बढ़त गरमी छिनत चैन के नींद

जनाबाई सोनवने अपन सबले करीबी सहेली मन ले कभू बहस धन झगरा करे नइ रहिस.

फेर ये बछर बात अलग होगे हवय. महाराष्ट्र के भादोले गांव मं अपन दू ठन खोली के नानकन घर के बहिर बइठे 62 बछर के सियानिन कहिथे, “मंय छोटे-छोटे बात मं घलो जल्दी बगिया जाथों अऊ अपन सहेली मन ले झगरे लागथों.”

साल 2025 के धूपकल्ला मं राज के कोल्हापुर जिला मं रतिहा मं गरमी भारी बढ़ गे हवय. अऊ जनाबाई ला नींद परे मं दिक्कत होय लगिस. पहिली त वोला लगिस के ओकर समस्या एक-दू दिन मं बने हो जाही. फेर कुछु दिन अइसने घलो रहिस जब मुस्किल ले तीन घंटा नींद परय. दिन हफ्ता बन गे अऊ ओकर बाद महिना मं बदल गे. वो ह सरलग चिड़चिड़ी होवत जावत रहिस अऊ थके जइसने मसूस करत रहय.

जनाबाई भूमिहीन किसान आय अऊ दिन मं आठ घंटा दीगर के खेत मं देहतोड़ मिहनत करथे. निंदई-गुड़ई करथे, चारा बोहथे अऊ फसल लूथे. संझा तक ले वो ह थक जाथे – ओकर खांध मं दरद होय लगथे , दिन भर के बोझा ले ओकर गोड़ सूज जाथे. अइसने दिन गुजरे के बाद, वो ह रतिहा 10 बजे तक ले अपन घर के फेरका तीर सुत जाथे. कुछेक घड़ी मं ओकर नींद पर जाथे.

लेकिन फेर जोर के आराम वाले नींद के रात ह सपना बनगे हवय. हाल के महिना मं ये इलाका मं बढ़त गरमी अऊ सूखा सेती वोला रतिहा भर पछिना आथे. वो ह केरौटी बदलत रहिथे, चैन नइ रहय, अऊ अपन टीना के छानी वाले घर ले निकरेइय्या गरमी ले घेरी बेरी जग जाथे.

एक पईंत जाग जाय के बाद वोला फिर ले सुते मं कम से कम घंटा भर लाग जाथे.

ओकर कहना आय के ये मई (2025) मं बिहनिया 3 बजे तकेच गरमी सहन करे लइक रहिस. वोला पांच बजे जागके घर के काम-बूता करे ला रहिथे, ओकर बाद दिन भर कड़ा मिहनत करे ला परथे.

जनाबाई सुरुज ऊबे के पहिली जागके पानी लाथे, बुहारथे अऊ घर बर रांधेथे. साथ बछर के उमर मं, खेत मं लंबा दिन अऊ भारी गरमी वोला थका देथे. घर के काम अभू घलो बांचे हवय – बरतन मांजे, रतिहा बर रांधे अऊ दूसर दिन बर जलावन लकरी संकेले. वो ह थके आवाज मं कहिथे, “हमेसा कुछु न कुछु बांचे रहि जाथे.”

नींद बढ़िया करके नइ परे, अऊ अक्सर अपन घर के लोगन मन के उपर झल्लाथे, अऊ ओकर बाद पछतावत रहिथे.वो ह आगू बतावत जाथे, “वो मन ला लागथे के मंय बदल गे हवं. पहिली, बूता करत लंबा बखत गुजारे के बाद घलो, मंय खुस रहंव.” अपन बचपना के दिन ला सुरता करत जब वो ह ताकत ले भरे रहिस, खेत मन मं बूता करत गावत रहय, वोला पता हवय के वो ह कतक बदल गे हवय.

वो ह आगू कहिथे, “अब, लोगन मन सोचथें के मंय हरेक बखत बगियाय रहिथों. फेर अब मोर मं ताकत [मेलजोल करे के] बांचे नइ ये.”

वो ह कहिथे, कुछेक रतिहा मं, “डोक दुखत ये [मुस पिराथे]. डोले लाल लाल होताय [ थके सेती आंखी लाल हो जाथे].” अइसने लगथे जइसने, “माझा डोका काम देत नइ [दिमाग काम नइ करय], वो ह बतावत जाथे. बेचैनी अऊ चिंता ओकर जिनगी अऊ बोली मं खुसरगे हवय.

