تاریخ کے صفحات پر درج ’سیا قلم‘ نقاشی

گلاب کی پنکھڑیوں اور پتوں کی لکیروں کے علاوہ بھی ارشاد حسین دھات پر بہت سارے نقش ابھار سکتے ہیں۔ وہ ایک فنکار ہیں، اور ان کے فن کو ’سیا قلم‘ کہا جاتا ہے، جو اتر پردیش میں ’پیتل نگری‘ کے نام سے مشہور مرادآباد میں رائج ہے۔

سارا دن جن مصنوعات پر انہوں نے کندہ کاری کی ہے وہ پیر زادہ میں واقع ان کی ورکشاپ میں ان کے ارد گرد بکھری پڑی ہیں۔ ان مصنوعات میں مور، چراغ، سواستک سے مزین پیالے، پوجا کی گھنٹیاں، اور شیر کے سر والے تلوار کے دستے شامل ہیں۔

ارشاد کا تعلق سیا قلم کاریگروں کے ایک طویل سلسلہ سے ہے۔ انہوں نے یہ کام ۱۰ سال کی عمر سے کرنا شروع کیا تھا۔ جس دیا (چراغ) پر وہ کام کر رہے ہیں اسے ایک تپائی، یعنی لکڑی کی ایک چھوٹی سی میز پر رکھ کر دو پتھروں کے درمیان بٹھایا گیا ہے۔ دیا سے بندھے دھاگے کا ایک سرا میز کے نیچے تک جاتا ہے اور ان کے دائیں پاؤں سے بندھا ہوا ہے۔ جیسے ہی ارشاد قلم کی شکل والی چھینی پر لکڑی کی تھاپی سے ضرب لگاتے ہیں، دھات پر ایک عمدہ نمونہ ابھر جاتا ہے۔

’’گاہک اکثر ذاتی تحائف کے لیے منفرد ڈیزائنوں کی فرمائشیں کرتے ہیں، جن میں ہندی، اردو یا انگریزی میں جوڑوں کے نام، قرآنی سورتیں، یا دیوار پر آویزاں کرنے کے لیے بیل بوٹے شامل ہوتے ہیں۔ میں انہیں پھولوں سے مزین کرتا ہوں کیونکہ لوگوں کو یہ پسند آتا ہے،‘‘ وہ پاری کو بتاتے ہیں۔ ’’مجھے گلاب کے پھولوں سے مزین تحفے سب سے زیادہ پسند ہیں۔‘‘

یہ استاد نقاش ایک دس مربع فٹ کے کمرے کے دروازے پر بیٹھے ہیں۔ یہاں وہ دوسرے کاریگروں کے ساتھ کام کرتے ہیں۔ ’’سیکھتے وقت یہ کلاکاری (فن) لگتا تھا،‘‘ وہ اپنے ابتدائی دنوں کو یاد کرتے ہوئے کہتے ہیں۔ ’’اور اب بس یہ ایک کام ہے۔‘‘

ارشاد (۴۷ سالہ) اپنے پاس رکھے پیکٹ سے بیڑی نکال کر سلگاتے ہوئے ہمیں چائے پیش کرتے ہیں۔ ’’کاریگر چائے پسند کرتے ہیں، کیونکہ اس سے ہمیں توانائی ملتی ہے۔ میں تناؤ دور کرنے کے لیے بیڑی پیتا ہوں،‘‘ وہ ہنستے ہوئے کہتے ہیں۔

ارشاد شہر کے پرانے حصہ میں کام کرتے ہیں۔ یہاں چھوٹی چھوٹی سوراخ نما بھٹیاں اور بہت سارے کارخانے موجود ہیں۔ عموماً مسلم برادری سے تعلق رکھنے والے کاریگروں کے ذریعہ چلائی جانے والی عارضی دکانوں کی دیواروں پر پیتل کی مصنوعات آویزاں ہیں۔ حسین کہتے ہیں، ’’یہ ہمارے آباء و اجداد کا کام ہے۔ یہاں تقریباً۸۰ فیصد لوگ پیتل کے کام سے وابستہ ہیں۔‘‘

وہ گلی جہاں ارشاد کام کرتے ہیں وہاں ’نمونہ کار‘ بھی رہتے ہیں، جو پیتل کی مصنوعات کے لیے موم کے نمونے تیار کرتے ہیں۔ پڑوس میں مختلف قسم کے پیتل کے کام کے ورکشاپ بھی ہیں۔ (پڑھیں: مراد آباد میں ماند پڑتی پیتل کی صنعت)

