کولہاپور میں درجۂ حرارت بڑھنے سے نیند غائب

جنابائی سونوَنے نے اپنی سہیلیوں کے ساتھ کبھی بحث یا جھگڑا نہیں کیا تھا۔

لیکن یہ سال کچھ الگ رہا۔ ’’میں جلد ناراض ہو جاتی ہوں اور معمولی اختلافات پر بھی اپنے دوستوں سے لڑنا شروع کر دیتی ہوں،‘‘ مہاراشٹر کے بھادولے گاؤں میں اپنے دو کمروں کے معمولی سے مکان کے باہر بیٹھیں ۶۲ سالہ سونوَنے کہتی ہیں ۔

سال ۲۰۲۵ کے موسم گرما میں ریاست کے کولہاپور ضلع میں رات کے درجۂ حرارت میں نمایاں اضافہ درج کیا گیا۔ اور جنابائی کو احساس ہوا کہ وہ سونے کے لیے جدوجہد کر رہی ہیں۔ پہلے تو انہوں نے سوچا کہ ان کی بے چینی ایک یا دو دن میں ختم ہو جائے گی۔ تاہم ایسے بھی دن گزرے جب وہ مشکل سے تین گھنٹے کی نیند ہی لے پائیں۔ دن، ہفتوں اور مہینوں میں بدلتے گئے۔ انہوں نے خود کو مسلسل چڑچڑا اور تھکا ہوا پایا۔

جنابائی ایک بے زمین کسان ہیں اور دن کے آٹھ گھنٹے دوسروں کے کھیتوں میں کمر توڑ محنت کرتی ہیں۔ ان کے ذمہ گھاس کی نکائی، جانوروں کے چارے کا بھاری بوجھ اٹھانا، اور فصلوں کی کٹائی کرنا شامل ہے۔ شام تک وہ تھک کر نڈھال ہو جاتی ہیں۔ ان کے کندھوں میں درد ہونے لگتا ہے، دن میں بوجھ اٹھانے کی وجہ سے ان کی ٹانگیں تھک جاتی ہیں۔ ایسے دن کے اختتام پر وہ عموماً رات میں ۱۰ بجے تک اپنے گھر کے دروازے کے قریب سو جاتی تھیں اور چند منٹوں کے اندر انہیں نیند آ جاتی تھی۔

لیکن گہری اور پرسکون نیند کی وہ راتیں اب بھولی بسری باتیں ہو گئی ہیں۔ علاقہ میں حالیہ مہینوں کے دوران درجۂ حرارت اور ہوا میں موجود نمی میں اضافہ کی وجہ سے پوری رات پسینہ بہتا رہتا ہے۔ بے چینی کی وجہ سے راتیں کروٹ بدلتے گزرتی ہیں۔ ٹن کی چھت سے نکلنے والی گرمی اکثر نیند میں خلل پیدا کر دیتی ہے۔

جب نیند کھل جاتی ہے، تو دوبارہ سونے میں انہیں کم از کم ایک گھنٹہ کا وقت لگتا ہے۔

ان کا خیال ہے کہ اس سال مئی (۲۰۲۵) میں صرف ۳ بجے صبح تک درجۂ حرارت میں معمولی کمی واقع ہوتی ہے اور اسے برداشت کیا جا سکتا ہے۔ اپنے گھر کے کام نمٹانے کے لیے انہیں صبح پانچ بجے تک بیدار ہونا پڑتا ہے، اور اس کے بعد ایک پورے دن کی سخت محنت ان کے سامنے ہوتی ہے۔

جنابائی پانی لانے، گھر میں جھاڑو لگانے اور گھر والوں کے لیے کھانا پکانے کے لیے طلوع آفتاب سے پہلے اٹھ جاتی ہیں۔ ان کی عمر چھ کی دہائی میں پہنچ چکی ہے۔ سخت گرمیوں کے دوران دن میں لمبے وقت تک کھیتوں میں کام کرنے سے وہ تھک جاتی ہیں۔ اس کے بعد گھر کا کام کرنا ہوتا ہے، جن میں برتن دھونا، رات کے کھانے کی تیاری کرنا، اور اگلے دن کے لیے لکڑیاں جمع کرنا شامل ہیں۔ ’’ہمیشہ کوئی نہ کوئی کام باقی رہ جاتا ہے،‘‘ وہ تھکے ہوئے لہجہ میں کہتی ہیں۔

