زمین کے لیے پورنیہ کے سنتھالوں کی جدوجہد

اس موسم میں پورنیہ ضلع کے مکئی بیلٹ سے گزرتی ہوئی مرکزی پکّی سڑک کے دونوں کنارے سونے سے جَڑے ہوئے معلوم ہوتے ہیں۔ مکئی کی فصل کٹ چکی ہے اور کسانوں نے اپنے کھیتوں کے قریب سڑک کے دونوں کناروں پر زرد مکئی کی بالیوں کو سوکھنے کے لیے قالین کی طرح بچھا دیا ہے۔ چندوا-روپس پور آدیواسی ٹولہ کے قریب پہنچتے ہی ہم دیکھتے ہیں کہ سنتھال مرد اور عورتیں لکڑی کے ہل نما ڈنڈے سے بالیوں کو الٹ پلٹ رہے ہیں، تاکہ ان کی نمی جاتی رہے۔ نزدیک ہی کوئی چوکیدار پہرہ دے رہا ہوگا، جو تھوڑی دیر میں زمینداروں کے حصہ کی وصولی کے لیے ان کے دروازوں پر آ دھمکے گا۔ یہ وہ زمیندار ہیں جن کی زمینوں پر آدیواسی نسل در نسل بطور بٹائی دار کام کرتے آئے ہیں، اور جنہیں اب بھی اپنی پیداوار کا ایک حصہ دیتے ہیں۔ ریاست میں زمین کے حقوق کی اصلاحات کے برسوں بعد بھی ایسا ہو رہا ہے۔

مرکزی سڑک سے کچھ فاصلہ پر گاؤں کے قریب ان کے آباء و اجداد کی یادگار بھی پہرہ دے رہی ہے۔ وہ لوگ پانچ دہائی قبل ایک قتل عام کے دوران مارے گئے تھے۔ چہار دیواری والے کھیت کے اندر ایک بلند پلیٹ فارم پر ایک سفید ستون پر سنگ مرمر کی تختی لگی ہوئی ہے، جس پر ان تمام ۱۴ افراد کے نام درج ہیں جو ۲۲ نومبر ۱۹۷۱ کو اپنے زمینداروں کے ہاتھوں بے دردی سے قتل ہوئے تھے۔

’’پورا گاؤں کسی شمشان کا منظر پیش کر رہا تھا۔ ہر گھر سے آہیں نکل رہی تھیں اور دھواں اٹھ رہا تھا۔ لوگ زار و قطار رو رہے تھے۔ انہوں نے [زمینداروں کی نجی فوج نے] ۴۵ گھروں کو نذر آتش کر کے راکھ کے ڈھیر میں تبدیل کر دیا تھا۔‘‘ شیو نارائن کی عمر نے اس قتل عام کی یادوں کو دھندلا نہیں کیا ہے۔ اس وقت انہوں نے اس سانحہ کو ایک نوعمر بچے کے طور پر دیکھا تھا۔ وقت کے ساتھ بہار میں ان کے لوگوں کے لیے بہت سی چیزیں ویسی کی ویسی ہی ہیں۔

اُس وقت بھی، ’’یہ زمین کی لڑائی تھی،‘‘ اب ۷۰ سال کے ہو چکے شیو نارائن مُرمو کہتے ہیں۔ انہوں نے اس قتل عام میں اپنے دو رشتہ داروں کو کھو دیا تھا۔ ’’سورج ابھی غروب نہیں ہوا تھا۔‘‘ جولائی ۲۰۲۵ کی ایک شام کو جب ہم ان سے گفتگو کر رہے ہیں، تو وہ پچھلے زمانہ کی باتوں کو یاد کرنے لگتے ہیں۔ ’’وہ بندوقوں، لاٹھیوں، کلہاڑیوں سے مسلح ہو کر آئے تھے اور ہماری بستی کو چاروں طرف سے گھیر لیا تھا۔ انہوں نے ہمارے آدیواسیوں کے گھروں کو آگ لگا دی اور جو بھی ان کے راستے میں آیا اسے گولی مار کر زندہ جلا دیا،‘‘ وہ کہتے ہیں۔

