ತೂತುಕುಡಿಯ ಚುನಾವಣೆಯಲ್ಲಿ ರಫೇಲ್ ಮೇಲೆ ಸ್ಟೆರ್ಲೈಟ್ ಸವಾರಿ

ಸಿ.ಸುಬ್ಬುಲಕ್ಷ್ಮಿಯವರು ತಮ್ಮ ಮನೆಯಿಂದ ಸ್ವಲ್ಪ ದೂರದಲ್ಲಿ ಆರು ಪ್ಲಾಸ್ಟಿಕ್ ನೀರಿನ ಬಿಂದಿಗಗಳಲ್ಲಿ ನೀರು ಖರೀದಿಸಿ ತುಂಬಿಸಿಕೊಂಡು ತನ್ನ ಪುಟ್ಟ ತಳ್ಳುಗಾಡಿಯಲ್ಲಿ ಇಟ್ಟುಕೊಂಡು ತರುತ್ತಿದ್ದರು. ರಸ್ತೆಯುದ್ದಕ್ಕೂ ಅವರಿಗೆ ನೀರಿನ ಸಂಕಷ್ಟ, ನೀರು ಎತ್ತೊಯ್ಯುವ ಭಾರದ ನೋವು ಇವುಗಳೇ ಕಾಡುತ್ತಿದ್ದವು. ಚುನಾವಣೆ ಮತ್ತು ಮತದಾನದ ಯೋಚನೆಗೆ ಅವರ ಮನಸ್ಸಿನಲ್ಲಿ ಯಾವಾಗಲೂ ಕೊನೆಯ ಸ್ಥಾನ. ಒಬ್ಬ ಕೃಷಿ ಕಾರ್ಮಿಕರಾದ ಅವರು, ಆ ಬಿಂದಿಗೆಗಳನ್ನೆಲ್ಲ ತಾನೇ ಹೊತ್ತೊಯ್ಯುವ ಅನಿವಾರ್ಯ ಸಹ ಇದೆ. “ನಾವು ಖಂಡಿತವಾಗಿಯೂ ಗೊಂದಲದಲ್ಲಿದ್ದೇವೆ" ಎಂದು ಕುಮಾರೆಡ್ಡಯ್ಯಪುರ ಗ್ರಾಮದ ಈ ನಿವಾಸಿ ಹೇಳುತ್ತಾರೆ.

48 ವರ್ಷದ ಸುಬ್ಬುಲಕ್ಷ್ಮಿಯವರು ಮತದಾನದ ಹೊರತಾಗಿ ಇತರ ಮುಖ್ಯ ವಿಷಯಗಳ ಮೇಲೆ ಗಮನಹರಿಸುವುದಕ್ಕೆ ಉತ್ತಮ ಕಾರಣವನ್ನು ಕೊಡುತ್ತಾರೆ, ಅವರ ಗ್ರಾಮವು ತೂತುಕುಡಿ ಲೋಕಸಭಾ ಕ್ಷೇತ್ರದಲ್ಲಿದೆ - ಅದು ತಮಿಳುನಾಡಿನಾದ್ಯಂತ ಅತ್ಯಂತ ಉನ್ನತ ಮಟ್ಟದ ಸ್ಪರ್ಧೆಗಳಿಗೆ ಸಾಕ್ಷಿಯಾಗಿದೆ. ದ್ರಾವಿಡ ಮುನ್ನೇಟ್ರ ಕಳಗಂ (ಡಿಎಂಕೆ) ಪಕ್ಷದ ಎಂ ಕನಿಮೊಳಿ - ದಿವಂಗತ ಮತ್ತು ಖ್ಯಾತ, ಡಿಎಂಕೆ ನಾಯಕ ಎಂ. ಕರುಣಾನಿಧಿ ಅವರ ಪುತ್ರಿ ಅವರು ಭಾರತೀಯ ಜನತಾ ಪಕ್ಷದ (ಬಿಜೆಪಿ) ರಾಜ್ಯಾಧ್ಯಕ್ಷ ತಮಿಳಿಸೈ ಸೌಂದರರಾಜನ್ ವಿರುದ್ಧ ಕಣಕ್ಕಿಳಿದಿದ್ದಾರೆ. 2014 ರ ಚುನಾವಣೆಯಲ್ಲಿ ಈ ಕ್ಷೇತ್ರದಲ್ಲಿ ಎಐಎಡಿಎಂಕೆಯ ಜಯಸಿಂಗ್ ತ್ಯಾಗರಾಜ್ ಅವರು ಡಿಎಂಕೆ ಪ್ರತಿಸ್ಪರ್ಧಿ ಜೆಗನ್ ಪಿ ಅವರನ್ನು ಸೋಲಿಸಿದ್ದರು.

