’بھیڑ پالنے والے ہم آخری لوگ ہیں‘

’’آئیے، آئیے! یہاں بیٹھئے،‘‘ نندو پال (۴۵) میرے بیٹھنے کے لیے زمین پر سفید چادر بچھاتے ہیں۔ یہ چادر بھیڑ کے اون کی ہے۔ ان کا تعلق گڈیری برادری سے ہے، جو روایتی طور پر بھیڑ پالنے کے لیے جانے جاتے ہیں اور وہ ریاست میں دیگر پس ماندہ طبقہ (او بی سی) کے طور پر درج ہیں۔ وہ سمجھاتے ہوئے کہتے ہیں، ’’یہ آپ کو گرمیوں میں ٹھنڈا اور سردیوں میں گرم رکھتی ہے۔ اتنا ہی نہیں، یہ برسات کے دنوں میں بھی آپ کی حفاظت کرتی ہے۔‘‘

صرف اس کے فائدہ مند استعمال تک محدود نہ رہتے ہوئے، وہ مزید کہتے ہیں، ’’اسے بادشاہوں اور سلطانوں نے عزت دی ہے۔ اور یہی تو اعلیٰ پروہتوں (ہندو مذہبی رہنماؤں) کی نشست ہے؛ اسے مبارک سمجھا جاتا ہے؛ لیکن یہ روایت اب غائب ہو گئی ہے۔‘‘

یہاں شِپور گاؤں میں نندو پال کے پاس دیسی چھوٹا ناگپوری نسل کی ۶۵۰ بھیڑیں ہیں، جو اُس وقت وہیں ہمارے ارد گرد میدان میں چر رہی تھیں۔ نندو کا خاندان گزشتہ پانچ نسلوں سے بھیڑیں چراتا آ رہا ہے، اور وہ اس کام کو نہایت سنجیدگی سے لیتے ہیں۔ وہ مسواک چباتے ہوئے کہتے ہیں، ’’آپ انہیں ایک منٹ کے لیے بھی اکیلا نہیں چھوڑ سکتے۔ اگر ذرا بھی لاپروائی کی تو کتے حملہ کر دیں گے یا پھر بھیڑیں کسی کے کھیت میں گھُس جائیں گی۔‘‘

یہ مئی کا دوسرا ہفتہ ہے، اور جھارکھنڈ کے پلامو ضلع میں درجہ حرارت پہلے ہی ۴۳ ڈگری سینٹی گریڈ تک پہنچ چکا ہے۔ چاروں طرف جہاں نظر جاتی ہے، خشک کھیت پھیلے ہوئے ہیں۔ جہاں ہم بیٹھے ہیں، وہاں سے تقریباً ۵۰۰ میٹر دور ایک چھوٹا سا تالاب ہی شپور گاؤں کے لیے ان کی زندگی کا سہارا ہے۔ مقامی لوگ اسے ’شپور ڈیم‘ کہتے ہیں، اور یہی تالاب فصلوں اور نندو کی بھیڑوں جیسے جانوروں کو سہارا دیتا ہے۔

یہاں قریب میں پانی ہونے کی وجہ سے ہی نندو اپنے دو چچیرے بھائیوں اور ایک چھوٹے بھتیجہ کے ساتھ ڈیرہ ڈالے ہوئے ہیں۔ انہوں نے بھیڑوں کو جنگلی جانوروں سے بچانے کے لیے نائلان کے جال سے ڈھانپ رکھا ہے۔ چرواہے ٹینٹ گاڑے یا کوئی عارضی رہائش گاہ بنائے بغیر اپنا کام چلا لیتے ہیں۔ ہر رات وہ زمین پر چادریں بچھا لیتے ہیں اور کھلے آسمان کے نیچے سو جاتے ہیں۔

نندو سوال کرتے ہیں، ’’کیا تمہیں معلوم ہے کہ مذہبی کتابوں میں بھیڑوں کے بارے میں کیا کہا گیا ہے؟‘‘ پھر تھوڑی دیر رک کر خود ہی جواب دیتے ہیں، ’’وہ [بھیڑیں] انسانوں سے دور رہنا چاہتی ہیں۔‘‘

