കോൽഹാപുരിൽ ഉറക്കമില്ലാതെ

ഏറ്റവുമടുത്ത സുഹൃത്തുക്കളോടുപോലും ജനാബായി സൊണവനെ ഇന്നുവരെ തർക്കിക്കുകയോ ബഹളംവെക്കുകയോ ചെയ്തിട്ടില്ല.

എന്നാൽ ഈ വർഷം അതിന് വ്യത്യാസം വന്നു. “ചെറിയ കാര്യങ്ങൾപോലും എന്നെ അസ്വസ്ഥമാക്കാനും ഞാൻ എൻ്റെ കൂട്ടുകാരുമായി തല്ലുകൂടാനും തുടങ്ങി, ” മഹാരാഷ്ട്രയിലെ ഭദോലെ ഗ്രാമത്തിലെ തൻ്റെ ചെറിയ ഇരുമുറി വീടിൻ്റെ പുറത്തിരുന്ന് ആ 62 വയസ്സുകാരി പറയുന്നു.

സംസ്ഥാനത്തിലെ കോൽഹാപുർ ജില്ലയിൽ 2025-ലെ വേനൽക്കാലത്ത്, രാതികാല താപനില ഗണ്യമായി ഉയർന്നു. ജാനാബായിക്ക് ഉറങ്ങാനും സാധിക്കാതെവന്നു. അതിൻ്റെ അസ്വസ്ഥത ഒന്നുരണ്ട് ദിവസംകൊണ്ട് മാറുമെന്ന് അവർ കരുതി. എന്നാൽ മൂന്ന് മണിക്കൂർപോലു സ്വസ്ഥമായി ഉറങ്ങാൻ കഴിയാത്ത ദിനങ്ങൾ ഉണ്ടായി. ആ ദിവസങ്ങൾ ആഴ്ചകളും മാസങ്ങളുമായി നീണ്ടുപോയി. അതോടെ, എന്നും അസ്വസ്ഥതകളും ക്ഷീണവുമായി അവർക്ക്.

മറ്റുള്ളവരുടെ പാടത്ത് എല്ലുമുറിയെ എട്ടുമണിക്കൂർ കായികാദ്ധ്വാനം ചെയ്യുന്ന ഭൂരഹിത കർഷകയാണ് അവർ. കളകൾ പറിക്കുക, ഭാരമുള്ള കാലിത്തീറ്റകളുടെ കെട്ടുകൾ ചുമക്കുക, വിളകൾ കൊയ്യുക തുടങ്ങിയ ജോലികൾ. വൈകുന്നേരമാവുന്നതോടെ അവർ തളരും. ചുമലുകൾ വേദനിക്കും, കാലുകൾക്ക് ഘനം തോന്നും. സാധാരണ നിലയിൽ രാത്രി 10 മണിയോടെ അവർ കിടക്കാൻ തയ്യാറാവും. വീടിൻ്റെ അകത്തേക്കുള്ള വഴിയിൽത്തന്നെ കിടന്ന്, വേഗത്തിൽ ഉറങ്ങാറുമുണ്ട്.

എന്നാൽ, അഗാധവും ശാന്തവുമായ ഉറക്കം കിട്ടിയിരുന്ന ആ രാത്രികൾ ഇപ്പോൾ ഒരു വിദൂരസ്മൃതി മാതം. മേഖലയിൽ ഈയിടയായി ഉണ്ടാവുന്ന ഉയർന്ന താപനിലയിലും ഈർപ്പത്തിലും രാത്രി മുഴുവൻ അവർ വിയർത്തൊലിക്കും. തിരിഞ്ഞും മറിഞ്ഞും, ഉറക്കംവരാതെ അവർ കിടക്കും.

ഉറക്കം മുറിഞ്ഞാൽ, വീണ്ടും ഉറങ്ങണെമെങ്കിൽ ഒരു മണിക്കൂറെങ്കിലും കഴിയണം.

