गीत! सब्द! आन्दोलन!

सांझ हो गईल रहे जब दुर्गा औरी नारायन स्वामी के नाटक ‘गंगम्मा नीरनागा जडे एनितवले’ पूरा भईल. कोटिगनहल्ली रमैया के लिखल इ नाटक जमीन, पानी प संवैधानिक अधिकार के बारे में बा. पूरा राज्य में इ नाटक के खेला, छुआछूत के ओर लोग के ध्यान ले आवे खातिर खेलल जाला.

जब ओ लोग के खेला के गीत धीमा होखेला तब उ लोग सड़क के अपना मंच प बाबासाहब भीमराव आंबेडकर के एगो तस्वीर ध देला. बाबासाहेब आंबेडकर एगो विद्वान, समाज के सुधारे वाला औरी समानता के माने वाला रहलन. ऊ दलितन के अधिकार खातिर लड़लन.

अइसे त लोग नाटक के बेरा बईठल रहे, औरी बड़ी ध्यान से सुनत रहे. बाकिर जइसही आंबेडकर के तस्वीर धयिल गईल, कर्नाटक के ऊ छोट गांव में माहौल तुरंत बदल गईल.

“जब हमनी तस्वीर लगावेनी, त उ लोग हमनी के जात के अकान लेला. हमनी के पानी देवे से मना क देला. अपना ओसारा में ना बईठे देला. कौनो-कौनो गांव में त हमनी के कार्यक्रम रद्द क दियाला,” नारायण स्वामी कहलन.

दुर्गा (31) से उनकर उमीर, उनकर बियाह औरी दूसर बात पूछल जाला. “का तहार माई-बाप ए तरे के खेला के आगया देला?”

एगो साधारनो बात में हीनाई सहे के परेला. कपड़ा बदले चाहे सौचालय जाए खातिर जब हमनी आवेनी तब लोग चिल्ला के कहेला, ‘ए तू इंहा काहे आवतारू? जा, जा होने झार-झंखार में जा के आपन कम चलावा.’ हमनी के बहुते अपमान सहे के परे.” दुर्गा मन पार के कहली. मन के घाव अभियो उनका मुंह प साफ लउकत रहे.

उ सब इ हीनाई के गीत में बदल देवेला:

तेराहल्ली बेट्टा प सून-सान बा. इंहा ना त मोबाइल टावर के सुन-गुन बा, ना इंटरनेट के कौनो तरंग इ पहाड़ी ले पहुंच पावेला. केहू के फोन करे के होखे त ढलान से तब ले नीचे उतरत रहे के परेला जब ले सिग्नल ना मिल जाव. इंहा के जिनगी में कई गो जरुरियाती चीज नईखे. ना पहचान बा, ना जरुरियाती सुविधा, ना सरकारी मदद. तब्बो, एही सून-सान के बीच से उठल बा प्रतिरोध अइसन गीत, जौन अब्बे आंबेडकरवादी लोक गायक लोग गावल ह.

संगीतकार नारायण स्वामी औरी दुर्गा बुड्डीदीपा अलगे-अलगे जिनगी जिए वाला लोग ह. तब्बो एक साथे मिल के साझा बिरासत, जुझारूपन, प्रतिरोध औरी एकजुटता के गीत गावेला. जौन लोग के बीतल दुख के याद दिलावेला, नया उम्मीद जगावेला.

ओ लोग के आपन-आपन जतरा कर्नाटक के कोलार जिला के एगो छोट दलित बस्ती, तेराहल्ली बेट्टा, के अंगनाई से सुरु भईल. इंहा लोग गीते के माध्यम से आपन सिखल बात, याद, प्रेम, जिनगी जिए के लूर-ढंग औरी अपनापन के भावना के कहेला.

इ छोट गांव पापराजनहल्ली पंचायत में बा, जहां एगो मानल दरगाह बा. जहां हिन्दू औरी मुसलमान दुनू आवेला. लमसम 1000 के आबादी वाला इ जघ़े में खेतिहर लोग, मजदूर औरी बेरा-बेरा प कार करेवाला लोग बा. एमे एक तिहाई लोग (2011 जनगणना) दलित बा.

