'छात्र कुल के बिरोध हमरा जइसन महतारी खातिर बा'

सना शेख के एगो सपना रहे. 19 साल के सना एगो अस्पताल खोले के चाहत रहली औरी ओकर नाम अपना बाबूजी, जाफर हुसैन के नाम प धरे के चाहत रहली.

50 साल के हुसैन, आंध्र प्रदेस के अपना गांव प्रोडतूर से लमसम 12 साल पहिले काम खातिर कुवैत चल गईल रहलन, काहे से कि उनका बैपार में भारी नोकसान भईल रहे.

आपन बेटियन के अच्छा पढ़ाई करावे खातिर उनकर 40 बरीस के मेहरारू हबीब-उन-निसा शेख आपन तीनू बेटी के ले के हैदराबाद चल गईली. उ अपना माई के घर के लगहीं के एगो अपार्टमेंट में रहे लगली.

हबीब-उन–निसा कहली, “सना अपना बाप के बहुत मानेली उ दुनु जाना बाप-बेटी रोज बिहाने बतियावे लोग. सना के मालूम रहे कि उनकर बाबूजी केतना कुर्बानी देले बाड़न. नोकसान भईला के बा, उनका दूर जाए के परल रहे, एही से उ आपन कामयाबी उनकर के समर्पित करे के चाहत रहली.”

3 मई, 2026 के जब सना अपना परीक्षा हॉल से बहरा निकलली, त उ सबसे पहिले अपना अब्बू के फोन कईली. हुसैन बतवलन, “उ बहुत गर्व से हमरा के बतवली कि उ आपन सब पेपर बहुत अच्छा से कईले बाड़ी.” हम उनका से कहनी कि उ अपना माई के साथे जश्न मनावस, चाहे बहरा जा के कौनो होटल में खा लेस.”

एगो औरी कम उमिर के लईकी, एस. अनीता जे 17 साल के बाड़ी, उनकरो एगो सपना रहे. अनीता तमिलनाडु के कुडुमुर गांव के एगो दलित परिवार से बाड़ी. जब उ सात साल के रहली उनकर माई एगो बेमारी के चलते गुजर गईली. उनकर बाबूजी सब्जी मंडी में दिहाड़ी मजूर रहलन. अनीता डाक्टर बने के चाहत रहली.

उनकर 36 साल के भाई मणि रत्नम कहलन, “उ बड़हन हो के हमनी जइसन जरूरतमंद परिवार के स्वास्थ्य सेवा करे के चाहत रहली.” उ सुरुये से हुसियार लईकी रहली.

उ अपना बोर्ड परीक्षा में 98 परसेंट नंबर ले अईली. इ उनका पसंद के कॉलेज में पढ़े औरी आपन सपना पूरा करे खातिर ढेर होखे के चाहत रहे.

दुनू लईकी पिछड़ल परिवार से रहली. दुनू जनी के समाज के मस्किल के पार करे औरी आपन जिनगी के खुसहाल बनावे के अपना काबिलियत प भरोसा रहे भरोसा रहे. बाकिर ओ लोग के सपना अचक्के टूट गईल. दुनू दुखद घटना में 9 साल के अंतर रहे. बाकिर एगो बात एक रहे कि नेशनल एलीजीबीटी कम एंट्रेंस टेस्ट, नीट भारत के नेशनल मेडिकल एंट्रेंस एग्जाम ओ सब के साथे फरके-फरके अन्याय कईल.

अनीता के मिरतु 2017 में भईल. उ नीट से जुडल आत्महत्या के पहिलका मामला रहली. सना पछिला महीना आपन जान दे दहली. औनलाइन न्यूज पोर्टल ‘न्यूजलौंड्री’ के बतावला से, इ दसक में मीडिया रिपोर्ट में अलगे-अलगे परीक्षा में पेपर लीक के 89 मामला सामने आईल, जौना में नीट में सामिल होखे वाला छात्र समेत कम से कम 6.5 करोड़ छात्र परभावित भईल.

जुलाई 20, 2026 के जब दिल्ली के जंतर-मंतर प भारत के नौजवान लईकन के जमा भईल खीस फूटल तब अनीता औरी सना के परिवार वाला लोग उ सब के साथे सामिल हो गईल. उ सब बिरोध करत छात्र कुल के संघे एकजुटता देखावे खातिर अपना-अपना राज्य राज्य से राष्ट्रीय राजधानी पहूंच गईल. पढी, ‘हम दिल्ली याद दिलावे अइनी कि हमनियो के वजूद बा.’