نندو جیسے چرواہوں کا کہنا ہے کہ چرائی پر ماحولیاتی تبدیلی کا گہرا اثر پڑا ہے۔ چراگاہ کی زمینیں کم رہ گئی ہیں، اور گھاس کے معیار پر بھی اثر پڑا ہے۔ انہوں نے پاری کو بتایا، ’’پہلے ہم لوگ کہیں کہیں ایک ایک مہینہ بھی رک جاتے تھے، لیکن اب مشکل سے ۱۰ دن۔ بھیڑی چربے نہیں کرے گا۔‘‘ نندو اور دیگر چرواہے گڈیریا برادری (پال یا بھیڑیہار گڈیری) سے تعلق رکھتے ہیں، جو ریاست میں دیگر پس ماندہ طبقہ (او بی سی) کے طور پر درج ہیں۔

جھارکھنڈ ماحولیات کے لحاظ سے ہندوستان کے سب سے حساس خطوں میں سے ایک ہے، جو خشک سالی، بے ترتیب بارش، سیلاب، بڑھتے درجہ حرارت اور بار بار آنے والی لو جیسے مسائل کا سامنا کر رہا ہے۔ ریاست کے اندر پلامو ضلع کو سب سے زیادہ ماحولیات سے متاثرہ خطوں میں سے ایک مانا جا رہا ہے۔ سال ۲۰۲۲ کی ایک رپورٹ کے مطابق، ۲۰۲۱ سے ۲۰۵۰ کے درمیان یہاں موسم گرما کے درجہ حرارت میں ایک سے دو ڈگری سینٹی گریڈ تک کا اضافہ ہونے کا امکان ہے۔ یہ رپورٹ ضلعی سطح پر ماحولیات میں ہو رہی تبدیلیوں پر مبنی ہے۔

زیادہ گرمی اور تیز بارش نے کھیتی کے ساتھ ساتھ بھیڑ بکریوں جیسے جانور پالنے کے کام کو بھی مشکل بنا دیا ہے۔ نندو بتاتے ہیں، ’’پہلے چرائی کبھی مسئلہ نہیں تھا۔ بھیڑیوں آسانی سے گھاس کھا لیتی تھیں۔ لیکن اب ہمیں گھاس کے میدان تلاش کرنے کے لیے بہت دور تک جانا پڑتا ہے۔ پھر بھی بھیڑوں کو ٹھیک سے کھلانا مشکل ہو گیا ہے۔‘‘

نندو، کنکاری گاؤں کے چنندہ چرواہوں میں سے ایک ہیں۔ یہ گاؤں پلامو کے چین پور بلاک میں پڑتا ہے۔ سال ۲۰۱۹ میں ہونے والی مویشیوں کی گنتی کے مطابق، جھارکھنڈ میں ۶ لاکھ سے زیادہ بھیڑیں ہیں۔ یہ ان چنندہ ریاستوں میں سے ایک ہے، جہاں سب سے زیادہ بکری پالنے کا کام ہوتا ہے۔ یہاں ۸۸ لاکھ سے زیادہ جانور اور تقریباً ۱ء۱ کروڑ مویشی ہیں۔ یہ سبھی جانور ایک ہی چراگاہ میں چرتے ہوئے نظر آتے ہیں۔

نندو پال کے چچیرے بھائی رام رتی (۶۲ سال) بتاتے ہیں، ’’کبھی کبھی ہمیں چراگاہ کی تلاش میں ۱۲-۱۳ کوس [تقریباً ۴۰ کلومیٹر] تک بھٹکنا پڑتا ہ۔ پہلے دوہر میں گھاس کی بھرمار رہتی تھی، جیسے مگر گھاس اور ڈنٹھل، لیکن اب وہ بھی نہیں ملتی۔‘‘ مگر گھاس موٹی اور کھردری ہوتی ہے، جو یہاں کے دوہر (قدرتی آبی ذرائع) کے آس پاس خوب اُگتی ہے۔ اسے عام طور پر مویشیوں کے چارے کے لیے استعمال کیا جاتا ہے اور یہ صرف گیلی مٹی میں ہی پنپتی ہے۔ لیکن جیسے جیسے آبی ذرائع خشک ہوتے جا رہے ہیں، یہ گھاس بھی غائب ہو گئی ہے۔