ان کی نیند پرسکون نہیں ہوتی ہے، اور وہ اکثر اپنے گھر والوں پر چیختی ہیں، اور پھر نادم ہوتی ہیں۔ ’’وہ سوچتے ہیں کہ میں بدل گئی ہوں۔ پہلے پورے دن کام پر گزارنے کے بعد بھی میں ہنستی رہتی تھی،‘‘ وہ مزید کہتی ہیں۔ جوانی کے دنوں میں جب وہ توانائی سے بھرپور تھیں، تو کھیتوں میں کام کرتے ہوئے گانا بھی گاتی تھیں۔ انہیں معلوم ہے کہ وہ بدل گئیں ہیں۔

’’اب لوگ سمجھتے ہیں کہ میں ہر وقت غصے میں رہتی ہوں۔ لیکن مجھ میں اب [خوش مزاج رہنے کی] طاقت نہیں ہے،‘‘ وہ مزید کہتی ہیں۔

وہ بتاتی ہیں کہ کچھ راتوں میں، ’’میرا سر درد کرتا ہے۔ آنکھیں تھکن سے سرخ ہو جاتی ہیں۔ ایسا محسوس ہوتا ہے کہ میں ڈھنگ سے سوچ نہیں سکتی۔‘‘ بے چینی اور پریشانی ان کی زندگی اور زبان کا حصہ بن گئی ہے۔

جنابائی تنہا اس پریشانی میں مبتلا نہیں ہیں۔ خاص طور پر گرم راتوں اور لو کے دوران محیطی درجۂ حرارت میں اضافہ کی وجہ سے لوگوں کے لیے سونا دشوار ہو گیا ہے۔ موسمیاتی تبدیلی کے گہری نیند پر پڑنے والے اثرات پر ۲۰۲۵ میں شائع ایک مقالہ میں کہا گیا ہے کہ ’’…موسمیاتی گرمی نیند کی کمی کو بڑھاتی ہے اور نیند کے معیار میں خرابی کا باعث بنتی ہے، خاص طور پر ضعیف العمر افراد، خواتین کی نیند میں…‘‘

’’جب کمرے کا محیطی درجۂ حرارت اونچا ہو جاتا ہے، تو جسم کے اندرونی تھرمو ریگولیشن (حرارت کو برقرار رکھنے والے) نظام کے لیے یہ مشکل ہو جاتا ہے کہ وہ بنیادی جسمانی درجۂ حرارت کو اتنا کم کر سکے کہ نیند آ جائے اور اسے برقرار رکھا جا سکے،‘‘ ماہر نفسیات ڈاکٹر اویس این اے بتاتے ہیں۔ سال ۲۰۲۴ کے ’کلائمیٹ سنٹرل‘ کے مطالعہ میں کہا گیا ہے کہ پورے ہندوستان میں لوگوں کو ۲۵ ڈگری سیلسیس سے زیادہ درجۂ حرارت والی تقریباً ۸۰ ’گرم‘ راتوں کا سامنا ہے۔

یہ گرم راتوں کی ایک بڑی تعداد ہے جنہیں اس سال گزارنا ہے۔ دن کے وقت باہر کام کرنے والوں کے لیے کوئی راحت نہیں ہے۔

’’حیاتیاتی طور پرہمارے جسم کو ٹھنڈا کرنے کے لیے ڈیزائن کیا گیا ہے خاص طور پر اس وقت جب ہم سونے کی تیاری کرتے ہیں یا جب گہری نیند کے مراحل میں داخل ہوتے ہیں،‘‘ اویس کہتے ہیں، جو کالی کٹ، کیرالہ، میں آئی کیو آر اے اے انٹرنیشنل ہسپتال اور ریسرچ سنٹر میں کنسلٹنٹ ہیں۔ ’’نیند بلانے کی یہ جدوجہد کروٹ پہ کروٹ بدلنے اور بستر پر پہلو بدلنے، بار بار نیند اچٹنے، اور بے چینی کے احساس کا باعث بن سکتی ہے۔‘‘ انہوں نے مزید کہا کہ یہ صورتحال کم آمدنی والے ممالک کے افراد، ضعیف العمر افراد، خواتین اور گرم علاقوں میں رہنے والوں میں واضح طور پر نظر آتی ہے۔

جنابائی کے گاؤں کے گھر میں چھت کا پنکھا کچھ راحت بخشتا ہے۔ یہ پنکھا دو کمروں والے گھر میں سونے کی کوشش کر رہے صرف چار لوگوں کے اوپر گرم ہوا چھوڑتا ہے۔