‘कॉकरोच जनता पार्टी’- जे पहिले एगो मीम पन्ना रहे औरी बाद में एगो आन्दोलन बन गईल- उ ऑल इंडिया स्टूडेंट्स एसोसियेशन’ औरी ‘ऑल इंडिया स्टूडेंट्स फेडरेशन’ जइसन छात्र संगठन कुल के साथे मिल के 20 जुलाई, 2026 के संसद तक ले शांतिपूर्ण ढंग से गोल (मार्च) निकाले के एलान कईल.

प्रदर्शनकारी लोग सिक्षा मंत्री धर्मेन्द्र प्रधान के इस्तीफा के मांग करत रहे. एकरा से पहिले लद्दाख के पर्यावरण कार्यकर्ता सोनम वांगचुक औरी छात्र कार्यकर्ता नेहा बोरा, मनीष कुमार औरी आमीन अमितोज जंतर-मंतर प भूख हड़ताल प बईठल रहे. मांग रहे- सिक्षा वाला परीक्षा कुल औरी सरकारी भर्ती में जवाबदेही औरी साफ़ सफाई प होखे.

भारी पुलिस बल औरी सुरक्षा तैनाती के बीच, हजारों लोग- जौना में बेसी कर के नौजवान रहे- जंतर-मंतर के सड़क प उमड़ गईल. सरकार बिरोधी नारा से आसमान गूंज गईल औरी उ जगह विरोध पर्द्सन के एगो उत्सव में बदल गईल. एकरा जवाब में केंद्र सरकार इंटरनेट सेवा बंद क दहल औरी पुलिस आ अर्धसैनिक बल के ऊंहा भेज दहल.

जईसे-जईसे दिन आगे बढ़ल, नारा के जघ़े आंसू गैस के गोला के फुफकार औरी शांतिपूर्ण पर्दरसनकारी लोग प लाठी चार्ज के हल्ला ले लहलस. ओ सब के गहीरा घाव लागल, माथा प से खून बहत रहे. सयान लयिकिन के कपड़ा फार दहल गईल. ईंह ले कि कम उमिर के छात्र कुल के ना छोड़ल गईल. कम से कम तीन छात्र कुल पैलेट गन के सिकार हो गईल. कश्मीर में पैलेट गन से कई लोग के आंख के रोशनी छिनाए के घटना सामने आ चुकल बा.

हेतना बेदनाई के कार्यवाही के बादो छात्र कुल जंतर-मंतर लौट आयिलन. औरी पहिले से बेसी जोस के साथे प्रदर्सन स्थल पर काबिज हो गईले.

हबीब-उन-निसा जौन हिंसा देखली, ओकरा से उ डेरा गईली. बाकिर प्रदरसनकारी कुल से उनका बलो मिलल. गुजर गईल सना शेख के माई पारी से कहली, “हम एगो साधारण माई बानी जेकर दुनिया ओकर लईके हवन कुल. हम एगो गृहस्थिन जइसन आपन जिनगी गुजरले बानी, बाकिर सत्ता में बईठल लोग एकरा के तहस-नहस क दहल. ओही लोग के चलते हमार बेटी जान चल गईल. रउआ सबनी के हमनी के जान बचावे के चाहीं ना कि हमनी के जिनगी बर्बाद करे के चाहीं.”

3 मई, 2026 के सना के परीक्षा में बहुत अच्छा कईला के बाद, केंद्र सरकार घोसना कईलस कि नीट के पेपर खुल गईल बा, त छात्र कुल के दुबारा से परीक्षा देवे के होई. उ एकदम टूट गईली. ओकर जबरदस्त तैयारी के ओकरा ऊपर पहिलही बहुत असर परल रहे. नीट एगो बहुत मस्किल परीक्षा ह, जेमे मेडिकल कालेजन में 1,30,000 से कम सीट खातिर 20 लाख से बेसी लोग मोकाब्ला करेला. सालन के तैयारी के बाद, सना के बुझाइल कि अब उ दबाव ख़तम हो गईल बाकिर अब उनका फेर से ऊहे मस्किल समय से गुजरे के होई.

अफ़सोस के बात बा कि दुबारा परीक्षा दहला के बोझा, आत्महत्या के नोट लिखे से बेसी भारी लागल. 21 जून के होखे वाला दुबारा परीक्षा के एक दिन पहिले, अपना कोठरी में फंदा कसे से पहिले उ लिखली,, “हमरा के माफ़ क दीहा”

उ ओ 20 लईकन में से एगो रहली, जे एही कारन से आत्महत्या क लहल.

जफ़र कहलन, “उ बिहाने उ हमार कौल के कवनो जवाब ना दहलस. सायद हम ओकरा से बात क पवतीं, त आज उ हमनी के साथे रहीत.”