जनाबाई अकेल्ला नो हे. बढ़त गरमी, खास करके तिपत रतिहा अऊ लू बखत, लोगन मन बर सुते मुस्किल होगे हवय. मऊसम मं बदलाव नींद उपर कइसने असर डारत हवय, येकर उपर साल 2025 के एक ठन पेपर मं कहे गे हवय, ““…क्लाइमेट वार्मिंग (मऊसम मं गरमी बढ़े) नींद कम करथे अऊ बढ़िया नींद घलो नइ परय, खास करके डोकरा सियान माइलोगन मन ला...”

साइकेट्रिस्ट डॉ. उवैस एन.ए, बताथें, “जब घर भीतरी के तापमान जियादा होथे, त देह के भीतरी थर्मोरेगुलेशन सिस्टम बर देह के उपर के तापमान ला अतक कम करे मुस्किल हो जाथे के नींद आय सुरु होय अऊ बने रहे.” फेर क्लाइमेट सेंट्रल के साल 2024 के ये अध्ययन मं कहे गे हवय के जम्मो भारत भर मं लोगन मन 80 डिग्री तक के ‘गरम’ रतिहा कस मसूस करथें जिहां तापमान 25 डिग्री सेल्सियस ले जियादा होथे.

बछर भर मं अतक रतिहा गरम होथे त जेन मन दिन मं बहिर मं काम करथें, वो मन ला गरमी ले कोनो निजात नइ मिलय.

केरल के कालीकट मं आई क्यू आरएए इंटरनेशनल हॉस्पिटल अऊ रिसर्च सेंटर मं कंसल्टेंट उवैस कहिथें, “बायोलॉजिकली, हमर देह सुते बर तियार होय बखत अऊ गाढ़ा नींद मं रहे ले घलो ठंडा होय बर बने हवय. येकर दिक्कत ले करवट बदले, घेरी-बेरी जगे अऊ बेचैनी मसूस होय जइसने दिक्कत मं घलो हो सकथें.” वो ह आगू कहिथे के ये कम आमदनी वाले देस के लोगन मन, डोकरा-सियान, माइलोगन अऊ गरम इलाका मं रहेइय्या लोगन मन मं साफ नजर आथे.

जनाबाई के गांव के घर मं, सीलिंग पंखा ले जियादा राहत नइ मिलय – ये ह बस दू खोली वाले घर मं सुतत चार लोगन मन के उपर गरम हवा फेंकथे.

जब जनाबाई ला लागथे के येकर ले निजात नइ मिले सकय, “ मंय माखुर खाथों काबर के येकर ले मोला कुछु बखत बर नींद आ जाथे,” वो ह पारी ला बताथे. वो ह बतावत जाथे के वोला येकर आदत होवत जात हवय. वइसे, राहत सिरिफ कुछु बखत के होथे, काबर के निकोटीन (माखुर) बखत के संग संग नींद मं खलल डारथे.

जनाबाई के सुते बर माखुर के भरोसे रहे एक ठन बड़े तरीका ला बताथे. अलग-अलग समाज मं, कतको लोगन मन नींद बर दारू धन दीगरजिनिस के सहारा लेथें. फेर येला घेरी-बेरी खाय पीये ले नींद उचट जाथे, खर्राटा आथे अऊ स्लीप एपनिया (नींद मं साँस रुके के समस्या) घलो हो जाथे.

थकान अऊ नींद के कमी के असर ओकर देह मं घलो परथे. वो ह कहिथे के घाम के महिना मं ओकर ब्लड प्रेशर अक्सर बढ़ जाथे अऊ धुकधुकी बाढ़ जाथे, जेकर ले वो ह बेचैन अऊ चिंता (तनाव) मं रहिथे. “बिहनिया तक मुड़ पीरा भारी बढ़ जाथे काबर के मंय बने करके सुते नइ रहंव.” घाम के सीजन मं हर हफ्ता वो ह एक ठन निजी दवाखाना मं जाथे जिहां डाक्टर ह नींद के दवई लिखथे जेकर ले वोला कुछु आराम मिलथे.

भड़ोले गाँव शांत जगा आय, जिहां धरसा अऊ नरियर के ऊँच रुख, आमा, पीपल अऊ लीम के रुख हवंय. अधिकतर लोगन मन दूरिहा कुसियार के खेत मं बूता करत अपन दिन गुजार देथें. सुग्घर संझा, जेन ह कभू परोसी मन के घर के बहिर एक-दूसर ले गोठ-बात करत बीतत रहिस, अब कम होगे हवय काबर के तापमान सरलग बढ़त हवय.

