مند غریب اور دیہی پس منظر سے تعلق رکھتے ہیں۔ آخرکار میں نے بولنے کا فیصلہ کیا۔‘‘

گرڈ اور ان کے وکیل ہریہر گرجے (۴۴)، جو پاتھرڈی تعلقہ کے مقامی ہیں، کو اپنے اقدام کے بدلے سخت ردعمل اور دھمکیوں کا سامنا کرنا پڑا۔ گرڈ کہتے ہیں، ’’جب لوک مت نے سلسلہ وار اسٹوریز شائع کیں، تو میرے خلاف پولیس میں شکایت درج کرائی گئی کہ میں نے مندر ٹرسٹ کی بدنامی کی اور مذہبی جذبات کو ٹھیس پہنچایا۔ جب بھی میں گھر سے نکلتا، تو میری بیوی پریشان ہو جایا کرتی تھی۔ جن لوگوں کو میں نے للکارا تھا وہ طاقتور اور بااثر تھے۔ میرا بیٹا اُس وقت قانون کی تعلیم حاصل کر رہا تھا۔ اُسے طعنے دیے گئے، ’اب تم اپنے باپ کا مقدمہ لڑ سکتے ہو۔‘ ہماری فیملی جو کبھی کسی عدالت یا پولیس کے معاملے میں نہیں پھنسی تھی، یہ سب ہمارے لیے بڑا جھٹکا تھا۔‘‘

گرڈ (۵۸ سالہ) امراپور تعلقہ (جو پاتھرڈی کے ساتھ لگا ہوا ہے) میں ایک تعلیمی ادارہ چلاتے ہیں اور ان غریب بچوں کے لیے ایک لائبریری بھی قائم کی ہے جو مقابلے کے امتحانات کی تیاری کر رہے ہیں۔ سخت ردعمل کے باعث وہ تقریباً ایک ہفتہ تک روپوش رہے۔ مقامی لوگوں نے اُنہیں اور گرجے کو ہندو مذہب پر حملے کا ذمہ دار ٹھہرایا۔ بعد ازاں اورنگ آباد بنچ کی طرف سے تحقیقات کا حکم آنے کے بعد مندر ٹرسٹ نے الزامات واپس لے لیے، گرڈ نے مزید بتایا۔

حمید دابھولکر کا کہنا ہے کہ بڑھتی ہوئی ہندو اکثریتی سوچ مندر کے ٹرسٹوں کو یہ موقع دیتی ہے کہ وہ خود کو مظلوم ظاہر کریں اور اپنی دھوکہ دہی کی سرگرمیوں کے انکشاف کو مذہب پر حملہ قرار دیں۔ اُن کا کہنا ہے، ’’بابا اور مندر ٹرسٹوں نے ہمیشہ ہی ہندوستان میں غیر متناسب طاقت حاصل کی ہے۔ لیکن موجودہ ماحول نے اُن کی پہلے سے موجود خطرناک بے خوفی کو اور بڑھا دیا ہے۔‘‘

لیکن وہ کہتے ہیں کہ مہاراشٹر کا انسدادِ توہم پرستی بل اُنہیں جواب دینے کی گنجائش فراہم کرتا ہے۔ حمید کے والد، نریندر دابھولکر– جو اے این آئی ایس کے بانی اور انسدادِ توہم پرستی مہم کے پیش رو تھے– نے اپنی پوری زندگی اس بل کو حقیقت بنانے کے لیے جدوجہد کی۔ سال ۲۰۱۳ میں اُنہیں پُنے میں ہندو مذہبی انتہا پسندوں نے قتل کر دیا تھا۔ اُن میں سے دو افراد کو بعد میں اُن کے قتل کے جرم میں سزا ہو چکی ہے۔ اُن کی شہادت کے فوراً بعد مہاراشٹر حکومت نے یہ بل پاس کیا اور یہ ریاست میں قانون بن گیا۔

حمید نے بتایا، ’’انسدادِ توہم پرستی بل کی اہمیت یہ ہے کہ یہ جامع انداز میں ریکارڈ کرتا ہے کہ توہمات کسی بھی مذہب کا حصہ نہیں ہیں۔ اور یہ قانون کے ذریعہ تسلیم کیا جا چکا ہے۔‘‘

گرڈ اوراے این آئی ایسکی مداخلت کے بعد، موہٹا مندر کے ٹرسٹیوں پر اسی قانون کے تحت مقدمہ درج ہوا، جو ماورائی طاقتوں اور کرامات کے دعوے کو جرم قرار دیتا ہے۔