ഈ മേയ് മാസത്തിലാണ്, 3 മണിയോടെ (2025-ൽ) താപനില അല്പം താഴ്ന്ന് സഹനീയമായത്. അഞ്ചുമണിയോടെ അവർക്ക് ഉണർന്ന് വീട്ടുപണിയും ആ ദിവസത്തെ കഠിനാദ്ധ്വാനവും തുടങ്ങിയേ പറ്റൂ.

സൂര്യനുദിയ്ക്കുന്നതിനുമുൻപ് എഴുന്നേറ്റ് വെള്ളം കൊണ്ടുവന്ന് വീട് തുടച്ച് വൃത്തിയാക്കി കുടുംബത്തിനുള്ള ഭക്ഷണം പാകം ചെയ്യണം. 60 വയസ്സായ അവരെ, പാടത്തെ പണിയും അസഹനീയമായ ചൂടും വല്ലാതെ തളർത്തുന്നു. പിന്നെയും പണികൾ ബാക്കിയാണ്. രാത്രിക്കുള്ള ഭക്ഷണം തയ്യാറാക്കൽ, പാത്രം കഴുകൾ, പിറ്റേന്നത്തേക്കുള്ള വിറക് കൊണ്ടുവരൽ എന്നിങ്ങനെ. “എപ്പോഴും എന്തെങ്കിലും ജോലി ചെയ്യാനുണ്ടാവും,” ക്ഷീണസ്വരത്തിൽ അവർ പറയുന്നു.

ആവശ്യത്തിനുള്ള ഉറക്കവും കിട്ടാതെയാവുമ്പോൾ കുടുംബാംഗങ്ങളുമായി വഴക്കിടുന്നതിലേക്ക് എത്തും. പിന്നെ അതിൽ പശ്ചാത്തപിക്കും. “ഞാൻ വല്ലാതെ മാറി എന്നാണ് അവർ കരുതുന്നത്. പണ്ടൊക്കെ, ദിവസം മുഴുവൻ അദ്ധ്വാനിച്ചാലും, എനിക്ക് ചിരിക്കാൻ കഴിയുമായിരുന്നു,” അവർ കൂട്ടിച്ചേർത്തു. പാടത്ത് പണിയെടുക്കുമ്പോൾ പാട്ടു പാടിയിരുന്ന ആ പഴയ കാലങ്ങൾ അവർ ഓർത്തെടുക്കുന്നു. താൻ വല്ലാതെ മാറിയെന്ന് അവർക്ക് മനസ്സിലാവുന്നുണ്ട്.

”എനിക്ക് എപ്പോഴും ദേഷ്യമാണെന്നാണ് ആളുകൾ കരുതുന്നത്. എന്നാൽ, ശാന്തമായിരിക്കാനുള്ള ശക്തി എനിക്കില്ല എന്നതാണ് സത്യം.”

ചില ദിവസങ്ങളിൽ, തനിക്ക് “തല വിങ്ങുന്ന”തായും, “കണ്ണുകൾ ചുവക്കുന്ന”തായും, “ശാന്തമായി ചിന്തിക്കാൻ കഴിയാതാവുന്ന’തായും തോന്നുന്നുവെന്ന് അവർ പറയുന്നു. വിശ്രമമില്ലായ്മയും ആശങ്കയും ജീവിതത്തിലേക്ക് കടന്നുകൂടിയിരിക്കുന്നു.

ജാനാബായി ഒറ്റയ്ക്കല്ല. വർദ്ധിക്കുന്ന ചൂടും, ഉഷ്ണമുള്ള രാത്രികളും, ഉഷ്ണതരംഗങ്ങളും മൂലം പലർക്കും ഉറങ്ങാൻ പറ്റുന്നില്ല. 2025-ലെ ഒരു പ്രബന്ധത്തിൽ, കാലാവസ്ഥാ വ്യതിയാനം ഉറക്കത്തെ ബാധിക്കുന്നതിനെക്കുറിച്ച് സൂചിപ്പിക്കുന്നുണ്ട്. “....കാലാവസ്ഥ ചൂടാവുന്നത് ഉറക്കത്തെ അസ്വസ്ഥമാക്കുകയും അതിനെ ബാധിക്കുകയും ചെയ്യുന്നു, പ്രത്യേകിച്ചും പ്രായമായ സ്ത്രീകളിൽ..”

