केरल के चूल्हा मं लहुट आइस धूँआ

कट्टिले कडा मं पहिला ग्राहेक हबरे के पहिलीच, जंगल मं दिन सुरु हो चुके हवय.

बिहान के अंजोर होतेच,ससिकुमारी कानी अऊ आने माईलोगन मन तिरुवनंतपुरम जिला के विथुरा-पेप्पारा बांध वाले रद्दा ले उतर के जंगल डहर निकर जाथें. ये आदिवासी पारा मन के निचला मैदानी इलाका आय.

वो मन अपन मुड़ मं लकरी के गठ्ठा धरे लहूटथें. तभेच रसोई खुलथे. ‘कट्टिले कड़ा’ के शाब्दिक अर्थ आय —‘जंगल मं दुकान’.

रोड तीर मं नानकन होटल के भीतरी, करिया परे बरतन मन के उपर ले धूँआ/ धूँवा उपर निकरत हवय. कोनहा मं बिन बउरे गैस सिलेंडर रखाय हवय. ओकर भरई ह घलो बखत मं नइ होवय, दाम ह बढ़गे हवय, अऊ मिले के घलो कोनो भरोसा नइ ये.

“अब हमन गैस के भरोसे नइ रहे सकन, 49 बछर के ससिकुमारी कहिथे. “ते पायके हमन पहिली मं लहूट आय हवन.”

पूरा केरल भर मं, अमेरिका-इजरायल अऊ ईरान के लड़ई ले लिक्विफाइड पेट्रोलियम गैस (एलपीजी) के सप्लाई मं जेन अड़ंगा आवत हवय, ओकर ले छोटे-छोटे होटल अऊ खवई-पियई के ठेला मन भारी हलाकान हवंय.गैस मिले मं देरी अऊ बढ़त दाम के सेती अब कतको झिन लकरी चुल्हा बउरे बर मजबूर होवत हवंय.

कट्टिले कडा मं, ये बदलाव ह जम्मो दिनेच ला नवा ढंग ले गढ़ ले हवय.

ससिकुमारी ह चार बछर पहिली ये होटल ला तब सुरू करिस, जब ओकर घरवाला 58 बछर के मनियन बीमार पर गे अऊ मिहनत के बूता करे नइ सकिस. कानी समाज – जेन ह दक्खिन-पच्छिम घाट के बासिंदा छोटे आदिवासी समाज आंय अऊ जंगल ले वो मन के गहिर ले नाता हवय- के ससिकुमारी ह इहीच का ला धरिस जेन ला वो ह सबले बढ़िया जानत रहिस: अपन खेत के उपज ले बने खाय पीये के जिनिस.

एकीकृत जनजातीय विकास कार्यक्रम के मदद अऊ ‘कुडुम्बश्री' के जरिया ले लेगे करजा ले, ये माइलोगन मन आमदनी के एक जरिया बनाय बर रोड तीर मं एक ठन नान-कन रसोईघर बनाइन. कोविड-19 लॉकडाउन बखत, 'कुडुम्बश्री' के ये 'होटल' मन कतको लोगन मन के गुजारा मं मदद करिस.

एलपीजी(रसोई गैस) ले कुछु राहत मिलिस —येकर ले धूँआ कम होइस अऊ जलावन लकरी संकेले मं लगेइय्या बखत घलो बांचिस. अब, हरेक बिहनिया अबले पहिली बूता जलाव लकरी संकेले होथे.

गर हमन जल्दी नइ जाबो, त हमर ला जियादा नइ मिलही, 38 बछर के स्वप्ना कानी कहिथे, जेन ह ससिकुमारी के बहूरियाआय. ये उपराहा मिहनत के मतलब आय के ओकर अधिकतर ताकत त रांधे के पहिलीच निकर जाथे.

भीतरी, काम ह धीरे अऊ गरु हो जाथे. आगि सरलग बरत राखे बर परथे. धूँआ ह खोली भर मं भर जाथे. गरमी बाढ़थे अऊ बने रहिथे. जियादा लोगन मन बर रांधे मं जियादा बखत लगथे.