لیکن خود شیو نارائن کے لیے یہ صدمہ ماضی میں مزید گہرا ہوتا چلا گیا۔ قتل عام کے تقریباً سات سال پہلے، جب وہ بمشکل ۱۰ سال کے تھے، تو ان کے والد لکھن لال ہیمبرم کو قتل کر دیا گیا تھا۔ قتل کی وجہ ایک بار پھر زمین ہی تھی۔ ’’وہ پڑھے لکھے تھے اور سنتھال آدیواسیوں کی زمین کے مالکانہ حقوق کی لڑائی لڑنے کے لیے عدالت جاتے تھے۔ ایک دفعہ ان سے ملنے آئے زمیندار کے لوگوں کو وہ چھوڑنے گئے اور پھر واپس نہیں آئے۔ تین دن بعد ان کی لاش گھر سے چار کلومیٹر دور جنگل میں ملی تھی۔ ان کا گلا کٹا ہوا تھا۔‘‘ اس معاملے میں کسی کو سزا نہیں ملی تھی۔

جب پورنیہ میں قتل عام کی ایک دہائی بعد ایک نچلی عدالت نے اس مقدمہ میں ۲۵ سے ۳۰ زمینداروں کو ۲۰ سال قید کی سزا سنائی تو شیو نارائن نے سوچا کہ وقت بدل رہا ہے۔

لیکن وہ صرف آدھی کہانی تھی۔

’’تقریباً ۲۵-۳۰ افراد کو مجرم قرار دیا گیا تھا، لیکن بعد میں سب کو ایک دوسری عدالت نے بری کر دیا تھا، اور کسی کو سزا نہیں ہوئی تھی،‘‘ ہرش وردھن کہتے ہیں۔ وہ لکشمی نارائن سدھانشو کے ۵۵ سالہ پوتے ہیں۔ سدھانشو ایک زمیندار اور چندوا-روپس پور قتل عام کے ایک ملزم تھے۔ ’’یہ سانحہ نہیں ہونا چاہیے تھا۔ مجھے افسوس ہے کہ اس کی وجہ سے ایک پوری نسل ۲۰ سے ۳۰ سال سے زیادہ عرصے تک مقدمات میں الجھی رہی اور وہ لوگ کوئی اور کام نہ کرسکے،‘‘ ہرش وردھن کہتے ہیں۔

ہرش وردھن کا دعویٰ ہے کہ سنتھالوں کو یہ زمین کبھی دی ہی نہیں گئی تھی۔ ’’زمین ہماری ہے، ہم زمین کا ٹیکس ادا کر رہے ہیں، لیکن ہم اس پر کھیتی نہیں کر سکتے۔ ہوسکتا ہے کہ انہوں نے زمین بٹائی کی بنیاد پر حاصل کی ہو، لیکن مالکانہ حقوق ان کے پاس کبھی نہیں تھے۔‘‘

سنتھالوں کو انیسویں صدی میں ایسٹ انڈیا کمپنی کے ذریعہ انگریز بہار لے کر آئے تھے۔ مقصد تھا جنگلات کو صاف کر کے زمین کو کاشت کے قابل بنانا اور اس سے آمدنی حاصل کرنا۔ مؤرخ کرسٹوفر وی ہِل نے اپنی کتاب ریور آف سارو میں سنتھال آدیواسیوں کی بہار میں ہجرت اور ان کی زمین کے حقوق کے لیے جدوجہد کی تفصیلات بیان کی ہے۔ وہ لکھتے ہیں کہ سنتھال نیپال اور مغربی بنگال کی سرحد سے متصل شمالی علاقہ میں آئے، جو دربھنگہ راج کے سب سے بڑے اور امیر ترین زمینداری نظام کے تحت تھا۔ آدیواسی کئی گروہوں میں آئے، ہر گروپ کی قیادت سنتھال سردار کر رہے تھے۔ ان سرداروں کو حکم دیا گیا تھا کہ وہ اپنے لوگوں کو جنگلات صاف کرنے اور بعد میں اس زمین پر کاشتکاری کرنے کے لیے کہیں۔

ہر آدیواسی سردار کاشتکاروں سے کرایہ وصول کر کے دربھنگہ راج کو ادا کرتا تھا۔ سنتھالوں کو بغیر کسی رسید کے بٹائی دار یا حصہ دار بنا دیا گیا تھا۔ انہوں نے جنگل اور دلدلی زمین میں ہل چلانے سے لے کر کھیتی کی منصوبہ بندی کرنے، فصل کی بوائی، کٹائی اور اناج کو چھانٹنے تک سب کچھ کیا۔ اور آخر میں بٹائی کی شرائط کے مطابق پیداوار کو تقسیم کر کے ایک حصہ زمیندار کے حوالے کیا۔

