شمسی توانائی سے روشن ہوئے آسام کے جزائر

برسنگ حصہ اوّل (پارٹ وَن) چار گاؤں میں بہار کا استقبال کرتی ہوئی یہ ایک خوشگوار صبح ہے۔ لیکن ۳۰ سالہ شاہدہ خاتون اس حسین صبح کا لطف نہیں اٹھا پا رہی ہیں۔ وہ بخار میں مبتلا ہیں اور چار کے ریورائن پرائمری ہیلتھ سینٹر (پی ایچ سی) کی لابی میں ڈاکٹر سے ملنے کا انتظار کر رہی ہیں۔

برسنگ دریائے برہم پتر کے کھسکتے ہوئے جزیروں یا چار پر بسی ۲۲۵۱ آبادیوں میں سے ایک ہے۔ یہاں کے دیگر چار کے برعکس، یہ مٹی اور ریت کے جمع ہونے سے نہیں بنا، بلکہ بنیادی طور پر یہ فقیر گنج قصبہ کا حصہ ہوا کرتا تھا جو دریا کے بدلتے رخ کی وجہ سے میدانی علاقوں سے الگ ہو گیا۔ یہی وجہ ہے کہ برسنگ کی زمین باقی چار کی طرح نازک اور عارضی نہیں ہے، بلکہ سالوں سے ایک ہی جگہ پر ٹکی ہوئی ہے۔

برسنگ چار میں تین گاؤوں ہیں۔ سال ۲۰۱۱ کی مردم شماری کے مطابق، برسنگ حصہ اوّل کی آبادی ۵۵۴۸ ہے، برسنگ حصہ دوم کی آبادی ۲۳۸۶ ہے اور برسنگ حصہ سوم کی آبادی ۳۱۱۷ ہے۔

شاہدہ اور پی ایچ سی میں انتظار کر رہے دوسرے مریض آپس میں بات چیت کر رہے ہیں۔ ان کی گفتگو کا موضوع جنوری ۲۰۱۷ میں اس ۱۸ کمروں والے ہیلتھ سینٹر کی چھت پہ لگایا گیا سولر پینل ہے۔ آسام انرجی ڈیولپمنٹ ایجنسی کے ذریعہ لگائے گئے ان ۲۰ پینلوں اور ۱۶ بیٹریوں سے ۵ کلو واٹ بجلی پیدا ہو سکتی ہے۔

کئی دہائی کے اندھیروں کے بعد، شمسی توانائی نے چار کے رہائشیوں کو دستیاب طبی سہولیات کا معیار بہتر کر دیا ہے۔ ’’اس پی ایچ سی میں اب بجلی اور نلکے کا پانی دستیاب ہے،‘‘ سولر پینل کی طرف اشارہ کرتے ہوئے شاہدہ کہتی ہیں۔ ’’حاملہ خاتون اب یہاں چیک اپ کرانے اور بچوں کو جنم دینے کے لیے آ سکتی ہیں۔‘‘

شاہدہ جانتی ہیں کہ جغرافیائی طور پر برسنگ جیسے الگ تھلگ علاقہ میں اسپتالوں کے اندر بچوں کی پیدائش کی کتنی اہمیت ہے۔ ’’میں نے دائی اور ہمسایوں کی مدد سے [گھر پر دو بچوں کو] جنا۔ میں دونوں دفعہ کافی پریشان تھی، مجھے ان کی مہارت پر یقین نہیں تھا۔ لیکن میرے پاس کوئی اور متبادل نہیں تھا، اور انہوں نے مجھے دلاسہ دیا کہ سب ٹھیک سے ہو جائے گا…‘‘

پی ایچ سی میں شمسی توانائی کی فراہمی سے پہلے، صرف حاملہ عورتوں کو طبی ایمرجنسی کے وقت دریا کے پار، ڈھبری ٹاؤن کے سرکاری یا پرائیویٹ ہسپتال لے جایا جاتا تھا۔ ہسپتال کا خرچہ تو ہوتا ہی تھا، ساتھ میں رات کے وقت جب دن میں چلنے والی کشتی کی سروس بند ہو جاتی تھی، تو کشتی کا کرایہ بھی بہت زیادہ ہوتا تھا، تقریبا ۲۰۰۰ سے ۳۰۰۰ روپے۔

