पस्चिम बंगाल: आपने घर में बाइली भइलन मतुआ

मई 2026 के एतवार रहे. पस्चिम बंगाल के उत्तर 24 परगना जिला में मतुआ समुदाय के आध्यात्मिक आस्था के केंद्र ठाकुरबाड़ी में भारी भीड़ जुटल. बाकिर एकरा में से जादेतर लोग मंदिर में माथा टेके ना आइल रहे, बलुक तपत गरमी में लमहर कतार में आपन बारी के इंतजार करत रहे, एह उम्मीद में कि मिले वाला कागज उनकर नागरिकता के सबूत बनी.

ई लोग ऊ बा, जेकर नाम विशेष गहन पुनरीक्षण (एसआईआर) के दौरान मतदाता सूची से काट देवल गइल रहे. एसआईआर में 90 लाख से जादे नाम काटल गइल बा. ऊ लोग अप्रिल 2026 में भइल राज्य विधानसभा चुनाव में आपन वोट ना डाल पाइल.

मतुआ बहुल 15 विधानसभा क्षेत्र सब में बड़ तादाद में हिंदू मतदाता लोग के नाम हटावल गइल बा.

ठाकुरबाड़ी में जुटल भीड़ में ललिता धाली भी बाड़ी. ऊ आपन घरवाला, कार्तिक संगे हिंदू कार्ड बनवावे आइल बाड़ी. कबिलाशपुर के रहे वाला 43 बरिस के ललिता स्कूटी चला के मोटा-मोटी 30 किमी दूर इहंवा अइली. आखिरी एसआईआर सूची में उनकर नाम नइखे आइल, जबकि कार्तिक के नाम बा.

ललिता के दादा आ बाऊजी लोग 1950 के जमाना में भारत आइल रहे. बाकिर 1984 में बांग्लादेस लउट गइल. कुछ साल बाद ऊ लोग फेरु भारत चल आइल. 53 बरिस के कार्तिक कहेलन, “ओर बाबा इपर-ओपर करतो. के जाने कोन पार जन्मेछे (बाबा एने-ओने आवत-जात रहस, के जानता उनकर जनम कवना तरफ भइल).”

मतुआ समाज 19वां सदी के आखिर दौर में जनमल एगो ब्राह्मणवाद विरोधी संप्रदाय बा. अखंड बंगाल के पूरबी हिस्सा में हरिचंद ठाकुर जब निचला जात के लोग, खास करके नामशूद्र लोग के एकजुट कइलन, ओही दौर में मतुआ पंथ उभरल. पस्चिम बंगाल में नामशूद्र लोग अनुसूचित जाति के रूप में सूचीबद्ध बा. केतना मतुआ लोग जिनगी में दुख आ कष्ट झेलत पस्चिम बंगाल आइल. ओह लोग लगे दस्तावेज नइखे. ब्रिटेन यूनिवर्सिटी ऑफ ससेक्स में फेलो, अयान गुहा बतावत बाड़न, “बंटवारा भइला के बाद पूरबी पाकिस्तान (बांग्लादेस) में नामशूद्र लोग के भी धार्मिक प्रताड़ना झेले पड़ल.” गुहा पस्चिम बंगाल के जातिगत राजनीति के तौर-तरीका पर व्यापक अध्ययन कइले बाड़न.

ठाकुरबाड़ी में ललिता जइसन लोग के आवाजाही जारी बा. केहू नयका कागज बनवावे आइल बा, त केहू आपन पुरनका कागज के जांच करवावे. कुछ लोग हिंदू आ मतुआ कार्ड बनवावे में कतना पइसा लागी, ई जाने आइल बा.

ललिता हिंदू कार्ड बनवावे खातिर 170 रुपइया आ नागरिकता कार्ड बनवावे खातिर 500 रुपइया देली ह. ऊ पूछेली, “अनेक टका, ना (बहुते पइसा बा, ह कि ना)?” ऊ आगू कहतारी, “जेरॉक्स (फोटोकॉपी) करावे में भी हमनी के पइसा लागल.” केतना लोग अलग-अलग कार्ड खातिर 200 से 850 रुपइया तक खरचा कइले बा. कुछ मामला में त नागरिकता साबित करे खातिर 1,000 से भी जादे रुपइया लाग गइल बा.

महाराष्ट्र में ईंटा-सीमेंट के काम करे वाला प्रवासी मजूर कार्तिक कहेलन, “हमनी सभे मतदाता बानी. हमार माई-बाऊजी, भाई, हमार तीन ठो लइकी आ ललिता के भाई-बहिन भी. नाम खाली उनकरे काटल गइल बा.”

नाम हटाए जाए से लोग में डर पैदा हो गइल बा. ललिता कहेली, “हम फोन पर बहुते चीज सब देखिला. (ओह लोग के बारे में जेकर नाम मतदाता सूची से हटा देवल गइल बा.) हम डेराएल बानी, चिंता में बानी.” अब ऊ नागरिकता संशोधन अधिनियम के जरिए नागरिकता खातिर आवेदन करे के कोसिस करिहन.