جب جنابائی کو اس سے نمٹنا ناممکن لگتا ہے، تو ’’میں تمباکو چباتی ہوں کیونکہ یہ مجھے کافی دیر کے لیے آرام بخشتا ہے اور میں سو جاتی ہوں،‘‘ انہوں نے پاری کو بتایا، ساتھ ہی یہ بھی کہا کہ وہ اس کی عادی ہوتی جارہی ہیں۔ یہ آرام صرف عارضی ہے، کیونکہ نکوٹن کی عادت سے نیند میں خلل پڑتا ہے۔

جنابائی کا سونے کے لیے تمباکو پر انحصار ایک بڑے نمونے کی عکاسی کرتا ہے۔ مختلف برادریوں میں بہت سے لوگ کم نیند سے نمٹنے کے لیے شراب یا دیگر نشہ آور مادوں کا رخ کرتے ہیں۔ لیکن ان مادوں کے کثرت استعمال سے نیند میں خلل، خراٹے اور یہاں تک کہ نیند میں سانسیں بے ترتیب (سلیپ اپینیا) بھی ہو جاتی ہے۔

تھکن اور نیند کی کمی کے اثرات ان کے جسم پر بھی دکھائی دیتے ہیں۔ وہ کہتی ہیں کہ گرمیوں کے دوران ان کا بلڈ پریشر اکثر بڑھ جاتا ہے، اور ان کے دل کی دھڑکنیں تیز ہو جاتی ہیں، جس کی وجہ سے وہ بے چینی اور دباؤ کا شکار ہو جاتی ہیں۔ ’’صبح میں سر میں شدید درد ہوتا ہے کیونکہ میں ٹھیک سے سو نہیں پاتی ہوں۔‘‘ گرمیوں کے دوران ہر ہفتے وہ ایک پرائیویٹ کلینک کا دورہ کرتی ہیں، جہاں ڈاکٹر انہیں نیند کی گولیاں تجویز کرتا ہے جس سے انہیں کچھ سکون ملتا ہے۔

بھادولے ایک پرسکون گاؤں ہے، جس میں کچے راستے اور ناریل، کھجور، آم، پیپل اور نیم کے درخت ایک قطار میں چلتے ہیں۔ زیادہ تر لوگ اپنے دن گنّے کے کھیتوں میں زرعی مزدور کے طور پر گزارتے ہیں۔ وہ زندہ دل شامیں، جس میں کبھی وہ اپنے ہمسایوں کے ساتھ اپنے گھروں کے باہر گپ شپ کرتے تھے، درجۂ حرارت میں مسلسل اضافہ کی وجہ سے تیزی سے کم ہوتی جا رہی ہیں۔

کولہاپور میں گرمیوں میں دن کا درجۂ حرارت اکثر ۳۸ ڈگری سیلسیس سے تجاوز کر جاتا ہے، اور یہ سال بھی کچھ الگ نہیں تھا۔ ‘‘ہر موسم گرما پچھلی گرمیوں سے زیادہ گرم محسوس ہوتا ہے،‘‘ ان کی ایک سہیلی نے ایک نصابی کتاب کو پنکھا بنا کر جھلتے ہوئے کہا۔

جب جنابائی اور ان کے پڑوسی کام سے واپس آتے ہیں تو اکثر بات چیت کا موضوع اس امر کے گرد ہوتا ہے کہ راتیں کس قدر ناقابل برداشت ہو گئی ہیں، ہوا میں کتنی گرمی ہے، اور نیند آسانی سے نہیں آتی۔ جنابائی اپنے روزمرہ کے تناؤ اور اضطراب کو بیان کرتے ہوئے کہتی ہیں، ’’گرمی تو پہلے سے ہی بہت زیادہ ہے، اوپر سے نیند کی کمی اسے مزید بدتر بنا دیتی ہے۔‘‘

جنابائی کہتی ہیں کہ اچھی نیند نہ آنے کی وجہ سے وہ کام کے دوران کمزوری محسوس کرتی ہیں۔ وہ کہتی ہیں کہ انہیں اکثر ایسا لگتا ہے کہ وہ کام کرتے ہوئے گر جائیں گی۔ اس کو روکنے کے لیے، ’’میں ہمیشہ اپنے ساتھ چینی لے جاتی ہوں۔‘‘ جب بھی وہ غنودگی محسوس کرتی ہیں ، تو اسے کھا کر لیموں کا رس پی لیتی ہیں، جس سے انہیں جلد آرام مل جاتا ہے۔