ಸುಮಾರು 13 ಲಕ್ಷಕ್ಕೂ ಹೆಚ್ಚು ಮತದಾರರಿರುವ ಈ ಕ್ಷೇತ್ರಕ್ಕೆ ಗಮನಾರ್ಹ ಅಂಶ ನೀಡಿದ ಇನ್ನೊಂದು ವಿಷಯವೆಂದರೆ, ಕಳೆದ ವರ್ಷ ತೂತುಕುಡಿ ಪಟ್ಟಣವನ್ನು ಬೆಚ್ಚಿಬೀಳಿಸಿದ ಹಿಂಸಾತ್ಮಕ ದುರಂತ. ಇದು ಕೇವಲ 24 ಕಿಲೋಮೀಟರ್ ದೂರದಲ್ಲಿರುವ ಕುಮಾರೆಡ್ಡಯ್ಯಪುರದ ಅನೇಕರನ್ನು ಬಾಧಿಸಿತು.

ಫೆಬ್ರವರಿ 12, 2018 ರಂದು, ಈ ಗ್ರಾಮದ ಸುಮಾರು 300 ಜನರು ತೂತುಕುಡಿ ಟೌನ್ ಸೆಂಟರ್‌ನಲ್ಲಿ ಸ್ಟೆರ್ಲೈಟ್ ತಾಮ್ರದ ಸ್ಥಾವರದ (ವೇದಾಂತ ಲಿಮಿಟೆಡ್‌ನ ವ್ಯವಹಾರ ಘಟಕ) ವಿಸ್ತರಣೆ ಯೋಜನೆಗಳ ವಿರುದ್ಧ ಪ್ರತಿಭಟನೆ ನಡೆಸಿದರು. ಪ್ರತಿಭಟನಾಕಾರರು ಅನುಮತಿ ನೀಡಿದ ಸಮಯದ ನಂತರ ಸ್ಥಳದಿಂದ ಹೊರಬರಲು ನಿರಾಕರಿಸಿದರು ಮತ್ತು ಅವರನ್ನು ಅಂತಿಮವಾಗಿ ಬಂಧಿಸಲಾಯಿತು. ಆ ಬಂಧನವು ಮಾರ್ಚ್ 24, 2018 ರಂದು ತೂತುಕುಡಿ ಪಟ್ಟಣದ ಬೀದಿಗಳಲ್ಲಿ ಸುಮಾರು 2 ಲಕ್ಷ ಜನರು ಪ್ರವಾಹವನ್ನೆ ಅಲ್ಲಿಗೆ ಬರಮಾಡಿಕೊಂಡಿತು. ಅನೇಕ ಉದ್ಯೋಗೀಗಳು, ಕಾರ್ಮಿಕರು ಮತ್ತು ಜನರು ಸ್ಟೆರ್ಲೈಟ್‌ನ ಹೊಸ ತಾಮ್ರ ಸ್ಮೆಲ್ಟರ್ ಸಂಕೀರ್ಣದ ನಿರ್ಮಾಣವನ್ನು ನಿಲ್ಲಿಸುವಂತೆ ಒತ್ತಾಯಿಸಿದರು. ಅಸ್ತಿತ್ವದಲ್ಲಿರುವ ಸ್ಟೆರ್ಲೈಟ್ ಸ್ಥಾವರವು ಅವರ ನೀರು ಮತ್ತು ಪರಿಸರವನ್ನು ವಿಷಪೂರಿತಗೊಳಿಸಿದೆ ಮತ್ತು ಅವರ ಜೀವನೋಪಾಯವನ್ನು ನಾಶಪಡಿಸಿದೆ ಎಂದು ಅವರು ಹೇಳಿದರು.

ಪ್ರತಿಭಟನೆಯ 100 ನೇ ದಿನ, ಮೇ 22, ಪ್ರತಿಭಟನಾಕಾರರ ಮೇಲೆ ಪೊಲೀಸರು ಮನಬಂದಂತೆ ಗುಂಡು ಹಾರಿಸಿದ್ದು, ಅವರಲ್ಲಿ 14 ಮಂದಿ ಸಾವನ್ನಪ್ಪಿದರು. 100ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ. ಮೇ 28 ರಂದು, ರಾಜ್ಯ ಸರ್ಕಾರ ಸ್ಟೆರ್ಲೈಟ್ ತಾಮ್ರ ಸ್ಥಾವರವನ್ನು ಮುಚ್ಚಿತು, ಆದರೆ ಸ್ಟೆರ್ಲೈಟ್ ಮತ್ತೆ ತೆರೆಯಲು ಕೋರಿ ನ್ಯಾಯಾಲಯದ ಮೊರೆ ಹೋಗಿದೆ.