दुखमी माई हबीब-उन-निसा कहली, “एतना दूर खाली एहीसे आईल बानी कि बता सकीं कि हम कौना समय से गुजर रहल बानी.” उनका अभियो इ माने में मस्किल होता कि उनकर जेठ बेटी अब इ दुनिया में नईखी. उ कहली, “हम पांच साल में मर जाईं चाहे बुढापा ले जिंदा रहीं, बाकिर इ दरद हम जिनगी भर अपना साथे ले के चलेम. रात में हमारा ठीक से नींन ना लागेला, आधा रात के हमार हाथ-गोड़ कांपे लागेला.”

तभिनो माई बाप आपन दू गो लईकी- जेकरा उमिर 15 साल औरी 11 साल बा- के पाछे छोड़ के दिल्ली आ गईल. “हम उनका बारे में सोचत रहेनी औरी बेकल हो जानी. हम इंहा सत्ता में बइठल लोग के ई बतावे आईल बानी कि- रउआ लोग गलत बानी. का सत्ता रउआ लोग के अंधा क देले बा? ई छात्र लोग हमरा अइसन माई लोग खातिर लड़ता. उ सब दुःख बुझे वाला बा. हमरा दुःख में सामिल लोग के पुलिस से पिटात देखल बहुत असहनीय रहे. जे रउआ हमार दरद बूझ नईखी सकत, त राउर सत्ता के का मतलब बा? किरपा क के लईकन प जुलुम मत करीं.”

मणि रत्नम खातिर इ डेजा वू (इतिहास के पुनरावृत्ति) जइसन अनुभव ह.

नीट के बिचार सबसे पहिले 2010 में आईल रहे औरी प्रधानमंत्री नरेंद्र मोदी के अगुअई वाला केंद्र सरकार के मानता रहे कि 2016 में नीट लागू करे से मेडिकल सिक्षा ब्यवस्था में सुधार होई. बाकिर इ कहला बेजायं ना होई कि दस साल बादो अइसन ना भयिल

तामिलनाडु उ सुरुआती राज्य में से एगो रहे जे नीट के बिरोध कईले रहे. औरी 2016 में ओ सब के एक साल के छूटो मिलल रहे जब जे. जयललिता मुख्यमंत्री रहली. राज्य सरकार के मानता रहे कि ओकर आपन सिक्षा बेवस्था बहुत बहुत मजबूत बा. औरी मेडिकल दाखिला खातिर कौनो औरी केन्द्रीय परीक्षा के जरूरत नईखे. 2021 में इ बात सही साबित भईल जब जस्टिस ए. के. राजन कमेटी नीट प आपन रिपोर्ट जारी कईलस.

रिपोर्ट में पावल गईल कि नीट के चलते वंचित आ पछुआयिल तबका के लईकन खातिर मेडिकल कौलेजन में दाखिला लहल औरी मस्किल हो गईल.

2010 में तमिलनाडु के अलगे-अलगे मेडिकल कौलेजन में दाखिला पावे वाल लईकन में से 80 प्रतिसत अंग्रेजी माध्यम वाला स्कूल से रहलें. 2017 में इ गिनती बढ़ के 90.41 परसेंट हो गईल. ऊंहई तमिल माध्यम से पढ़े वाला लईकन के गिनती 20 परतिसत से घट के 2 परतिसत से कम हो गईल.

जे पहिलहीं अकान लेले रहे कि अइसन होखे वाला बा, ऊ रहस मणि रत्नम के बहिन अनीता आ एगो दलित छात्र.

अगस्त 2017 में, उ पछिला साल मिलल छूट के आगहूं जारी राखे खातिर सुप्रीम कोर्ट के दुआरी गयीली. बाकिर सुप्रीम कोर्ट एसे इनकार क दहल. सितम्बर 2017 के जब घर में केहू ना रहे तब उ आत्महत्या क लहली. उ 17 साल के रहली.

मणि रत्नम कहलें, “ओकरा पूरा भरोसा रहे कि तामिलनाडु खातिर दहल छूट जारी रही. उ राज्य के बोर्ड परीक्षा में अपना के साबित कईले रहे. औरी नीट के परीक्षा खाली अपना अनुभव खातिर देले रहे. बाकिर जब सुप्रीम कोर्ट के फैसला आईल त ओकर दुनिए उजड़ गईल. जौना परीक्षा खातिर उ इतना मेहनत से तैयारी कईले रहे, ओकर त अब गिनतियो ना होखे वाला रहे.”

उनका मिरतु के बाद पूरा तमिलनाडु में भारी बिरोध प्रदर्शन भईल. छात्र कुल सड़क प उतर गईलें औरी अचक्के परदर्सन से रास्ता जाम करे लगलें. ओ लोग में से कुछ लोग त भूखो हड़ताल कईल. परदरसन कारी सब मोदी के पुतला जरावल. सैकड़न लोग के गिरफ्तार कईल गईल. जब 20 जुलाई के मणि रत्नम जंतर-मंतर प खड़ियाइल रहलन त उनका सितम्बर 2017 के बिरोध-परदरसन कुल मन पर गईल.