اپنی سہیلیوں کے ساتھ وقت گزارنا، ہنسی مذاق اور گپ شپ کرنا، ایک دوسرے کی سننا اور مدد کرنا، کہانیاں سنانا اب ماضی کی باتیں ہو گئی ہیں۔ مہینوں کی خراب نیند، چڑچڑاپن اور تھکاوٹ کی وجہ سے وہ کئی دنوں تک سماجی میل جول سے دور رہنے پر مجبور ہیں۔ وہ تنہا رہنے کو ترجیح دیتی ہیں، اور اس دوستی کو ترک کرنے کے لیے تیار ہیں جس سے وہ کبھی لطف اندوز ہوتی تھیں۔

گاؤں میں ایک کہاوت اکثر سنی جاتی ہے، ’’جھوپ ناہی تر شریر دم دیت ناہی، آنی من شانت ہوت ناہی [نیند کے بغیر جسم کو سکون نہیں ملے گا، اور دماغ پرسکون نہیں رہے گا]۔‘‘

اس کہاوت سے جنابائی واقف ہیں۔ وہ تھکاوٹ محسوس کرتی ہیں، لیکن نیند نہیں آتی۔

جنابائی کے گھر سے صرف ۳۰ کلومیٹر کے فاصلہ پر واقع جامبھلی گاؤں میں لالو بائی کامبلے بھی گرمی کی شدت کو محسوس کر رہی ہیں۔

وہ کہتی ہیں، ’’اس سال بہت گرمی تھی، اور میں تین مہینوں کے دوران ہر روز بمشکل ایک گھنٹہ سو پائی تھی۔‘‘ نو افراد پر مشتمل ان کے کنبے کے لیے ایک ٹیبل فین ہے، جسے ان کا بیٹا استعمال کرتا ہے۔ ’’مناسب نیند کے بغیر میں اگلے دن تھکاوٹ اور کمزوری محسوس کرتی ہوں،‘‘ لالو بائی (۷۲ سالہ) کہتی ہیں جنہوں نے گنّے کے کھیتوں میں کام کرنا چھوڑ دیا ہے۔ گرم راتوں میں تاخیر سے سونا جسمانی تھکاوٹ کا باعث بنتا ہے اور اس سے پژمردگی، اضطراب اور دماغی صحت کے دیگر مسائل پیدا ہوتے ہیں۔

ہر بالغ شخص کو روزانہ کم از کم سات گھنٹے کی نیند لینے کا مشورہ دیا جاتا ہے۔ تاہم، یہ لالو بائی کے لیے خیالی باتیں ہیں۔ کبھی کبھی انہیں نیند بلانے کے لیے جدوجہد کرنی پڑتی ہے۔ یہ صورتحال ان کی بڑھتی ہوئی عمر اور گنّے کے کھیتوں میں کئی دہائیوں تک سخت محنت کے باعث پیدا ہونے والی جسمانی کمزوری کی وجہ سے ہے، جو انتہائی گرم راتوں میں نیند اچٹنے کی وجہ سے مزید خراب ہو جاتی ہے۔

’’چار سال پہلے تک، مجھے پانچ منٹ میں نیند آ جاتی تھی،‘‘ لالو بائی پاری کو بتاتی ہیں۔ ’’لیکن اب نہیں آتی۔‘‘

ان کے ۴۵ سالہ بیٹے پرمود ان کی بے خوابی کی وجہ سے پریشان ہیں۔ ’’وہ ہر وقت تھکی ہوئی نظر آتی ہیں،‘‘ وہ کہتے ہیں۔ ’’یہاں تک کہ جب وہ خاموشی سے بیٹھتی ہیں تب بھی ایسا محسوس ہوتا ہے کہ ان کا ذہن بے چین ہے۔‘‘

اویس کا کہنا ہے کہ مطلوبہ معیاری نیند نہ لینا ذہنی صحت کے مسائل جیسے پژمردگی، اضطراب، بائی پولر (دوئبرووی) بیماری اور پوسٹ ٹرامیٹک دباؤ کی بیماری کا باعث بن سکتی ہے۔ ناقص نیند دماغ کے کیمیائی نظام میں خلل پیدا کر سکتی ہے، دماغ میں تناؤ اور جذباتی مراکز کو زیادہ متحرک کرسکتی ہے، جسم کو ’’تناؤ موڈ‘‘ میں رکھ سکتی ہے، کم درجے کی سوزش کا باعث بن سکتی ہے، اور جسم کے قدرتی نیند کے دورانیہ میں مداخلت پیدا کرسکتی ہے۔