“ಸ್ಥಾವರವನ್ನು ಶಾಶ್ವತವಾಗಿ ಮುಚ್ಚುವ ತನಕ ಈ ಹೋರಾಟ ಮುಂದುವರೆಯುತ್ತದೆ ಮತ್ತು ಚುನಾವಣೆಗಳಿಗೆ ಯಾವ್ದೇ ಅರ್ಥವಿರುವುದಿಲ್ಲ" ಎಂದು ಸುಬ್ಬುಲಕ್ಷ್ಮಿ ತೂತುಕುಡಿ ಜಿಲ್ಲೆಯ ಒಟ್ಟಪಿಡಾರಂ ಬ್ಲಾಕ್‌ನಲ್ಲಿರುವ ಕುಮಾರೆಡ್ಡಯ್ಯಪುರಂನ ಮನೆಯಲ್ಲಿ ನಮಗೆ ಹೇಳಿದರು. ಅದೃಷ್ಟವಶಾತ್ ಈ ಹಳ್ಳಿಯಿಂದ ಯಾರೂ ಗಾಯಗೊಂಡಿಲ್ಲ. ಆದರೆ ಈ ಘಟನೆ ಅವರನ್ನು ಭಯಭೀತರನ್ನಾಗಿ ಮಾಡಿದೆ - ಮೇ 21 ರಂದು ಪೋಲೀಸರು ಪ್ರತಿಭಟನೆಯಿಂದ 'ನಿರ್ಬಂಧಿಸಿದ' ಮೂರು ಹಳ್ಳಿಗಳಲ್ಲಿ ಇದು ಒಂದಾಗಿದೆ.

ತಮಿಳುನಾಡಿನಲ್ಲಿ ಉಪಚುನಾವಣೆ ನಡೆಯುತ್ತಿತ್ತು ಅದೇ ಸಮಯವಾದ ಏಪ್ರಿಲ್ 18 (ಲೋಕಸಭಾ ಮತದಾನದ ದಿಂದಂದು) ಮತ್ತು ಮೇ 19 ರಂದು, 22 ವಿಧಾನಸಭಾ ಕ್ಷೇತ್ರಗಳಿಗೆ ಜನರು ಮತ ಚಲಾಯಿಸುತ್ತಿದ್ದಾರೆ. 234 ಸದಸ್ಯರ ತಮಿಳುನಾಡು ವಿಧಾನಸಭೆಯಲ್ಲಿ ಸುಮಾರು 10 ಪ್ರತಿಶತದಷ್ಟು ಸ್ಥಾನಗಳು ಕುಮಾರರೆಡ್ಡಿಪುರಂ ಅಡಿಯಲ್ಲಿ ಬರುವ ಒಟ್ಟಪಿಡಾರಂ ಎಸ್‌ಸಿ (ಮೀಸಲು) ಕ್ಷೇತ್ರದಲ್ಲಿ ಮೇ 19 ರಂದು ಮತದಾನ ನಡೆಯಲಿದೆ. ಒಟ್ಟಾಪಿಡಾರಂಗೆ ಉಪಚುನಾವಣೆ ಸಹ ಇದೆ ಏಕೆಂದರೆ ಅದರ ಹಾಲಿ ಎಐಎಡಿಎಂಕೆ ಶಾಸಕ ಆರ್. ಸುಂದರರಾಜ್ ಪಕ್ಷಾಂತರ ವಿರೋಧಿ ಕಾನೂನಿನ ಅಡಿಯಲ್ಲಿ ಅನರ್ಹಗೊಂಡಿದ್ದಾರೆ. ಇಲ್ಲಿಯವರೆಗೆ ಡಿಎಂಕೆ ಮಾತ್ರ ತನ್ನ ಅಭ್ಯರ್ಥಿ ಎಂ.ಸಿ. ಷಣ್ಮುಗಯ್ಯರನ್ನು ನೇಮಕಾತಿ ಮಾಡಿದೆ.

ಆಡಳಿತದಲ್ಲಿರುವ ಎಐಎಡಿಎಂಕೆಗೆ ಈಗಾಗಲೇ ಬಹುಮತಕ್ಕೆ ಕೇವಲ ಎರಡು ಸ್ಥಾನಗಳಷ್ಟೇ ಕೊರತೆಯಿರುವುದರಿಂದ, ವಿಧಾನಸಭೆಯಲ್ಲಿ ಆ 22 ಸ್ಥಾನಗಳ ಫಲಿತಾಂಶವು ಸಮತೋಲನವನ್ನು ಕಂಗೆಡಿಸಬಹುದು.

