सियान उमर मं घलो काम- बूता मं मगन

दनामती माझी करीबन अपन आधा पेंसन गुड़ाखू मं खरचा कर देथे.

“मोला पेंसन मं 1,000 रूपिया मिलथे अऊ मंय 500 रूपिया अपन भाई बहू ला देथों, जेन ह मोला रांध के खवाथे, वो ह बताथे. बाकी पइसा मं नून, मिर्चा, साबुन,चुपरे बर तेल अऊ गुड़ाखू बिसोय मं खरचा करथों.”

जब ये रिपोर्टर ह ओकर ले हँसी-ठठोली करिस के जब ओकर बस कुछेक दांत बांचे हवय, त गुड़ाखू बर अतक जियादा खरचा करे कुछु जियादाच हवय, त वो ह धीरे ले हांसत कहिथे, “येकर बगेर मोला बने नइ लगय. ये ह एक ठन आदत आय, जइसने तुमन मन के हवय –गुटखा खाय के.”

दनामती के माटी के घर खपरा वाले आय. घर भीतरी खुसरे बर झुके ला परथे. इहाँ रखाय जिनिस मं मड़िया पिसे के जांता, एक ठन टार्च, माटी के चूल्हा अऊ कपड़ा भराय बांस के एक ठन टुकना. ये सियान महतारी भूंइय्या मं सुतथे.

जइसनेच हमन गोठियाय सुरु करेन, वो ह जांता निकारिस अऊ पिसे ला सुरु ककर दिस, अऊ वो ह अपन बचपना ला बताय लगिस के कइसने ओकर बचपना कालाहांडी मं बितिस, जेन ह देस के सबले गरीब इलाका मन ले एक आय.

वो ह बनेच मुस्किल बखत रहिस. हमर महतारी मन हमन ला खवाय बर जंगल मं कंद मूल संकेलें.करा एक जोड़ी कपड़ा होवत रहिस, जेन ला हमन बछर भर पहिरत रहेन. जब हमन नदिया मं नुहाय जावत रहेन, त हमन ला तब तक ले अगोरे ला परय जब तक के वो ह सूखा झन जाय, जेन ला हमन फिर ले पहिर सकन.

हमन दनामती ला सबले पहिली रोड मं देखे रहेन, वो ह नीला टी-शर्ट पहिरे रहिस अऊ नदिया के तरी कोती उतरत रहिस. ओकर एक हाथ मं लउठी अऊ दूसर मं रस्सी ,जेन ह मेढ़ी अऊ ओकर पीला ले बंधाय रहिस, जेन ह ओकर संगे संग जावत रहिन.

वोला अपन उमर ठीक-ठीक पता नइ ये, फेर हर रोज दनामती बहिर निकरथे – छेरी मन ला चराथे, लकठा के सरसों के खेत मन मं बूता करथे, घर-बार संभालथे अऊ मगन जिनगी जीथे. वो ह बताथे के कभू-कभार वो ह बैगा-गुनिया धन झोलाछाप डाक्टर मन करा जाथे, अऊ वो ह जोर देवत कहिथे के वो ह पूरा बने बने हवय.

कोंध जनजाति के ये सियानिन, टुकुगुड़ा मं अपन भाई के परिवार के संग अपन पुस्तेनी घर मं रहिथे. ये ह करीबन 350 लोगन मन के आबादी वाले एक ठन गाँव आय (जनगणना 2011), जिहां खास करके कोंध आदिवासी समाज के लोगन मन रहिथें.

ओकर लइका मन पचास ले जियादा उमर के हवंय अऊ ओकर परपोता – परपोती मन स्कूल जाथें, येकरे सेती ओला लागथे के ओकर उमर करीबन अस्सी बछर हवय. वो ह पारी ले बताथे, मंय अपन भाई के परिवार संग टुकुगुड़ा गाँव मं रहत हवंव.”

“मोर बहुरिया सुग्घर मइनखे आय, अऊ मोर (दूनों) पोता मं मोला घर ले जाय बरआय हवंय,” वो ह कहिथे. फेर दनामती ला अपन भाई संग रहे भाथे. पुइगुड़ा के ओकर घर सिरिफ 3 कोस दूरिहा हवय. ये दूनों गाँव थुआमुल-रामपुर ब्लॉक मं परथे जेन ह ओडिशा के कालाहांडी जिला के सबले पिछड़ा अऊ अविकसित गाँव मन ले हवय.

दनामती अपन बेटा अऊ ओकर परिवार के संग पुइगुड़ा गाँव के अपन घर मं रहिथे. जब लइका मन बनेच नान-नान रहिन, वो बखत ओकर घरवाला गुजर गे रहिस. “मंय बनि-भूति करके अपन लइका मन ला पाले पोसे हवंव. वो बखत भारी कठिन रहिस. मोर एक झिन बेटा हवय अऊ मोर बेटी ह बनेच कम उमर मं गुजर गिस,” वो ह बताथे.

परिवार करा करबन आठ एकड़ ज़मीन हवय, जेन मं वो मन रागी, कोसला, कांगू, बिरी (उरीद), काटिंग, कांदूल अऊ धान जइसने बाजरा अऊ दार कमाथें. ओकर देखरेख ओकर बेटा दुमेन माझी अऊ ओकर सुवारी सुखमती माझी करथें.

दुमेन के बड़े बेटा, बीर सिंग माझी, काम करे बर बहिर जावत रहिस. 24 बछर के बीर कहिथे, “मंय केरल के त्रिशूर जिला के अलुआ मं मजूरी करत रहंय, जिहां रोजी करीबन 500 ले 600 रूपिया मिलत रहिस. फेर मोला अपन बेटी [11 महीना के] अऊ घरवाली [जयंती] के भारी सुरता आवत रहिस, ते पायके लहूट आंय.” अब वो ह गाँवेच मं बनि भूति करथे फेर हमेसा बूता नइ मिलय.

ओकर छोटे भाई, 21 बछर के रूप सिंग माझी, हैदराबाद चले गे हवय अऊ उहाँ एक ठन टेंट हाउस मं काम करथे. गैर-सरकारी संगठन ग्राम विकासके एक ठन अध्ययन के मुताबिक, थुआमूल रामपुर ब्लॉक मं गरीबी के दर बनेच जियादा हवय अऊ इहाँ ले लोगन मन के पलायन घलो भारी जियादा होथे, खासकरके जवान लइका मन के. केरल वो मन ला लुभाथे, जिहां वो मन महीना के 12,000 ले 15,000 रूपिया कमा सकथें.

दनामती कहिथे के अब जिनिस मन सुभीता के होगे हवंय, फेर वो ह अभू घलो ओतकेच मिहनत करथे जतक पहिली करत रहिस. ओकर भतीजा राजफूल घलो ये बात ला मानथे अऊ कहिथे, “वो ह भारी फुरती वाली आय.”

लेदना माझी, दनामती के छोटे भाई आंय, जेन ह वोला इहाँ रहे बर लाय रहिस. 61 बछर के लेदना माझी कहिथे, “ हमन वोला कहे रहेन के वो ह काम बूता झन करय, फेर वो ह हमर बात ला चेत नइ धरय अऊ उहिच करते जेन ह वोला भाथे.”

बिनती हवय, सरकार ले कहव के वो ह मोला एक ठन घर [पीएमएवाई] देवय, जिहां मं रहे सकंव” ये ह मोला दनामती के कहे आखिरी बोल रहिस.