கொல்ஹாப்பூரில் தூக்கமின்மை

ஜனாபி சொனாவனே நெருங்கிய நண்பர்களுடன் எப்போதும் வாதிட்டதும் இல்லை. சச்சரவு கொண்டதும் இல்லை.

ஆனால் இந்த வருடம் நிலை மாறிவிட்டது. “வேகமாக எரிச்சலடைந்து, சிறு விஷயங்களுக்கெல்லாம் நண்பர்களுடன் சண்டை தொடங்கி விடுகிறேன்,” என்கிறார் 62 வயதாகும் அவர், மகாராஷ்டிராவின் பதோலே கிராமத்திலுள்ள ஈரறை வீட்டுக்கு வெளியே அமர்ந்து.

2025ம் ஆண்டின் கோடைக்கால இரவுகளின் வெப்பநிலை குறிப்பிடத் தகுந்த அளவில் கொல்ஹாப்பூரில் அதிகரித்திருக்கிறது. தூங்க முடியாமல் ஜனாபாய் தவிக்கிறார். முதலில், இந்த சிரமம் ஓரிரு நாட்களில் மறைந்து விடும் என நினைத்தார். ஆனால், மூன்று மணி நேரம் கூட தூங்க முடியாத நாட்கள் அவருக்கு நேர்ந்தன. நாட்கள் வாரங்களாகி மாதங்களாகின. தொடர் எரிச்சலும் சோர்வும் அவரை பீடித்தது.

நிலமற்ற விவசாயியான ஜனாபாய் நாளில் எட்டு மணி நேரங்கள் பிறரின் வயல்களில் முதுகொடிய வேலை பார்க்கிறார். களைகள் எடுக்கிறார், கனமான தீவனத்தை தூக்கிறார், அறுவடை செய்கிறார். மாலையில் சோர்வாகிறார். தோள்கல் வலி கொள்கின்றன. கால்கள் கனமாகின்றன. நாளின் முடிவில் வழக்கமாக அவர் 10 மணிக்கு வீட்டு வாசலருகே உறங்க செல்வார். சில நிமிடங்களில் தூங்கி விடுவார்.

ஆனால் ஆழமான நிம்மதியான அந்த தூக்கம் இப்போது தூரக் கனவாகி விட்டது. கடந்த சில மாதங்களாக இப்பகுதியில் அதிகரித்திருக்கும் தட்பவெப்பமும் குறைவான ஈரப்பதமும், இரவு முழுக்க அவருக்கு வியர்வையை வரவழைக்கிறது. அல்லாடும் அவர் ஓய்வெடுக்க முடியாமல் தகர வீட்டுக்குள் ஏறும் சூடினால் உறக்கம் கலைந்து அடிக்கடி விழிக்கிறார்.

விழிப்பு வந்த பிறகு, மீண்டும் தூங்க குறைந்தபட்சம் ஒரு மணி நேரம் பிடிக்கிறது.

கடந்த மே மாதத்தில் அதிகாலை மூன்று மணி அளவில் வெப்பநிலை கொஞ்சம் குறையும். ஆனால் அவர் ஐந்து மணிக்கு எழுந்து வீட்டுவேலை செய்து முடித்து, தினக்கூலி வேலைக்கு கிளம்ப வேண்டும்.

சூரியன் உதிக்கும் முன்பே ஜனபாய் விழித்தெழுந்து நீரெடுத்து, வீட்டுக்கு சமைத்து விடுவார். அறுபது வயதுகளில் இருக்கும் அவருக்கு வயலில் நாள் முழுவதும் நிற்பதும் அதிக வெப்பநிலையும் சோர்வை தருகிறது. வீட்டுவேலை இன்னும் முடியவில்லை. பாத்திரங்கள் கழுவுவது, இரவுணவு தயாரிப்பது, அடுத்த நாளுக்கான விறகு சேகரிப்பது என இன்னும் வேலை இருக்கிறது. “எப்போதும் செய்வதற்கு ஒரு வேலை இருந்து கொண்டுதான் இருக்கிறது,” என்கிறார் அவர்.