कोल्हापुर मं घाम के बखत मं दिन के तापमान सरलग 38 डिग्री सेल्सियस ले जियादा हो जाथे, अऊ ये बछर घलो कुछु अलग नइ रहिस. ओकर एक झिन सहेली ह स्कूल के जुन्ना किताब ले पंखा झलत कहिथे, हरेक घाम बीते घाम ले जियादा तीपत लागथे.

जब जनाबाई अऊ ओकर परोसी मन बुत्ता करके घर लहुटथें, त वो मन के गोठ-बात अक्सर ये रहिथे के रतिहा कतक मुस्किल के होगे हवय, हवा कतक तिपथे, अऊ तुरते नींद नइ परे. वो ह अपन रोज के चिंता अऊ बैचेनी ला बतावत कहिथे, “पहिलीच ले भारी गरमी हवय, अऊ बढ़िया नींद नइ परे सेती ये ह अऊ घलो बढ़ जाथे.”

जनाबाई कहिथे के बढ़िया नींद नइ परे सेती वो ह बूता करत दुब्बर मसूस करथे. वो ह कहिथे के वोला अक्सर अइसने लगथे के बूता करे बखत चक्कर खाके गिर जाही. येकर ले बांचे बर, “मंय हमेसा अपन तीर शक्कर राखे रहिथों.” जब घलो वोला सुस्ती लागथे, जनाबाई येला खाथे अऊ नीबू पानी पीथे, जेकर ले वोया तुरते आराम मिल जाथे.

अपन संगी सहेली संग बखत गुजारे, हंसे-बतियाय, एक दूसर के गोठ-बात सुने अऊ मदद करे, अपन कहिनी बताय, अब जुन्ना बात होगे हवय. महीना महीना कम नींद, चिड़चिड़ापन अऊ थकान सेती कतको दिन तक ले मेल-मिलाप ले दूरिहा रहिथे; वो ला अपन आप मं मगन रहे ला भाथे, वो ह सहेली मन ला छोड़ दे हवय जेन मन ले कभू दू घड़ी हंस-बोल लेवत रहिस.

गांव मं अक्सर एक ठन हाना सुने मं आथे, “जोपनही तर शरीर दम देवत नइ, अनि मन शांत होत नई [बगेर सुते देह ला आराम नइ मिलय, अऊ मन शांत नइ होवय].”

ये हाना जनाबाई के दिमाग मं किंजरत रहिथे ; वो ह थके कस मसूस करथे, फेर नींद नइ परय.

जनाबाई के घर ले करीबन 10 कोस दूरिहा जांभली गाँव मं लालूबाई कांबले ला घलो गरमी लागत हवय.

वो ह कहिस, “ ये बछर बनेच जियादा गरमी रहिस, अऊ मंय तीन महीना मं हरेक दिन मुस्किल ले घंटा भर सुते सकेंय.” नौ परानी के ओकर घर मं सिरिफ एक ठन टेबिल पंखा हवय, जेन ला ओकर बेटा चलाथे. कुसियार के खेत मं बूता करे के ला छोड़ छोड़ चुके 72 बछर के ये सियानिन कहिथे, “ बने करके नींद नइ परे सेती, मंय दूसर दिन थके अऊ दुब्बर मसूस करथों.” तिपत रतिहा मं बनेच बखत बाद नींद परे ले देह मं थकान आ जाथे अऊ तनाव चिंता अऊ दीगर दिमागी तकलीफ के खतरा बढ़ जाथे.

सियान मन ला रोज के कम से कम सात घंटा सुते के सलाह देय जाथे. फेर, लालूबाई बर ये ह दूरिहा के सपना आय, जउन ला कुछु दिन ले सोया मं घलो दिक्कत होवत हे. ये ओकर देह अऊ बढ़त उमर के असर आय – कुसियार के खेत मं बछरों बछर तक ले कड़ा मिहनत करे ले देह मं पड़े बोझा, अऊ अब भारी गरमी सेती रतिहा मं बने नींद नइ परे ये ह अऊ घलो बढ़गे हवय.

लालूबाई ह पारी ला बताइस, “चार बछर पहिली तक, मंय पांच मिनट मं सुत जावत रहेंय. फेर अब अइसने नइ ये.”