ಕುಮಾರೆಡ್ಡಯ್ಯಪುರ ಮತ್ತು ಸುತ್ತಮುತ್ತಲಿನ ಪ್ರದೇಶದಲ್ಲಿನ ತೀವ್ರ ನೀರಿನ ಕೊರತೆಯ ಸಂದರ್ಭದಲ್ಲಿ ಸುಬ್ಬುಲಕ್ಷ್ಮಿ (ಮೇಲಿನ ಮುಖಪುಟದಲ್ಲಿ)ಮತ್ತು ಅವರಂತಹ ಅನೇಕ ಮಹಿಳೆಯರು ತಮ್ಮ ದಿನದ ಹೆಚ್ಚು ಸಮಯವನ್ನು ಅಲ್ಲಿ-ಇಲ್ಲಿ ಹಾಗೂ ಸುತ್ತಮುತ್ತಲಿಂದ ನೀರು ತರುವಾದರಲ್ಲೇ ಕಳೆಯುತ್ತಾರೆ. ಪ್ರಶ್ನೆ ಮಾಡುವ ವಿಚಾರ ಎಂದರೆ, ಸ್ಟೆರ್ಲೈಟ್ ಕಂಪನಿಯು ನೀರನ್ನು ಅತಿಕಡಿಮೆ ದರದಲ್ಲಿ ಖರೀದಿಸುತ್ತಿದೆ. ಈ ಮಹಿಳೆಯರು, 10ರೂಪಾಯಿಗೆ ‘ಯೋಗ್ಯ ಕುಡಿಯುವ ನೀರಿಗೆ’ ಒಂದು ಕೊಡ ಖರೀದುಸುತ್ತಾರೆ. 10 ರೂ. ಪ್ಲಾಸ್ಟಿಕ್ ನೀರಿನ ಕೊಡ ಸುಮಾರು 25 ಲೀಟರುಗಳನ್ನು ಹೊಂದಿರುತ್ತದೆ. "ಸ್ಟೆರ್ಲೈಟ್ ಮುಚ್ಚಿದ ನಂತರವೇ, ಕುಮಾರೆಡ್ಡಯ್ಯಪುರ ಮಹಿಳೆಯರು ದಿನನಿತ್ಯ ನಿಯಮಿತವಾಗಿ ಅಲ್ಲದಿದ್ದರೂ ಕುಡಿಯಲು ಯೋಗ್ಯವಾದ ನೀರನ್ನು ಪಡೆಯಲು ಸಾಧ್ಯವಾಯಿತು" ಎಂದು ಪಿ.ಪ್ರಭು ಹೇಳುತ್ತಾರೆ. “ವಿಪರ್ಯಾಸವೆಂದರೆ ಸ್ಥಾವರ ಮುಚ್ಚುವವರೆಗೂ, ಸ್ಟೆರ್ಲೈಟ್ ಕಂಪನಿಯು ನೀರನ್ನು 1,000 ಲೀಟರ್‌ಗೆ 10 ರೂಪಾಯಿಗಳಂತೆ ಖರೀದಿಸುತ್ತಿತ್ತು. ಪ್ರತಿಭಟನಾಕಾರ ಮತ್ತು ತೂತುಕುಡಿಯ ಸ್ಥಳೀಯ ಉದ್ಯಮಿಯಾದ ಪ್ರಭು ತಮ್ಮ ಹಳ್ಳಿಗೆ ವರದಿಗಾರರ ಜೊತೆಗೆ ನಡೆದರು.

