एलपीजी संकट: चौका में जरे लागल लकड़ी के चूल्हा

काटिले कड़ा में ग्राहक आवे के सुरु होखे से पहिलहीं जंगल में आवाजाही होखे लागेला.

भोर के पहिल किरिण फूटते ससि कुमारी कानी दोसर मेहरारू लोग संगे तिरुवनंतपुरम जिला के वितुरा-पेपारा डैम रोड से उतर के जंगल ओरी चल पड़ेली. पस्चिम घाट के ई निचलका इलाका बा. पेपारा तलाव के बगल से निकले वाला रोड पर आगू बढ़म, त बसावट धीरे-धीरे कम होखत जाई आ आखिर में रउआ बस एगो आदिवासी टोला लउकी. इहंवा चूल्हा जरावे खातिर लकड़ी अपने बटोर के लावे पड़ेला.

माथा पर लकड़ी के गट्ठर उठइले मेहरारू लोग जब लउटेला, तब जाके चूल्हा जरेला. काटिले कड़ा, माने ‘जंगल में ढाबा’.

रोड किनारे के एह ढाबा में धुंआ उठता, आ करिया-करिया बरतन-बासन पर मंडराता. ओने एक कोना में गैस सिलिंडर चुपचाप पड़ल बा. आजकल गैस भरवावल आफत हो गइल बा. भाव त बढ़िए गइल बा, ओपर से गैस सिलिंडर मिली कि ना मिली, एकरो ठिकाना नइखे रह गइल.

“गैस पर अब निर्भर ना रहल जा सके,” 59 बरिस के ससि कुमारी कहेली. “एहि से हमनी पुरान तरीका अपनावत बानी.”

ईरान आ अमेरिका-इजराइल के बीच लड़ाई चलते केरल भर में छोट-छोट होटल आ ढाबा में गैस (एलपीजी) के भारी किल्लत हो रहल बा. गैस मिले में देरी आ बढ़ रहल दाम चलते केतना लोग रसोई में अब लकड़ी के चूल्हा पर खाना बनावे लागल बा.

एह फेरबदल के असर काटिले कड़ा के दिनचर्या पर साफ लउक रहल बा.

ससि कुमारी आपन 58 बरिस के घरवाला, मणियन के बेमार पड़ला आ मजूरी करे से लाचार होखला के बाद ई ढाबा सुरु कइली. पस्चिमी घाट के जंगलन से गहिर जुड़ल कानी समुदाय से आवे चलते ससि कुमारी उहे काम चुनली, जे उनका बनिहा से आवत रहे. जमीन आ जंलग से जुड़ल रसोई आ देसी खाना.

ससि कुमारी इंटीग्रेटेड ट्राइबल डेवलपमेंट प्रोग्राम के सहारा लेली आ कुदुम्बश्री से करजा. घर चलावे खातिर ऊ सड़क किनारे एगो छोट रसोई सुरु कर देली. लॉकडाउन में अइसने कुदुम्बश्री ‘होटल’ केतना परिवार के सहारा बनल रहे.

एलपीजी से काम तनी आसानी त हो गइल रहे. ना त रोज धुंआ धक्कड़ के झंझट रहे आउर ना जलावन के लकड़ी जुटावे के झमेला. बाकिर अब त रोज भोरे-भोरे सबले पहिले लकड़ी लावे जाए पड़ेला.

“भोरे जदि जल्दी ना निकलनी, त लकड़ी पूरा ना मिल पाई,” ससि कुमारी के पतोह, 38 बरिस के स्वप्ना कानी कहेली. एतना भाग-दौड़ के बाद दिन के पहिलका खाना बनावे से पहिलहीं ऊ लोग थक जाला.

चउका के भीतरी, काम कठिन आ धीरे-धीरे होखे लागल बा. ई ध्यान रखे पड़ेला कि चूल्हा में आग लगातार जरत रहो. एह चलते पूरा जगह धुआं-धुआं भइल रहेला. खूब गरमी हो जाला आ देर तक गरम रहेला. ढेर लोग खातिर खाना बनावे में ढेर देर लागेला.