“മുറിയിലെ താപനില അധികമാവുമ്പോൾ, ശരീരത്തിൻ്റെ ആഭ്യന്തര ചൂട് നിയന്ത്രണ സംവിധാനത്തിന് ശരീരത്തിൻ്റെ താപനിലയെ താഴ്ത്താനും, ശാന്തമായി ഉറങ്ങാനുമുള്ള കഴിവ് നഷ്ടപ്പെടുന്നു” എന്ന് സൈക്കിയാട്രിസ്റ്റായ ഡോ. ഉവൈസ് എൻ.എ. പറയുന്നു. എന്നാൽ ഇന്ത്യയിൽ, 25 ഡിഗ്രി സെൽഷസിന് മുകളിലുള്ള ചൂടനുഭവപ്പെടുന്ന 80 ഉഷ്ണരാത്രികൾ ആളുകൾ അഭിമുഖീകരിക്കുന്നുണ്ടെന്ന് ക്ലൈമറ്റ് സെൻട്രലിനെ 2024-ലെ ഈ പഠനം പറയുന്നു.

അത് വളരെ കൂടുതൽതന്നെയാണ്. ദിവസം മുഴുവൻ വെളിയിൽ ജോലി ചെയ്യുന്നവർക്കാകട്ടെ, ഒരു രക്ഷയുമില്ല.

ഉറങ്ങാൻ തയ്യാറാവുമ്പോഴും, അഗാധമായ ഉറക്കത്തിൻ്റെ ഘട്ടത്തിലേക്ക് പോവുമ്പോഴും ശരീരത്തിൻ്റെ താപനില കുറയാൻ ജൈവപരമായി പരുവപ്പെട്ടതാണ് നമ്മുടെ ശരീരഘടന എന്ന്, കേരളത്തിലെ കോഴിക്കോട്ടെ ഇൻ്റർനാഷണൽ ഹോസ്പിറ്റൽ ആൻഡ് റിസർച്ച് സെൻ്ററിൽ ഐ.ക്യു.ആർ.എ.എ. കൺസൾട്ടൻ്റായ ഉവൈസ് കൂട്ടിച്ചേർക്കുന്നു. “ഈ സംഘർഷം ഇടയ്ക്കിടയ്ക്ക് ഉണരാനും, ആവശ്യത്തിനുള്ള വിശ്രമത്തിൻ്റെ അഭാവത്തിനും, തിരിഞ്ഞും മറിഞ്ഞുമുള്ള അസ്വസ്ഥതകൾക്കും കാരണമാവുന്നു.” താഴ്ന്ന വരുമാനമുള്ള രാജ്യങ്ങളിലെ വ്യക്തികളിലും, പ്രായമായവരിലും സ്ത്രീകളിലും, ചൂട് കൂടിയ പ്രദേശങ്ങളിൽ താമസിക്കുന്നവരിലും ഇത് പ്രത്യക്ഷമാണെന്നും അദ്ദേഹം പറയുന്നു.

ജനാബിയുടെ ഗ്രാമത്തിലെ വീട്ടിൽ സീലിംഗ് ഫാൻ വലിയ പ്രയോജനമൊന്നുമില്ല. ഇരുമുറി വീട്ടിൽ ഉറങ്ങാൻ തത്രപ്പെടുന്ന നാലാളുകളുടെ മുകളിൽ ചുടുകാറ്റ് വീശുകമാത്രമാണ് അത് ചെയ്യുന്നത്.

സഹിക്കാൻ വയ്യാതാവുമ്പോൾ “ഞാൻ പുകയില ചവയ്ക്കും. അപ്പോൾ കുറച്ച് ആശ്വാസം കിട്ടും. കുറച്ചുനേരം ഉറങ്ങാനും സാധിക്കും,” അവർ പാരിയോട് പറഞ്ഞു. പുകയില ശീലമായെന്നും അവർ കൂട്ടിച്ചേർത്തു. കാലക്രമത്തിൽ നിക്കോട്ടിൻ ഉറക്കത്തെ ഇല്ലാതാക്കുകയാണ് ചെയ്യുന്നത് എന്നതിനാൽ, ഇപ്പോൾ കിട്ടുന്ന ആശ്വാസം താത്കാലികം മാത്രമാണ്.