ಕೈಗಾರಿಕಾ ಕೇಂದ್ರವೆಂದು ಕರೆಯಲ್ಪಡುವ ತೂತುಕುಡಿಯು ತಾಳೆ ಎಲೆ ಸಾಮಗ್ರಿಗಳು ಮತ್ತು ಕಡಲೆಕಾಯಿ ಮಿಠಾಯಿಗಳನ್ನು ಒಳಗೊಂಡಂತೆ ಅನೇಕ ಗುಡಿ ಕೈಗಾರಿಕೆಗಳಿಗೆ ನೆಲೆಯಾಗಿದೆ. 300ಕ್ಕೂ ಹೆಚ್ಚು ಮನೆಗಳಿಲ್ಲದ ಕುಮಾರೆಡ್ಡಯ್ಯಪುರ ವಿವಾದಿತ ಸ್ಟೆರ್ಲೈಟ್ ತಾಮ್ರದ ಸ್ಥಾವರದ ಸಮೀಪದಲ್ಲಿದೆ. ಇದು ಸ್ಟೆರ್ಲೈಟ್ ವಿರುದ್ಧದ ಪ್ರತಿಭಟನೆಯ ಕೇಂದ್ರವಾಗಿದೆ. ಸ್ಥಾವರ 1998 ರಲ್ಲಿ ಸ್ಥಾಪಿಸಲಾಯಿತು ನಂತರ ಪರಿಸರವನ್ನು ಕಲುಷಿತಗೊಳಿಸುವುದಕ್ಕಾಗಿ ಮತ್ತು ವ್ಯಾಪಕವಾದ ಆರೋಗ್ಯ ಸಮಸ್ಯೆಗಳನ್ನು ಉಂಟುಮಾಡುವುದಕ್ಕಾಗಿ ಸ್ಥಳೀಯರಿಂದ ಪ್ರತಿಭಟನೆಯನ್ನು ಎದುರಿಸಿತು. 2011 ರವರೆಗೆ ಸ್ಟೆರ್ಲೈಟ್ ನಿರಂತರವಾಗಿ ಕಾರ್ಯಾಚರಣೆಯ ಮಾನದಂಡಗಳನ್ನು ಉಲ್ಲಂಘಿಸಿದೆ ಮತ್ತು ನವೀಕರಣ ಪರವಾನಗಿ ಇಲ್ಲದೆ ಕಾರ್ಯನಿರ್ವಹಿಸುತ್ತಿದೆ ಎಂದು ಕಾರ್ಯಕರ್ತರು ಆರೋಪಿಸಿದ್ದಾರೆ. ರಾಷ್ಟ್ರೀಯ ಪರಿಸರ ಸಂಶೋಧನಾ ಸಂಸ್ಥೆ ಮತ್ತು ತಮಿಳುನಾಡು ಮಾಲಿನ್ಯ ನಿಯಂತ್ರಣ ಮಂಡಳಿಯ ಅಧ್ಯಯನಗಳು ಸ್ಟೆರ್ಲೈಟ್ ಅಂತರ್ಜಲ, ಗಾಳಿ ಮತ್ತು ಮಣ್ಣನ್ನು ಅದರ ತ್ಯಾಜ್ಯದಿಂದ ಕಲುಷಿತಗೊಳಿಸಿದೆ ಎಂದು ಕಂಡುಹಿಡಿದಿದೆ.

2018 ರಲ್ಲಿ ತಾಮ್ರದ ಸ್ಥಾವರ ವಿಸ್ತರಣೆಯ ಯೋಜನೆಗಳನ್ನು ಹೊಂದಿದೆ ಎಂದು ತಿಳಿದಾಗ ಕುಮರೆಡ್ಡಿಪುರದ ಗ್ರಾಮಸ್ಥರು ಇತ್ತೀಚಿನ ಹಂತದ ಪ್ರತಿಭಟನೆಗೆ ಹೆಚ್ಚಾಗಿ ಸೇರಿಕೊಂಡರು. ಈ ಕೈಗಾರಿಕೆಯು ತಮ್ಮ ಗ್ರಾಮವನ್ನು ಕಲುಷಿತಗೊಳಿಸುತ್ತಿದ್ದು, ವಿವಿಧ ರೋಗಗಳು ಉಲ್ಬಣಗೊಂಡು ಹರಡಲು ಕಾರಣವಾಗುತ್ತದೆ ಎಂದು ಆರೋಪಿಸಿದ್ದಾರೆ. “ವರ್ಷಗಳು ಕಳೆದಂತೆ ನಮ್ಮ ಜೀವನದ ಗುಣಮಟ್ಟ ಕ್ಷೀಣಿಸುತ್ತಿರುವುದನ್ನು ನಾವು ನೋಡಿದ್ದೇವೆ. ಇಲ್ಲಿ ಇರುವುದಕ್ಕಿಂತ ಗ್ರಾಮಾಂತರದಲ್ಲಿ ವಾಸಿಸುವುದು ಒಳ್ಳೆಯದು ಎಂದು ಅವರು ಹೇಳುತ್ತಾರೆ. ಈ ಪ್ರದೇಶದಲ್ಲಿ ಜೀವನ ಹೇಗಿದೆ ಎಂದು ತಿಳಿಯಲು ನೀವು ಕುಮಾರೆಡ್ಡಯ್ಯಪುರ ಬಂದು ವಾಸಿಸಬೇಕು, ”ಎಂದು 55 ವರ್ಷದ ಗೃಹಿಣಿ ವೆಲ್ಲೈತಾಯೀ ಹೇಳುತ್ತಾರೆ.