اب تو زرعی زمینیں بھی جانوروں کو وافر چارہ نہیں فراہم کر پا رہی ہیں۔ پہلے کھیتوں میں چنا اور چکوَڑ (سینّا آوبٹوسیفولیا) جیسی فصلیں اُگائی جاتی تھیں، جن کے بیج جانوروں کو کھیتوں میں پڑے ہوئے مل جاتے تھے۔ لیکن اب انہیں ڈھونڈنا مشکل ہو گیا ہے کیوں کہ اب یہ فصلیں بہت کم کسان اگاتے ہیں۔ ان کی جگہ زیادہ تر لوگ مکئی، دھان اور گیہوں اُگانے لگے ہیں۔ یہ ایسی فصلیں ہیں جو جانوروں کو چرنے لائق کچھ نہیں چھوڑتیں۔ نندو کہتے ہیں، ’’بھیڑوں کو اب پہلے جیسی خوراک نہیں مل رہی ہے۔ اب تو بس تھوڑی سی سوانا گھاس اور تھوڑی سی دوب گھاس [سائنوڈون ڈیکٹیلان] ہی دکھائی دیتی ہے۔

علاقہ میں لگاتار دو بار ہوئی خشک سالی (۲۰۲۲ اور ۲۰۲۳ میں) نے یا تو زیادہ آبی ذرائع کو خشک کر دیا ہے یا انہیں آلودہ کر دیا ہے۔ نندو کہتے ہیں، ’’بھیڑوں کو زندہ رہنے کے لیے صاف پانی چاہیے۔‘‘ انہوں نے پچھلی دہائی میں کئی آبی ذرائع کو غائب ہوتے دیکھا ہے۔

پچھلے سال کے قحط کے بارے میں بتاتے ہوئے نندو تیز آواز میں کہتے ہیں، ’’ہم بالکل حاشیہ پر پہنچ گئے تھے۔ پورے دن چرائی کے بعد بھی بھیڑیں بھوکی رہتی تھیں۔‘‘ کچھ لمحہ رک کر وہ مزید بولے، ’’پچھلے سال [۲۰۲۳] میری ۲۰ بھیڑیں مر گئیں۔‘‘

حال ہی میں، نندو اور ان کے ساتھیوں نے اپنی بھیڑوں کو نیوموکوکل بیماری سے بچانے کے لیے ٹیکہ لگوایا ہے۔ انہوں نے بتایا کہ اس بیماری کا خطرہ ان جانوروں کو ہوتا ہے جنہیں پینے کے لیے صاف پانی نہیں ملتا۔

وہ بتاتے ہیں، ’’ہم ہر چار مہینے میں بھیڑوں کا اون کاٹتے ہیں، اور تبھی انہیں ٹیکہ لگایا جاتا ہے۔‘‘ تقریباً ۶۰۰ بھیڑوں کے جھنڈ کے لیے انہیں ہر چار مہینے پر تقریباً ۸۰۰۰ روپے کا خرچ آتا ہے، یعنی سالانہ تقریباً ۲۵ ہزار روپے انہیں خرچ کرنے پڑتے ہیں۔

پرانے دنوں کو یاد کرتے ہوئے، جب جھارکھنڈ بہار کا حصہ ہوا کرتا تھا، نندو ادس ہو جاتے ہیں، ’’لالو کے زمانہ میں سب ٹھیک تھا۔ ہمیں ساری دوائیاں مل جاتی تھیں۔ اب کچھ نہیں ملتا۔‘‘

رام رتی درمیان میں ٹوکتے ہوئے کہتے ہیں، ’’یہ خبر کب ہمارے موبائل میں آئے گی؟ ہمیں سرکار کی طرف سے کچھ مدد ملنی چاہیے۔‘‘

ایک وقت تھا جب اون کو بیش قیمتی مانا جاتا تھا۔ رام رتی کہتے ہیں، ’’اب تو اون کاٹنے کے بعد ہم اسے پھینک دیتے ہیں۔ اور کر بھی کیا سکتے ہیں؟‘‘ باقی لوگ بھی حامی بھرتے ہیں، ’’اب ہم کیا کریں…‘‘

نندو اپنے پلاسٹک کے گھسے ہوئے جوتے اٹھا کر دکھاتے ہیں اور کہتے ہیں، ’’انہوں نے ساری قیمتی چیزیں ہٹا دیں اور ہمارے لیے بس کچرا چھوڑ دیا۔‘‘ وہ مزید کہتے ہیں، ’’راجاؤں کے زمانے میں کام ضابطے سے ہوتا تھا۔ بھیڑوں کی کھال سے ہمارے جوتے بنائے جاتے تھے۔ اب وہ سب بند ہو گیا ہے اور ہمیں پلاسٹک کے جوتے پہننے پڑتے ہیں۔‘‘