कोलार जिला के जातिवाद विरोध औरी आंबेडकरवादी इतिहास बहुत पुरान ह. इ ‘दलित संघर्ष समिति’ के देन ह, जौन दलित संगठन कुल के सामिलात मंच ह.

दुर्गा पारी के बतवली, “आंबेडकर, बुद्ध औरी बासव के साथे-साथे कोलार के माटी से जुड़ल हमनी के सांस्कृतिक, भावना वाला जर के गीत गावला से हमनी के संगीत यात्रा के एगो डोर में बांधेला.”

उ अपना स्कूल के दिन से गीत गावल सुरु क देले रहली. इ उनकर गीत प्रेमी आजी औरी माई रहे लोग जे लोग ‘सोबाने पदा‘ (पुरनका लोकगीत) के गायिका रहे लोग. ओही लोग के देख के इनका मन में कलाकार बने के इच्छा भईल. सोबाना गीत के ‘मुंहा-मुंही’ चले वाला इतिहास बहुत पुरान बा. इ गीत कई पीढ़ी से चलता. एकरा खेत में कार करे वाली मेहरारू कुल परब-तेवहार औरी दूसर जग-परोजन प गावेली.

दलित मेहरारू कुल के इतिहास के पन्ना पर जघे ना मिलल. इ गीत ओ सब के मानल चीन्हा औरी जिंदा कोस ह. इ सब गावला से आगे बढ़ल बा. ठीक ओ बेरा जब मंदिर औरी स्कूल में ओ सब के जाए के मनाही रहे.

2010 में दुर्गा जब तीसरा कलास में रहली, तब कवि औरी कार्यकर्ता कोटिगनहल्ली उनका सरकारी इस्कूल में एगो कार्यशाला करे आईल रहलन. उनका एगो चिऊंटी के किरदार मिलल रहे. पूरा नाटक में बस एक बेर लाउके वाला किरदार रहे. बाकिर दर्सक लोग के ताली औरी खुसी उनका के औरी मन लगा के सीखे खातिर आगे कईल.

दुर्गा कहेली कि एगो कलाकार जइसन उनकर जात्रा के सुरुआत ठीक एही बेरा भईल.

“जे ओह दिन कोटिगनहल्ली रमैया ना आई रहतन, त आज हमार काम एकदम अलगे रहीत! हमरा कला चाहे थियेटर के एक्को अच्छर ना मालूम रहीत.” उ आज अपना के एगो कलाकार, नायिका, गायिका औरी आंबेडकरवादी मानेली. दुर्गा. ऊ बुड्डीदीपा सेंटर में रहेली औरी लगहीं रहत अपना माई-बाप से भेंट करे जायेली. ऊ कहेली, “हमनी अपना गीतन से आंबेडकर के बारे में जानेनी औरी अपना कला में आंबेडकर के देखावेनी. “

दुर्गा कोलाटा सीखे औरी डुल्लू कुनीता (एगो नाच के ढंग ह जेमे नाचे वाला एगो बड़का ड्रम बजावेला) बजावल सुरु कईली. उ तनियक मुस्किया के कहली, ”लोग हमरा से अक्सरहा कहे कि हम एगो लईका जइसन नाची औरी डुल्लू कुनीता बजाइला.” कोलाटा औरी डुल्लू कुनीता कर्नाटक के पुरान लोकनृत्य ह. ई समूह के जिनगी औरी मुंहा-मुंही (मुंहजबानी) इतिहास में बसल बा.

नारायण स्वामी के बाप-दादा ‘कोलाटा’ (लाठी संघे नाचे वाला नाच) कलाकार रहे. बाकिर उ इ रीत के आगे ना बढ़ा सकलन. उ जनमे से आन्हर रहस. त उनकर मन गावे ओरिया चल गईल. ऊ बिरोध के गीत औरी ‘तत्वपद’ (दरसन के बात वाला लोकगीत ह) गावे लगलन. ई गीत धार्मिक मेलजोल, सामाजिक समानता औरी सांस्कृतिक लेन-देन के आगे बढ़ावत रहल.