ಸ್ಟೆರ್ಲೈಟ್ ಸುತ್ತಮುತ್ತಲಿನ ಪ್ರದೇಶದಲ್ಲಿ ವಾಸಿಸುವುದರಿಂದ ಕ್ಯಾನ್ಸರ್ ಮತ್ತು ಗರ್ಭಪಾತ ಸಂಬಂಧಿಸಿದ ಅನೇಕ ತೊಂದರೆಗಳು ಹೆಚ್ಚಾಗುತ್ತಿವೆ ಎಂದು ನಿವಾಸಿಗಳು ಹೇಳುತ್ತಾರೆ. “ರೋಗಿಯಿರದ ಒಂದೇ ಒಂದು ಮನೆಯನ್ನೂ ನೀವು ಇಲ್ಲಿ ಕಾಣುವುದಿಲ್ಲ. ನನ್ನ ತಂದೆ ತಾಯಿ ಕಾಲಕ್ರಮೇಣ ಪ್ರಕ್ರಿಯೆಗಿಂತ ಅತಿವೇಗವಾಗಿ ವಯಸ್ಸಾಗುತ್ತಿರುವ ಪ್ರಕ್ರಿಯೆ ನಡೆಯುತ್ತಿರುವುದನ್ನು ನಾನು ನೋಡುತ್ತಿದ್ದೇನೆ’ ಎನ್ನುತ್ತಾರೆ 17ರ ಹರೆಯದ ವಿದ್ಯಾರ್ಥಿನಿ ಪಿ.ಮಹಾಲಕ್ಷ್ಮಿ.

ತೀವ್ರ ನೀರಿನ ಕೊರತೆ ಇಲ್ಲಿನ ಅತಿದೊಡ್ಡ ಸವಾಲುಗಳಲ್ಲಿ ಒಂದಾಗಿದೆ. ಮಹಿಳೆಯರು ತಮ್ಮ ಟ್ರಾಲಿ ತಳ್ಳುಗಾಡಿಯಲ್ಲಿ ಪ್ಲಾಸ್ಟಿಕ್ ನೀರಿನ ಬಿಂದಿಗೆಗಳನ್ನು ತುಂಬಿಸಿಕೊಂಡು ತಳ್ಳಿಕೊಂಡು ರಸ್ತೆಗಳನ್ನು ದಾಟುವುದನ್ನು ಪ್ರತಿನಿತ್ಯ ಇಲ್ಲಿ ಕಾಣಬಹುದು. ಯೋಗ್ಯ ಕುಡಿಯುವ ನೀರು ಪಡೆಯಲು ನಾವು 10 ರಿಂದ 15 ದಿನ ಕಾಯಬೇಕು ಹಾಗೂ ಅದನ್ನು ತರಲು ನಾವು ಒಂದು ಕಿಲೋಮೀಟರ್ ಅಥವಾ ಅದಕ್ಕಿಂತ ಹೆಚ್ಚು ನಡೆಯಬೇಕಾಗುತ್ತದೆ. ನಾವು ಆರು ಸುತ್ತ್ತಿಗೂ ಮೀರಿ ಟ್ರಾಲಿ ಗಾಡಿಯಲ್ಲಿ ನೀರು ತಳ್ಳಲು ಸಾಧ್ಯವಿಲ್ಲ’ ಎಂದು 50 ವರ್ಷದ ಕೃಷಿ ಕಾರ್ಮಿಕರಾದ ಕೃಷ್ಣ ಲೀಲಾವತಿ ವಿವರಿಸುತ್ತಾರೆ.

ರಾಜ್ಯದ ಈ ಭಾಗಕ್ಕೆ ವಿಶಿಷ್ಟವೆನಿಸುವ ಟ್ರಾಲಿಗಳನ್ನು ತೂತುಕುಡಿ ಪಟ್ಟಣದಲ್ಲಿ ತಯಾರಿಸಿ ಈ ಹಳ್ಳಿಗಳಿಗೆ ತರಲಾಗುತ್ತದೆ. “ಒಂದು ಟ್ರಾಲಿಗೆ ಜನರು 2,500 ರೂ ಹಾಗೂ ಅದನ್ನು ಹಳ್ಳಿಗೆ ಸಾಗಿಸಲು ಪ್ರತ್ಯೇಕವಾಗಿ 300ರೂ ಪಾವತಿಸಬೇಕಾಗಿದೆ.” ಎಂದು ಲೀಲಾವತಿ ದೂರುತ್ತಾರೆ.