’’میں اپنے والد اور چچا کے ساتھ استابِ پھولدان پر کام کرتا تھا۔ یہ پھولوں کی نقاشی والا ایک بڑا برتن ہوتا تھا، جس پر ہم پیچیدہ نمونے بناتے تھے،‘‘ وہ یاد کرتے ہوئے کہتے ہیں۔ ’’ان دنوں یہ چیزیں روس کو برآمد کی جاتی تھیں۔‘‘ ان کا یہ بھی کہنا ہے کہ ان کے وسیع خاندان میں۵۰-۶۰ افراد تھے جو کاریگر کے طور پر کام کرتے تھے۔ ’’اب صرف آٹھ یا نو اس کام سے منسلک ہیں۔‘‘

سیا قلم (جس کا نام کندہ کاری کے لیے استعمال ہونے والی قلم جیسی چھینی کے نام پر پڑا ہے) ایک موروثی پیشہ ہےجو ان خاندانوں میں پشت در پشت منتقل ہوتا رہا ہے۔ خورشید احمد کہتے ہیں، ’’علاقے میں بہت سے سیا قلم استاد ہیں جنہوں نے یہاں کاریگروں کو کندہ کاری کے ہنر سکھائے ہیں۔‘‘

موسم سرما کی ایک شام کو تقریباً پانچ بجے کا وقت ہے اور تین کاریگر اپنی یاداشت سے ڈیزائنیں بنا رہے ہیں۔ خورشید احمد بھرائی کا کام کر رہے ہیں۔ اس کام میں چھینی سے کندہ کی گئی پنکھڑیوں کی لکیروں کو بھرنا ہوتا ہے۔ یہ پھولوں کی جالی بنانے کا وسیع خاکہ ہوتا ہے، جو جالی دار پردے کے پیچیدہ نمونے جیسا ہوتا ہے۔ ’’صرف پھول اور ڈیزائن بدلتے ہیں، تکنیک وہی رہتی ہے،‘‘ خورشید کہتے ہیں۔

انہوں نے ۱۹۵۷ میں اپنے والد استاد عبدالامین سے صرف ۱۶ سال کی عمر میں کندہ کاری سیکھی تھی۔ ’’مجھے یہ کام پھولوں کے ڈیزائن اور اسے ملنے والی عزت کی وجہ سے پسند آیا،‘‘ وہ مزید کہتے ہیں۔ وہ یاد کرتے ہیں کہ ۱۹۵۰ کی دہائی میں مانگ بہت زیادہ تھی لیکن کاریگر بہت کم تھے۔ اب ’’بہت زیادہ ہنر مند کاریگرموجود ہیں، جو کم ہوتے کام کے لیے ایک دوسرے سے مسابقت کر رہے ہیں۔‘‘

استاد کاریگرخورشید احمد اپنے دو شاگردوں – ۲۲ سالہ ظہور احمد اور ۳۵ سالہ نصرت علی کے ساتھ کام کر رہے ہیں۔ ’’ابتدائی طور پر، ہمیں قلم پر تھاپی کا ضرب لگانے کا طریقہ سکھایا جاتا ہے۔ ہم اس وقت تک یہ کام کرتے رہیں گے جب تک کہ ہمارے استاد ہمیں مزید پیچیدہ کام دینے کے لیے ہم پر اعتماد نہ کرنے لگیں،‘‘ وہ اپنے ابتدائی دنوں کو یاد کرتے ہوئے کہتے ہیں جب ایک نوآموز کاریگر کے طور پر کسی بھی غلطی پر انہیں ڈانٹ پلائی جاتی تھی۔ ’’اب کوئی بھی اس طرح سیکھنا نہیں چاہتا،‘‘ وہ افسوس کا اظہار کرتے ہوئے کہتے ہیں۔ ’’استاد نہیں سکھاتا ہے، [بلکہ] شاگرد سیکھتا ہے، اگر آپ میں سیکھنے کا جذبہ ہے، تو آپ سیکھ لیں گے۔‘‘

یہاں اتر پردیش کے شہر مراد آباد کے پیرزادہ علاقے میں زیادہ تر مسلمان مرد اس فن اور اس نوع کی دیگر دستکاریوں سے وابستہ ہیں۔ مراد آباد میں مسلمان یہاں کی کل آبادی کا تقریباً نصف حصہ ہیں (مردم شماری۲۰۱۱)۔