தூக்கம் ஓய்வை தரவில்லை. அவர் அடிக்கடி குடும்பத்தினரிடம் கோபத்தை கொட்டுகிறார். பிறகு அதற்கு வருந்துகிறார். “நான் மாறிவிட்டதாக அவர்கள் நினைக்கின்றனர். முன்பு, நாள் முழுவதும் வேலை பார்த்துவிட்டு வந்தாலும் நான் சிரிப்பேன்,” என்கிறார் அவர். முழு உற்சாகத்துடன், வயல்களில் வேலை பார்த்து பாடித் திரிந்த இளைய நாட்களை நினைவுகூரும் அவர், எந்தளவுக்கு மாறி விட்டாரென்பதை அறிந்திருக்கிறார்.

”நான் எப்போதும் கோபத்தோடு இருப்பதாக மக்கள் இப்போது நினைக்கின்றனர். இனிமையாக இருக்கும் சக்தி இல்லை,” என்கிறார்.

சில இரவுகளில், “தலைசுற்றும். கண்கள் எரியும். நேர்மறையாக கூட எனக்கு சிந்திக்க முடிவதில்லை,” என்கிறார். ஓய்வின்மையும் கவலையும் அவரின் வாழ்க்கைக்குள்ளும் வார்த்தைகளுக்குள்ளும் புகுந்து விட்டது.

ஜனாபி தனியாக இல்லை. வெப்ப அலைகளும் இரவு நேர வெப்பநிலைகளும் மக்களின் தூக்கத்தை பாதிக்கின்றன. தூக்கத்தை பாதிக்கும் காலநிலை மாற்றம் குறித்து 2025ம் ஆண்டு வெளியான ஆய்வு, “...காலநிலை வெப்பமடைதல், தூக்கமின்மையை அதிகரித்து, தூக்கத்தின் தன்மையை பாதிக்கிறது. குறிப்பாக முதியவர்களுக்கும், பெண்களுக்கும்,” என்கிறது.

”அறையின் வெப்பநிலை அதிகமாக இருக்கும்போது உடலின் வெப்ப ஒழுங்கு அமைப்பு, தூக்கத்துக்கு தேவையான வகையில் உடலின் வெப்பத்தை குறைப்பது கஷ்டம்,” என விளக்குகிறார் உளவியல் மருத்துவரான டாக்டர் உவாய்ஸ் என்.ஏ. ஆனால் இந்தியா முழுவதும் மக்கள் 25 டிகிரிக்கும் மேல் இருக்கும் 80 ‘வெப்ப’ இரவுகளை அனுபவிப்பதாக காலநிலை மையம் வெளியிட்ட 2024ம் ஆண்டு ஆய்வு தெரிவிக்கிறது.

ஒரு வருடத்தில் அதிகமான வெப்ப இரவுகளின் எண்ணிக்கை அது. நாள் முழுக்க வெளியில் வேலை பார்ப்பவர்களுக்கு, இளைப்பாறுதல் இருக்காது.

“உயிரியல் ரீதியாக நம் உடல்கள், தூங்கத் தயாராகும்போது வெப்பம் தணிக்கத் தொடங்கி, தூக்கத்தின் ஆழ்நிலைகளுக்கு செல்லும்போது குளுமை அடையும் வகையில் வடிவமைக்கப்பட்டிருக்கிறது,” என்கிறார் கேரளாவின் கள்ளிக்கோட்டையில் இருக்கும் IQRAA சர்வதேச மருத்துவமனை மற்றும் ஆய்வு மையத்தை சேர்ந்த உவாய்ஸ். “அடிக்கடி விழிப்பது, திரும்பி படுப்பது, ஓய்வற்ற உணர்வு கொண்டிருப்பது ஆகியவை இருக்கும்.” குறைந்த வருமானம் கொண்ட நாடுகளை சேர்ந்த வளர்ந்தவர்களிடமும் முதியவர்களிடமும் பெண்களிடமும் வெப்ப பகுதிகளில் வாழ்பவர்களிடமும் இதைக் காண முடியும்.

ஜனாபாயின் கிராமத்து வீட்டில், ஃபேன் கொஞ்சம் ஆறுதல் தருகிறது. எனினும் அது சூடான காற்றைதான் தருகிறது.