’’وہ مرضی کے بٹائی دار بنے رہے۔ اور دلال اپنے نام پر زمین کا اندراج کروا کر طاقتور ہوتے گئے،‘‘ آنند چکرورتی ’رپورٹ آن دی ریجنل سروے اینڈ سیٹلمنٹ‘ میں لکھتے ہیں۔

جن سنتھال آدیواسیوں نے پیداوار کا ایک حصہ مالک کو نہیں دیا تھا، انہیں زمین سے بے دخل کر دیا گیا تھا۔ زمین کے حقوق کے لیے ان کی جدوجہد کبھی نتیجہ خیز ثابت نہیں ہوئی، اس وقت بھی نہیں جب ۱۹۳۸ میں انہوں نے پورنیہ کے ڈسٹرکٹ مجسٹریٹ ولیم جارج آرچر کو اپنے مطالبہ کا خط پیش کیا تھا۔ سال ۱۹۴۰ میں بھی نہیں، جب انہوں نے رسید کے بغیر زمیندار کو بٹائی کا حصہ ادا کرنے سے انکار کر دیا تھا۔ اور ملک کی آزادی کے بعد بھی نہیں، جب بہار لینڈ ریفارمز ایکٹ (اصلاحات اراضی قانون، بہار) متعارف کرایا گیا تھا جس کے تحت ۱۹۵۰ میں زمینداری نظام کو ختم کر دیا گیا تھا۔

زمین کی ملکیت کے یہ مسائل صرف ایک یا دو اضلاع کے آدیواسیوں تک محدود نہیں ہیں۔ بہار حکومت کی ذات پات سروے رپورٹ - ۲۰۲۳ کے مطابق ریاست میں سنتھالوں کی آبادی تقریباً ۷۶ء۵ لاکھ ہے۔ یہ ریاست کی کل ۲۱ لاکھ ۹۹ ہزار ۳۶۱ کی آدیواسی آبادی کا ۱۸ء۲۶ فیصد ہے۔ شمالی بہار کے زیادہ تر سنتھال زمین کے مالکانہ حقوق کے لیے جدوجہد کر رہے ہیں۔

غیر منقسم بہار میں آدیواسیوں کی ایک کثیر آبادی تھی۔ جب سال ۲۰۰۰ میں بہار کی تقسیم ہوئی، تو یہاں کی آدیواسیوں کی بھاری اکثریت نئی ریاست جھارکھنڈ میں چلی گئی تھی۔ اور یہی وجہ ہے کہ اس خطہ میں آدیواسی زیادہ تر جھارکھنڈ کے حوالے سے زیر بحث آتے ہیں۔

بہار میں باقی ماندہ آدیواسیوں کی تعداد تقریباً ۲۲ لاکھ ہے، جو ریاست کی آبادی کا صرف ۶۸ء۱ فیصد ہے۔ نیز، وہ نصف درجن سے زیادہ اضلاع میں بکھرے ہوئے ہیں۔ سرکاری اعداد و شمار کے مطابق، بہار کے ۴۵ ہزار سے زیادہ گاؤوں میں سے صرف ۱۸۰ گاؤں ایسے ہیں جہاں آدیواسی اکثریت میں ہیں۔ اس کا مطلب ہے کہ ان کے ساتھی آدیواسیوں کے پاس جھارکھنڈ میں جس طرح کی سودے بازی کی طاقت یا اجتماعی طاقت ہے وہ یہاں نہیں ہے۔

