اروناچل کی سرزمین سے مونیئول گیت

…مونیئول چولے گیال لو
مونیئول چولے گیال لو

[مونیئول زندہ باد
زندہ باد مونپا سرزمین]

اسکول کی دعائیہ مجلس کا یہ آخری گیت ہے، جو میرے ذہن میں سوال چھوڑ جاتا ہے۔ صرف اس لیے نہیں کہ میں نے یہ گیت کبھی سنا نہیں ہے یا پھر یہ زبان مجھے نہیں آتی۔ سوال اس لیے بھی پیدا ہوئے کہ ہمالیہ کی اس وادی میں مقامی لوگوں کے ذریعہ بولی جانے والی زبان سے اس کی زبان کافی الگ سنائی دیتی ہے۔ ویسٹ کمینگ ضلع کے چُگ گاؤں میں مونپا خاندانوں کی زندگی کو دستاویزی شکل دیتے ہوئے مجھے کچھ عرصہ ہو چلا ہے۔

جولائی کا مہینہ ختم ہونے کو ہے، اور جمعرات کی صبح کا وقت ہے۔ میں اُس گاؤں میں ہوں، جسے تمام لوگ اروناچل پردیش کا سب سے خوبصورت گاؤں کہتے ہیں۔ سرکاری اسکول کے ٹیچر نوانگ سیرنگ کی بائک پر پیچھے بیٹھ کر میں چُگ سے تقریباً ۶ کلومیٹر دور واقع راما کیمپ کے پی ایم شری سرکاری سیکنڈری اسکول پہنچی ہوں۔ آس پاس کے گاؤوں کے تمام بچے ہر صبح پیدل اسکول آتے ہیں۔

صبح کے ۹ بجے ہیں اور دعائیہ مجلس کا وقت ہو رہا ہے۔ میں دیوار کے جتنے قریب ہو سکتی ہوں اتنا قریب رہنے کی کوشش کر رہی ہوں، اور ان طلباء کے پیچھے کھڑی ہوں جو اسٹیج سے پروگرام پیش کر رہے ہیں۔ میرے سامنے سرسبز پہاڑیاں ہیں، بے داغ سفید بادلوں سے سجا نیلا آسمان ہے، جو طلباء کی ڈریس سے میل کھاتا ہے۔ سیدھی قطاروں میں ۲۶۰ بچے کھڑے ہیں۔

وہ منجو شری (یا بودھی ستوا، عظیم ترین علم اور خوشحالی کی علامت) کا نام لے کر مجلس کا آغاز کرتے ہیں، پھر سنسکرت میں ایک شلوک پڑھتے ہیں، قومی ترانہ گاتے ہیں، اور آخر میں مونپا (ان کی آبائی زبان میں مونیئول) گیت کی آواز وادی میں گونجتی ہوئی محسوس ہوتی ہے۔ اس پیشکش نے میرے تجسس میں اضافہ کر دیا ہے۔ خاص کر، آخری گیت نے میری توجہ اپنی جانب مبذول کی ہے۔

بعد میں، ایک ہی نام والی دو دوست، تینزن ڈریما، جن میں سے ایک تیسری جماعت میں ہے اور دوسری چوتھی جماعت میں، مجھے وہی گیت سناتی ہیں۔ گاؤں کی ملی آما بستی کے سبھی مونپا بچے اس گیت سے واقف ہیں، خواہ وہ وادی کے تینوں اسکولوں میں سے کسی میں بھی پڑھنے جاتے ہوں۔ دیرانگ مونپا زبان کا یہ گیت بھوٹی رسم الخط میں لکھا گیا ہے، اور ان کی ثقافتی وراثت سے وابستگی کا ایک اہم ذریعہ مانا جاتا ہے۔

