अधर मं झूलत मथुआ समाज

ये ह मई 2026 के इतवार के दिन आय, पश्चिम बंगाल के उत्तर 24 परगना जिला मं बने मथुआ समाज के एक ठन मंदिर, ठाकुरबाड़ी मं भारी भीड़ जुरे हवय. फेर अधिकतर लोगन मन इहाँ पूजा-पाठ करे ला आय नइ यें. वो मन घाम मं लंबा लाइन मं ठाढ़े तउन कागजात मन ला अगोरत हवंय, जेकर ले वो मन ला आस हवय के ओकर मन के नागरिकता साबित हो सकही.

ये वो लोगन मन आंय जेकर मन के नांव हटा दे गे रहिस – ये वो 90 लाख ले जादा नांव मं सामिल हवंय जेन मन ला वोटर लिस्ट के स्पेशल इंटेंसिव रिविज़न (एसआईआर) के बखत हटाय गे रहिस. ये लोगन मन अप्रैल 2026 मं राज मं होय चुनाव बखत वोट डारे नइ पाय रहिन.

मथुआ-बहुल 15 विधानसभा इलाका मं भारी पैमाना मं हिंदू नांव हटाय गे रहिस.

ठाकुरबाड़ी मं भरे भीड़ मं ललिता धाली घलो हवय, जेन ह हिंदू कार्ड बनवाय बर अपन घरवाला कार्तिक के संग इहाँ आय हवय. कोबीलाशपुर के रहेइय्या 43 बछर के ललिता इहाँ स्कूटी ले आइस; ये ह करीबन 10 कोस के रद्दा रहिस. ओकर नांव त फाइनल एसआईआर लिस्ट मं नइ ये, फेर कार्तिक के नांव ओ मं हवय.

ललिता के बबा अऊ ददा 1950 के दसक मं भारत आय रहिन, फेर साल 1984 मं बांग्लादेश लहूट गिन. ओ मन कुछेक बछर ले फिर ले भारत आ गिन. 53 बछर के कार्तिक कहिथे,”ओर बाबा एपरो पार करतो. के जाने कोन पारे जोनमेछे [ओकर ददा आवत-जावत रहय. कोन जाने वो ह कोन डहर जन्मे रहिस.]”

मथुआ एक ठन अइसने समाज आय जेन ह बाम्हन- विरोधी विचारधारा ला मानथे अऊ 19 वीं सदी के आखिर मं येकर जनम होइस. ये समाज वो बखत उभर के आइस जब हरिचंद ठाकुर ह अविभाजित बंगाल के उत्ती हिस्सा मं निचली जाति मन ला, खासकर के नमोशुद्र मन ला एकजुट करिस. नमोशुद्र ला पश्चिम बंगाल सरकार ह अनुसूचित जाति मं सूचीबध्द करे हवय. कतको मथुआ लोगन मन मुस्किल हालत मं पश्चिम बंगाल आ गिन अऊ ओकर मन करा कोनो कागजात नइ ये. अयन गुहा बताथें, “बंटवारा के बाद पूर्वी पाकिस्तान/बांग्लादेश मं नमोशुद्र मन ला धार्मिक अतियाचार घलो झेले ला परे रहिस.” यूके के ससेक्स यूनिवर्सिटी मं फेलो, गुहा ह पश्चिम बंगाल मं जाति के राजनीति उपर बनेच काम करे हवय.

ठाकुरबाड़ी मं ललिता जइसने लोगन मन के आना-जाना लगे रहिथे, जेन मन नवा कागजात बनवाय धन अपन कागजात मन के सत्यापन करवाय आथें. कुछेक लोगन मन हिंदू अऊ मथुआ कार्ड के कीमत पूछे घलो आथें.

ललिता ह हिंदू कार्ड बर 170 रूपिया अऊ नागरिकता कार्ड बर 500 रूपिया दे हवय. वो ह सवाल करत कहिथे, “अनेक टाका, ना ( बनेच अकन पइसा, हे ना?)” वो ह बतावत जाथे, “हमन ज़ेरॉक्स (फोटोकॉपी) उपर घलो खरचा करेन.” लोगन मन अलग-अलग कार्ड बर 200 ले 850 रूपिया तक खरचा करिन. कुछेक मामला मं, सिरिफ नागरिकता साबित करे बर 1,000 रूपिया ले जादा खरचा करे ला परिस.

महाराष्ट्र मं सड़क-इमारत बनाय वाले जगा मं काम करेइय्या मजूर कार्तिक कहिथे, “हमन सब्बो वोटर आन – मोर दाई-ददा, भाई, मोर तीन झिन बेटी अऊ ललिता के भाई-बहिनी मन घलो... बस ओकरे नांव लिस्ट ले हटाय गे हवय.”

नांव हट जाय ले वो ह डेर्रागे. ललिता कहिथे, “मंय फोन मं अइसने बनेच अकन जिनिस देखथों (वो लोगन मन के बारे मं जेकर मन के नांव लिस्ट ले हटा दे गे हवय). मंय डरे अऊ हलाकान हवं.” अब वो ह नागरिकता संशोधन अधिनियम के ज़रिया ले अपन नागरिकता हासिल करे बर अरजी दिही.