ओकर बाद घलो, आंकड़ा सिरिफ बढ़ेच हवय.

मंझनिया होवत होवत, ये होटल ह पूरा भर जाथे.पेप्पारा बांध कोती जवेइय्या लोगन मन इहींचे रुकथें. विथुरा अऊ पालोड जइसने तीर-तखार के शहर ले लोगन मन इहाँ आथें. कुछेक लोगन मन त अरोंठ/ आरारोट के पाना मं परोसे जवेइय्या खाय के गोठ-बात ला सुन के इहाँ खिंचाय चले आथें.

इहाँ के खाना सादा अऊ अपन मूल ले जुड़े हवय. ये मं खास करके आरारोट बउरे जाथे. साग येकर उपर रहिथे के वो बखत काय मिलत हवय. खाय के जिनिस ला तुरते टोरे आरारोट पाना मं परोसे जाथे, जेकर ले ये मं ओषध के महक अऊ सुवाद आ जाथे.

“लकरी के आगि मं चूरे खाना के सुवाद ह गजब रहिथे,” तिरुवनंतपुरम ले आय एक झिन पहुना खाय के बाद अपन पतरी ला लपेटत कहिथे. दीगर लोगन मन घलो कहिथें के येकर सुवाद जोरदार होथे.

ये सुवाद के दाम चुकाय ला परथे.

पहिली जिहां ये होटल करीबन 60 ले 120 झिन ला खवावत रहिस, अब इहाँ ये ह रोज के करीबन 200 लोगन मन ला खवाथे. काम मं कोनो बदलाव नइ होय हवय, अऊ न बढ़ाय गे हवय. बस काम के बोझा बढ़गे हवय. एक ठन थाली – जेन मं पोन्नी भात धन लाल भात के संग मछरी साग समेत तीन किसिम के साग होथे – जेकर दाम 60 रूपिया हवय. ये ह सबले बढ़िया खाना आय, फेर “हमर परिवार के पांच परानी इहींचे काम करथें अऊ मिलके रोज के 4,200 ले 5,000 रूपिया कमाथन.”

केरल भर मं, कुडुम्बश्री डहर ले चलाए जावत कतकको होटल – जेन मं बड़े सामुदायिक रसोई घलो हवय – ह एलपीजी (रसोई गैस) कम मिले सेती फिर ले लकरी बउरे सुरु कर दे हवय. कुछु मन अपन बनाय जिनिस मं कटौती करे हवंय, त आने लोगन मन खुले के बखत ला बदल दे हवंय.

कानी माइलोगन मन बर, ये बदलाव भारी चिंता लेके आये हवय. वो मन के खान-पान के परंपरा हमेसा ले जंगल के भरोसे रहे हवय. लकरी बार के रांधे वो मन बर कोनो नवा बात नो हे.

फेर ये डहर लहूट आय के वजा ये आय.

“हमन अइसने सोचे नइ रहेन,” शशि कुमारी कहिथे. “गैस ले काम सुभीता हो जावत रहिस. अब जियादा मिहनत करे ला परथे.” लकरी संकेले में जियादा बखत लगथे. धूँआ मं काम करे ला परथे. हरेक बेर परोसे मं जियादा मिहनत लागथे.

ढरत मंझनिया भीड़ कम हो जाथे. जलावन लकरी के ढेरी कम होय लगथे. आख़िरी ग्राहक घलो चले जाथे. जंगल फिर ले लकठा मं आ जाथे.

बिहान होय के पहिलीच, माईलोगन मं जंगल निकर जाहीं – रसोई के जरूरी जिनिस संकेले बर. दूरिहा कोनो जगा मं, इंधन अऊ वोला बांटे ले जुड़े कतको फइसला सरलग बदलत रइही. फेर इहाँ, कट्टिले कडा मं, वो जम्मो बदलाव कलेचुप रोज के जिनगी के हिस्सा बन जाथें.

एक बेर मं लकरी के एक गट्ठर.