रीना (नाम बदलल बा) के स्थिति खास नाजुक बा. उनकर घरवाला के नाम मतदाता सूची से हटा देवल गइल बा. गायघाट ब्लॉक के चिकनपाड़ा के रहे वाली रीना पारी से कहली, “एई देशे आमार केउ नेई (एह देस में हमरा केहू नइखे).” उनकर बाऊजी, सौतेल माई आ भाई-बहिन समेत पूरा परिवार बांग्लादेस में बा.

चालीस बरिस के रीना बतावेली कि उनकर जनम बांग्लादेस में एगो नामशूद्र परिवार में भइल रहे. बाकिर ओह लोग के मतुआ समुदाय के वंश परंपरा, चाहे सांस्कृतिक मान्यता के बारे में जादे जानकारी नइखे. ऊ कोई 20 साल पहिले भारत आइल रहस. मूल रूप से बांग्लादेस के फरीदपुर जिला के पाटबली गांव के रहे वाली रीना आपन डेढ़ बरिस के बेटा संगे भारत आइल रहस.

रीना आपन बांस के घर के अंगना में ठाड़ बाड़ी. ऊ कहेली, “हम अढ़ाई साल के रहीं, त माई चल बसल रहे. सौतेल माई हमरा कबो शांति से रहे ना देत रहस. बाऊजी हमार बियाह 17 बरिस में कर देले रहस आउर हमार घरवाला हमरा संगे मार-पीट करत रहे. आमी खूब कोष्टे दिन काटछिलाम (हमरा खातिर ऊ बहुते कष्ट वाला दिन रहे).” भारत में आपन दू दसक के वास के बीच ऊ कबो आपन घर ना गइली. उनकर मौजूदा आवास से सबले लगे के सीमा चौकी कोई 20 किमी दूर बोंगांव में रहे.

कोई दस बरिस ले रीना नदिया जिला के कल्याणी में रहली. उहंवा ऊ आपन बेटा के पाले खातिर कइएक तरह के काम कइली. घर में काम, मेडिकल अटेंडेंट आ रसोइया. अइसने आउर बहुत काम. दोसर बियाह करे आ चिकनपाड़ा आवे के बाद ऊ कुछ पहचान से जुड़ल कागज बनवइली. बाकिर एह बरिस संशोधित मतदाता सूची में उनकर नाम ना आइल. ऊ जवन दिन सुनवाई में गइल रहस, ओकरा बारे में ऊ कहेली, “ई कॉपी कोरे फोटो तुल्लो खाली (ऊ लोग खाली एगो फोटो खींचलक).” साफ-साफ चिंतित देखाई दे रहल रीना पूछेली, “अब आपन माई-बाऊजी के कागज कहंवा से लाईं, ऊ लोग त अभियो बांग्लादेस में बा?”

प्रदेस में 27 लाख से जादे लोग आपन नाम हटाए जाए के खिलाफ ट्रिब्यूनल में गुहार लगवलक. एतना कइला के बादो ऊ लोग भोट ना दे सकल.

रीना के दोसर बियाह से एगो लइकी बा, जे अबही 8 बरिस के बा. रीना के चिंता बा कि आगू उनकर लरिका लोग के का होई. बेटा त होटल में काम करे बंबई चल गइल. रीना के घरवाला शारीरिक रूप से अक्षम बाड़न. उनकर एगो गोड़ में दिक्कत बा. ऊ उत्तर बंगाल के सिलीगुड़ी में केक के एगो कारखाना में काम करेलन. ऊ सीएए के तहत नागरिकता खातिर पहिलहीं आवेदन कर चुकल बाड़न. कुछ समय पहिले ले रीना लगे के एगो घर में घरेलू कामगार के रूप में काम करत रहस. बाकिर अब परिवार उनकर घरवाला आ लइका के आमदनी पर आश्रित बा.

प्रदेस के उत्तर 24 परगना जिला के गायघाटा (सीडी) ब्लॉक में पड़ेवाला चिकनपाड़ा में रउआ काच आ पक्का, दुनो तरह के मकान देख सकत बानी. गांव में कइएक जगह पन्नी में रखल फूल के माला सब लउकी. इहंवा के जादेतर रहवासी एकरा बनावे आ बेचे के काम करेला. गांव में रहे वाला लोग के कहनाम बा कि नयका उमिर के जादेतर लोग काम खोजे बाहर चल गइल बा. एही चलते इहंवा रहे वाला लोग अधिकांश बुजुर्गे लोग बा.

इहंवा रहे वाला मतुआ रहवासी के पता चलल कि एसआईआर के बाद ओह लोग के नाम के ‘विचाराधीन’ के सूची में डाल देवल गइल बा. मतदाता सूची से हटावल लोग के अबले एकर कोई साफ कारण नइखे बतावल गइल. आ बूथ लेवल ऑफिसर (बीएलओ) लगे भी एकर कवनो जवाब नइखे.

