گرمیوں کے سات گیت

گرائنڈ مِل سانگز پروجیکٹ کے اس شمارہ میں ملشی تعلقہ، پونہ کے کولاوڑے گاؤں کی کھڑکواڑی بستی کی عورتیں سات گیتوں کے ذریعہ گرمیوں کی کڑی دھوپ میں گزرتی زندگی کے بارے میں بیان کرتی ہیں

اپریل کے ایک تپتے دن، ہم کولاوڑے گاوؑں کی ایک بستی، کھڑکواڑی پہنچتے ہیں۔ تقریباً دو دہائی پہلے گرائنڈ مل سانگز پروجیکٹ کی ابتدئی ٹیم نے اِس گاوُں میں اووی ریکارڈ کیے تھے۔ آج یہ پروجیکٹ پاری پر موجود ہے اور ہماری موجودہ ٹیم وقتاً فوقتاً کچھ گاؤں میں جا کر گلوکاراؤں سے ملتی ہے۔

پونہ کے ملشی تعلقہ کی کھڑکواڑی بستی میں پہنچنے پر ہمارے پاس ۲۱ گلوکاراؤں کی فہرست ہے
– اِن میں سے اکثرعورتیں مراٹھا کاشتکار خاندانوں سے تعلق رکھتی ہیں (یا رکھتی تھیں)۔ کولاوڑے گاؤں کی آبادی ۱۰۰۰ لوگوں یا ۱۸۸ کنبوں پر مشتمل ہے (مردم شماری ۲۰۱۱)۔

گاؤں پہنچتے ہی لیلا بائی کامبلے (۵۸) ہمیں سیدھے رام مندر کے احاطہ میں موجود ہال میں لے جاتی ہیں۔ یہ مستطیل ہال اوپر سے ٹین کی چادروں سے ڈھکا ہے اور باقی جانب سے کھلا ہے۔ ایک دو سطحی باہری دیوار بیٹھنے کے کام آتی ہے۔

لیلا بائی اووی گلوکاراؤں کو ان کے گھروں سے بلاتی ہیں اور دھیرے دھیرے ہال میں کچھ عورتیں جمع ہونے لگتی ہیں۔ ہماری فہرست میں درج عورتوں میں سے کئی گاؤں میں نہیں ہیں، کچھ فوت ہو چکی ہیں اور کچھ کا ہم پتا نہیں لگا سکے۔

سبھی عورتیں کہتی ہیں کہ وہ اب بھی کبھی کبھی چکّی کو بیسن، گھاون کے لیے چاول کے آٹے اور شادیوں پر ہلدی کی رسم کے لیے ہلدی پیسنے کے لیے استعمال کرتی ہیں۔

ہماری فہرست میں شامل اووی گلوکاراؤں میں سے ایک، لکشمی بائی اوبھے اب تقریباً ۶۵ برس کی ہو چکی ہیں۔ وہ کہتی ہیں ’’بندر ہمیں چاول کے علاوہ کچھ اگانے ہی نہیں دیتے۔‘‘ وہ ایک فخریہ مسکراہٹ کے ساتھ مزید کہتی ہیں ’’میری چار بیٹیاں، ایک بیٹا، گیارہ پوتے پوتیاں اور دو پڑپوتے پوتیاں ہیں۔‘‘

مکتا بائی اوبھے (۶۰) نے ساتویں جماعت تک تعلیم حاصل کی ہے اور وہ پڑھنے کی بڑی شوقین ہیں۔ وہ کہتی ہیں ’’میں نے رنجیت دیسائی کی شریمن یوگی، پانڈو پرتاپ ہری، اور دیگر مذہبی کتابیں پڑھی ہیں۔‘‘

کندھے پر کلہاڑی لیے ایک آدمی رک کر چِلّاتا ہے ’’یہاں کیا ہو رہا ہے؟‘‘ ہم اسے بتاتے ہیں کہ یہ عورتیں ہمارے لیے چکّی کے گیت گانے والی ہیں اور وہ رضامندی میں سر ہلا کر چلا جاتا ہے۔

موسم گرما کے بارے میں چکّی کے گیت گانے کے لیے چھ عورتیں ایک قطار میں بیٹھتی ہیں اور ایک دوسرے سے مشورہ کرتے، گنگناتے اور پھسپھساتے ہوئے نسل در نسل سیکھے اِن گیتوں کو یاد کرتی ہیں۔

مکتا بائی پہلی اووی گانا شروع کرتی ہیں، جو ایک گرمی سے مارے کارپینٹر کے بارے میں ہے۔ گلوکارہ اپنے بیٹے سے کہتی ہیں کہ وہ آدمی اپنے دوست کے گھر کی اوپری منزل تعمیر کر رہا ہے۔ دوسرے گیت میں خود گرمی محسوس کرنے پر وہ اپنے بیٹے بھیوا کو ان کے اوپر چھتری رکھنے کو کہتی ہیں۔ یہ مصرعے ظاہر کرنے کی کوشش کرتے ہیں کہ ایک بیٹا خوشی خوشی اپنی ماں کی بات مانتا ہے اور ہمیشہ اس کی مدد کرنے کے لیے تیار رہتا ہے۔

گرمیوں میں سورج درخت سے ’’بات‘‘ کرتا ہے اور وہ سایہ دیتا ہے۔ تیسری اووی میں گلوکارہ کہتی ہیں کہ ان کی ماں کا لاڈلا بیٹا (ان کا بھائی) سڑک سے گزر رہا ہے۔ اگلے دوہے میں وہ خود گرمی محسوس کرنے پر اپنے بھائی کے سایہ میں پناہ لیتی ہیں۔