ஜனாபாய் சிரமப்படுகிறார். “சாந்தமாகி தூங்க உதவுவதால் நான் புகையிலை மெல்லுகிறேன்,” என்கிறார் அவர், அதற்கு அடிமையாவதாக குறிப்பிட்டு. தீர்வு தற்காலிகமானதுதான். ஆனால் ஒரு கட்டத்தில் நிக்கோடினும் தூக்கத்தை பாதிக்கத்தக்கது.

தூங்க புகையிலையை சார்ந்திருக்கும் ஜனாபாயின் நிலை பரவலாக இருக்கிறது. பலரும் மோசமான தூக்கமின்மையை சமாளிக்க மது மற்றும் பிற போதைப்பொருட்களை சார்ந்திருக்கின்றனர். ஆனால் தொடர்ந்து அவற்றை பயன்படுத்தினால் தூக்கத்தில் இடையூறு ஏற்படும். குறட்டை வரும். தூக்க நோய்களும் ஏற்படும்.

சோர்வும் தூக்கமின்மையும் அவரின் ஆரோக்கியத்தையும் பாதித்திருக்கிறது. கோடைக்காலத்தில் ரத்த அழுத்தம் அதிகரிப்பதாகவும் இதயம் வேகமாக துடிப்பதாகவும் சொல்கிறார். இதனால் ஓய்வெடுக்க முடியாமல் அழுத்தத்துக்கு ஆட்படுகிறார். “தூங்காததால் காலையில், தலைவலி கடுமையாக தாக்கும்.” கோடைக்காலத்தில் வாரந்தோறும், அவர் தனியார் மருத்துவ மையத்துக்கு சென்று தூக்க மாத்திரை வாங்கி வருவார். ஒருவழியாக அது அவருக்கு தீர்வை வழங்கியது.

பதோலே ஓர் அமைதியான கிராமம். குறுகிய மண் தெருக்களும் உயர தென்னைகளும் மாமரங்களும் ஆலமரங்களும் வேப்ப மரங்களும் நிறைந்தது. பெரும்பாலானோர் தங்களின் நாட்களை விவசாயத் தொழிலாளர்களாக தொலைதூர கரும்பு வயல்களில் கழிக்கின்றனர். அண்டைவீட்டாருடன் பேசும் பொழுதாக இருந்த மாலை வேளைகள் வெப்பநிலை அதிகரித்ததால், இல்லாமல் போய்விட்டது.

பகல் வெப்பநிலை கோடையில் 38 டிகிரியை தாண்டும். இந்த வருடமும் இதே நிலைதான். “ஒவ்வொரு கோடையும் முந்தையதை விட அதிக வெப்பம் கொண்டிருக்கிறது,” என்கிறார் அவரின் நண்பர்களில் ஒருவர், பழைய பள்ளி புத்தகத்தை கொண்டு விசிறியபடி.

ஜனாபாயும் அண்டைவீட்டாரும் வேலை முடிந்து திரும்புகையில், பேச்சு மெல்ல இரவுகளின் வெப்பம், சூடான காற்று, தூக்கமின்மை ஆகியவை நோக்கி செல்லும். “ஏற்கனவே கடும் வெப்பமாக இருக்கிறது. தூக்கமின்மை இன்னும் நிலையை மோசமாக்குகிறது,” என்கிறார் அவர் அன்றாட அழுத்தத்தையும் சோர்வையும் குறிப்பிடும் வகையில்.

தூக்கம் இல்லாத நிலை, வேலையை பாதிப்பதாக ஜனாபாய் சொல்கிறார். வேலை பார்க்கும்போது மயங்கி விழுந்து விடுவதை போல் அடிக்கடி உணர்வதாக சொல்கிறார். அதை தடுக்க, “எப்போதும் கையில் சர்க்கரை வைத்திருப்பேன்,” என்கிறார். தூக்க கலக்கத்துடன் இருந்தால், ஜனாபாய் சர்க்கரையை சாப்பிட்டு, எலுமிச்சை சாறையும் குடிக்கிறார். உடனே சரியாகி விடும்.