उनके ओकर 45 बछर के बेटा प्रमोद ला चिंता हवय के वो ह मुस्किल ले सुतथे. वो ह कहिथे, “हर घड़ी वो ह थके जइसने दिखथे. जब वो ह कलेचुप बइठे घलो रहिथे, त अइसने लागथे के ओकर मन मं चैन नइ ये.”

यूवैस के कहना आय के बढ़िया नींद नइ परे ले डिप्रेशन, एंग्जायटी (चिंता), बाइपोलर डिसऑर्डर (मन के उतार-चढ़ाव) अऊ पोस्ट-ट्रॉमेटिक स्ट्रेस डिसऑर्डर ( कोनो खराब घटना के सुरता धन सोच बिचार करे) जइसने दिमागी बीमारी के दिक्कत ला अऊ बिगाड़ सकथे. बने नींद नइ परे ले ब्रेन केमिकल्स ला गड़बड़ कर सकथे, दिमाग मं तनाव अऊ इमोशन सेंटर्स ला ओवर-एक्टिवेट कर सकथे, देह ला “स्ट्रेस मोड” मं उलझाय सकथे, सरलग हल्का फुल्का सूजन लाय सकथे, अऊ देह के सुते के सुभाविक चक्र मं बाधा डार सकथे.

चिंता मं परे लालूबाई कहिथे, “ मोला लगे रहिस के मऊसम के संग दरद कम हो जाही, फेर नइ होइस.”

अब, वोला लागथे के बनिहारी करे छोड़े ला परही. वो ह हर घड़ी तनाव मं रहिथे : ओकर परोसी मन के मुताबिक, ये ओकर चेहरा मं साफ झलकथे.

आखिर मं, पांच महीना तक ले बिन सुते रहे के बाद, लालूबाई डाक्टर करा गीस जउन ह वोला नींद के दवई दीस.वो ह कहिथे, मोला लगिस के ये बने हो जाही... जब मोला जरूरी काम करे मं घलो दिक्कत होय लगिस, त मोला गम होईस के कुछ बात हवय जेन ह बढ़गे हवय.”

भदोले गाँव के नंदा सोनावने धूपकल्ला ले भारी डेर्राथे. जब घलो घाम के महीना सुरु होय लागथे त वो ह 90 दिन (तीन महीना) के उल्टी गिनती सुरु कर देथे. 50 बछर के सियानिन कहिथे, “मंय हरेक दिन भगवान ले बिनती करत रहिथों के घाम के महीना खतम हो जाय.” येकर सेती के काबर के मऊसम बदलतेच ओकर नींद बढ़िया परे लगथे.

तीपत रतिहा मं वो ला तीन घंटा ले घलो कम नींद परथे. वो ह कहिथे, “गर कुछु घलो काम नइ आवत, त मंय टीवी देखे सुरु कर देथों, ये आस मं के मोला नीं आ जाही.” कम नींद के नतीजा भारी खराब होथे. दूसर दिन वोला चिड़चिड़ापन लागथे अऊ चक्कर आथे अऊ देह ह भारी पिराथे जेन ह दरद के दवई नइ खावत तक ले बने नइ होवय.

जनाबाई अऊ लालूबाई जइसने, नंदा ला घलो नींद के दवई देय गे रहिस, जेन ला लेके वो ह कहिथे के ये ह कतको माइलोगन मन के आदत बनगे हवय. वोला हाइपोटेंशन के दिक्कत हवय, अऊ भारी गरमी येला अऊ बढ़ा देथे, जेकर ले वोला सुते मं दिक्कत होथे. जब घलो ओकर नींद उचट जाथे, त वो ह अपन आप ला थिर राखे बर थोकन शक्कर खा लेथे.

जिला भर मं बढ़त गरमी लोगन मन के नींद छीन लेवत हवय.

जनाबाई कहिथे, “पहिली मोला नींद ले जुड़े कोनो दिक्कत नइ रहिस.” वो ह कहिथे के पहिली वोला तनाव नइ होवत रहिस, फेर अब ओकर कोनो दिन घलो बगेर तनाव के नइ गुजरे

पारी के क्लाइमेट चेंज अऊ मेंटल हेल्थ ऊपर देस भर मं चलेइय्या सीरिज ला मारिवाला हेल्थ इनिशिएटिव के मदद मिले हवय. ये सीरिज भारत के गांव अऊ शहर मं रहेइय्या गाँव के लोगन मन के देह अऊ दिमागी सेहत, अऊ रोजी-रोटी उपर जलवायु संकट के असर के जाँच-पड़ताल करथे.

अनुवाद: निर्मल कुमार साहू