चिकनपाड़ा में आपन पक्का मकान के बाहर बइठल अमल कृष्ण हलदर कहेलन, “आमार वोट नेई तो की होयेछे? आमी आज आछी, काल नेई (जदि हमरा लगे वोट नइखे, त का भइल? हम आज इहंवा बानी, कल के का पता).”

अमल सन् 1985 में बांग्लादेस के खुलना से भारत आइल रहस. ओह घरिया ऊ 28 बरिस के रहस. उनका कोलकाता में रोड, बिल्डिंग जइसन चीज बनावे के काम मिलल. ऊ उत्तर 24 परगना जिला के कानुपूर में रहे लगलन. पस्चिम बंगाल आवे के कोई आठ महीना बाद अमल चिकनपाड़ा चल गइलन आ खेत मजूर के काम करे लगलन.

आपन समुदाय के कइएक दोसर लोग जेका अमल पछिला दू चुनाव में ममता बनर्जी के अगुवाई वाला ऑल इंडिया तृणमूल कांग्रेस के भोट देले रहस. बरिसन से अलग-अलग राजनीतिक दल मतुआ महासंघ के मातृसत्ता बीनापानी देवी के समर्थन हासिल करे के कोसिस करत रहल बाड़न. उनका समुदाय के लोग ‘बडोमा’ भी पुकारेला. बीनापानी देवी, मतुआ महासंघ के स्थापना करे वाला गुरुचंद ठाकुर के पोता पी.आर. ठाकुर के घरवाली रहस. बीनापानी देवी 2019 में चल बसली. ओकरा बाद परिवार के भीतर राजनीतिक झुकाव के लेके बंटवारा आउर गहिर हो गइल.

अमल के ममता बनर्जी के पार्टी से मोह 2023 में तब टूट गइल, जब मालदा में एगो जनसभा के दौरान ऊ लोग उनकर दोसर आध्यात्मिक गुरु गुरुचंद ठाकुर के नाम गलत, ‘गोरुचंद’ कह देलक. अमल माथा हिलावत कहलन, “आमार ठाकुर के जे गोरु बोले, तार साथे आमी नाई. नाई (जे हमार भगवान के गाय कहता, हम ओकर साथ ना देहम, ना, कबो ना).”

अब ऊ भारतीय जनता पार्टी (बीजेपी) संगे आपन समर्थन खुलके जाहिर करेलन आउर विधानसभा क्षेत्र में पार्टी के बैठक सब में नियम से आवेलन.

सन् 2020 में बोंगांव में भाजपा के एगो बैठक में हिस्सा लेवे जाए घरिया भइल एगो दुर्घटना के बाद अमल काम करे लायक ना रह गइलन. उनकर मेहरारू शाश्वती कोलकाता के बाघाजतिन बजार में माला बनाके बेचेली, जेकरा से उनका महीना के 4,000 रुपइया आमदनी हो जाला. मतदाता सूची से उनकरो नाम काट देहल गइल बा. अमल मुंबई में रह के मजूरी करे वाला आपन बेटा के नाम से भी अपील कर चुकल बाड़न.

अमल के कहनाम बा कि ऊ आपन हिंदू आ मतुआ कार्ड लेके पहिलहीं ठाकुरबाड़ी जा चुकल बाड़न, ताकि 2019 में लागू भइल नागरिकता संशोधन अधिनियम (सीएए) के जरिए नागरिकता खातिर आवेदन कर सकस. ई कानून अफगानिस्तान, पाकिस्तान आ बांग्लादेस में धार्मिक उत्पीड़न झेल रहल अल्पसंख्यक लोग खातिर भारत के नागरिकता प्राप्त करे का रास्ता बनावेला. शर्त बा कि ऊ लोग 31 दिसंबर 2014 से पहिले भारत आइल होखे.

सुब्रत ठाकुर, एह इलाका के नयका चुनाइल विध्याक, आध्यात्मिक गुरु हरिचंद ठाकुर के सीधा वंशज बाड़न. गायघाटा विधायक के कहनाम बा, “हिंदु देर रोख्या कोरते होबे (हिंदू के बचावे के पड़ी),” आ एह बात पर जोर देलन कि एह में हर जाति के हिंदू लोग बा. ऊ सीएए के मतुआ समुदाय खातिर “रोक्खा कोबोच” माने सुरक्षा कवच बतावेलन. ऊ समझइलन, “मतुआ लोग एही चलते भारी संख्या में हमनी के वोट देलक.”

अइसे, तृणमूल कांग्रेस के राज्यसभा सांसद ममता बाला ठाकुर पारी से बतइली कि बहुते मतुआ लोग डर के साया में जी रहल बा. आगे का होई, ई लेके उनका लगे कवनो साफ-साफ जानकारी नइखे. “लोग अलग-अलग कागज बनवावे खातिर इहंवा-उहंवा धउड़ता. सरकार के डिटेंशन कैंप खोलत देख के मतुआ लोग डेराइल बा, आगे ओह लोग संगे का होई.”