تبتی ادب میں مون کا مطلب ہوتا ہے – تبتی سطح مرتفع کے مقابلے چھوٹی اونچائی والی زمین؛ اور پا کا مطلب ہے لوگ۔ اس لیے مونپا کا لفظی معنی ہے، تبت کی جنوبی سمت میں ہمالیہ کے نیچے رہنے والے لوگ۔ انہیں اکثر ان کے جغرافیائی مقام، معاش سے جڑی روایتوں اور زبان کی بنیاد پر ذیلی برادریوں میں تقسیم کیا جاتا ہے۔ حالانکہ، سبھی مونپا مہایان بودھ مذہب کے پیروکار ہیں۔ اس مذہب کی تاریخ ۸ویں صدی تک جاتی ہے، جب یہ تبت کے ذریعہ آیا تھا۔ یہاں مونپا ہونے کو اکثر بودھ پہچان کے ساتھ جوڑا جاتا ہے۔

سال ۲۰۱۱ میں، اروناچل پردیش کی حکومت نے ویسٹ کمینگ سمیت چار بودھ آبادی والے ضلعوں کے تمام اسکولوں میں بھوٹی رسم الخط پڑھانا لازمی کر دیا تھا۔ ’’ایسے دور میں، جب تمام نوجوان اعلیٰ تعلیم اور نوکریوں کے لیے شہروں کا رخ کر رہے ہیں، ہم چاہتے ہیں کہ وہ ہماری زبان اور ثقافت کی اہمیت کو سمجھیں،‘‘ نوانگ کہتے ہیں۔

مردم شماری (۲۰۱۱) کے مطابق، تقریباً ۱۳۷۰۳ لوگ مونپا لسانی خاندان کی کوئی نہ کوئی بولی بولتے ہیں۔ ان میں سے ۱۲۳۹۸ اکیلے اروناچل میں رہتے ہیں۔ دیرانگ مونپا لسانی ذیلی گروپ کو ریاستی حکومت کے ذریعہ معدومیت کی شکار زبانوں کے تحفظ و بقا کی اسکیم میں شامل کیا گیا ہے، جسے ویسٹ کمینگ کے دیرانگ بلاک میں صرف ۸۹۶ لوگ بول سکتے ہیں۔

اسکول کے ہندی ٹیچر تاشی سیرنگ کہتے ہیں، ’’مونپا زبان تبتی برمی خاندان سے تعلق رکھتی ہے، اور اس میں بھوٹی رسم الخط کا استعمال ہوتا ہے۔ اس کی کئی بولیاں ہیں۔ اب آٹھویں جماعت تک اس رسم الخط کو پڑھانا لازمی ہو گیا ہے۔‘‘

اسکول میں روزانہ دعائیہ مجلس ہوتی ہے، اور روزانہ بچے اسی ترتیب میں وہ چار گیت گاتے ہیں۔ اس بہانے دونوں تینزن ڈریماؤں نے اسے یاد کر لیا ہے۔ ’’اس گیت کو ہم نے اسکول میں سیکھا۔ یہ مونپا گیت ہے۔ روایتی گیت۔ مجھے بس اتنا ہی معلوم ہے۔ گیت کا مطلب ہمیں نہیں معلوم،‘‘ تینزن قہقہہ لگاتی ہے۔

اس مونپا (جنہیں مونیئول بھی کہا جاتا ہے) گیتوں کو اروناچل پردیش کے ویسٹ کمینگ میں واقع چُگ گاؤں میں بولی جانے والی زبان کے گیتوں کے طور پر درج کیا گیا ہے۔ گیتوں کو سمجھنے میں مدد کے لیے صحافی نوانگ سیرنگ (دیرانگ) اور گیندیں سانگے (توانگ) کا شکریہ۔

عظیم پریم جی یونیورسٹی کی مدد سے پاری نے ’معدومیت کی شکار زبانوں کا پروجیکٹ‘ شروع کیا ہے۔ پروجیکٹ کا مقصد ہندوستان کی معدومیت کی شکار زبانوں کی، انہیں بولنے والے عام عوام اور ان کی زندگی کے تجربات کے ذریعہ دستاویز سازی کرنا ہے۔

ترجمہ نگار: قمر صدیقی