پانچواں گیت چیتر (اپریل/مئی) کے مہینے کی شدید گرمی کو بیان کرتا ہے۔ گرمی کے چلتے گلوکارہ کا بیٹا ایک پولیس والے کی بیٹھک میں آرام کرنے چلا جاتا ہے۔ یہ دوہا غالباً یہ ظاہر کرنے کی کوشش کرتا ہے کہ گاؤں کے پولیس والے سے جان پہچان رکھنا فائدہ مند ہوتا ہے۔

چھٹے دوہے میں گلوکارہ کہتی ہیں ’’جب میں سایہ دیکھتی ہوں تو دوڑی چلی جاتی ہوں۔‘‘ وہ اپنے بھائی کے سایہ میں کھڑی ہو جاتی ہیں جو ’’ایک آم کے سایہ دار درخت کی مانند ہے۔‘‘ ان مصرعوں میں چھپا ہے وہ سہارا جو ایک بہن مشکل وقت میں اپنے بھائی میں تلاش کرتی ہے۔ وہ واحد انسان ہے جو اس کی بات سنتا ہے اور اس کی گزارشوں کو نظرانداز نہیں کرے گا۔

آخری اووی میں گلوکارہ کہتی ہیں کہ ان کا بیٹا بھری جوانی میں ہونے کے باوجود دوسرے گاؤں جاتے ہوئے چھاتا ساتھ لے جاتا ہے۔

अशी उन्हाळ्याची ऊन ऊन लागत सुताराला
सांगते रे बाळा तुला माडी बांधतो मैतराला

उन्हाळीच उन्ह उन्ह लागत माझ्या जिवा
वाणीच्या माझ्या बाळा वर छतरी धर भिवा

उन्हाळ्याच उन्ह उन्ह झाडाशी बोलत
माझ्या माऊलीच बाळ सोन वाटन चालत

उन्हाळीच उन्ह उन्ह करील माझ काही
बंधू माझ्याच्या मी सावली उभी राही

उन्हाळीच उन चैताची केली भारी
बाळा माझा उन टाळी चौकीवाल्याच्या रंगमहाली

सावली पाहुनी मी तर जाते धावूनी
वाणीच माझ बंधू अंबा डौलाचा पाहुनी

गावाला गेल बाळ छत्री नेली संगतीला
बाळायाच्या माझ्या उन लागत नवतीला

aśī unhāḷyācī ūna ūna lāgata sutārālā
sāṅgatē rē bāḷā tulā māḍī bāndhatō maitarālā

unhāḷīca unha unha lāgata mājhyā jivā
vāṇīcyā mājhyā bāḷā vara chatarī dhara bhivā

unhāḷyāca unha unha jhāḍāśī bōlata
mājhyā māūlīca bāḷa sōna vāṭana cālata

unhāḷīca unha unha karīla mājha kāhī
bandhū mājhyācyā mī sāvalī ubhī rāhī

unhāḷīca una caitācī kēlī bhārī
bāḷā mājhā una ṭākī caukīvālyācyā raṅgamahālī

sāvalī pāhunī mī tara jātē dhāvūnī
vāṇīca mājha bandhū ambā ḍaulācā pāhunī

gāvālā gēla bāḷa chatrī nēlī saṅgatīlā
bāḷāyācyā mājhyā una lāgata navatīlā

کارپینٹر تپتی دھوپ میں جھلس رہا ہے
بیٹا، وہ اپنے دوست کے گھر کی اوپری منزل بنا رہا ہے

میں تپتی دھوپ میں جھلس رہی ہوں
بھیوا، میرے پیارے بیٹے، میرے اوپر چھاتا تھام لے

درخت تپتی دھوپ میں سایہ دیتا ہے
میری ماں کا لاڈلا بیٹا راستے سے جا رہا ہے

میں گرمی میں جل رہی ہوں، اے آفتاب
میں اپنے بھائی کے سایہ میں پناہ لیتی ہوں

کڑی دھوپ چیتر کے مہینہ کو بہت گرم بنا دیتی ہے
میرا بیٹا گرمی سے بچ کر تھانیدار کی بیٹھک میں آرام کرتا ہے

سایہ دیکھ کر میں دوڑی چلی جاتی ہوں
اپنے بھائی کے پاس جو آم کے سایہ دار درخت کی مانند ہے*

میرا بیٹا چھتری لیے دوسرے گاؤں گیا
بھری جوانی میں اسے گرمی لگ رہی ہے

نوٹ: *ان کے بھائی کا سایہ آم کے سایہ دار درخت کی طرح سایہ دیتا ہے۔

گلوکار: سیتا بائی اوبھے، سندھو اوبھے، مکتا بائی اوبھے، سُلوچنا ڈھگے، لکشمی بائی اوبھے، نندا اوبھے

گاؤں: کولاوڑے

بستی: کھڑکواڑی

تعلقہ: ملشی

ضلع: پونہ

ذات: مراٹھا

تاریخ: یہ گانے اور کچھ معلومات ۶ جنوری، ۱۹۹۶ کو ریکارڈ کیے گئے تھے۔ ویڈیو اور فوٹو ۳۰ اپریل، ۲۰۱۷ کو لیے گئے تھے۔

فوٹو: نمیتا وائکر اورسمیُکتا شاستری

پوسٹر: سِنچِیتا ماجی

ترجمہ نگار: انوشا اِرَم جاوید