مگر پولیس کی تحقیقات اور مزید کارروائی مایوس کن رہی، جو موہٹا مندر ٹرسٹ کی طاقت اور اثر و رسوخ کی مثال ہے۔ صرف پانچ افراد کو مالی بدعنوانی اور توہم پرستی کو فروغ دینے کے الزام میں گرفتار کیا گیا، جن میں پردیپ جادھو بھی شامل ہیں – وہی بابا جنہوں نے سونے کے اوزار دفنانے کا منصوبہ مکمل کیا۔ لیکن دونوں ججوں کو کسی قانونی انجام کا سامنا نہیں کرنا پڑا۔ حالانکہ اُن کے نام اصل شکایت میں شامل تھے، مگر چارج شیٹ میں اُن کا ذکر تک نہیں کیا گیا۔

یہ مقدمہ اس وقت اہلیہ نگر کے چیف جوڈیشل مجسٹریٹ کی عدالت میں زیرِ سماعت ہے۔پاریسے بات کرتے ہوئے مندر ٹرسٹ کے موجودہ سی ای او، سُریش بھانگے نے کہا، ’’یہ کیس پچھلے ٹرسٹیوں کے خلاف چل رہا ہے اور موجودہ ٹرسٹ کا اس سے کوئی تعلق نہیں ہے۔ یہ سب کچھ پچھلے ٹرسٹیوں کی انتظامیہ کے دوران ہوا۔ اب مجھے اس کے بارے میں کچھ نہیں معلوم۔ مندر ٹرسٹ اس میں شامل نہیں ہے۔‘‘

مہاراشٹر کے کونے کونے سے آنے والے ہزاروں زائرین کے باعث، موہٹا مندر ٹرسٹ عقیدت مندوں سے کروڑوں روپے جمع کرتا رہتا ہے۔ یہ ایک مذہبی ٹرسٹ ہے، جس کا مطلب ہے کہ یہ ٹیکس نہیں دیتا۔ اسے اپنے کھاتوں کو عوام کے سامنے پیش کرنے کی بھی کوئی قانونی پابندی نہیں ہے۔

یہ مندر طویل عرصے تک ایک عام سا، غیر نمایاں سا مقام تھا۔ لیکن اب یہ ایک تجارتی دیو ہیکل ادارہ بن چکا ہے۔ ایڈووکیٹ گرجے نے اس تبدیلی کو بچپن سے اپنی آنکھوں کے سامنے دیکھا ہے۔ وہ کہتے ہیں، ’’دیوی ہمیشہ اپنے عقیدت مندوں میں مقبول رہی ہے، جو روزگار یا شادی جیسے معاملات میں اس کی غیبی مداخلت کے طالب ہوتے تھے۔ یہ ذاتی عقیدے کا معاملہ ہے۔‘‘

لیکن وہ مزید کہتے ہیں کہ مسئلہ تب پیدا ہوتا ہے جب عقیدہ کا استعمال تجارتی فائدے کے لیے کیا جائے۔ ’’اور سب سے بڑی تشویش یہ ہے کہ ایک جج اس کی نگرانی کرتا ہے۔ ایک سیکولر ریاست میں کسی آئینی عہدے کو کسی مذہبی ٹرسٹ کا حصہ کیوں ہونا چاہیے؟‘‘

مندر ٹرسٹ کے سی ای او، سُریش بھانگے کا کہنا ہے کہ یہ پیسہ کئی فلاحی کاموں پر خرچ کیا جا رہا ہے، جیسے خشک سالی کے دوران پانی کے ٹینکر فراہم کرنا، اجتماعی شادیوں کا اہتمام کرنا، محروم خواتین کو ساڑیاں دینا، ذہنی طور سے معذور افراد کی امداد کرنا، اور غریب عقیدت مندوں کے لیے روزانہ دو وقت کا مفت کھانا فراہم کرنا۔ اس کے علاوہ ٹرسٹ نے وبا کے دوران کووڈ۔۱۹ سینٹر قائم کیا، راشن، دوائیاں اور ٹیسٹنگ کٹس بھی تقسیم کیے۔

پاتھرڈی تعلقہ، جہاں موہٹا مندر واقع ہے، گنے کے مزدوروں کا ایک بڑا مرکز بھی ہے۔ یہ مزدور سب سے محروم طبقات سے تعلق رکھتے ہیں۔ وہ محض ۳۰ ہزار سے ۴۰ ہزار روپے چھ ماہ کے بدلے مغربی مہاراشٹر یا کرناٹک ہجرت کرتے ہیں اور انتہائی مشکل حالات میں غلامی جیسی مشقت کرتے ہیں۔