بھیڑیں پالنے کا خرچ لگاتار بڑھ رہا ہے، اور اون سے آمدنی نہ ہونے سے یہ پریشانی اور گہری ہو گئی ہے۔ نندو بتاتے ہیں، ’’پہلے جب ہم اون بیچتے تھے تو تین کلو تک کے ہمیں ۱۰۰ روپے مل جاتے تھے۔‘‘ لیکن وہ اچھے دن اب بہت پیچھے چھوٹ چکے ہیں۔

ان کے گھر کی عورتیں بُنائی میں مدد کرتی تھیں۔ سنجو دیوی یاد کرتے ہوئے کہتی ہیں، ’’یہ بہت محنت کا کام تھا۔ پہلے اون کو صاف کرنا پڑتا تھا، پھر اسے کات کر دھاگہ بنانا، اور اس کے بعد ہی بُنائی ہو پاتی تھی۔ تین لوگ مل کر دو دن میں ایک کمبل بنا پاتے تھے۔‘‘

سنجو دیوی (۴۵) رام رتی کی بیوی ہیں۔ کنکاری میں ان کے اینٹ کے مکان کے باہر ہماری ان سے بات ہوئی۔ وہ مزید بتاتی ہیں، ’’ایک کمبل بنانے کے عوض ہمیں صرف ۱۰۰ سے ۲۰۰ روپے ہی ملتے تھے۔‘‘ ہم سے بات کرتے ہوئے وہ ہمیں ایک پرانا چرخہ دکھاتی ہیں، جو ان کے خاندان کی روایت کی آخری نشانی ہے۔

سنتھیٹک اون کے بڑھتے چلن نے ہاتھ سے بنے کمبلوں کی مانگ پوری طرح ختم کر دی ہے۔ سنجو دیوی کے بڑے بیٹے ونے پال نے یہ مانتے ہوئے کہا، ’’اب تو ہم بھی کمبل بازار سے ہی خریدتے ہیں۔‘‘

رام رتی اور سنجو کے پاس تین بیگھہ زمین ہے، جس پر وہ خریف کے موسم میں مکئی اور دھان، اور ربیع کے موسم میں گیہوں اُگاتے ہیں۔ سنجو کہتی ہیں، ’’اس بار تو دو سال کے بعد بارش ہوئی ہے، اس لیے مکئی کی فصل اچھی ہونی چاہیے۔‘‘ زیادہ تر اناج وہ اپنی کھپت کے لیے ہی رکھتے ہیں، اور اگر کچھ بچ جاتا ہے تو اسے بیچ دیتے ہیں۔ ان کے چار بچے ہیں: دو بیٹیاں اور دو بیٹے۔ ان میں سے تین کی شادی ہو چکی ہے اور وہ اپنی اپنی زندگی میں مصروف ہیں۔

نئی نسل اب مویشی پروری سے دور ہوتی جا رہی ہے۔ رام رتی کے بڑے بیٹے ونے پال ۲۵ سال کے ہیں اور اب دہاڑی مزدور کے طور پر کام کرتے ہیں۔ انہوں نے بتایا، ’’میں نے سات سال پہلے یہ کام چھوڑ دیا۔ یہ بہت محنت والا کام ہے۔ اب کوئی اسے کرنا نہیں چاہتا، کیوں کہ اس میں کوئی آمدنی نہیں ہے۔‘‘ وہ مزید کہتے ہیں، ’’ہم بھیڑ کے دودھ سے بنا گھی بھی بیچتے تھے۔ لیکن اب اس کی بھی کوئی مانگ نہیں رہ گئی ہے۔‘‘ یہ ان کی مویشی کی پیداوار کی گھٹتی مانگ کو صاف دکھاتا ہے۔

بھیڑوں کی فروخت ہی اب ان کی آمدنی کا بنیادی سہارا ہے۔ ایک بھیڑ تقریباً ۲۵۰۰ سے ۳۰۰۰ روپے میں فروخت ہوتی ہے، جس سے سالانہ تقریباً ایک لاکھ روپے کی آمدنی ہو جاتی ہے۔ نندو آہ بھرتے ہوئے کہتے ہیں، ’’کاش، ہمارا اون پھر سے فروخت ہونے لگے۔ اس سے پورے گاؤں کو روزگار مل جائے گا۔ ہم اس مرتی ہوئی روایت کو بچا سکیں گے۔‘‘