रीना (बदले नांव) के हालत भारी मुस्किल हवय काबर के ओकर घरवाला के नांव लिस्ट ले हटा दे गे हवय. गाइघाटा ब्लॉक के चिकनपारा के बासिंदा रीना पारी ला बताथे, “एइ देसे आमार केई नेई ( ये देस मं मोर कोनो नइ ये).” ओकर परिवार –जेन मं ओकर ददा, सौतेली महतारी अऊ भाई-बहिनी हवंय - बांग्लादेश मं हवंय.

40 बछर के ये महतारी के कहना आय के ओकर जनम बांग्लादेश मं एक ठन नमोशूद्र परिवार मं होय रहिस, फेर ओला मथुआ समाज के वंशावली धन सांस्कृतिक रीत-रिवाज के बारे मं जादा जानकारी नइ ये. वो ह करीबन 20 बछर पहिली भारत आय रहिस. मूल रूप ले बांग्लादेश के फरीदपुर जिला के पटबाली गाँव के रहेइय्या ये महतारी ह अपन बेटा संग इहाँ आय रहिस; ओ बखत ओकर बेटा डेढ़ बछर के रहिस.

जब मंय ढाई बछर के रहेंय, तब मोर दाई गुजर गे. मोर सौतेली महतारी ह मोला चैन ले रहे नइ देवय. 17 बछर के उमर मं मोर ददा ह मोर बिहाव कर दीस अऊ मोर घरवाला मोला भारी सतावत रहय. रीना अपन बाँस के घर के अंगना मं ठाढ़े कहिथे, “आमी खूब कोस्टो दिन काटा छीलन (मंय भारी मुस्किल मं जिनगी गुजारत हवंव).” इहाँ रहत ओला बीस बछर होगे हवय, फेर वो ह कभू घर नइ गीस. सबले लकठा के बॉर्डर चेकपॉइंट बोंगगाँव आय, जेन ह ओकर घर ले करीबन 7 कोस दूरिहा हवय.

करीबन दस बछर तक ले रीना नादिया जिला के कल्याणी मं रहिस, जिहां वो ह अपन बेटा ला पाले पोसे बर कतको किसम के बूता करिस – जइसने घर के काम, बीमार लोगन मन के सेवा-जतन अऊ रसोइय्या के काम. जब वो ह दूसर बिहाव करिस अऊ चिकनपारा चले गिस, त वो ह कुछु पहिचान-पत्र बनवाइस, फेर ये बछर के सुधर करे गे वोटर लिस्ट मं ओकर नांव नइ रहिस. सुनवाई बखत वो ह कहिस, “एक कोपी कोरे फोटो टुलोखाली [वो मन सिरिफ एक फोटो खींचे रहिन].” हलाकान दिखत रीना सवाल करत कहिथे, “मंय अपन ओ दाई ददा के कागजात कइसने दिखावंव जेन मन ये बखत घलो बांग्लादेश मं हवंय?”

राज मं 27 लाख ले जियादा लोगन मन ट्रिब्यूनल के आगू अपन नांव हटाए जाय के फइसला ला चुनौती दे रहिन, फेर ओकर बाद घलो ओ मन वोट डारे नइ सकिन.

रीना, जेकर दूसर बिहाव ले आठ बछर के बेटी हवय, अपन लइका मन के अगम ला लेके घलो हलाकान रहिथे. ओकर बेटा मुंबई चले गे हवय, जिहां वो ह एक ठन होटल मं बूता करथे. ओकर घरवाला के एक ठन गोड़ ले असकत हवय अऊ वो ह उत्तरी बंगाल के सिलीगुड़ी मं एक ठन केक फ़ैक्टरी मं बूता करथे; वो ह सीएए के तहत नागरिकता बर अरजी घलो दे हवय. कुछु बखत पहिली रीना लकठाच के एक ठन घर मं घर के काम-बूता करत रहिस, फेर अब वो ह अपन घरवाला अऊ बेटा के कमई के भरोसे हवय.

राज के उत्तर 24 परगना जिला के गाइघाटा (सीडी) ब्लॉक मं बसे चिकनपारा मं कच्चा अऊ पक्का, दूनों किसम के घर हवंय. गाँव मं बड़े प्लास्टिक बैग मं पैक करे माला मन अक्सर देखे ला मिलथें; इहाँ के अधिकतर बासिंदा येला बनाय अऊ बेचे के काम करत हवंय. इहाँ के लोगन मन के कहना आय के अधिकतर जवान लइका मन काम करे बर दीगर जगा चले गे हवंय, जेकर सेती इहाँ खासकरके डोकरा सियान मन रहिगे हवंय.

इहाँ रहेइय्या अधिकतर मथुआ लोगन मन एसआईआर के बाद देखिन के ओकर मन के नांव के जांच-पड़ताल चलत हवय. जेन लोगन मन के नांव वोटर लिस्ट मं नइ ये. ओकर मन बर येकर वजा साफ नइ ये अऊ बूथ लेवल ऑफ़िसर (बीएलओ) करा घलो येकर कोनो जुवाब नइ ये.