நண்பர்களுடன் நேரம் கழிப்பது, சிரிப்பது, பேசுவது, அடுத்தவர் பேச கேட்பது, ஒருவருக்கொருவர் உதவுவது, கதைகள் சொல்வது ஆகியவை எல்லாம் கடந்த காலத்தவையாக மாறிவிட்டன. மாதக்கணக்கில் தூங்க முடியாமல், எரிச்சலும் சோர்வும் அதிகமாகி, சமூக உறவுகளை தவிர்க்கும் நிலைக்கு அவர் சென்றுவிட்டார். ஒருகாலத்தில் சந்தோஷமாக இருந்த நட்புறவுகளை விடுத்து தனிமையில் இருப்பதையே அவர் விரும்புகிறார்.

கிராமத்தில் அடிக்கடி சொல்லப்படும் ஒரு விஷயம் உண்டு. “தூக்கமின்றி உடல் ஓய்வெடுக்காது, மனமும் அமைதியாகாது.”

இந்த வாசகம் ஜனாபாயின் மனதில் ஓடுகிறது; அவர் சோர்வாக இருக்கிறார். ஆனால் தூக்கம் வரவில்லை.

ஜனாபாய் வீட்டிலிருந்து 30 கிலோமீட்டர் தொலைவில் இருக்கும் ஜம்பாலி கிராமத்தில், லாலுபாய் காம்ப்ளேவும் வெப்பத்தில் தகிக்கிறார்.

“இந்த வருடம் கடும் வெப்பமாக இருக்கிறது. மூன்று மாதங்களில் உருப்படியாக நான் ஒருமணி நேரம் கூட தூங்கவில்லை,” என்கிறார் அவர். ஒன்பது பேர் இருக்கும் வீட்டில் ஒரு டேபிள் ஃபேன்தான். அதையும் அவரது மகன் பயன்படுத்துகிறார். “நல்ல தூக்கமின்றி, சோர்வாகவும் பலவீனமாகவும் அடுத்த நாள் இருக்கிறேன்,” என்கிறார் கரும்புவயல்களில் வேலை பார்த்துக் கொண்டிருந்த 72 வயது பெண். வெப்ப இரவுகளில் தாமதமான தூக்கங்கள், உடலை பலவீனமாக்கி அழுத்தம், பதற்றம் போன்ற அகச்சிக்கல்களை அதிகரிக்கின்றன.

வளர்ந்தவர்கள் குறைந்தபட்சம் ஏழு மணி நேரங்கள் தினமும் தூங்க வேண்டும் என பரிந்துரைக்கப்படுகிறது. ஆனால் லாலுபாய்க்கு இது சாத்தியமாகவில்லை. சில நாட்களில் தூக்கம் கூட வராமல் தவித்திருக்கிறார் அவர். பல பத்தாண்டுகளாக கரும்பு வயல்களில் செலுத்திய கடின உழைப்பும் அவரின் வயதும் சேர்ந்து, வெப்ப இரவுகளில் தூக்கம் வருவதை கடுமையாக தடுக்கிறது.

”நான்கு வருடங்களுக்கு முன் வரை, ஐந்து நிமிடங்களில் என்னால் தூங்கி விட முடியும்,” என்கிறார் லாலுபாய். “இப்போது முடியவில்லை.”

அவரின் 45 வயது மகனான பிரமோத், அவர் தூங்குவதில்லை என வருத்தப்படுகிறார். “எல்லா நேரமும் அவர் சோர்வாக தெரிகிறார்,” என்கிறார் அவர். “அமைதியாக உட்கார்ந்திருக்கும்போதும் கூட, அவர் மனம் ஓய்வின்றி அலைவது தெரிகிறது.”

போதுமான தூக்கம் இல்லாத நிலை, மன ஆரோக்கியத்தை பாதித்து சோர்வு, பதற்றம், பைபோலார் டிசார்டர் மற்றும் மன அழுத்த குறைபாடு போன்றவற்றை உருவாக்கும் என்கிறார் உவாய்ஸ். மோசமான தூக்கம் மூளையின் ரசாயனத்துக்கு தொந்தரவு செய்து, அதிக அழுத்தத்தையும் உணர்வு மையங்களையும் மூளையில் தூண்டி, உடல் எப்போதும் “அழுத்த நிலையில்” இருக்க வைத்து, எரிச்சலை உருவாக்கி, உடலின் இயற்கையான தூக்கம்-விழிப்பு சுழற்சியை குலைக்கும்.