آج بھی برسنگ کا پی ایچ سی دوپہر میں بند ہو جاتا ہے، جس کے بعد کسی بھی طبی ایمرجنسی کے لیے لوگوں کو ڈھبری جانا پڑتا ہے۔ لیکن شمسی توانائی نے اس ہیلتھ سینٹر میں ایک نئی جان ڈال دی ہے۔ ’’سولر پلیٹ جنوری ۲۰۱۷ میں لگائی گئی، اور فروری سے مارچ تک یہاں ۱۸ بچوں کی پیدائش ہوئی،‘‘ ڈاکٹر جواہر لال سرکار بتاتے ہیں۔ وہ ۲۰۱۴ میں فقیر گنج کے سب ڈویژنل میڈیکل آفیسر (ایپیڈیمکس) کے طور پر ریٹائر ہونے کے بعد، اب اس پی ایچ سی کے سربراہ ہیں۔ ’’ہمارے یہاں اس چار پر ۱۰ آشا کارکن [منظور یافتہ سماجی صحت کارکن] ہیں، اور سب کی یہی کوشش رہتی ہے کہ حاملہ عورتیں بچوں کی ڈیلیوری کے لیے اسپتال آئیں۔‘‘

شاہدہ نے جب ڈاکٹر سرکار سے اپنا معائنہ کرالیا، تو میں ان کے ساتھ بازار سے ہو کر ان کے گھر کی طرف چلنے لگی۔ بازار دن میں خالی دکھائی دے رہا ہے؛ کچھ چائے کی ٹپریاں اور دوا کی دکانیں کھلی ہوئی ہیں۔ بیشتر دکانیں شام میں کھلتی ہیں جب دکاندار اپنے دن کے کام سے فارغ ہو جاتے ہیں، کچھ لوگ ڈھبری میں رکشہ چلاتے ہیں، گھوم گھوم کر سامان بیچتے ہیں یا بانس مزدور کے طور پر کام کرتے ہیں۔ شاہدہ کے شوہر شاہ جمال شیخ، ڈھبری ٹاؤن میں رکشہ چلاتے ہیں اور ساتھ ہی چار کے بازار میں ان کی ایک چھوٹی سی پنساری کی دکان بھی ہے۔

برسنگ میں شاہدہ سمیت کئی گھروں نے سولر پینل لگوا لیے ہیں۔ کچھ لوگوں کو سرکاری اسکیم سے مدد ملی ہے، جس کے تحت ۳۶۰۰ روپے کی رعایتی قیمت پر ایک سولر پینل اور ایک بیٹری فراہم کی جاتی ہے۔ ان سے ۵ء۱ واٹ کے دو سی ایف ایل یا ایل ای ڈی لائٹ بلب جلائے جا سکتے ہیں۔ چند گھرانے ایسے بھی ہیں جنہوں نے بازار سے ۲۰ ہزار روپے کے سولر سسٹم خریدے ہیں۔ ان سے چار بلب اور ٹی وی یا پنکھا ایک ساتھ چلائے جا سکتے ہیں۔ بازار میں ایک چھوٹا ڈھابہ چلانے والے تاراچند علی کا کہنا ہے، ’’[ڈھبری میں] پیسہ کمانے کے ذرائع سے جو اضافی آمدنی ہوتی ہے، اس سے ہم سولر سسٹم جیسی ضرورت کی اشیاء خرید پاتے ہیں۔‘‘

پنچایت کے رکن عصمت علی (۶۲) کا کہنا ہے کہ برسنگ کے تقریباً ۵۰ فیصد گھروں میں شمسی توانائی کا استعمال ہوتا ہے۔ ’’اب بچے رات میں آرام سے پڑھ سکتے ہیں،‘‘ وہ کہتے ہیں۔ ’’پہلے یہ ممکن نہیں تھا، کیونکہ روشنی کا واحد ذریعہ کیروسین تیل تھا۔‘‘

آسام انرجی ڈیولپمنٹ ایجنسی (اے ای ڈی اے) نے چار سال پہلے، برسنگ کے کستوربا گاندھی بالیکا ودیالہ میں ۴ کلو واٹ کا شمسی سسٹم لگایا تھا۔ اے ای ڈی اے، نئی اور قابل تجدید توانائی کی وزارت کی ریاستی نوڈل ایجنسی ہے۔ اے ای ڈی اے کے ایک اہلکار کا کہنا ہے کہ ایک نیا سولر پینل کم از کم ۲۵ سال تک کام کرتا ہے بشرطیکہ وہ ٹوٹے نہیں یا اسے کوئی نقصان نہ پہنچے۔ بیٹریوں کی تھوڑی دیکھ ریکھ کرنی پڑتی ہے؛ ضرورت پڑنے پر ڈھبری ٹاؤن سے سروس فراہم کرنے والے لوگ بلائے جاتے ہیں۔

چار پر ایک ہی اے ٹی ایم ہے، جو یونائٹیڈ بینک آف انڈیا کا ہے اور یہ بھی شمسی توانائی سے ہی چلتا ہے۔ بینک کے بزنس ڈیولپمنٹ کرسپانڈنٹ، محمد احمد علی روز صبح ڈھبری سے کچھ نقدی لے کر آتے ہیں اور دوپہر میں واپس چلے جاتے ہیں۔ ’’روز مرہ کا لین دین شمسی توانائی کی بدولت آرام سے چل رہا ہے،‘‘ وہ کہتے ہیں۔