उ कहलन, “हमारा बुझाता कि पूरा देस ऊहे महसूस कर रहल बा जौन नौ साल पहिले तमिलनाडु कईले रहे. इ लिहाज से, हमरा खुसी बा कि इ मुद्दा अब राष्ट्रीय स्तर प पहुंच गईल बा. इ एगो फासीवादी सरकार ह औरी इ अपना छात्र कुल के सामान अवसर नइखे देवे के चाहत.”

सना के गईले एक महीना से बेसी हो गईल बा. जफ़र कुवैत से लौट आईल बाड़न. औरी अब घरही से काम खोजतारन.

उ कहलन, “हम अब अपना बीबी, बेटी कुल के छोड़ के नईखी जा सकत. हम बहुत कमजोर औरी उदास बानी. हमरा अब ईंहें कुछु करे के होई. बाकिर हम अब 50 साल से ऊपर के हो गईनी औरी इ उमिर में काम मिलल आसन त नईखे.”

उ हैदराबाद छोड़ के अपना गांव लौट आईल बाडन. सना के मिरतु के के बाद परिवार खातिर उंहा रहल अब मस्किल हो गईल रहे. उ जगह ओ सब के बेकल करे लागल रहे. हबीब-उन-निसा बतावत रहली कि सना के दराज साफ़ करे बेरिया उनकरा ओकर ढेर किताब मिलल. उ कांपत बोली में कहली, “उ केतना लगन से पढ़ाई कईले रहे. बाकिर हमनी उ दू बेटियन खातिर हिम्मत जोरे के होई, जे हमनी के लगे बाड़ी.”

बेटी कुली डाक्टर बने के मन बनवले बाड़ी. बाकिर ए प मिलल-जुलल प्रतिक्रया रहे. जाफर कहलन, “हमनी ओ सब प तनियक्को दबाव नयिखीं देवे के चाहत. हमनी ओ सब से कहले बानी कि उ लोग ऊहे करे जौन सही बुझाए. हमनी अभी सना के गम से उबरे के कोसिस कर रहल बानी.”

अनीता के मिरतु के एक साल बाद, मणि रत्नम अपना गांव में एगो लायब्रेरी सुरु कईलन, औरी ओकर नाम अनीता के नाम प धयिलन. उनका अपना छोट बहिन के मिरतु के बिपत से उबरे खातिर कुछु करे के जरुरत रहे. उ कहला, “हम ओकरा याद के सम्मान देवे के चाहत रहनी. हमनी पिछड़ा समुदाय के छात्र खातिर कार्यक्रम औरी स्टडी सेंटर चलावेनी. हमनी ओ सब के परीक्षा के तैयारी में मदद करेनी.”

उ आठ साल ले लायब्रेरी चलवलन. बाकिर फेर उनका पइसा के तंगी होखे लागल. नौ महीना पहिले उ एकरा के एगो भरोसा के आदमी के हाथे संउप दहलन. औरी चेन्नई में नौकरी क लहलन, जहां उ एगो स्किल सेंटर में एडमिस्ट्रेटर के रूप में काम करेलन.

तमिलनाडु राज्य उनकरा के भुलाइल नईखे. मार्च 2023 में, अरियालपुर जिला मेडिकल कॉलेज- जौना जिला में उनकर गांव आवेला- अपना औडिटोरियम के नाम अनीता के नाम प धयिलस. अगस्त 2023 में, डीएमके पार्टी के अध्यक्ष एम. के. स्टालिन कहलन कि नीट के ख़तम कईल ही अनीता के सच्चा श्रधांजलि होई. साथही उनकर पार्टी एक दिन के भूखो हड़ताल कईलस.

मणि रत्नम कहलन, “ओकरा याद के सम्मान मिलत देख के हमार करेजा भर जाला. उ एगो अनेत (अन्याय) के खिलाफ लड़ाई कईलस, ठीक ओही तरे, जे तरे ए बेरा इ छात्र कुल लड़ रहल बा. हमनी ओकरा के कब्बो ना बिसराएम.”

जे रउआ मन में आत्महत्या के बिचार आ रहल बा, चाहे केहू आदमी परेसानी में बा, त किरपा क के राष्ट्रीय हेल्पलाइन ‘किरन’ के नंबर 1800-599-0019 (24/7 टोल फ्री) प, चाहे अपना अगल-बगल के कौनो हेल्पलाइन नंबर प कॉल करीं.