ഉറക്കത്തിന് പുകയിലയെ ആശ്രയിക്കുന്ന ജനബായിയുടെ ശീലം വ്യാപിച്ചുകൊണ്ടിരിക്കുന്ന മറ്റൊരു വലിയ ശീലത്തിൻ്റെ പ്രതിഫലനമാണ്. മിക്ക സമുദായങ്ങളിലുള്ളവരും മദ്യം തുടങ്ങിയ ലഹരികളെ ആശ്രയിക്കുകയാണ്, നല്ല ഉറക്കം കിട്ടാൻ. എന്നാൽ ഇത്, കാലക്രമത്തിൽ ഉറക്കം മുറിയുന്നതിനും, കൂർക്കം വലിക്കും ശ്വാസതടസ്സത്തിനും കാരണമാകും.

തളർച്ചയും ഉറക്കമില്ലായ്മയും ഒടുവിൽ ശരീരത്തിനെ ബാധിക്കാൻ തുടങ്ങും. വേനൽക്കാലത്ത്, രക്താതിസമ്മർദ്ദവും ഹൃദയമിടിപ്പും കൂടി അസ്വസ്ഥത തോന്നാറുണ്ടെന്ന് അവർ പറയുന്നു. “രാവിലെയാവുമ്പോഴേക്കും തലവേദന രൂക്ഷമാവും. ഉറങ്ങാത്തതിനാൽ.” എല്ലാ വേനൽക്കാലത്തും അവർ സ്വകാര്യ ക്ലിനിക്കിൽ പോയി, ഡോക്ടറെ കണ്ട്, ഉറക്കഗുളിക വാങ്ങാറുണ്ട്. അത് അല്പം ആശ്വാസം നൽകുന്നു.

ഭദോലെ ഒരു ശാന്തമായ ഗ്രാമമാണ്. ഇടുങ്ങിയ മൺപാതകളും ഈന്തപ്പനകളും മാവുകളും, വേപ്പുമരങ്ങളും പീപ്പൽ മരങ്ങളുമുള്ള ഗ്രാമം. ഗ്രാമക്കാർ മിക്കവരും ദൂരെയുള്ള കരിമ്പുപാടങ്ങളിൽ കൃഷിക്കാരാണ്. വൈകീട്ട്, അയൽക്കാരുമായി വീട്ടുമുറ്റങ്ങളിലിരുന്നുള്ള കുശലം പറച്ചിലും ഒത്തുകൂടലുമൊക്കെ, താപനില കൂടിയതോടെ ഇല്ലാതായി.

വേനൽക്കാലത്ത് കോൽഹാപുരിലെ പകൽ താപനില 38 ഡിഗ്രി സെൽഷ്യസ് കടക്കാറുണ്ട്. ഈ വർഷവും വ്യത്യസ്തമല്ല. “ഓരോ വേനലും മുമ്പത്തെ വേനലിനേക്കാൾ ചൂട് കൂടുതലായി തോന്നുന്നു,” അവരുടെ കൂട്ടുകാരി സൂചിപ്പിച്ചു.

ജനബായിയും അയൽക്കാരും ജോലി കഴിഞ്ഞ് തിരികെ വരുമ്പോൾ, അവരുടെ സംഭാഷണം മിക്കവാറും രാത്രിയിലെ ഉറക്കമില്ലായ്മയെക്കുറിച്ചു, ചുടുകാറ്റിനെക്കുറിച്ചുമൊക്കെയായിരിക്കും. “അല്ലെങ്കിലേ ചൂട് കൂടുതലാണ്. ഉറക്കമില്ലാതാവുമ്പോൾ സ്ഥിതി കൂടുതൽ മോശമാകും,” ആശങ്കയും മാനസികസമ്മർദ്ദവും അവരുടെ ശബ്ദത്തിൽ കേൾക്കാം.

