खेत से घर, दादी अस्सियो में फरहर

दनामती माझी अपनी पेंशन के मोटा-मोटी आधा पईसा अइसन मंजन पर खर्चा कर देली जेमे गुड़ आ तम्बाकू मिलल बा.

“हमके 1000 रूपया के पेशन मिलेला जेमे से 500 रूपया हम अपनी भाई के पतोह के देनी जवन हमरी भोजन पानी के ध्यान रखेले,” उ बतावेली. “बाकि पइसा से हम नमक, मिर्च, साबुन, तेल, मालिश खातिर तेल आ गुड़ाखू कीन लीहिला.”

जब ई पत्रकार ए बात पर मजा लिहलें कि उनकी मुंह में कुछे दांत बचल बा, त मंजन पर एतना पईसा खर्च करे के का जरूरत बा, उ तनी मुस्करात के कहेली, “एकरी बिना हमके नीक ना लागेला. ई एगो नशा निहर हो गईल बा, जईसे आप लोगन के गुटखा (चबावे वाला तम्बाकू).”

दनामती माटी के खपरैल वाला कच्चा कच्चा घर में. एक कमरा के ए घर में घुसे खातिर झुके के पड़ेला. रागी पीसे खातिर एगो पत्थर के सील लोढ़ा, एगो टॉर्च, एगो माटी के चूल्हा आ कपड़ा से भरल एगो बांस के टोकरी ए घर के जरूरी सामान बा. ई बुजुर्ग महिला माटी के फर्श पर सुतेली.

हमनी के बतिवाये शुरू करेनी जा आ उ ओही समय पत्थर के सील लोढ़ा पर पिसाई चालू कर देली. उ देश के सबसे गरीब हिस्सन में से एक, उड़ीसा के कालाहांडी में बीतल अपनी बचपन के बारे में बतावेली.

“बहुत कठिन समय रहे. हमनी के माई लोग दिन भर जंगल में हमनी के खियावे खातिर घूम घूम जड़ खोजें. हमनी के लगे एक सेट कपड़ा रहे जेके हमनी के पूरा साल पहिनी जा. जब हमनी के नहाये खातिर नदी में जाईं जा, त निकलला के बाद पहिने खातिर एकरी सूखला के इंतजार करे के पड़े.”

हमनी के सबसे पाहिले दनामती के एगो नीला टी-शर्ट पहिनले देखनी जा आ उ नदी के ओर उतरत रहली. उनकी एक हाथ में छड़ी रहे आ दूसरी में, एगो बकरी आ ओकर बच्चा के रसरी रहे जवन उनकी संघे संघे चलत रहें सन.

उ अपनी उमिर के ले के बहुत निश्चित नईखी बाकिर उनकर दिनचर्या बहुत व्यस्त बा. उ बाहर निकलेली, बकरी चरावेली, लगे के सरसों के खेत में काम करेली आ आपन घर दुआर संभारेली. उनकर कहनाम बा कि उ एकदम स्वस्थ बाड़ी आ बड़ी मुश्किल से कबो-कबो कवनो ओझा, चाहे झोला छाप डॉक्टर से देखा लेवेली.

कोंध जनजाति से आवे वाली दनामती अपनी भाई के परिवार संघे टुकुगुड़ा में अपनी पैतृक घर में रहेली. ई लगभग 350 लोगन (2011 के जनगणना के अनुसार) के गांव हवे जेमे मुख्य रूप से कोंध आदिवासी समुदाय के अधिकता बा.

उनकर लईका बच्चा कुल पचास के फेंटा में बाड़ें सन आ उनकर नाती-पोता स्कूले जाए लागल बाड़ें सन. एसे उनका अंदाज लागेला कि उनकर उमिर अस्सी के आसपास होई. “हम अपनी भाई के परिवार संघे टुकुगुड़ा गांव में रहेनी,” उ पारी के बतावेली.

“हमर पतोह मन के बहुत साफ़ हवे आ हमार (दू गो) पोता हमके घरे ले जाए आईल बाड़ें सन,” उ बतावेली. बाकिर दनामती के भाई के परिवार संघे रहल नीक लागेला. उनकर घर खाली दस किलोमीटर दूर पुइगुड़ा में बा. दुनो गांव थुआमुल-रामपुर ब्लाक में हवे. ई उड़ीसा के कालाहांडी के सबसे पिछड़ल आ कम विकसित गांवन में से एक हवे.

दनामती अपनी बेटा आ ओकरी परिवार संघे अपनी घर में पुइगुड़ा में रहत रहली. बच्चा बहुत छोट रहलें सन तब्बे पति के निधन हो गईल. “हम अपनी बच्चन के पाल पोस के मजदूर बनवनी, बहुत कठिन समय रहे. हमार एगो बेटा बा. हमार बेटी बहुत कमे उमिर में मर गईल रहे, उ बतावेली.

परिवार के लगे लगभग आठ एकड़ के जमीन बा. एकरा पर उ लोग रागी, कोसला, कंगू, बीरी, कटिंग, कांदुल आ धान जइसन अनाज आ दाल सब उगावेलें. एके उनकर बेटा दुमेन माझी आ उनकर मेहरारू सुखमती माझी संभारेलें.

दुमेन के बड़का बेटा बीर सिंह माझी काम खातिर प्रवास कईलें. “हम केरल के त्रिसूर जिला के अलुआ में मजदूरी करत रहनी. हमरा लगभग 500 से 600 रूपया दिहाड़ी मिलत रहे. बाकिर हमके अपनी बेटी (11 महीना के) आ मेहरारू (जयंती) के याद आवत रहे, एसे हम लौट अईनी,” बीर (24) कहेलन जे अब गांव में दिहाड़ी मजदूर के काम कर रहल बाड़ें जवन अनियमित रहेला.

उनकर छोट भाई रूप सिंह माझी (21) हैदराबाद चल गईल बाड़ें आ एगो टेंट हाउस में काम करेलें. गैर-सरकारी संगठन ग्राम विकास के एगो अध्ययन के अनुसार थुआमुल रामपुर ब्लाक में गरीबी बहुत जादे बा, आ युवा लोगन के बीच पलायन भी जादे देखे के मिलेला. केरल में काम के मौका जादे बा. इहां उ लोग महीना में औसतन 12,000-15,000 रूपया कमा लेवेला.

दनामती कहेली कि अब कुल पहिले से आसान हो गईल बा बाकिर उ पहिले निहर ही कड़ा मेहनत कर रहल बाड़ी. उनकर भगिना राजफूल ए बात से सहमत बाड़ें, “उ बहुत सक्रिय रहेली.”

लेदना माझी दनामती के छोट भाई हवें जे उनके एइजा रहे खातिर ले के अईलें. लेदना (61) कहेलन, “हमनी के कही ना जा कि एतना काम मत कर लेकिन उ केहू के ना सुनेली. जवन मन करेला उहे करेली.”

“आप कृपया सरकार से कहीं कि हमके एगो घर (पीएमएवाय) दिहल जाओ कि हम ओइजा रह सकीं,” दनामती आवत के हमसे अंतिम बात इहे कहली.