سال ۱۹۷۱کے بعد حکومت کی جانب سے ملی ۹ء۰ ایکڑ زمین پر شیو نارائن اب کھیتی کرتے ہیں۔ ’’زمیندار اب بھی کہتا ہے کہ یہ ان کی زمین ہے ہماری نہیں، لیکن ہم سرکار کو کرایہ ادا کر رہے ہیں۔ ہم چاہتے ہیں کہ زمینی تنازعات ختم ہوں، ورنہ وہ امیر ہیں اور کسی بھی وقت قبضہ کر سکتے ہیں۔‘‘ شیو نارائن کے لیے زمین سے ان کی جذباتی وابستگی ​​اس حقیقت پر غالب ہے کہ انہیں اس سے بہت کم پیداوار حاصل ہوتی ہے۔ ’’ہم مکئی کے ہر ایک دانہ کو اگانے پر ۱۰ روپے خرچ کرتے ہیں، ہمیں کوئی فائدہ نہیں ہوتا، لیکن چونکہ ہمارے پاس زمین ہے، ہم کھیتی کرتے ہیں، ہمارے آباء و اجداد کاشتکاری کرتے رہے ہیں، تو ہم کیوں چھوڑیں؟‘‘ وہ کہتے ہیں۔

تقریباً ۱۰۰ کلومیٹر دور سوپول ضلع کے ہانسا گاؤں میں ایک اور سنتھال آدیواسی، ۵۰ سالہ تالیشور باسکی اپنے والد کے نقش قدم پر چل رہے ہیں۔ ان کا صرف یہ کہنا ہے، ’’سرکار کوئی سالیوشن [حل] دے!‘‘ اپنے کچے مکان کے اندر بیٹھ کر وہ ۲۰۰ سنتھال آدیواسی خاندانوں کے زمینی دستاویزات کی جانچ کر رہے ہیں، تاکہ یہ یقینی بنایا جا سکے کہ کاشت شدہ زمین کے کھاتہ نمبر اور رقبہ صحیح طریقہ سے درج ہوں۔

وہ حکومت کے ساتھ خاموشی سے جنگ لڑتے ہیں، علاقے میں سماجی کارکنوں کی مدد سے درخواستیں داخل کرتے ہیں، سرکاری دفاتر کا دورہ کرتے ہیں اور ان بٹائی داروں کے مطالبات پیش کرتے ہیں، جن کے پاس ابھی تک زمین کے مالکانہ حقوق نہیں ہیں۔ ان میں سے کوئی بھی قانونی لڑائی لڑنے کا متحمل نہیں ہو سکتا۔ باسکی کہتے ہیں، ’’میرے والد کا ایک دہائی قبل انتقال ہو گیا تھا، اس لیے میں یہ کام کر رہا ہوں۔ ہم ان کاغذات کو کئی بار ڈسٹرکٹ ہیڈ کوارٹر لے گئے ہیں، لیکن کوئی جواب نہیں ملا ہے۔‘‘

آخری بار انہوں نے سوپول میں اصلاحات اراضی کے ڈپٹی کلکٹر کے پاس ۳۱ مارچ ۲۰۲۵ کو درخواست جمع کروائی تھی۔ جب انہوں نے کاغذات ایک اہلکار کو دیے تو اس نے یہ کہتے ہوئے انہیں واپس کر دیا کہ وہ سمجھ نہیں پا رہا ہے کہ اس میں کیا لکھا ہے۔ ’’تو، میں نے ان سے پوچھا، اگر وہ کاغذات نہیں پڑھ سکتے، تو پھر انہیں نوکری کیسے ملی،‘‘ باسکی کہتے ہیں۔

بہار میں سنتھالوں کا دعویٰ ہے کہ وہ ۱۹۵۰-۵۱ کے درمیان ریاست میں بہار کے اصلاحات اراضی قانون کے نفاذ سے کئی دہائیوں پہلے اپنی زمین پر کاشتکاری کر رہے ہیں۔ قانون کے لحاظ سے آدیواسیوں کو زمین کی واضح ملکیت ملنی چاہیے تھی۔ لیکن اس کے بجائے دلال زمینیں اپنے نام کروا کر غلط طریقے سے کرایہ وصول کرتے رہے۔

ہانسا گاؤں کے ایک کسان ۴۸ سالہ لال سورین کہتے ہیں، ’’جب ہمارے آباء و اجداد یہاں آئے تو یہ پورا علاقہ جنگل تھا، لیکن زمین زرخیز ہونے کی وجہ سے انہوں نے جنگل کاٹ کر انتھک محنت کر کے زمین کو قابل کاشت بنایا۔ جب فصلیں اچھی اگنے لگیں تو زمینداروں نے دعویٰ کرنا شروع کر دیا کہ یہ ان کی زمین ہے۔ پھر زمینداروں نے کہا، ’آپ لوگ کھیتی کریں، اور اس میں سے کچھ حصہ ہمیں بھی دیں۔‘ ہمارے آباء و اجداد نے اس سے اتفاق کیا تھا،‘‘ وہ کہتے ہیں۔

