شانتی نکیتن میں رابندر ناتھ کی مختلف شکلیں

’’میری ماں ان سے ایک بار ملی تھیں۔‘‘

شانتی نکیتن میں ہر کوئی جانتا ہے کہ ’’وہ‘‘ کون ہیں۔

بپن کرمکار اپنے ماہر ہاتھوں سے مٹی سے رابندر ناتھ ٹیگور کی ایک مورتی بنا رہے ہیں۔ وہ اسی عظیم ثقافتی شخصیت کی بات کر رہے ہیں، جن کا نام یہاں کی زندگی میں چاروں طرف دکھائی دیتا ہے۔ ’’شانتی نکیتن آنے والے سیاح رابندر ناتھ کی کوئی نہ کوئی چیز ضرور لے جاتے ہیں – مورتی ہو یا تصویر۔ جس طرح پوری جانے پر ہم جگن ناتھ کی مورتی خریدتے ہیں،‘‘ وہ عقیدت سے کہتے ہیں، اور ایک ہندو دیوتا کا موازنہ ۲۰ویں صدی کی اس بڑے ادیب سے کر رہے ہیں۔ مزیدار بات یہ ہے کہ شاعر کے نام کے آخری لفظ ’ٹیگور‘ (ٹھاکر) کا بنگالی تلفظ اسی زبان میں ’غیبی‘ یا ’خدائی‘ کے معنوں میں بھی استعمال ہوتا ہے – وہی زبان جسے ٹیگور نے اپنے ادب اور موسیقی سے مالا مال کیا۔

ایک صدی سے زیادہ عرصہ گزر چکا ہے، جب ٹیگور نے اُس زمانے کے ایک گاؤں میں اپنا آشرم اسکول اور یونیورسٹی (وشو بھارتی) قائم کی تھی۔ آج شانتی نکیتن مغربی بنگال کے بیر بھوم ضلع کا ایک مصروف قصبہ اور سیاحتی مرکز ہے۔ کولکاتا سے ایکسپریس ٹرین سے یہاں پہنچنے میں تین گھنٹے سے بھی کم وقت لگتا ہے۔

نوبل انعام یافتہ ٹیگور آج بھی شانتی نکیتن کی زندگی اور منظر نامہ میں ہر جگہ موجود ہیں – دکانوں کے ناموں میں، دیواروں پر آویزاں تصویروں میں، چھوٹے مورتیوں اور کپڑوں میں، سنیما ہالوں کے ناموں میں اور مختلف قسم کی یادگاری چیزوں میں۔ شانتی نکیتن میں شاید ہی کوئی قدم ایسا ہو، جو ٹیگور سے وابستہ کسی چیز کے سامنے نہ لے جائے۔

بپن (۶۲) بتاتے ہیں کہ ان کے ماموں ان کی ماں کو، جو تب چھوٹی بچی تھیں، رابندر ناتھ سے ملانے ان کے گھر لے گئے تھے۔ ’’دونوں نے کچھ باتیں کی تھیں، بس اتنا ہی،‘‘ وہ شرمیلی مسکراہٹ کے ساتھ بتاتے ہیں۔

بپن شانتی نکیتن کے مضافاتی علاقہ میں واقع آدتیہ پور گاؤں میں رہتے اور کام کرتے ہیں۔ گاؤں کی گلیوں سے گزرتے ہوئے مٹی کو پیروں سے روند کر تیار کرتے لوگ نظر آ جاتے ہیں۔ کہیں قسم قسم کی گڑیا اور چھوٹی بڑی مورتیاں سردیوں کی دھوپ میں سوکھ رہی ہوتی ہیں۔ ان مورتیوں کی قیمت ان کے سائز کے مطابق ۵۰ سے ۲۰۰ روپے تک ہے۔ بپن اور پورنیما کرمکار اپنے گھر کے آنگن میں کام کرتے ہیں۔ آنگن میں ٹیگور کی مورتیوں کی قطار لگی ہے۔ کچھ پر رنگ چڑھ چکا ہے، کچھ اپنی باری کا انتظار کر رہی ہیں۔ بپن مٹی کو سانچے میں دبا کر مورتیوں کی شکل بناتے ہیں۔