جیسے جیسے آمدنی گھٹ رہی ہے، ہر ایک روپیہ اب ان کے لیے بہت معنی رکھتا ہے۔ پچھلے کچھ دنوں سے رام رتی کا پوتا بخار سے تڑپ رہا ہے، اور انہوں نے پاس کے ایک جھولا چھاپ ڈاکٹر (ایسے ڈاکٹر، جن کے پاس ڈاکٹری کا لائسنس نہیں ہے، اور جو وسطی ہندوستان کے دیہی علاقوں میں عام طور پر ملتے ہیں) کو دکھایا ہے۔ رام رتی بتاتے ہیں، ’’اس نے کہا کہ میرا پوتا ٹھیک ہو جائے گا۔ میں نے ابھی ۲۰۰ روپے کی دوا لی ہے۔‘‘ بیمار بچہ کو دیکھنے کے لیے رام رتی نو کلومیٹر پیدل چل کر گھر پہنچے۔ وہ پچھلی شام کو نکلے تھے اور علی الصبح لوٹ آئے۔ وہ اسی راستے سے ہو کر گئے جس پر وہ بھیڑیں چرانے جاتے ہیں۔

’’تُرّ-تُرّ-تُرّ…‘‘ نندو کی آواز سنتے ہی تمام بھیڑیں کھڑی ہو جاتی ہیں، جیسے چلنے کے لیے تیار ہوں۔ نندو ہنستے ہوئے کہتے ہیں، ’’یہ ہماری خاص زبان ہے، اسے صرف ہم ہی سمجھتے ہیں۔‘‘ وہ جھنڈ کی کچھ بھیڑوں کی طرف اشارہ کرتے ہوئے کہتے ہیں، ’’ہر بھیڑ کا ایک نام ہے۔ یہ چکری ہے، اور یہ بھوری۔‘‘ چِکری وہ بھیڑ ہے، جس کے جسم پر دھبے (کالی سفید دھاری) ہیں، جب کہ بھوری کا نام اس کے بھورے رنگ کی وجہ سے پڑا ہے۔

یہ ایک اور مصروف صبح ہے۔ چرواہے چاول اور نینوا (توری) پکا رہے ہیں۔ نندو آواز لگاتے ہیں، ’’چاول تیار ہو گئے ہیں، جلدی سے سبزی چڑھاؤ۔‘‘ ان کے پاس صرف ایک ہی برتن ہے۔ ایسے میں ویرندر تسلے سے چاول نکال کر چار پلیٹوں میں تقسیم کر دیتے ہیں، تاکہ سبزی پکانے کے لیے برتن کو خالی کر سکیں۔ اسی درمیان رام رتی نینوا دھوتے ہیں اور ہاتھوں سے توڑ کر ٹکڑے کرتے ہیں۔ چاقو جیسی چیز ان کے لیے کسی قیمتی شے کی طرح ہے، اس لیے وہ اس کے بغیر ہی کام چلا رہے ہیں۔

کالے پالی تھین بیگ سے نندو چٹکی چٹکی بھر کر سوکھی لال مرچ، زیرہ اور ہلدی نکالتے ہیں اور انہیں پراس کے پتّے پر رکھ دیتے ہیں۔ پھر وہ ان مسالوں کو گرم تیل میں ڈالتے ہیں، نینوا ملاتے ہیں اور برتن کو ڈھک دیتے ہیں۔

صبح ساڑھے سات بجے تک وہ کھانا کھا چکے ہوتے ہیں اور برتن، پلاسٹک کی بالٹیاں اور جال سیمنٹ کی پرانی بوریوں میں سمیٹ لیتے ہیں۔ جب وہ گاؤں سے دور نکلتے ہیں تو سارا سامان اپنے کندھوں پر ڈھوتے ہیں، لیکن چونکہ آج رات انہیں یہیں لوٹنا ہے، اس لیے وہ اسے پاس میں ایک کھجور کے درخت پر ٹانگ دیتے ہیں۔

نندو، رام رتی اور ملّو بھیڑوں کے جھنڈ کو تین حصوں میں بانٹ لیتے ہیں۔ کندھوں پر چادر ڈالے اور ہاتھوں میں لمبی لاٹھیاں لیے یہ تینوں نکل پڑتے ہیں۔ کئی بار وہ دن میں ۲۰ سے ۳۰ کلومیٹر تک پیدل چلتے ہیں۔ لمبے سفر میں ان کا راستہ مشرق کی جانب لوہردگا ہوتے ہوئے رانچی تک جاتا ہے اور مغرب کی جانب گڑھوا سے ہوتے ہوئے بہار کے ڈیہری تک، جو یہاں سے ۵۰۰ کلومیٹر سے بھی زیادہ دور ہے۔