دلشاد حسین کا مکان خورشید احمد اور ارشاد حسین کے مکان سے محض پانچ منٹ کی پیدل دوری پر واقع ہے۔ دلشاد حسین کی عمر ستر کی دہائی میں ہے۔ انہوں نے بہت سے ڈیزائن بنائے اور ان میں مہارت حاصل کی۔ ایسے ہی ڈیزائنوں میں ’ڈالی کا ڈیزائن‘ (جس میں لمبی شاخوں والے نمونے شامل ہوتے ہیں) اور ’راجستھانی بارات‘ (جو پیتل پر کندہ راجپوتانہ جدری نقاشی ہوتی ہے)۔

مروڑی کے کام میں مہارت حاصل کرنا سب سے پیچیدہ اور مشکل خیال کیا جاتا ہے، اور دلشاد کو اپنی مہارت پر فخر ہے۔ سال ۲۰۲۲ میں لکھنؤ میں ایک نمائش میں وزیر اعظم نریندر مودی کے ان کے فن سے متاثر ہونے کے بعد انہوں نے جرمن چانسلر اولف شولز کو ایک سیاہ پھولوں کا برتن تحفے میں دیا تھا۔ ’’اب گھر کے کام میں کیا ہی عزت، باہر لوگ اسے نمائش میں رکھتے ہیں۔‘‘ دلشاد کہتے ہیں کہ انہوں نے ایران میں ایک نمائش کا دورہ کیا تھا، جس میں ایرانی قالین کا کام دیکھ کر وہ کافی متاثر ہوئے تھے۔

استاد نقاش کو ’شلپ گرو‘ اور ’پدم شری‘ کے ساتھ ساتھ متعدد ریاستی اور قومی اعزازات سے نوازا گیا ہے۔ دوسرے فنکار بھی ان کے کام سے متاثر ہیں۔ ارشاد حسین کہتے ہیں کہ مروڑی کے چند ہی کاریگر (جیسے دلشاد) باقی بچے ہیں۔ وہ اپنے پردادا کو یاد کرتے ہیں جنہوں نے یہ پیچیدہ کام کیا تھا۔

دلشاد حسین ریٹائر ہوچکے ہیں اور نوجوان کاریگروں کو تربیت دیتے ہیں۔ ’’یہ وہ باریک تفصیلات ہیں جن کے ساتھ ہم انہیں ٹریننگ دیتے ہیں۔ اس فن کو پہلے کباڑ پر سکھایا جاتا ہے،‘‘ وہ کہتے ہیں۔ جب کاریگر تربیت حاصل کر لیتے ہیں، تو انہیں چھینی پر ضرب لگانے، اوزاروں کو تیز کرنے اور دھات کو ریتنے کی مختلف تکنیکیں سکھائی جاتی ہیں۔

لیکن اس فن کے اپنے چیلنجز ہیں۔ ’’یہ کام آپ صبح صرف ۱۰ منٹ کے لیے کرسکتے ہیں۔ آنکھیں جواب دے جاتی ہیں،‘‘ ارشاد حسین کہتے ہیں۔

پیتل کے باریک ذرے (جسے روا کہتے ہیں) ہوتے ہیں جو ہوا میں اڑتے رہتے ہیں اور آنکھوں کو نقصان پہنچاتے ہیں۔ ’’ہم اس طرح کھڑے ہوتے ہیں کہ روا ہمارے چہرے کی بجائے سینے پر آکر رکے،‘‘ محمد اسلام کہتے ہیں۔ چالیس کی دہائی میں پہنچ چکے اسلام پچھلے ۳۰ سالوں سے یہ کام کر رہے ہیں۔

اسلام کا مزید کہنا ہے کہ ’’کسی کسی صبح جب ہم سو کر اٹھتے ہیں تو ان چھوٹے ذرات کو اپنی آنکھوں کے کونے میں جمع دیکھتے ہیں۔‘‘ بعض اوقات وہ اسے اپنے ہاتھوں سے ہٹا دیتے ہیں۔ عموماً انہیں اکٹھا کر کے مقامی بھٹی میں بھیجا جاتا ہے تاکہ انہیں پیتل کے ڈلے میں تبدیل کیا جا سکے۔