ತೂತುಕುಡಿಯ ಯೋಗಿಶ್ವರ್ ಕಾಲೋನಿಯು ಅಷ್ಟೇನೂ ದೂರದಲ್ಲಿಲ್ಲ, ಮಹಿಳೆಯರು ನೀರು ತರಲು ವರ್ಷಗಳಿಂದ ಸೈಕಲ್ ಓಡಿಸುವುದನ್ನು ಕಲಿತಿದ್ದಾರೆ. ಈ ಪ್ರದೇಶದಲ್ಲಿ ಸುಮಾರು 100 ಕುಟುಂಬಗಳಿದ್ದು, 50 ವರ್ಷಗಳಿಂದ ಕುಡಿಯುವ ನೀರಿನ ಸಮಸ್ಯೆ ಎದುರಿಸುತ್ತಿದ್ದೇವೆ. ಸೈಕಲ್ ಓಡಿಸಲಾಗದ ಮಹಿಳೆಯನ್ನು ನೀವು ನಮ್ಮ ನಡುವೆ ಕಾಣುವುದಿಲ್ಲ. ನೀರು ತರಲು ನಾವು ಸುಮಾರು ಎರಡು ಕಿಲೋಮೀಟರ್ ಪ್ರಯಾಣಿಸಬೇಕಾಗಿದೆ ಮತ್ತು ಟ್ರಾಫಿಕ್ ಹೆಚ್ಚು ಇರುವ ಪಟ್ಟಣದಲ್ಲಿ ನಾವು ಅದನ್ನು ಸೈಕಲ್‌ಗಳಲ್ಲಿ ಮಾತ್ರ ತರಬಹುದು. ಈರೀತಿ ನಿರಾತರವಾಗಿ ಇಷ್ಟೊಂದು ನೀರು ಹೊತ್ತುಕೊಂಡು ಹೋಗುವುದು ಆರೋಗ್ಯದ ಸಮಸ್ಯೆ ತಂದೊಡ್ಡಿದೆ’ ಎನ್ನುತ್ತಾರೆ ತೂತುಕುಡಿ ನಿವಾಸಿ 40 ವರ್ಷದ ಕೂಲಿ ಕಾರ್ಮಿಕರಾದ ಎo.ಸರಸ್ವತಿ.

ಈಮಧ್ಯೆ ಸರ್ಕಾರದಿಂದ ಸ್ಟೆರ್ಲೈಟ್ ಸ್ಥಾವರವನ್ನು ಮುಚ್ಚಿ ಒಂದು ವರ್ಷ ಕಳೆದರೂ, ಕುಮಾರರೆಡ್ಡಿಪುರದ ಜನರು ಆತಂಕ ಮತ್ತು ಭಯದಲ್ಲಿ ಹೊರಬಂದಿಲ್ಲ. "ನಾವು ಸಾಕಷ್ಟು ಅನುಭವಿಸೆದ್ದೇವೆ, ಯಾವುದೇ ಕಾರಣಕ್ಕೂ ಸ್ಥಾವರವನ್ನು ತೆರೆಯಲು ನಾವು ಬಯಸುವುದಿಲ್ಲ" ಎಂದು ವೆಲ್ಲೈತಾಯೀ ಹೇಳುತ್ತಾರೆ. ಸ್ಟೆರ್ಲೈಟ್ ತನ್ನ ಸ್ಥಾವರವನ್ನು ಮತ್ತೆ ತೆರೆಯಲು ನ್ಯಾಯಾಲಯದಿಂದ ಅನುಮತಿ ಪಡೆಯಲು ಪ್ರಯತ್ನಿಸುತ್ತಿದೆ ಎಂದು ಗ್ರಾಮಸ್ಥರಿಗೆ ತಿಳಿದಿದೆ.

ಸ್ಪಷ್ಟವಾಗಿ, ಸ್ಟೆರ್ಲೈಟ್ ಮತ್ತೆ ತೆರೆಯುವ ಭಯವು ಚುನಾವಣೆಯ ಉತ್ಸಾಹಕ್ಕಿಂತ ದೊಡ್ಡದಾಗಿದೆ. "ಚುನಾವಣೆ ಬೇಕು ಬೇಡ ಅನ್ನುವುದಕ್ಕಿಂತ ಸ್ಟೆರ್ಲೈಟ್ ಅನ್ನು ಶಾಶ್ವತವಾಗಿ ಮುಚ್ಚಿ ಎನ್ನುವುದೇ ನಮ್ಮ ಏಕೈಕ ಬೇಡಿಕೆ" ಎಂದು ವೆಳ್ಳೈತಾಯೀ ಹೇಳುತ್ತಾರೆ.