ऊ अपने से तंबूरी बजावे के सिखलन. तार वाला ई बाजा देखे में भले साधारण लागे, बाकिर एकर इतिहास बहुत पुरान बा. कई पीढ़ी से, इ तंबूरी घुमंतू ‘शरण’ कवि लोग के बाजा रहल बा, जे गांव-गांव घूम के समानता के संदेस पसारत रहे. एकर जर बसवन्ना के ‘वचन’ (भक्ति आन्दोलन के दार्शनिक कविता, जे समानता, मेहनत के महत्त औरी भगवान सिव के भक्ति के बढ़ावे) में रहे. वीणा चाहे मृदंगम जइसन बाजा से अलगे, जौना के ब्राह्मणवादी सीमा में सुरक्षित राखल जाय, तंबूरी हमेसा से साधारण लोग के बाजा रहल. एह बिद्रोही और लोकतांत्रिक बाजा के केनहियो ले जाईल जा सकता.

तीस बरीस के नारायण स्वामी आपन माई-बाप, मेहरारू औरी लयिकन के साथे रहेलन. कार खातिर 20 किलोमीटर दूर ‘बुड्डीदीपा सांस्कृतिक केंद्र’ ले रोज जालें-आवेलें.

उनका इयाद बा कि उनका मन में लायिकाइयें से बस तम्बूरी छूए के बहुत इच्छा रहे. इ चाह ए बात से पैदा भईल रहे कि उ ओकरा कीने के खर्चा ना उठा सकत रहलन. आखिर एगो प्रस्तुति के मानदेय के रूप में उनका एगो तंबूरी मिलल, जौन उनका जिनगी के अनमोल छन बन गईल.

कोटिगनहल्ली रमैया दलित समुदाय के मानल कवि औरी लेखक हवन. जाति भेद मिटावे में उनकर मेहनत, उनका रचना आ कविता में साफ-साफ झलकेला. रमैया के नाटक ‘कागे कन्नू इरवे बाला’ के खेला कई गो स्कूल में होला. इ नाटक दलित औरी फरके कईल (हाशिया पर बसल) लईकन के आपन संस्कृति समझे औरी इतिहास के जाने में सहायक होला.

इ दुर्गा के पहिला नाटक रहे. आजो उ औरी नारायण स्वामी गायक औरी कलाकार के रूप में साथे कार करता.

1970 में बी. बसवलिंगप्पा (एगो दलित राजनेता औरी कर्नाटक के कन्नड़ देवराज उर्स सरकार में पहिले मंत्री रहलन) मुख्यधारा के कन्नड़ साहित्य के आलोचना करे खातिर ‘बूसा’ (मवेसियन के चारा) सब्द के इस्तेमाल कईलन. मुख्यधारा के कन्नड़ साहित्य पर अंगुरी उठावत, ऊ कहलन कि इ दलित साहित्य के किनारे धकेलता. एकरे चलते राज्य में ‘बूसा आन्दोलन’ सुरु भईल, जेकरा से कई गो दूसर प्रतिरोध आन्दोलन के सुरुआत भईल.

मैसूर औरी कोलार में ‘दलित एक्शन कमिटी’ औरी ‘दलित छात्र संघ’ प्रतिरोध गीत के बढ़ावा दहलस. औरी कन्नड़ साहित्य ‘बंडया साहित्य’ के उभारे में महत्त भूमिका निभईलस. एगो कार्यकर्ता के रूप में, रमैया कोलार में दलित संघर्ष समिति के बनाहूं में महत्त भूमिका कईलन.

कोटिगनहल्ली रमैया आ कुछ लोग मिल के 2005 में कोलार के शिवगंगे में ‘आदिम सांस्कृतिक केंद्र’ सुरु कईलक. एकर काम कर्नाटक में ‘रंगायन’ औरी ‘नीनासम’ जइसन रंगमंच संस्थान के ब्राहमणवादी दबदबा के चुनौती दहल रहे. अइसन संस्थान सब में ऊंच जात के लोग दलित दुख पर नाटक त करे, बाकिर दलित लोग के मंच प प्रस्तुति के अवसर सायदे कब्बो देवे. जात-पात के बढ़ावा देवे वाला रंगायन के खिलाफ दलित कार्यकर्ता, लेखक औरी रंगमंच समुदाय भारी बिरोध कइलक.