ഉറക്കമില്ലായ്മ തൻ്റെ ജോലിയെപ്പോലും ബാധിക്കുന്നുൻടെന്ന് ജനബായി പറയുന്നു. “ജോലിക്കിടയിൽ വീഴുമെന്നുപോലും തോന്നാറുണ്ട്. അതില്ലാതിരിക്കാൻ, കൈയ്യിൽ എപ്പോഴും പഞ്ചസാര കരുതും,” അവർ പറയുന്നു. ക്ഷീണിക്കുമ്പോൾ പഞ്ചസാര കഴിക്കുകയും നാരങ്ങവെള്ളം കുടിച്ചാൽ ആശ്വാസം തോന്നാറുണ്ട് അവർക്ക്.

കൂട്ടുകാരുമായുള്ള വർത്തമാനങ്ങളും കളിചിരികളും,കഥകൾ പരസ്പരം പങ്കിടലും ഒന്നും ഇപ്പോൾ ഇല്ല. മാസങ്ങളായുള്ള ഉറക്കമില്ലായ്മയും, അസ്വസ്ഥതയും, ക്ഷീണവുമെല്ലാം സാമൂഹിക സമ്പർക്കങ്ങളെപ്പോലും ഇല്ലാതാക്കി. സുഹൃദ്ബന്ധങ്ങളെ സ്നേഹിച്ചിരുന്ന അവർ ഇപ്പോൾ അതെല്ലാം ഒഴിവാക്കി മിക്കപ്പോഴും ഒറ്റയ്ക്കിരിക്കുകയാണ് പതിവ്.

ഗ്രാമത്തിൽ ഒരു പറച്ചിലുണ്ട്. “ഉറക്കമില്ലെങ്കിൽ ശരീരത്തിന് വിശ്രമം കിട്ടില്ല. മനസ്സ് ശാന്തമാവില്ല.”

ജനബായിയുടെ മനസ്സിൽ ഇത് മുഴങ്ങുന്നുണ്ട്. അവർക്ക് ക്ഷീണം തോന്നാറുണ്ട്. പക്ഷേ ഉറക്കം വരാറില്ല എന്നുമാത്രം.

ജനബായിയുടെ വീട്ടിൽനിന്ന് 30 കിലോമീറ്റർ അകലെയുള്ള ജാംഭലി ഗ്രാമത്തിൽ ലാലുബായി കാംബ്ലെക്കും ചൂടെടുക്കുകയാണ്.

“കഠിനമായ ചൂടാണ് ഈ വർഷം. മൂന്ന് മാസത്തോളം, ദിവസത്തിൽ ഒരു മണിക്കൂർപോലും എനിക്ക് ഉറങ്ങാൻ പറ്റിയിട്ടില്ല,” മുതിർന്ന ഒമ്പതുപേർ താമസിക്കുന്ന ആ വീട്ടിലെ ഒരേയൊരു ടേബിൾ ഫാൻ ഉപയോഗിക്കുന്നത് മകനാണ്. “ഉറക്കമില്ലാത്തതിനാൽ അടുത്ത ദിവസം ക്ഷീണവും ബലക്കുറവും തോന്നാറുണ്ട്,” കരിമ്പുപാടത്തെ ജോലി അവസാനിപ്പിച്ച 72-കാരിയായ അവർ പറയുന്നു. ഈ ഉറക്കമില്ലായ്മയും ക്ഷീണവുമെല്ലാം മാനസികപ്രശ്നങ്ങൾക്കും വിഷാദരോഗത്തിനും വഴിവെക്കുന്നു.

മുതിർന്നവർക്ക് ദിവസവും ചുരുങ്ങിയത് ഏഴ് മണിക്കൂർ ഉറക്കമെങ്കിലും ലഭിക്കണമെന്നാണ് പഠനങ്ങൾ സൂചിപ്പിക്കുന്നത്. എന്നാൽ ലാലുബായിയെപ്പോലുള്ളവർക്ക് ഇതൊരു വിദൂരസ്വപ്നമാണ്. ചില ദിവസങ്ങളിൽ അവർക്ക് ഉറക്കമേ കിട്ടാറില്ല.