”பருவ காலம் மாறியதும் வலி சரியாகும் என நினைத்தேன். ஆனால் மாறவில்லை,” என்கிறார் லாலுபாய் கவலையோடு.

இனி விவசாயத் தொழிலை நிரந்தரமாக கைவிட வேண்டியிருக்கும் என அவர் நம்புகிறார். எல்லா நேரமும் அவர் அழுத்தத்தில் இருக்கிறார். அவரின் முகத்திலேயே அது வெளிப்படுவதாக அண்டை வீட்டார் சொல்கின்றனர்.

தூக்கமற்ற ஐந்து மாதகால இரவுகளுக்கு பின் இறுதியாக, லாலுபாய் மருத்துவரை பார்த்தார். மருத்துவர் அவருக்கு தூக்க மாத்திரைகளை பரிந்துரைத்தார். “சரியாகும் என நினைத்தேன். எளிய வேலைகள் செய்வது கூட சிரமமானபோதுதான், பிரச்சினையை உணர்ந்தேன்,” என்கிறார் அவர்.

பதோலே கிராமத்தை சேர்ந்த நந்தா சொனாவனே கோடைகாலங்களுக்கு பயப்பட்டிருக்கிறார். கோடை தொடங்கும்போது, 90 நாள் கணக்கை அவர் தொடங்குவார். “ஒவ்வொருநாளும் கோடைக்காலம் முடிய வேண்டுமென நான் வேண்டிக் கொள்வேன்,” என்கிறார் 50 வயதாகும் அவர். ஏனெனில் பருவம் மாறியதும் தூக்க சுழற்சி அவருக்கு சரியாகி விடும்.

வெப்ப இரவுகளில் மூன்று மணி நேரங்களுக்கும் குறைவாகதான் அவரால் தூங்க முடிகிறது. “எதுவும் உதவவில்லை எனில், நான் தூக்கம் வர தொலைக்காட்சியை பார்ப்பேன்,” என்கிறார் அவர். தூக்கமின்மை ஏற்படும் விளைவுகள் மோசமானவை. அடுத்த நாள் அவர் எரிச்சலுடன் இருப்பார். தலைசுற்றும். உடல் வலி இருக்கும். வலி நிவாரணி எடுக்க வேண்டியிருக்கும்.

ஜனாபாய் மற்றும் லாலுபாய் போல, நந்தாவுக்கும் தூக்க மாத்திரைகள் பரிந்துரைக்கப்பட்டது. ஆனால் அது பல பெண்களுக்கு போதையாகி விட்டதாக சொல்கிறார் அவர். அவருக்கு பதற்ற குறைபாடு உண்டு. தீவிர வெப்பம் அதை மோசமாக்கி, தூங்க முடியாமல் அவரை ஆக்கியிருக்கிறது. வெப்பம் அவரது தூக்கத்தை கலைக்கும்போதெல்லாம் கொஞ்சம் சர்க்கரை சாப்பிட்டு ஆசுவாசப்பட்டுக் கொள்வார்.

மாவட்டம் முழுக்க அதிகரிக்கும் வெப்பம், மக்களின் தூக்கத்தை பறித்துக் கொண்டிருக்கிறது.

“இதற்கு முன், தூங்க எனக்கு எந்த சிரமமும் இருந்ததில்லை,” என்கிறார் ஜனாபாய். இதற்கு முன் அழுத்தம் ஏற்பட்டதில்லை என்கிறார் அவர். ஆனால் இப்போது அழுத்தமின்றி ஒருநாள் கூட அவருக்கு கழிவதில்லை.

காலநிலை மாற்றம் மற்றும் மனநலம் குறித்த பாரியின் தேசிய அளவிலான கட்டுரைத்தொடர், மரிவாலா சுகாதார முன்னெடுப்பின் ஆதரவை பெற்றது. காலநிலை நெருக்கடி மனதளவிலும் ஆரோக்கியத்திலும் கிராமப்புற வாழ்வாதாரங்களிலும் நகர்ப்புற புலம்பெயர் தொழிலாளர்கள் மீதும் செலுத்தும் தாக்கம் குறித்து இந்த தொடர் ஆய்வு செய்கிறது

தமிழில்: ராஜசங்கீதன்