پلامو میں بھیڑ پالنے کا کام تقریباً پوری طرح مردوں کے ذریعہ ہی کیا جاتا ہے۔ نندو بتاتے ہیں، ’’اگر آپ دہلی-پانی پت والے راستے پر جائیں، تو پورے خاندانوں کو ایک ساتھ بھیڑ چراتے ہوئے دیکھ سکتے ہیں۔‘‘ رام رتی مزید کہتے ہیں، ’’یہاں سنگرولی روڈ پر بھی وہ گدھوں اور اونٹوں کو ساتھ رکھتے ہیں۔‘‘ دونوں نے دوسرے علاقوں کے چرواہوں کو دیکھا، تو یہ دیکھ کر حیران رہ گئے کہ کہیں کہیں عورتیں بھی بھیڑ چرانے کا کام کرتی ہیں۔ نندو فخر سے کہتے ہیں، ’’ہمارے خاندانوں کی عورتوں نے کبھی بھیڑ نہیں چرائی۔ یہ کام صرف مردوں کا ہے۔‘‘

نندو کہتے ہیں، ’’جس طرح حکومت کا مالی سال مارچ مہینہ سے شروع ہو کر مارچ میں ختم ہوتا ہے، اسی طرح ہم بھی مارچ سے مارچ تک بھیڑ چرانے کا کام کرتے ہیں اور تمام راستوں سے گزرتے ہوئے اس کا ایک پورا چکّر لگاتے ہیں۔‘‘

گزشتہ کئی دہائیوں میں نندو اور رام رتی نے ہزاروں کلومیٹر کا سفر پیدل طے کیا ہے۔ نندو ہنستے ہوئے کہتے ہیں، ’’آج کل ہم فون ساتھ لے کر چلتے ہیں، لیکن پہلے جب کسی کو ہمیں کوئی خبر [جیسے شادی یا موت کی] بھیجنی ہوتی تھی تو ایک آدمی کو پیدل چل کر آنا پڑتا تھا۔ راستے میں وہ گاؤں والوں سے پوچھتا کہ ہم کس علاقہ میں ہیں، اور پھر ہمارے پاس پیغام لے کر آتا تھا۔‘‘

چار گھنٹے بعد، اب آرام کرنے کا وقت ہو چلا ہے۔ نندو کہتے ہیں، ’’ہم بس تھوڑا ستّو ہی کھا لیں گے۔ اس سے پیٹ بھر جاتا ہے اور لو کا سامنا کرنے میں مدد ملتی ہے۔‘‘ پھر اس کے بعد، وہ اپنے جانوروں کے لیے جال بچھاتے ہیں، اور سونے چلے جاتے ہیں۔

خبریں اور ادھر ادھر کی باتیں ان سے تیز یہاں وہاں پھیلتی ہیں۔ ہر شام جب چرواہے گاؤں کی طرف لوٹتے ہیں، انہیں کھیتوں میں کچھ گاؤں والے انتظار کرتے ہوئے ملتے ہیں۔ اس بار، انہوں نے نندو کے خاندان میں ایک بچہ کی موت کی خبر سنی ہے۔

شام کی دھندلی سی روشنی میں نندو پرانے دنوں کو یاد کرتے ہوئے بتاتے ہیں کہ کیسے پہلے گاؤں والے اس بات کے لیے جھگڑتے تھے کہ ان کی بھیڑوں کو کون اپنے کھیت میں رکھے گا۔ وہ بتاتے ہیں، ’’وہ ہمیں کھانا اور اناج دیا کرتے تھے، اور کچھ لوگ بھیڑوں کے اون بھی مفت میں کاٹ دیا کرتے تھے۔‘‘ بھیڑوں کا گوبر قیمتی کھاد مانا جاتا تھا، اس لیے لوگوں کے لیے چرواہے اور ان کے جانور ہمیشہ عزیز مہمان مانے جاتے تھے۔

نندو افسوس کا اظہار کرتے ہوئے کہتے ہیں، ’’لیکن اب، خواہ ہم پیسے بھی دیں، کسی کو کوئی دلچسپی نہیں ہے۔ تب اور اب میں بہت فرق ہے۔ اب کوئی ہماری طرف دیکھتا تک نہیں۔ ہم آخری لوگ ہیں جو یہ کام کر رہے ہیں۔ ہمارے بعد اب کوئی بھیڑ نہیں پالے گا۔‘‘

ترجمہ نگار: قمر صدیقی