आदिम में दुर्गा औरी नारायण स्वामी पहिला बेर ठीक से थियेटर में गईल लोग. दुर्गा कहेली, (आदिम सेरकोंडमेले नामगे नम्मा हदिना महत्त्वा तिलिसिकोट्टू, जोतेगे हादुवा धैर्य बंटू) आदमी हमनी के साहस दहलस. इहे हमनी के बतवलस कि हमनी के जिनगी लजाये वाला नईखे. हमनी के गीत छोट नईखे.

एगो खुलहा मैदान में बसल आदिम, गांव के परिवेस में घुल-मिल गईल बा. आंबेडकर नाटकोत्सव (अंबेडेकर थियेटर फेस्टिवल), हनीमी हब्बा जइसन नियमित रूप से होखे वाला आयोजन में जात-पात, मिहनत मजूरी आ जमीन के हक के बारे में नाटक खेलल जाला. साथेही बुडकट्टू जनपद (आदिवासी लोक परम्परा) प कार्यशाला कईल जाला. हाशिया पर धकेल देवल गइल कलाकार लोग एकजुट होके नया तरह के नाटक रचेला आ ब्राह्मणवाद के चुनौती देवेला.

दुर्गा के इयाद बा कि के तरे अभ्यासे गांव के बैठकी बन जात रहे. काम कईला के बाद गोल में चर्चा होखे. थियेटर के सब्केहू के सामिलात बिचार जईसन देखल जाय. दुर्गा औरी नारायण स्वामी खातिर इ पहिला मौका रहे जब ओ सब के खाली लोक-कला के तमासे ले ना रखल गईल.

बिरोध के इ बोली तब औरी तेज भईल जब उ सब 2010 में बनल ‘बुड्डीदीपा कल्चरल सेंटर’ में आईल. रमैया आंबेडकरवादी बिचारधारा के सांस्कृतिक, राजनैतिक औरी बौद्धिक जागृति खातिर इ नया जगह बनवलें. इंहा एगो ‘आंबेडकर लाइब्रेरी’ बा, जेकर नाम ‘आंबेडकर लाइब्रेरी मूवमेंट ह. एकरा ‘आलम’ बोलावल जाला. उनकर कहनाम बा कि उ दलित संघर्ष के खाली संग्रहालय ले नईखन राखे के चाहत

रमैया लईकन खातिर नाटक लिखले बाड़न. जौना के उ गरमी के कैंप (समर कैंप) के बेरा खेलेलन. उ पारी के बतवलन, “हमनी किताब वाला पढ़ाई से अलगे, कला, अभिनय औरी खेल से लईकन के भासा, सामाजिक बिज्ञान औरी जागरूकता से जोरेनी.”

दुर्गा कहली, “हमनी के अक्सरहां ‘लोक गायक चाहे आंबेडकरवादी कहल जाला. इ एगो अइसन चीन्हा ह, जौन हमनी के कला के कुछ अलगे चाहे एकओरा परल चीज जइसन देखावेला.” इ सब बात के एक ओर क के, उ रमैया के रचना-क्रांतिकारी औरी जात-बिरोधी गीत गावेनी.

लोक संगीत आज बहुत नाजुक समय से निकल रहल बा. काहे से कि एकरा खातिर मौका मिलल कम होत जाता. पहचान मिलल त दूर के बात बा. बाकिर इ जोड़ी कहेला कि हमनी त खाली ज़िंदा रहे खातिर औरी बिरोध करे खातिर गावेनी. बड़का मंच ले पहुंच ना भईला के बादो, इ सब के गीत लोग ले पहुंचिये जाला.

कलाकार इ बात जानता कि लोग के अब डीजे, फिल्मी गीत, इलेक्ट्रिक धुन औरी गिटार जादे भावता. दुर्गा आगे कहली, “बाकिर हमनी तब्बो गावेनी, भले सहर हमनी के ना सुने के चाहे. काहे से कि हमनी के नजरिया औरी मकसद एकदम साफ़ बा. हमनी अपना गीतन में बाबा साहेब के ले के चलेनी.”