’’پیتل نیا سونا بن گیا ہے،‘‘ خورشید احمد کہتے ہیں۔ ان کا کہنا ہے کہ آج سیا قلم کا کام کم ہو گیا ہے۔ خام پیتل کی قیمتیں بڑھ گئی ہیں۔ پیتل کا ایک ڈلا عام طور پر سات سے آٹھ کلوگرام کے درمیان ہوتا ہے، اور اس کی قیمت تقریباً ۵۰۰ روپے فی کلو گرام ہوتی ہے۔

پیتل کے ڈلوں کی قیمت میں اضافہ سے کاریگروں کے کام میں کمی آئی ہے۔ ان کاریگروں کو کندہ کاری کے کام کے لیے ٹھیکیداروں سے ادت [پیتل کی مصنوعات] حاصل کرنی پڑتی ہیں۔ ان کی آمدنی کا انحصار ایک دن میں ملنے والی پیتل کی مصنوعات کی تعداد پر ہوتا ہے۔ خورشید احمد نے پاری کو بتایا، ’’ہم ایک گھنٹہ کے کام کے عوض ۲۰ روپے کما لیتے ہیں۔‘‘

محمد اسلام کا کہنا ہے کہ وہ ایک دن میں۱۵-۲۰ پیتل کی عام مصنوعات پر کام کر سکتے ہیں، اور تقریباً ۴۰۰ روپے کما سکتے ہیں۔ ’’اگر کام زیادہ پیچیدہ ہے – جیسے جالی یا چُنیا جالی– تو دن میں صرف ایک پر کام کر سکتے ہیں اور ۵۰۰ روپے کما سکتے ہیں،‘‘ ۴۰ سالہ کاریگر کہتے ہیں۔

الگ الگ ڈیزائنوں کا کوئی تحریری ریکارڈ موجود نہیں ہوتا ہے۔ کاریگریا تو دھات کی سطح پر چوخانے بناتے ہیں، نمونے کندہ کرتے ہیں اور انہیں ابھارنے کے لیے دھات کی سطح کو ریتی کا استعمال کر کے گھستے ہیں، جس سے ایک ابھار جیسا اثر پیدا ہوتا ہے جو نمونوں میں جان ڈال دیتا ہے۔

اجرت کا انحصار کام کی پیچیدگی پر ہے۔ ناقص معیار کے ڈیزائن کو ’جاپانی‘ کہتے ہیں۔ یہ نام جاپان کو برآمد کی جانے والی مصنوعات کے لیے دیا گیا تھا۔ یہ ایک سادہ ڈیزائن ہوتا ہے جس میں کاریگرسیا قلم کے ساتھ دھات میں بہت کم تفصیلات کے ساتھ ایک نشیب پیدا کرتے ہیں۔ ’’اس کا معیاراتنا ناقص ہوتا ہے کہ آپ اسے ۶ سے ۷ سالوں میں سیکھ سکتے ہیں،‘‘ خورشید کہتے ہیں۔ ’جاپانی‘ آرٹ ورک میں ضرب دکھائی دیتے ہیں جو پھولوں یا پنکھڑیوں جیسے نمونوں کے خاکہ کو دکھاتے ہیں، اس میں وہ تفصیلات نہیں ہوتیں جو انھیں شکل دیتی ہیں۔

’’میں خوش قسمت ہوں کہ مجھے ہر روز کام ملتا ہے، لیکن ایسےبھی کاریگر ہیں جن کے لیے کام کی کمی ہے،‘‘ ارشاد حسین کہتے ہیں، لیکن ساتھ میں یہ اضافہ کرتے ہیں کہ مزدوری اتنی نہیں ہے کہ وہ اپنے کنبے کی کفالت کرسکیں۔ ان کے دو بچے ہیں۔ ایک بیٹی اقراء جو درجہ ۷ میں پڑھتی ہے اور ایک بیٹا محمد اسد اس سے ایک سال چھوٹا ہے۔ ’’میں نہیں چاہتا کہ میرے بچے یہ ہنر سیکھیں، اور مجھ جیسی قسمت پائیں۔ یہ ان پر منحصر ہے کہ وہ بڑے ہو کر کیا بننا چاہتے ہیں۔ لیکن میں چاہتا ہوں کہ وہ تعلیم یافتہ ہوں، اور اچھے پیسے کمائیں،‘‘ ارشاد کہتے ہیں۔