വാർദ്ധക്യവും, കരിമ്പുപാടത്തെ പതിറ്റാണ്ടുകളായുള്ള നടുവൊടിക്കുന്ന പണിയും, അമിതമായ ചൂടുകാരണം ഇപ്പോഴുള്ള ഉറക്കമില്ലായ്മയും എല്ലാം ചേർന്ന് അവരുടെ ആരോഗ്യം മോശമായിരിക്കുന്നു.

“നാലുവർഷം മുമ്പുവരെ, അഞ്ചുമിനിറ്റിനുള്ളിൽ എനിക്ക് ഉറങ്ങാൻ കഴിഞ്ഞിരുന്നു. ഇപ്പോൾ പറ്റുന്നില്ല,” പാരിയോട് പറയുന്നു.

45 വയസ്സുള്ള മകൻ പ്രമോദിന് ഇതാലോചിച്ച് ഭയം തോന്നാറുണ്ട്. “അമ്മ എപ്പോഴും ക്ഷീണിച്ചിരിക്കുന്നു. വെറുതെ ഇരിക്കുമ്പോഴും അവരുടെ മനസ്സ് അസ്വസ്ഥമാകുന്നതായി തോന്നാറുണ്ട്,” അദ്ദേഹം പറയുന്നു.

ആവശ്യത്തിനുള്ള ഉറക്കം കിട്ടാതെ വരുന്നത്, വിഷാദരോഗം, ആശങ്ക, ബൈപോളാർ ഡിസോർഡർ, പോസ്റ്റ് ട്രോമാറ്റിക്ക് സ്ട്രെസ്സ് ഡിസോർഡർ തുടങ്ങിയ മാനസികരോഗങ്ങൾക്ക് കാരണമായേക്കാമെന്ന് ഉവൈസ് പറയുന്നു. തലച്ചോറിനകത്തെ രാസപദാർത്ഥങ്ങളെ തടസ്സപ്പെടുത്തുകയും, അമിതമായ മാനസികസമ്മർദ്ദവും ആശങ്കയും തലച്ചോറിൽ കേന്ദ്രീകരിക്കുകയും, ശരീരത്തെ എപ്പോഴും അത് മുൾമുനയിൽ നിർത്തുകയും ചെയ്യുന്നു. ഉണർവ്വ്-ഉറക്കം തുടങ്ങിയ സ്വാഭാവിക ജൈവപ്രക്രിയകളെ അത് അവതാളത്തിലാക്കുന്നു.

“സീസൺ മാറിയാൽ വേദന കുറയുമെന്ന് ഞാൻ കരുതി. പക്ഷേ ഇല്ല,” ലാലുബായി പറയുന്നു.

കൃഷിപ്പണി എന്നന്നേക്കുമായി ഉപേക്ഷിക്കേണ്ടിവരുമെന്ന് അവർ വിശ്വസിക്കുന്നു. മാനസിക പിരിമുറുക്കം അവരുടെ മുഖത്ത് വ്യക്തമാണെന്നാന് അയൽക്കാർപോലും ഇപ്പോൾ പറയുന്നത്.

ഒടുവിൽ, ഉറക്കമില്ലാത്ത അഞ്ച് മാസങ്ങൾക്കുശേഷം ലാലുബായി ഒരു ഡോക്ടറെ കണ്ടു. അദ്ദേഹം ഉറക്കഗുളിക നിർദ്ദേശിക്കുകയും ചെയ്തു. “അത് ആശ്വാസം തരുമെന്ന് ഞാൻ കരുതി. എന്നാൽ, ദൈനംദിനകൃത്യങ്ങൾപോലും ചെയ്യാൻ പറ്റാതെയായപ്പോൾ എനിക്ക് മനസ്സിലായി ഇത് ഗുരുതരമാണെന്ന്,” അവർ പറയുന്നു.