’’میں نے سوچا کہ موسم کے ساتھ درد کم ہو جائے گا، لیکن ایسا نہیں ہوا،‘‘ لالو بائی تشویش ظاہر کرتے ہوئے کہتی ہیں۔

اب انہیں محسوس ہوتا ہے کہ انہیں زرعی مزدور کا کام مستقل طور پر چھوڑنا پڑے گا۔ وہ ہر وقت تناؤ کا شکار رہتی ہیں۔ ان کے پڑوسیوں کے مطابق ان کے چہرے پر تناؤ دکھائی دیتا ہے۔

آخر کار، پانچ ماہ کی بے خوابی والی راتوں کے بعد لالو بائی ایک ڈاکٹر کے پاس گئیں جس نے انہیں نیند کی گولیاں تجویز کیں۔ وہ کہتی ہیں، ’’میں نے سوچا کہ اس میں بہتری آ جائے گی… جب مجھے بنیادی کام کرنے میں بھی مشکل پیش آنے لگی، تو مجھے احساس ہوا کہ کچھ خطرناک بات ضرور ہے،‘‘ وہ کہتی ہیں۔

بھادولے گاؤں کی نندا سونوَنے گرمیوں سے خوف محسوس کرتی ہیں۔ جب بھی موسم گرما شروع ہوتا ہے، وہ ۹۰ دن کی الٹی گنتی شروع کر دیتی ہیں۔ یہ ۵۰ سالہ خاتون کہتی ہیں، ’’میں ہر روز گرمیوں کے ختم ہونے کی دعا کرتی ہوں۔ اس کی وجہ یہ ہے کہ موسم بدلتے ہی ان کی نیند کا مرحلہ بہتر ہو جاتا ہے۔

گرم راتوں میں انہیں تین گھنٹے سے بھی کم نیند آتی ہے۔ وہ کہتی ہیں، ’’اگر کسی طرح سے راحت نہیں ملتی ہے، تو میں سونے کی امید میں ٹیلی ویژن دیکھنا شروع کر دیتی ہوں۔‘‘ ان پر بے خوابی کے شدید اثرات نمایاں ہونے لگتے ہیں۔ وہ اگلے دن چڑچڑاپن محسوس کرتی ہیں اور انہیں چکر آنا، اور جسم میں شدید درد ہونا شروع ہو جاتا ہے، جو اس وقت تک ختم نہیں ہوتا جب تک کہ وہ درد کش دوا نہ لے لیں۔

جنابائی اور لالو بائی کی طرح، نندا کو بھی نیند کی دوا تجویز کی گئی تھی، جو بقول ان کے بہت سی خواتین کے لیے ایک عادت سی بن چکی ہے۔ وہ ہائپو ٹینشن (کم بلڈ پریشر) کا شکار ہیں، جس کی شدت زیادہ گرمی میں اور بڑھ جاتی ہے، جس سے ان کے لیے سونا مشکل ہو جاتا ہے۔ جب بھی گرمی کی وجہ سے وہ جاگتی ہیں، تو وہ اپنے آپ کو پرسکون کرنے کے لیے کچھ چینی کھا لیتی ہیں۔

ضلع بھر میں بڑھتی ہوئی گرمی لوگوں کی نیندیں اڑا رہی ہے۔

جنابائی کہتی ہیں، ’’اس سے پہلے، مجھے نیند کے حوالے سے کبھی بھی کسی قسم کی پریشانی کا سامنا نہیں کرنا پڑتا تھا۔‘‘ وہ بتاتی ہیں کہ وہ پہلے تناؤ کا شکار نہیں تھیں، لیکن اب ان کا کوئی بھی دن تناؤ کے بغیر نہیں گزرتا۔

موسمیاتی تبدیلی اور دماغی صحت کے موضوع پر پاری کی ملک گیر سیریز کو ماری والا ہیلتھ انیشیٹو کی حمایت حاصل ہے۔ اس کے تحت موسمیاتی بحران کے ذہنی اور مجموعی صحت پر مرتب ہونے والے اثرات کے ساتھ ساتھ دیہی ہندوستان کے لوگوں اور شہری ہندوستان میں دیہی مہاجرین کے ذریعہ معاش پر مرتب ہونے والے اثرات کا مطالعہ کیا جائے گا۔

ترجمہ نگار: شفیق عالم