एतना के बादो ग्राहक के गिनती बढ़ले जा रहल बा.

दुपहरिया ले ग्राहक लोग से ढाबा भर जाला. जे लोग पेपारा तलाव जाला, इहंवा रुकेला आ खाना खाला. वितुरा आ पलोदे जइसन लगे के गांव से इहंवा खाए खातिर लोग खूब आवेला. केतना लोग खाना एरोरूट (अरारोट) के पत्ता पर परोसल जाए के कहानी सुन के आवेला.

ढाबा में सादा आ देसी खाना परोसल जाला. कसावा चाहे अरारोट भोजन के मुख्य हिस्सा होखेला. जे चीज धइल रहेला, ओकरे से करी बनावल जाला. ग्राहक लोग के खाना औषधीय गंध आ स्वाद वाला अरारोट के ताजा तुड़ल पत्ता पर परोसल जाला.

तिरुवनंतपुरम से आवे वाला एगो यात्री बतइलन, “लकड़ी पर बनावल खाना के स्वादे अलग होखेला.” दोसरो लोग ई बात मानेला कि ई जादे स्वादिष्ट होखेला.

बाकिर एह स्वाद के बहुत बड़ा कीमतो चुकावे पड़ेला.

पहिले एह ढाबा में कोई 60 से 125 लोग खात रहे. बाकिर अब इहंवा रोज मोटा-मोटी 200 लोग आ रहल बा. जबकि ना सुविधा बढ़ल बा, ना क्षमता, हां काम जरूर बढ़ गइल. मछली करी (रस वाला मछरी), भात आ तीन प्रकार के तरकारी के छोट कटोरी वाला थरिया 60 रुपइया में मिलेला. थाली मन भर देवे वाला बा, बाकिर “परिवार के पांचों लोग मिलके काम करेला, तब जाके पूरा दिन में कुल मिलाके कोई 4,200 से 5,000 रुपइया (शुद्ध) के कमाई होखेला.”

एलपीजी के आपूर्ति घटे से केरल में कइएक कुदुम्बश्री भोजनालय, खास करके सामुदायिक रसोई में अब लकड़ी के चूल्हा जरे लागल बा. केतना होटल में त खाना के आइटम (मेनू) कम हो गइल बा, आउर केतना में समय बदल देवल गइल बा.

कानी मेहरारू लोग पर एह तरह के बदलाव बोझा बढ़ा देले बा. ओह लोग के खान-पान हरमेसा से जंगल पर निर्भर रहल. लकड़ी पर खाना पकावल ओह लोग खातिर कवनो नया बात नइखे.

बाकिर एकरा पर लउटे के कारण जरूर नया रहे.

ससि कुमारी कहेली, “हमनी कबो ना सोचले रहीं अइसन होई. गैस आवे से हमनी खातिर खाना बनावल आसान हो गइल रहे. अब फेरु जादे मिहनत पड़ता.” जलावन के लकड़ी जंगल से लावे में बहुत समय खरचा हो जाला. दिन-रात धुंआ में रहे पड़ेला, आ खाना पकावे में जादे मिहनतो करे पड़ेला.

दिन ढलत-ढलत भीड़ कम होखे लागेला. जलावन के लकड़ी के ढेर छोट पड़ जाला. अंतिमो ग्राहक जब निकल जाला, तब पूरा दिन के भाग-दौड़ के बाद के शांति में जंगल जादे नजदीक महूसस होखे लागेला.

मेहरारू लोग मुंह अन्हारे चूल्हा जरावे खातिर लकड़ी लावे जंगल निकल जाई. कहीं दूर गैस आ एकर इंतजाम पर फैसला बदलत रही. काटिले कड़ा में ई बदलाव चुप्पे, धीरे-धीरे रोज के जिनगी के हिस्सा बन जाई.

एक बेरा में लकड़ी के एगो गट्ठर.