’’ہم کام کرتے ہیں، تاکہ پیٹ بھر سکیں،‘‘ وہ کہتے ہیں۔ اس کام سے ہونے والی آمدنی طے نہیں ہے۔ ’’سردیوں میں زیادہ کمائی ہوگی کیوں کہ اس وقت سیاح زیادہ آتے ہیں اور ہم تقریباً ۸۰۰۰ روپے تک کما سکتے ہیں،‘‘ بپن بتاتے ہیں۔ وہ اپنے ذریعہ بنائی گئی چیزیں کنکالی تلا اور سونا جھوری کے دو ہاٹوں (بازاروں) میں لے جا کر بیچتے ہیں۔ ’’گرمیوں اور برسات میں ان کی فروخت کم ہو جائے گی۔‘‘

سال ۲۰۱۱ کی مردم شماری کے مطابق، تقریباً ۱۸۰۰ کی آبادی والے آدتیہ پور میں زیادہ تر لوگ درج فہرست ذات کے ہیں۔ مٹی کا کام بپن کے خاندان کا روایتی پیشہ نہیں تھا۔ مغربی بنگال میں کرمکار کا شمار دیگر پس ماندہ طبقہ میں ہوتا ہے اور یہ لوگ روایتی طور پر لوہار کا کام کرتے رہے ہیں۔ لیکن لوہے کے کام سے فیملی کا گزارہ نہیں ہو پا رہا تھا۔ اس لیے انہوں نے مٹی کا کام اپنا لیا۔ بپن گزشتہ ۴۷ برسوں سے مٹی کا کام کر رہے ہیں۔ انہوں نے یہ ہنر اپنے بڑے بھائی کا ہاتھ بٹاتے ہوئے سیکھا تھا۔

اس فیملی کے پاس مشترکہ طور پر ۱۰ بیگھہ زمین تھی، جس پر وہ سبزیاں اور دھان اُگاتے تھے۔ لیکن زمین سے ہونے والی آمدنی بھی کم ہونے لگی اور تقریباً ۱۵ سال قبل انہوں نے پانچ بیگھہ زمین بیچ دی۔ بپن بتاتے ہیں، ’’میں نے اسے کچھ بابوؤں کو فروخت کر دیا، جو یہاں ہوٹل بنائیں گے۔ اسی کے پیسوں سے یہ گھر بنا۔‘‘ یہ کہتے ہوئے بپن ایک لمحہ کے لیے سر اٹھا کر دو منزلہ پختہ مکان کو دیکھتے ہیں، جہاں وہ پورنیما کے ساتھ رہتے ہیں۔ ’’اس کام سے ہونے والی آمدنی سے اتنا بڑا گھر بنانا میرے لیے کبھی ممکن نہیں ہوتا،‘‘ وہ کہتے ہیں۔

رابندر ناتھ کی مٹی کی مورتیاں بنانے کے علاوہ بپن وہ مصنوعی زیور بھی بیچتے ہیں، جنہیں پورنیما ہاتھ سے ڈیزائن کر کے بناتی ہیں۔ ان کے گھر سے تقریباً چار پانچ کلومیٹر دور کنکالی تلا میں پورنیما کے ذریعے بنائے گئے ہار اور بالیاں رابندر ناتھ کی مورتیوں کے مقابلے زیادہ تیزی سے فروخت ہوتی ہیں۔

لیکن بپن ہمیشہ امید بنائے رکھتے ہیں۔ وہ کہتے ہیں، ’’پچھلے اتوار کو میں نے سارے رابندر ناتھ بیچ دیے۔‘‘