बाकिर खाली अपना बात प अड़ल रहला से ना त किराया निकलेला औरी नाही बिले भराला. जहां एक ओर कर्नाटक के ‘कन्नड़ औरी संस्कृति बिभाग’ शास्त्रीय कला कुली के बढ़ावे खातिर करोड़न रोपया के सब्सिडी देला, ऊंहे आंबेडकरवादी लोक गायक एकरा से पूरा तरे खाली रह जाला. दुर्गा कहली, “जब हमनी आंबेडकर के बिचारधारा वाला गीत गावेनी, त हमनी के कार्यक्रम करे के जगहे ना मिलेला.” आमदनी के कवनो भरोसा ना होला. बाकिर हमनी के लगे औरी बरले का बा? इहे त हमनी के जिनगी ह.”

सूखा से जूझत कोलार जिला में, जहां खेती-बारी के मस्किल के चलते बहरा गईल एकदम साधारन बात बा, बेसी दलित लोग कम मजदूरी वाला छोट-मोट कार में लागल बा. कर्नाटक में कार करे वाला दलित मेहरारू लोग के गिनती 20 परतिसत से कम बा. “खेत में सुखाड़ देखेनी औरी हमनी के थरियो में सुखाड़े भईल रहेला.” दुर्गा अपना आजी के बात मन पारतारी. “गीते हमनी के जिन्दा रखले बा.”

नारायण स्वामी मन पर के कहलन कि उ कब्बो राजगीर मजूरा, कबो खेती-बारी के मजूर , त कब्बो लकडहारा हो के कार कईलन. ”हम इतने कमाई मस्किल से क पाईं कि हमार पेट भर सके औरी अपना माई-बाप के सहारा हो सकीं. जल्दिये हमार अब्बर (दैहिक अक्षमता) देह गुने, लोग हमरा के कार दहल बंद क दहल.”

सुरुआत में दुर्गा औरी नारायन स्वामी के इहो कलाकार के जइसन हर कार्यक्रम खातिर 1,000 रोपया मिले. जौन दसियन साल बाद धीरे-धीरे बढ़ के 5,000 रोपया हो गईल. उ लोग पइसा के मजबूरी के चलते एगो गोल में कार्यक्रम करेला, उ दूसर कलाकार औरी बाजा के खर्चा नइखे उठा सकत.

अब तक के सबसे बेसी 10,000 रोपया ओ सब के मिलल बा, जेकरा के उ लोग आपस में बांट लेले बा. दुर्गा कहली, “इ कार में निश्चित कुछु नईखे. हमनी के लगे आपन देखभाल करे चाहे अपना परिवार के गुजारा चलावे खातिर आमदनी के कवनो पक्का इंतजाम नईखे. 15 साल के कार के बादो, हमनी आपन रोजदिना के जरूरत पूरा करे ला आजो संघर्स कर रहल बानी.”

“जब हमनी सहर जानी, त जात त उंहवो रहेला, बस दोसर रूप में.”

“हालत चाहे जौन होखे औरी चुनौती चाहे जईसन होखे, हमनी आखिर ले गावत औरी परदरसन करत रहल जाई.” दुर्गा मजबूती से कहेली. उनकर बोली हर बेर परदरसन के बेरी जातिवाद औरी मरदाना मलिकई के बिरोध में बुलंद रहेला

अब उ आपन फिलिम ‘द 1979 अनटोल्ड स्टोरी’ के बहरा आवे के जोहतारी. एकरा बनावे वाला पुष्पराज बाडन. उ एगो जवान डायरेक्टर हवन. इ फिलिम में दुर्गा एगो बहिन के रोल कईले बाड़ी, जे मुख्य सहायक रोल में बा. उ कहली, “उम्मीद बा कि हमरा एसे कुछ पहचान मिली औरी एगो कलाकार के रूप में आगे बढ़े के मौको भेंटाई.”