ಪುಲ್ವಾಮಾ, ಬಾಲಾಕೋಟ್ ಅಥವಾ ಆಗಸ್ಟಾ ಅಥವಾ ರಫೇಲ್ ಡೀಲ್‌ಗಳ ಸಮಸ್ಯೆಗಳಿಗೂ ಮೀರಿದ ತೀವ್ರವಾದ ಸಮಸ್ಯೆ ಕುಮರೆಡ್ಡಿಪುರಂನ ಸ್ಟೆರ್ಲೈಟ್. "ನಮ್ಮ ಮತ ಕೇಳಲು ಯಾರೂ ಇಲ್ಲಿಗೆ ಬಂದಿಲ್ಲ, ಆದರೆ ಸ್ಟೆರ್ಲೈಟ್ ಶಾಶ್ವತವಾಗಿ ಮುಚ್ಚಲ್ಪಟ್ಟಿದೆ ಎಂದು ನಮಗೆ ತಿಳಿಯುವತನಕ ನಾವು ಮತ ​​ಚಲಾಯಿಸಲು ಸಹ ಹೋಗುವುದಿಲ್ಲ" ಎಂದು ಲೀಲಾವತಿ ಹೇಳುತ್ತಾರೆ.

ಚುನಾವಣೆಯನ್ನು ಬಹಿಷ್ಕರಿಸುವುದೋ ಅಥವಾ ಸ್ಟೆರ್ಲೈಟ್ ಮುಚ್ಚುವ ಭರವಸೆ ನೀಡುವವರಿಗೆ ಮತ ಹಾಕುವುದೋ, ಈ ಆಯ್ಕೆ ಕುರಿತಾಗಿ ಹಲವು ಚರ್ಚೆಗಳು ಈ ಹಳ್ಳಿಯಲ್ಲಿ ನಡೆಯುತ್ತಿವೆ. ವೆಲ್ಲೈತಾಯೀ ಬಹಳ ಸ್ಪಷ್ಟವಾಗಿ "ನಾವು ಮೋದಿಯನ್ನು ಮರುಆಯ್ಕೆಮಾಡಲು ಬಯಸುವುದಿಲ್ಲ” ಎಂದರು.

ಗುಂಡಿನ ದಾಳಿಯಲ್ಲಿ 14 ಜನರು ಸತ್ತರೂ ಮೋದಿ ನಮ್ಮ ಬಗ್ಗೆ ಬಾಯೇ ಬಿಡಲಿಲ್ಲ ಎಂದು 55 ವರ್ಷದ ಕೃಷಿ ಕಾರ್ಮಿಕರಾದ ಪಿ.ಪೊನ್‌ರಾಜ್ ಹೇಳುತ್ತಾರೆ. "ಕನಿಷ್ಠ, ಸ್ಟೆರ್ಲೈಟ್ ನಮ್ಮನ್ನು ನಿಧಾನವಾಗಿಯೇ ಕೊಂದಿತು."

ಇಷ್ಟೆಲ್ಲಾ ಘಟನೆ ನಡೆದ ಮೇಲೆಯೂ, ಸುಮಾರು 25 ವರ್ಷಗಳ ಕಾಲ ಅವರ ಜೀವನ ಮತ್ತು ಜೀವನೋಪಾಯದ ಮೇಲೆ ಇನ್ನು ಈ ವಿಚಾರ ಪ್ರಾಬಲ್ಯ ಹೊಂದಿದೆ ಎನ್ನುತ್ತಾರೆ ಸುಬ್ಬುಲಕ್ಷ್ಮಿ. "ರಾಜಕಾರಣಿಗಳು ನಾವು ಅವರಿಗೆ ಮತ ಹಾಕುತ್ತೇವೆ ಎಂದು ಭಾವಿಸುತ್ತಿದ್ದಾರೆ. ಆದರೆ ನಮಗಾಗಿ ಅಲ್ಲದಿದ್ದರೆ, ಕನಿಷ್ಠ ನಮ್ಮ ಮುಂದಿನ ಪೀಳಿಗೆಗಾಗಿ ನಾವು ಇದನ್ನು ಹೋರಾಡಬೇಕಾಗಿದೆ.

ಅವರು ಮತ ಕೇಳಲು ಇಲ್ಲಿಗೆ ಯಾವ ಮುಖ ಇಟ್ಟುಕೊಂಡು ಬರುತ್ತಾರೆ?" ಎಂದು 46 ವರ್ಷದ ಕೃಷಿ ಕಾರ್ಮಿಕರಾದ ವೆಲ್ಲೈತಾಯೀ ಕೇಳುತ್ತಾರೆ. "ನಮ್ಮ ಜೀವನ ಮತ್ತು ಜೀವನೋಪಾಯಕ್ಕಿಂತ ಸ್ಟೆರ್ಲೈಟ್ ಮುಖ್ಯ ಎಂದು ಅವರು ಭಾವಿಸಿದರೆ, ನಮ್ಮನ್ನು ಮನುಷ್ಯರಂತೆ ಪರಿಗಣಿಸಿ ಇಲ್ಲಿ ಚುನಾವಣೆ ನಡೆಸುವುದು ಏಕೆ?"

ಅನುವಾದ: ಏಕತಾ ಹರ್ತಿ ಹಿರಿಯೂರು