चिकानपारा मं अपन पक्का घर के बहिर बइठे अमल कृष्ण हालदर कहिथे, “आमार भोट नेइ तो की होयछे? आमी आज अछि काल नेइ (मोर वोट नइ ये त काय होईस? मंय आज इहाँ हवं, कालि चले जाहूँ.”

अमल 1985 मं बांग्लादेश के खुलना ले भारत आय रहिस. वो बखत वो ह 28 बछर के रहिस; ओला कोलकाता मं इमारत बनाय के जगा मं काम-बूता मिलिस अऊ वो ह दक्खिन 24 परगना जिला के कानूपुर मं रहे लगिस. पश्चिम बंगाल आय के करीबन आठ महीन बाद, अमल चिकनपारा चले गे अऊ बनिहारी करे लगिस.

अपन समाज के कतको दूसर लोगन मन के जइसने, अमल घलो बीते दू चुनाव मं घलो ममता बनर्जी के अगुवई वाले ऑल इंडिया तृणमूल कांग्रेस ला वोट दे रहिस. गुजरत बखत के संग, अलग-अलग राजनीतिक पार्टी मन मथुआ महासंघ के मुखिया बिनापानी देवी – जेन ला समाज के लोगन मन मया ले बोरोमा कहिथें – के समर्थन हासिल करे मं लगे रहिन. बिनापानी देवी, पी. आर. ठाकुर के घरवाली रहिस. पी. आर. ठाकुर,गुरुचंद ठाकुर के पोता रहिस, जेन ह ये इलाका मं मथुआ महासंघ के स्थापना करे रहिस. साल 2019 मं बिनापानी देवी गुजर गिस अऊ परिवार मं राजनीतिक जुड़ाव ला लेके मतभेद अऊ बढ़गे.

अमल ह बेनर्जी के पार्टी बर अपन मया ला छोड़ दिस जब वो ह साल 2023 मं मालदह मं एक ठन सभा मं अपन संत गुरुचांद ठाकुर ला ‘गोरू-चांद’ के रूप मं गलत बोल दिस. “आमार ठाकुर के जे गोरू बोले, तार साथे मिनाई,नइ, नइ [मंय ओकर समर्थन नइ करंव जेन ह मोर भगवान ला गोरू कहिथे, नइ, नइ],” अमल ह अपन मुड़ी हलावत कहिथे.

वो ह अब भारतीय जनता पार्टी (बीजेपी) के खुलके समर्थन करथे अऊ अपन चुनाव इलाका के पार्टी के बइठका मं हर बेर सामिल होथे.

साल 2020 मं बोंगाँव मं बीजेपी के एक ठन मीटिंग मं जाय बखत होय एक्सीडेंट सेती अमल ला काम-बूता मिले मुस्किल होगे हवय. ओकर घरवाली शाश्वती कोलकाता के बाघाजतिन बजार मं माला बनाथे अऊ बेचथे, जेकर ले वो ह महीना के 4,000 रूपिया कमा लेथे. ओकर नांव घलो लिस्ट ले निकार दे गे हवय. अमल ह अपन बेटा डहर ले घलो अपील करे हवय, जेन ह प्रवासी मजूर आय अऊ ये बखत मुंबई मं हवंय.

अमल के कहना आय के वो ह साल 2019 मं लागू नागरिकता संशोधन अधिनियम (सीएए) के तहत नागरिकता बर आवेदन करे सेती अपन हिंदू अऊ मथुआ कार्ड के संग पहिलीच ले ठाकुरबाड़ी जा चुके हवय. ये कानून अफ़गानिस्तान, पाकिस्तान अऊ बांग्लादेश मं धार्मिक अतियाचार झेले वो अल्पसंख्यक लोगन मन ला भारत के नागरिकता हासिल करे के रद्दा देथे, जेन मं 31 दिसंबर 2014 के पहिली भारत आय रहिन.

ये इलाका के नवा चुने गेय विधायक सुब्रत ठाकुर, संत गुरु हरिचंद ठाकुर के वंशज आय. गाइघाट के विधायक कहिथे, “हिंदू देर रोक्खा कोरते होबे” ​​[हमन ला हिंदू मन के रक्षा करना होही] अऊ वो ह कहिथे के ये मं सब्बो जात के लोगन मन हवंय. वो ह सीएए ला मथुआ समाज बर 'रोक्खा कोबोच' मतलब सुरक्षा कवच बताथे. वो ह बताथे के, “ते पायके मथुआ समाज ह घलो हमन ला भारी वोट दे हवंय.”

वइसे, तृणमूल के राज्यसभा सांसद ममता बाला ठाकुर ह पारी ला बताइस के बनेच अकन मथुआ समाज के लोगन मन डर डरके जिनगी गुजारत हवंय अऊ ओकर मन के भविष्य साफ नइ ये. वो ह कहिथे, “लोगन मन अलग-अलग कागजात बनवाय बर भाग-दौड़ करत हवंय. सरकार ला डिटेंशन कैंप खोलत देख मथुआ समाज के लोगन मं डरे हवंय के आगू ओकर मन के संग काय होही.”