پچھلی ڈیڑھ دہائی میں آدیواسیوں نے ایسے معاملات کی تعداد میں اضافہ ہوتے ہوئے دیکھا ہے، جن میں ان کی زمینیں ان کے علم کے بغیر فروخت کی جا رہی ہیں۔ تالیشور کہتے ہیں، ’’حکومت کی طرف سے کوئی سنوائی نہیں ہے۔ ہمیں نہیں معلوم کہ وہ کیا کر رہی ہے۔ اگر یہ کام یہاں سے نہیں ہو سکتا، تو وہ بھی بتائیں، لیکن حکام ہمیں یہ بھی نہیں بتا رہے ہیں۔ اور زمیندار ہماری زمینیں فروخت کر رہے ہیں۔‘‘ ان کا اندازہ ہے کہ زمیندار ان کے گاؤں میں ۱۰ ایکڑ زمین پہلے ہی فروخت کر چکے ہیں۔

آٹھ سال پہلے، ۲۰۱۷ میں، کچھ نامعلوم افراد نے ہانسا گاؤں کے رہائشی ۵۵ سالہ سورت لال مرمو کو ان کی زمین تک پہنچنے سے روک دیا تھا۔ ’’جب ہم کھیت جوتنے گئے تو وہاں پہلے سے موجود لوگوں نے کہا کہ یہ زمین انہیں بیچ دی گئی ہے اور اب یہ میری نہیں رہی۔ انہوں نے ہمیں بتایا کہ زمین مالکان نے اس زمین کو فروخت کر دیا ہے۔ اور اب انہوں نے اس زمین پر مکان تعمیر کر لیا ہے،‘‘ وہ کہتے ہیں۔

سورت لال نے زمین مالکان کو ڈھونڈنے کی کوشش کی، لیکن وہ نہیں مل سکے۔ اس زمین کے ایک نہیں بلکہ کئی مالک تھے۔ انہیں صحیح تعداد کا کوئی اندازہ نہیں ہے، کیونکہ وہ صرف چوکیدار کے ساتھ معاملہ کرتے ہیں۔ ’’زمیندار نے چوکیدار کو رکھا ہے، جو لاٹھی لیکر گھومتا رہتا ہے۔ وہ دیکھتا رہتا ہے کی کب فصل کٹی۔ وہ یہ بھی جان سکتا ہے کہ کس کے پاس کتنا اناج ہے اور آدھا لے کر چلا جاتا ہے،‘‘ وہ کہتے ہیں۔

مرمو کے پاس اب صرف ۲ ایکڑ زمین رہ گئی ہے، لیکن انہیں ڈر ہے کہ یہ زمین بھی فروخت کر دی جائے گی اور وہ بے زمین ہو جائیں گے۔ وہ اصلاحات اراضی کے کلکٹر کے دفتر کا کئی چکر لگا چکے ہیں، لیکن وہاں سے کوئی جواب نہیں ملا ہے۔ وہ کہتے ہیں کہ آخری بار کالے کوٹ والے ایک افسر نے مجھ سے پوچھا کہ کھتیان [زمین کے کاغذات] میں کس کا نام ہے، میں نے بتایا کہ یہ نام میرے والد کا ہے جو اب نہیں رہے۔ اس آدمی نے دو ٹوک انداز میں کہا کہ جب میرے والد چلے گئے تو میرا زمین پر کوئی دعویٰ نہیں ہو سکتا۔ میں غصے میں تھا۔ میں نے افسر سے کہا کہ اگر میرے والد فوت ہو گئے ہیں، تو زمیندار کے والد بھی نہیں رہے۔ زمین ان کی بھی ملکیت نہیں ہے۔ میں نے ان سے پوچھا کہ وہ زمین کو ان آباد [غیر محسوب زمین جسے سرکاری ملکیت سمجھا جاتا ہے] بہار سرکار کے نام سے کیوں نہیں منتقل کر دیتے۔‘‘

