کھیل مٹائے زبان کی دوری

سات لڑکیاں، چھ گاؤں، پانچ مادری زبانیں، دو کھیل، اور کھیل کی ایک زبان!

وسنت شالہ کے کھیل کے میدان میں ۱۲ سالہ رنجن راٹھوا، ۱۱ سالہ جیوتی بھیل، ۹ سالہ شرمیلا دھائکی، ۱۰ سالہ کنجل نائکہ، اور ۱۰ سالہ نیرل راٹھوا کھیل میں مصروف ہیں۔ وسنت شالہ ان کا رہائشی پرائمری اسکول ہے جو گجرات کے چھوٹا ادے پور ضلع کے آدیواسی گاؤں تیج گڑھ میں کورج پہاڑی کے دامن میں واقع ہے۔

اڑکو دڑوکو دہی دڑوکو
شراون گاجے، پِلّو پاکے…

یہ گجراتی کے بڑ بڑ گیتوں، یا بچکانہ تک بندیوں کے ایک وسیع ذخیرہ سے لیا گیا ایک گیت ہے، جسے ریاست بھر کے بچے کھیلتے ہوئے گاتے ہیں۔ دلچسپ بات یہ ہے کہ گیت کی زبان گروپ کے کسی بچے کی مادری زبان نہیں ہے۔ اپنے اسکول سے ۳۰ سے ۵۰ کلومیٹر کے دائرہ میں واقع گاؤوں کی رہنے والی پانچوں لڑکیاں اپنے گھروالوں سے اپنی اپنی مخصوص آدیواسی زبانوں جیسے راٹھوی، دھانکی، ڈونگرا بھیلی، نائکی وغیرہ میں بات کرتی ہیں۔ لیکن مرکزی دھارے کی گجراتی زبان ہی آدیواسی اکیڈمی کے اس کیمپس، جہاں ان کے اسکول اور ہاسٹل واقع ہیں، میں ان کی رابطہ کی زبان بن گئی ہے۔

وسنت شالہ میں رہ کر تعلیم حاصل کرنے والے بچوں کے والدین زیادہ تر غریب مہاجر مزدور ہیں، جو سال کے زیادہ تر حصوں میں روزی روٹی کی تلاش میں گھومتے پھرتے رہتے ہیں، جس کی وجہ سے ان کے لیے اپنے بچوں کی تعلیم کا معقول انتظام کرنا مشکل ہو جاتا ہے۔ یہ کہنا مشکل ہے کہ آیا نقل مکانی اور دوسروں کے ساتھ (عموماً غالب برادریوں کے ساتھ) تعامل نے گجراتی کو ان کی ثقافت میں داخل ہونے کی اجازت دی ہے، یا یہ حقیقت پر مبنی ایک اور طرح کی ضرورت ہے جس کی وجہ سے انہیں روایتی نظام تعلیم کا حصہ بننے کے لیے تیار ہونا پڑا۔ یہ ایک ایسی ضرورت ہے جو ان کے لیے اس حقیقت کو ناگزیر بناتی ہے کہ وہ آسانی کے ساتھ یہ زبان سیکھیں اور بولیں۔

ویڈیو: ۱

’’ہوے مارو وارو [اب میری باری ہے]،‘‘ لکشمی اپنے پاس بیٹھی ایلیسا سے نرمی کے ساتھ آہستہ سے گجراتی میں کہتی ہیں۔ وہ چھوٹی ٹہنی کو اپنے درمیان بنائے ریت کے ایک لمبے ڈھیر کے نیچے چھپانے کے لیے اٹھاتی ہے۔ وہ اسی اسکول کے احاطہ کی دوسری جانب کاٹھیو شودھوانی رَمت (’ٹہنی تلاش کرو‘) کھیل رہی ہیں۔ کاونت تعلقہ کے امباڈونگر گاؤں سے تعلق رکھنے والی ۱۱ سالہ ایلیسا بھیل گھر میں بھیلی بولتی ہے اور دھورکووا گاؤں کی ۱۱ سالہ لکشمی نائکہ نائکی بولتی ہے۔ ان کے کھیل میں زیادہ تر روایتی کھیلوں کی طرح بہت کم وسائل کی ضرورت پڑتی ہے۔ یہاں آپ کو صرف کچھ ریت اور دو کھلاڑیوں کی ضرورت ہے۔ ریت کو ایک لمبے ڈھیر کی شکل میں جمع کیا جاتا ہے، اور ایک کھلاڑی ڈھیر کے اندر لکڑی کی ایک چھوٹی چھڑی چھپا دیتا ہے۔ دوسرے کھلاڑی کو چھپی ہوئی چھڑی تلاش کرنی پڑتی ہے تاکہ اسے اگلی بار چھپانے کی باری مل سکے۔

ویڈیو: ۲

ترجمہ نگار: شفیق عالم