اکثر صورتوں میں یہ مزدور اپنے بچوں کو بھی ساتھ لے جاتے ہیں، کیونکہ پیچھے دیکھ بھال کے لیے کوئی نہیں ہوتا۔ اس طرح بچوں کی تعلیم قربان ہو جاتی ہے۔ ان بچوں کے لیے، بھانگے کے مطابق، مندر ٹرسٹ نے ایک ہاسٹل قائم کیا ہے جس میں اس وقت ۱۲۴ بچے رہتے ہیں – جن میں سے ۸۰ فیصد گنے کے مزدوروں کے بچے ہیں۔

اہلیہ نگر کے رہائشی ایک ماہر تعلیم اور سابق اسکول پرنسپل، ہیرمبھ کلکرنی کہتے ہیں کہ موہٹا جیسے مندر ٹرسٹ اپنی جمع کی گئی دولت کے حساب سے کہیں زیادہ کام کر سکتے ہیں، اور پھر بھی یہ توہم پرستی کو پھیلانے کا جواز نہیں بنتا۔ وہ کہتے ہیں، ’’لیکن ان مذہبی ٹرسٹوں کا اصل مقصد پیسہ بنانا ہے۔ کوئی سیاست داں بھی یہ بات کہنے کی جرأت نہیں کرے گا، کیوں کہ فوراً اُسے ہندو مخالف قرار دے دیا جائے گا۔‘‘

المیہ یہ ہے کہ چھ ماہ کے لیے دوسرے علاقوں کی طرف ہجرت کرنے سے پہلے، سینکڑوں گنے کے مزدور موہٹا مندر آتے ہیں اور دیوی سے دعا و آشیرواد لیتے ہیں۔

کلپنا چورمالے (۳۲)، چھ ماہ کی کڑی مشقت کے بعد مئی ۲۰۲۵ میں اپنے گاؤں کاروڈی واپس لوٹیں اور اب مانسون سے پہلے کاشت کے سیزن کی تیاریوں میں مصروف ہیں۔ اُن کے دو بیٹے، ۱۴ اور ۱۳ سال کے، بھی اُن کے ساتھ گئے تھے اور صرف امتحان دینے کے لیے پاتھرڈی واپس لوٹے۔ وہ کہتی ہیں، ’’یہ اُن کے لیے بہت مشکل تھا۔ دن رات گنا کاٹتے ہوئے پڑھائی کرنا ناممکن ہے۔ ہم میں سے کوئی بھی اتنا پڑھا لکھا نہیں ہے کہ اُن کا ہوم ورک چیک کر سکے۔ اسی طرح ہمارے بچے اسکول میں پیچھے رہ جاتے ہیں، اور پھر زندگی میں بھی پیچھے رہ جاتے ہیں۔‘‘

اپنے نیم روشن کچے شیڈ میں، جس کی چھت پر گھاس پھونس اور اطراف میں ٹین کی چادریں ہیں، کلپنا – جو دھنگر برادری (مہاراشٹر میں ایک خانہ بدوش قبیلہ) سے تعلق رکھتی ہیں، خاموشی سے اپنی بستی کے ساتھیوں کی بات سنتی ہیں جو سمجھا رہے ہیں کہ موہٹا دیوی سب سے زیادہ فعال دیویوں میں سے ایک ہے۔

مہادیو چورملے (۴۳) جو اُن کے دیور ہیں، اپنی بستی کے اردگرد مٹی کھودتے ہوئے بتاتے ہیں کہ اُن کی بیوی شاردا کے کان کے پیچھے ایک گلٹی نکل آئی تھی، جو اس وقت غائب ہو گئی جب دونوں نے دیوی سے شفا کے لیے دعا کی۔ وہ کہتے ہیں، ’’جب وہ ہمیں آشیرواد دیتی ہے، تو ہم اپنی آمدنی کے حساب سے جتنا ممکن ہو سکے چندہ دیتے ہیں۔‘‘

میں کلپنا سے پوچھتا ہوں، جو اپنی گرم اور حبس بھری جھونپڑی میں آم کے اچار کی ایک بالٹی بھر رہی ہیں، ’’کیا آپ نے دیوی سے کچھ مانگا؟‘‘

وہ جواب دیتی ہیں، ’’کیوں بلاوجہ اُس پر بوجھ ڈالوں؟ میرے مسائل میرے اپنے ہیں۔ یہ اُس کا کام نہیں کہ اُنہیں حل کرے۔‘‘

یہ اسٹوری پلٹزر سینٹر سے امداد یافتہ توہم پرستی پر مبنی سلسلے کا حصہ ہے

ترجمہ نگار: قمر صدیقی