کاریگروں کا کہنا ہے کہ اس کام میں جو فخر کا احساس ہے وہ مالی عدم تحفظ کی وجہ سے دھندلا ہو جاتا ہے۔ ’’اسّی کی دہائی کے آخر میں ایک وقت تھا جب ہم تھیٹر جایا کرتے تھے۔ مِگلانی [تھیٹر] مشہور تھا، لیکن اب وہ سب بند ہوچکے ہیں۔ ٹکٹ صرف ۲ روپے اور ۴۵ پیسے میں آتے تھے۔ میں نے وہاں امیتابھ بچن کی بہت سی فلمیں دیکھی تھیں، اور میری پسندیدہ فلم ’قلی‘ تھی۔‘‘

ارشاد کا کہنا ہے کہ اب ان کے پاس فلمیں دیکھنے کا وقت نہیں ہے۔ اس کے باوجود امیتابھ بچن ان کے پسندیدہ اداکار ہیں۔ پسندیدہ اداکارہ کے بارے میں پوچھے جانے پر وہ شرارتی مسکراہٹ کے ساتھ کہتے ہیں، ’’میری بیوی!‘‘

’’جب آپ سیا قلم سیکھ رہے ہوتے ہیں، تو یہ چھوٹی چھوٹی تفصیلات اہم ہوتی ہیں۔ مثال کے طور پر، آپ کو معلوم ہونا چاہیے کہ ایک خاص سائز کی کندہ کاری کے لیے آپ کو کتنی طاقت سے قلم پر ضرب لگانا ہے،‘‘ ظہور احمد اپنے ہاتھوں میں ادت پر پنکھڑی کا خاکہ دکھاتے ہوئے کہتے ہیں۔

ظہور احمد نے سیا قلم کاریگر بننے سے پہلے سلائی، چوڑیاں کاٹنے اور مینا کاری (دھاتی رنگ چڑھانے) سمیت متعدد کام کرنے کی کوشش کی۔ اس ۲۲ سالہ نوجوان نے ۹ویں جماعت میں اسکول چھوڑ دیا تھا، اس یقین کے ساتھ کہ وہ مزید پڑھنا نہیں چاہتا تھا۔

’’شروع میں نمونوں کو یاد رکھنا مشکل ہوتا ہے۔ میں یاد رکھنے کے لیے پہلے نوٹ بک پر نمونے بناتا تھا،‘‘ ظہور کہتے ہیں۔ ’’یہ آرٹ کی ایک شکل ہے،‘‘ چار بہن بھائیوں میں سب سے چھوٹے نوجوان دستکار کہتے ہیں۔ انہوں نے اپنے والد اور چچا سے سیا قلم سیکھا تھا۔

’’اگرچہ میں نے دوسرے کاموں میں اپنے ہاتھ آزمائے تھے، لیکن میں ہمیشہ یہ سیکھتا رہا کیونکہ میرے تمام چچا اور میرے والد کاریگر ہیں۔ میں نے یہ کام ۱۰ سال کی عمر میں سیکھنا شروع کیا تھا، لیکن آج تک میں بڑے جار پر کام نہیں کرسکتا اور پیچیدہ نمونے نہیں بنا سکتا،‘‘ وہ اس کام میں شامل چیلنج پر زور دیتے ہوئے کہتے ہیں۔

اگرچہ آمدنی کم ہے، لیکن کاریگر کہتے ہیں کہ برادری میں ان کے فن کو قدر کی نگاہ سے دیکھا جاتا ہے۔ استاد کاریگروں کی عزت اور تکریم کی جاتی ہے۔ اس فن کو جو شناخت ملی ہے اس میں دلشاد کے کردار کو باقی دستکار تسلیم کرتے ہیں۔ دلشاد کے گھر کے باہر بینرز لگائے گئے ہیں۔ ان بینروں پر انہیں قومی سطح پر ملنے والے شلپ گرو اور پدم شری کے اعزازات کو اجاگر کیا گیا ہے۔

’’وہ کام ایسا کرتے ہیں کہ پردھان منتری بھی ان سے ملتے ہیں،‘‘ دلشاد کے بارے میں ارشاد کہتے ہیں۔ ’’اس قسم کی مہارت صرف چند لوگ ہی حاصل کرسکتے ہیں۔‘‘

اس اسٹوری کو مرنالنی مکھرجی فاؤنڈیشن (ایم ایم ایف) کی فیلوشپ سے تعاون حاصل ہے۔

ترجمہ نگار: شفیق عالم