لیکن شاہدہ، تارا چند اور اس چار کے باقی افراد کے لیے پی ایچ سی جو ۲۰۱۴ میں مکمل ہوا، ایک خواب کے سچ ہونے کی مانند تھا۔ پہلے انہیں شک تھا، کیونکہ سرکاری ملازمین چار پر کام کرنے سے ہچکچاتے ہیں۔ اس کے علاوہ، بقول شاہدہ، برسنگ کے لوگ پی ایچ سی جانے سے ہچکچاتے تھے کیونکہ انہیں معلوم نہیں تھا کہ ڈاکٹر کے سامنے اپنی بیماری کیسے بیان کریں۔ لیکن، ۲۰۱۴ میں جب حکومت نے چار پر ڈاکٹر سرکار کو تعینات کیا، تب سے یہاں کافی تبدیلی آئی ہے۔ وہ اس بات کا دھیان رکھتے ہیں کہ پی ایچ سی کے ملازمین باقاعدگی سے آئیں اور بنیادی طبی نگہداشت، دوائیاں فراہم کریں اور محفوظ طریقے سے خواتین کی ڈیلیوری کروائیں۔

ڈاکٹر سرکار کو تقریباً دو سال تک ڈھبری ٹاؤن کے محکمہ صحت کے کئی چکر کاٹنے پڑے اور تب جا کر پی ایچ سی میں شمسی پلیٹیں لگوائی گئیں، جن کی بدولت بجلی اور نلکوں میں پانی آنا شروع ہوا۔ ’’اس ہسپتال میں روزانہ تقریباً ۶۵ مریض آتے ہیں،‘‘ شمیمۃ الکبری خاتون بتاتی ہیں، جو پی ایچ سی میں ایک کمیونٹی ہیلتھ ورکر ہیں۔ ’’بخار، جلد کی بیماریاں اور معدے کی پریشانیاں یہاں عام ہیں۔‘‘

پی ایچ سی کے ملازمین میں ایک دوا ساز، ایک اے این ایم ہیلتھ ورکر، اور ایک لیباریٹری ٹیکنیشین شامل ہیں۔ یہ سبھی ڈھبری میں رہتے ہیں اور بنا چھت والی مشین سے لیس روایتی کشتی کے ذریعہ دریا پار کر کے صبح تقریباً ۸:۴۵ بجے ہسپتال پہنچتے ہیں۔ بیرونی مریضوں کے شعبہ میں دوپہر ایک بجے تک کام ہوتا ہے۔

’’لوگ چار پر کام کرنا پسند نہیں کرتے کیونکہ یہ جغرافیائی طور پر کافی الگ تھلگ ہے،‘‘ ڈاکٹر سرکار کہتے ہیں۔ ’’لیکن جب مجھے ریٹائرمنٹ کے بعد یہاں کام کرنے کے لیے کہا گیا، تو میں نے اسے ایک نعمت سمجھا جس کی بدولت مجھے ان لوگوں کی خدمت کرنے کا موقع ملا جنہیں حقیقتا اس کی بہت ضرورت تھی۔ مجھے معلوم ہے کہ چار کے علاقوں میں شعبۂ صحت اور خاص کر مادری صحت میں بہتری لانے کے لیے ہمیں کتنا کام کرنا ہے۔‘‘

سال ۲۰۱۴ کی آسام ہیومن ڈیولپمنٹ رپورٹ کے مطابق، چار کے علاقوں میں شرح پیدائش ۸ء۲ ہے، جو کہ سب سے زیادہ ہے۔ رپورٹ یہ بھی بتاتی ہے کہ کم عمر میں شادی یہاں ایک بڑا مسئلہ ہے اور ۳ء۲۵ فیصد عورتوں کی شادی ۱۵ سے ۱۹ سال کے درمیان ہو جاتی ہے جو کہ ریاست کے سبھی علاقوں میں سے سب سے زیادہ ہے (جس میں چار، چائے کے باغات، پہاڑی اور سرحدی علاقے شامل ہیں)۔ رپورٹ کے مطابق، ڈھبری ضلع میں ۱۵ سے ۱۹ سال کی شادی شدہ عورتوں کا فیصد سب سے زیادہ ہے – ۲ء۲۹ فیصد۔

برسنگ کے لیے سفر ابھی بہت لمبا ہے، لیکن اب غروب آفتاب اپنے ساتھ چار کے کئی رہائشیوں کے لیے اندھیرا لے کر نہیں آتا۔ حالانکہ بہت سے لوگ اپنے گھروں کو روشن کرنے کے لیے اب بھی بازار سے ۴۰ روپے فی لیٹر کے حساب سے کیروسین خرید کر لاتے ہیں، لیکن شاید ایک نئی صبح کی امید برقرار ہے۔