کیرالہ: باورچی خانوں تک پہنچا ایندھن کا بحران

کاٹِلے کڑا میں پہلے گاہک کی آمد سے پہلے ہی جنگل میں دن کی شروعات ہو چکی ہوتی ہے۔

سورج اُگتے ہی، ششی کماری کانی اور ان کے ساتھ دیگر عورتیں ترو اننت پورم ضلع میں وِتورا پیپّارہ ڈیم روڈ سے ہوتے ہوئے جنگل میں داخل ہوتی ہیں۔ یہ مغربی گھاٹ کا ایک پہاڑی سلسلہ ہے۔ یہاں کی سڑک پیپّارہ آبی ذخیرہ کے پاس سے گزرتی ہے اور آگے جا کر آدیواسی بستیاں نظر آنے لگتی ہیں۔ یہاں، کھانا پکانے والا ایندھن پہنچایا نہیں جاتا، بلکہ لوگوں کو خود ہی اکٹھا کرنا پڑتا ہے۔

یہ عورتیں اپنے سروں پر ایندھن کی لکڑی لادے ہوئے گھر واپس لوٹتی ہیں۔ تب جا کر ان کا چولہا جلتا ہے۔ ’کاٹِلے کڑا‘ کا لفظی معنوی ہے ’جنگل میں دکان‘۔

سڑک کے کنارے بنے کھانے کے اس چھوٹے سے ہوٹل میں، چولہے سے دھواں نکلتا ہے اور سیاہ ہو چکے برتنوں کے اوپر پھیل جاتا ہے۔ ایک کونے میں ایل پی جی سیلنڈر پڑا ہے، جو استعمال میں نہیں ہے۔ خالی سیلنڈر پابندی سے بھرے نہیں جا رہے ہیں، قیمتیں اونچی ہو چکی ہیں، اور سپلائی کا کوئی بھروسہ نہیں ہے۔

’’ہم اب گیس پر انحصار نہیں کر سکتے۔ اس لیے لکڑی کی طرف لوٹ آئے ہیں،‘‘ ۵۹ سالہ ششی کماری کہتی ہیں۔

ایران پر امریکہ اور اسرائیل کے حملے کی وجہ سے پورے کیرالہ میں سیال پیٹرولیم گیس (ایل پی جی) کی سپلائی پر اثر پڑا ہے، جس کی وجہ سے وہاں کے چھوٹے چھوٹے ہوٹل پریشانی کا سامنا کر رہے ہیں۔ گیس کی سپلائی میں تاخیر اور قیمتیں بڑھ جانے کی وجہ سے ایسے کئی ہوٹل اب لکڑی سے کھانا پکانے پر مجبور ہو چکے ہیں۔

اس بحران کی وجہ سے، کاٹِلے کڑا میں دن کی ترتیب پوری طرح بدل چکی ہے۔

ششی کماری نے چار سال پہلے یہ ہوٹل کھولا تھا، کیوں کہ ان کے شوہر منی یَن (۵۸) بیمار پڑنے کے بعد کام کرنے سے معذور ہو گئے تھے۔ کانی برادری مغربی گھاٹ کے علاوہ میں رہنے والی ایک چھوٹی سی آدیواسی برادری ہے، جو اپنے معاش کے لیے برسوں سے جنگل پر منحصر رہی ہے۔ کانی برادری سے تعلق رکھنے کے سبب ششی کماری نے اسی کام کا انتخاب کیا جو انہیں سب سے اچھا آتا تھا: یعنی زمین سے جڑی ہوئی کھانے کی روایت کو بطور پیشہ اپنانا۔

یہاں کی ان عورتوں نے آمدنی کے لیے انٹیگریٹڈ ٹرائبل ڈیولپمنٹ پروگرام کی مدد اور کڈمب شری کے ذریعہ حاصل کردہ قرض سے سڑک کے کنارے ایک اچھا باورچی خانہ بنایا۔ کڈمب شری ’ہوٹلوں‘ نے کووڈ۔۱۹ لاک ڈاؤن کے دوران بہت سے لوگوں کی جان بچانے میں مدد کی تھی۔

ایل پی جی کے آنے سے انہیں کچھ راحت ملی تھی – ایک تو دھوئیں سے نجات ملی اور لکڑیاں اکٹھا کرنے میں جو وقت لگتا تھا وہ بھی بچ گیا تھا۔ لیکن، اب انہیں روزانہ صبح کو سب سے پہلے ایندھن کی لکڑی اکٹھا کرنی پڑتی ہے۔

’’اگر ہم صبح کو جلدی نہ جائیں، تو کام لائق لکڑیاں نہیں ملیں گی،‘‘ ششی کماری کی بہو، سوپنا کانی (۳۸) کہتی ہیں۔ اضافی محنت کا مطلب ہے، پہلا کھانا تیار ہونے سے پہلے ان کی کافی توانائی خرچ ہو چکی ہوتی ہے۔

باورچی خانہ کے اندر، کام کی رفتار تو دھیمی ہوتی ہے، لیکن بوجھ زیادہ ہوتا ہے۔ چولہے میں لگاتار لکڑیاں ڈالنی پڑتی ہیں۔ دھوئیں سے پورا کمرہ بھر جاتا ہے۔ اس کی وجہ سے اندر گرمی بڑھ جاتی ہے۔ زیادہ لوگوں کا کھانا بنانے میں وقت بھی بہت لگتا ہے۔