ریاست میں آدیواسی پریشد کے صدر وجے اُراؤں کہتے ہیں، ’’بہار میں آدیواسیوں کے علم کے بغیر شکمی زمین [کرایہ دار کسانوں کو پٹّہ پر دی گئی] مالکان کی جانب سے ایسی زمینوں کے فروخت کے معاملے میں بے تحاشہ اضافہ ہوا ہے۔ لیکن اگر ایک شکمی دار [کاشتکار] مر گیا ہے، تو معاہدہ ختم نہیں ہوتا ہے۔ اس کا بیٹا شکمی دار ہونے کا دعویٰ کرسکتا ہے اور زمین پر دعویٰ کرسکتا ہے۔‘‘

ماہر سماجیات اور مصنف تیجکر جھا کا کہنا ہے کہ سنتھالوں کو زمین کی ملکیت کا قانونی حق حاصل ہے۔ ’’اگر کوئی ان کی زمین کی ملکیت کا دعویٰ کر رہا ہے اور اسے فروخت کر رہا ہے، تو یہ مکمل طور پر غیر قانونی ہے۔ سنتھال جس زمین پر کاشتکاری کر رہے ہیں، اس پر ان کا حق ہے، اور اگر وہ عدالت میں جائیں گے تو فیصلہ ان کے حق میں آئے گا۔‘‘

لیکن وجے اُراؤں کے مطابق یہ اور بھی آسان ہے۔ ’’آدیواسیوں کو زمین کے مالکانہ حقوق کے لیے مقامی سرکل آفیسر کے پاس ایک درخواست جمع کرنی ہوگی، جو اسے ڈائریکٹریٹ آف لینڈ ریکارڈ آف سروے کے پاس بھیج دے گا۔ وہاں سے انہیں مالکانہ حقوق فراہم کر دیے جائیں گے۔‘‘ وہ کہتے ہیں کہ یہ عمل آسان ہے، لیکن افسران اس جانب کبھی توجہ نہیں دیتے۔

زمیندار نے رازداری کے ساتھ سورت لال کی ۶۲۵ء۰ ایکڑ زمین فروخت کر دی ہے۔ اور باقی ماندہ زمین پر جو کچھ وہ اگاتے ہیں اس کا نصف حصہ زمیندار کے حوالے کر دیتے ہیں، جیسا کہ ان کے آباء و اجداد نے طے کیا تھا۔ ’’ہم بنیادی طور پر دھان، مکئی اور راگی اگاتے ہیں۔ کاشتکاری بہت محنت طلب کام ہے اور بہت مہنگی بھی ہے۔ ایک کٹھّہ [۰۳۱۲۵ء۰ ایکڑ] زمین کاشت کرنے میں ہماری لاگت ۱۵۰۰ روپے آتی ہے۔ ہم سب کچھ کرتے ہیں اور پھر زمیندار پیداوار کا آدھا لے جاتا ہے،‘‘ وہ کہتے ہیں۔

’’ہمیں ڈر ہے کہ ہماری پوری زمین چھین لی جائے گی۔ اگر جمع بندی [زمین کے ریکارڈ] مکمل کر دی جائے اور حکومت ہمیں کرایہ کی رسیدیں دینا شروع کر دے تو ہمیں سکون ملے گا،‘‘ وہ کہتے ہیں۔

اس دوران، ان کے ۲۰ اور ۲۷ سال کی عمر کے بچے تمل ناڈو میں ایک فیکٹری میں کام کرنے کے لیے ہجرت کر چکے ہیں۔ وہ بھی پڑوسی اضلاع میں اینٹوں کے بھٹوں پر کام کرنے کے لیے جاتے ہیں اور بعض اوقات پنجاب اور دہلی کے دور دراز مقامات کا بھی سفر کرتے ہیں، جب کہ ان کی بیوی انجولا دیوی گھر کی دیکھ بھال کرتی ہیں۔ ’’اگر ہم اپنی کھیتی کی پیداوار کا نصف حصہ انہیں دیتے رہیں گے تو ہمارا کنبہ کیسے زندہ رہے گا؟‘‘ سورت لال پوچھتے ہیں۔

یہ اسٹوری تکشیلا فیلوشپ ۲۰۲۵ کے تحت لکھی اور شائع کی گئی ہے۔

ترجمہ نگار: شفیق عالم