ഭദോലെ ഗ്രാമത്തിൽ നന്ദ സൊണവനെയ്ക്ക് വേനൽക്കാലത്തെ ഭയമാണ്. വേനൽ തുടങ്ങിയാൽ, അടുത്ത 90 ദിവസം അവർ എണ്ണാൻ തുടങ്ങും. “വേനൽ വേഗം അവസാനിക്കണമെന്ന് ഞാൻ ദിവസവും പ്രാർത്ഥിക്കും,” 50 വയസ്സുള്ള അവർ പറയുന്നു. കാരണം, സീസൺ മാറിയാൽ അവർക്ക് നന്നായി ഉറങ്ങാൻ സാധിക്കാറുണ്ട്.

ഉഷ്ണകാലത്ത് മൂന്ന് മണിക്കൂറിൽ കുറവേ അവർക്ക് ഉറങ്ങാനാവുന്നുള്ളു. “ഒരു രക്ഷയുമില്ലെങ്കിൽ ഞാൻ ടെലിവിഷൻ കണ്ടിരുന്ന് ഉറങ്ങാമെന്ന് കരുതും,” അവർ പറയുന്നു. ഉറക്കമില്ലായ്മ മൂലം പിറ്റേന്ന് അസ്വസ്ഥതകളും തലചുറ്റലും ശരീരവേദനയും എല്ലാം അനുഭവപ്പെടുന്നു. അപ്പോളവർ വേദനസംഹാരികളെന്തെങ്കിലും കഴിക്കും.

മറ്റുള്ളവരെപ്പോലെ, നന്ദയ്ക്കും ഡോക്ടർ ഉറക്കഗുളിക നിർദ്ദേശിച്ചു. സ്ത്രീകളുടെയിടയിൽ ഇത് ശീലമായി എന്ന് അവർ പറയുന്നു. രക്തസമ്മർദ്ദക്കുറവുള്ള അവർക്ക്, ചൂട് കാലാവസ്ഥ കൂടുതൽ ബുദ്ധിമുട്ടുണ്ടാക്കുന്നു. ഉറക്കമില്ലായ്മ അവർക്കുമുണ്ട്. ഉറക്കം മുറിയുമ്പോൾ അവർ പഞ്ചസാരയെടുത്ത് കഴിച്ച് ആശ്വാസം കണ്ടെത്തും.

ജില്ലയിലുടനീളം, ചൂട്, ആളുകളുടെ ഉറക്കത്തെ ഇല്ലാതാക്കുകയാണ്.

“മുമ്പൊന്നും ഉറക്കത്തിന് ഒരു പ്രശ്നവുമുണ്ടായിരുന്നില്ല എനിക്ക്,” ജനബായി പറയുന്നു. മുമ്പ് ഒരു മാനസികസമ്മർദ്ദവുമുണ്ടായിരുന്നില്ല തനിക്ക്, എന്നാലിന്ന്, അതില്ലാത്ത ഒരു ദിവസംപോലുമില്ലെന്ന് അവർ പറയുന്നു.

ദേശീയതലത്തിൽ പാരി നടത്തുന്ന കാലാവസ്ഥാ വ്യതിയാനവും മാനസികാരോഗ്യവും എന്ന ഈ പരമ്പര, മാരിവാല ഹെൽത്ത് ഇനിഷ്യേറ്റീവിൻ്റെ പിന്തുണയോടെയുള്ളതാണ്. ഗ്രാമീണ ഇന്ത്യയിലെയും ഇന്ത്യൻ നഗരങ്ങളിലെയും കുടിയേറ്റക്കാരുടെ ജീവിതത്തിലും ഉപജീവനത്തിലും അവരുടെ ആരോഗ്യത്തിലും മാനസികാരോഗ്യത്തിലും കാലാവസ്ഥാ പ്രതിസന്ധിയുണ്ടാക്കുന്ന പ്രത്യാഘാതങ്ങൾ പഠിക്കുന്ന പരമ്പരയാണ് ഇത്

പരിഭാഷ: രാജീവ് ചേലനാട്ട്