ان سب کے درمیان، کھانے والوں کی تعداد میں لگاتار اضافہ ہی ہو رہا ہے۔

دوپہر ہوتے ہوتے، ہوٹل گاہکوں سے پوری طرح بھر جاتا ہے۔ پیپّارہ ڈیم (باندھ یا بند) کی طرف جانے والے مسافر یہاں رکتے ہیں۔ وِتورا اور پالوڈ جیسے پاس کے قصبوں سے لوگ آتے ہیں۔ کچھ لوگ اراروٹ کے پتّوں پر کھانا پیش کیے جانے کی بات سن کر یہاں آتے ہیں۔

یہاں سادہ اور اچھا کھانا ملتا ہے۔ کساوا یا ساگودانہ ہمیشہ ملتا ہے۔ سبزی میں جو کچھ مل جائے، اسے پکا دیا جاتا ہے۔ اور کھانا تازہ کاٹے گئے اراروٹ کے پتّوں پر پیش کیا جاتا ہے، جس سے مزیدار ادویاتی ذائقہ آتا ہے۔

’’لکڑی پر پکا ہوا کھانا لذیذ ہوتا ہے،‘‘ ترو اننت پورم سے آئے ہوئے ایک گاہک، کھانے کے بعد پتّے کو موڑتے ہوئے کہتے ہیں۔ باقی لوگوں کا بھی یہی کہنا ہے کہ ذائقہ مزیدار ہوتا ہے۔

لیکن، اس ذائقہ کی قیمت چکانی پڑتی ہے۔

پہلے اس ہوٹل میں کھانے کی تقریباً ۶۰ سے ۱۲۰ پلیٹیں پیش کی جاتی تھیں، لیکن اب ایک دن میں تقریباً ۲۰۰ لوگ یہاں کھانا کھاتے ہیں۔ نہ تو کام کا وقت بدلا ہے، نہ ہی کام کرنے والوں کی تعداد میں اضافہ۔ بلکہ، پہلے کے مقابلے اب کام بہت زیادہ بڑھ گیا ہے۔ پونّی رائس یا سرخ چاول کے ساتھ مچھلی، اور سبزیوں کی تین چھوٹی چھوٹی پیالیوں پر مشتمل ایک تھالی کی قیمت ۶۰ روپے ہے۔ یہ ایک شاندار اضافہ ہے، لیکن ’’ہماری فیملی کے پانچوں ارکان یہاں کام کرتے ہیں اور ایک دن میں [مجموعی طور پر] ۴۲۰۰ سے ۵۰۰۰ روپے تک کما لیتے ہیں۔‘‘

پورے کیرالہ میں، کڈمب شری کے ذریعہ چلائے جانے والے کئی ہوٹلوں، بشمول بڑے ساجھا چولہوں، نے ایل پی جی کی سپلائی کم ہونے کے بعد پھر سے لکڑی کے چولہے پر کھانا پکانا شروع کر دیا ہے۔ کچھ نے اپنے مینو (طرح طرح کے کھانوں کی تعداد) گھٹا دیے ہیں۔ باقیوں نے اپنے وقت تبدیل کر دیے ہیں۔

کانی عورتوں کے لیے، یہ تبدیلی بڑی پریشانی کا باعث بن رہی ہے۔ کھانے پینے سے متعلق ان کی روایات جنگل پر مبنی ہیں۔ لکڑی سے کھانا بنانا ان کے لیے کوئی نئی بات نہیں ہے۔

لیکن، اس کی طرف واپسی کی وجہ ہے۔

’’ہم نے ایسا نہیں سوچا تھا،‘‘ ششی کماری کہتی ہیں۔ ’’گیس نے زندگی آسان کر دی تھی۔ اب زیادہ کام کرنا پڑ رہا ہے۔‘‘ لکڑیاں جمع کرنے میں زیادہ وقت لگ رہا ہے۔ دھوئیں کے سامنے زیادہ دیر تک بیٹھنا پڑتا ہے۔ ہر بار کھانا تیار کرنے میں زیادہ محنت لگتی ہے۔

شام ہوتے ہوتے، بھیڑ کم ہونے لگی ہے۔ لکڑیوں کا انبار بھی چھوٹا ہو چکا ہے۔ آخری گاہک کھانا کھا کر جا چکے ہیں۔ اور جنگل پھر سے قریب آتا ہوا محسوس ہوتا ہے۔

سورج طلوع ہونے سے پہلے، یہ عورتیں پھر سے جنگل میں آئیں گی، چولہے کو جلائے رکھنے کے لیے جو بھی ضروری ہوگا اسے اکٹھا کریں گی۔ یہاں سے کوسوں دور، ایندھن اور اس کی سپلائی سے متعلق فیصلے بدلتے رہیں گے۔ لیکن یہاں، کاٹِلے کڑا میں، وہ تمام تبدیلیاں خاموشی کے ساتھ روزمرہ کا معمول بن جاتی ہیں۔

جہاں لکڑیوں کے ایک ایک گٹھر کے ساتھ زندگی اپنی رفتار سے روزانہ آگے بڑھتی جاتی ہے۔

ترجمہ نگار: قمر صدیقی