احمد آباد کے کباڑ چننے والے

’’میرا نام تلسی بھائی نارن بھائی ہے، لیکن اگر آپ کو مجھے ڈھونڈنا ہے تو آپ کو کہنا پڑے گا کہ ’بچّن کو بلاؤ‘۔ سبھی مجھے اسی نام سے جانتے ہیں،‘‘ تلسی بھائی وضاحت کرتے ہیں کہ لوگ انہیں کیوں پیار سے اس فلمی سپر اسٹار کے نام سے پکارتے ہیں۔

یہ ۶۰ سالہ بزرگ اپنے بیٹے تنو بھائی کے ساتھ احمد آباد کی ایک کھلی بستی، گل بائی ٹیکرا کے قریب فٹ پاتھ پر رہتے ہیں۔ ان کی بیوی کی موت ان کے بیٹے تنو بھائی کی پیدائش کے فوراً بعد واقع ہو گئی تھی۔ ’’میری دادی نے میری پرورش کی ہے۔ وہ اب بھی زندہ ہیں اور ان کی عمر سو سال سے زیادہ ہو چکی ہے،‘‘ تنو بھائی، جو اب تیس برس کے ہیں، ہمیں بتاتے ہیں۔

باپ اور بیٹے دونوں صبح نو بجے سے رات نو بجے تک کباڑ اکٹھا کرتے ہیں، اور اسے میم نگر میں بھنگار والوں (کباڑ یوں) کو فروخت کرتے ہیں۔ میم نگر شہر کا ایک تعلقہ ہے، جہاں کباڑ چننے والے کلوگرام کے حساب سے اپنی جمع کی ہوئی چیزیں فروخت کرتے ہیں۔

جس دن اس رپورٹر کی ان سے ملاقات ہوئی، اس دن انہوں نے دوپہر دو بجے سے کام کر کے تقریباً چار کلو پلاسٹک کی بوتلیں اور ایک کلو گتے جمع کیے تھے، جسے کباڑ والوں سے فروخت کر کے انہوں نے ۱۱۰ روپے کمائے تھے۔ تلسی بھائی کہتے ہیں، ’’اس سال گرمی بہت زیادہ تھی، ہم بیمار پڑ جاتے۔ ہم نے جو گتے جمع کیے تھے ان کا استعمال دن میں گرمی سے نجات حاصل کرنے کے لیے پنکھے بنا کر کیے۔‘‘

وستر پور، میم نگر اور نارن پورہ کے درمیان روزانہ تقریباً پانچ کلومیٹر کا فاصلہ طے کرتے ہوئے، دونوں باپ بیٹے سات سالوں سے کباڑ جمع اور فروخت کر رہے ہیں۔ مانسون کے مہینوں میں جب یہ کام مشکل ہو جاتا ہے، تو یہ دونوں اس موسم کے بعد آنے والے گنیش چترتھی کے تہوار کے لیے مورتیاں بناتے ہیں۔

’’پہلے میں چین، انگوٹھیاں، اور دھات اور موتیوں کی چیزیں بنانے اور فروخت کرنے کا کام کرتا تھا۔ چونکہ مالک نے شہر چھوڑ دیا، اس لیے دکان بند ہو گئی اور میں نوکری سے ہاتھ دھو بیٹھا،‘‘ تلسی بھائی کہتے ہیں۔ ’’ان چیزوں کو پہلے میں گوکل، متھرا، دوارکا ہر جگہ پہنچانے جایا کرتا تھا۔ اب میں یہی کام [کباڑ چننے کا] کرتا ہوں،‘‘ وہ کہتے ہیں۔

ایسا ہی معاملہ ۷۵ سالہ کاموبین واگھیلا کا ہے جو نارن پورہ میں رہتی ہیں۔ پہلے وہ گھریلو ملازمہ کے طور پر کام کرتی تھیں، اب اپنے پانچ پوتے پوتیوں، جن کی وہ خود پرورش کر رہی ہیں، کی کفالت کے لیے کباڑ جمع کرتی ہیں۔ سال ۲۰۲۳ میں ان کے بیٹے اور بہو دوںوں کی موت واقع ہو گئی تھی۔

دادی صبح سے شام تک کام کرتی ہیں، دوپہر کو گھر واپس آ کر چھوٹے بچوں کو کھانا کھلاتی ہیں، جن میں دو پوتیاں بھی شامل ہیں جو بصارت سے محروم ہیں۔ کبھی کبھار وہ کچھ اضافی روپے کمانے کے لیے صفائی کا اضافی کام بھی کرتی ہیں۔

ان کے بچوں میں سے کوئی بھی اسکول نہیں جاتا۔ ’’ان کو چھوڑنے اور لانے کون جائے گا؟‘‘ وہ پوچھتی ہیں۔ ’’میونسپلٹی کا اسکول بہت دور ہے اور وہ خود سے نہیں جا سکتے۔‘‘

کباڑ چننے والے صحت کے خطرات سے دو چار ہوتے رہتے ہیں جن میں سانس، معدے، اور جلد کی بیماریوں کے بڑھتے ہوئے خدشات کے ساتھ ساتھ کٹنے پھٹنے اور جانوروں کے کاٹنے کے خطرات بھی شامل ہوتے ہیں۔ سال ۲۰۲۳ کے اس مطالعہ کے مطابق ہندوستان میں کباڑ کے انتظام کے شعبہ میں تقریباً ۴۰ لاکھ کارکن مصروف عمل ہیں۔

چالیس سالہ ریتربین بھی شہر کا کباڑ جمع کرتی ہیں۔ وہ کہتی ہیں، ’’بعض دنوں میں، میں غسل بھی نہیں کر سکتی۔ آپ ہی بتائیے کہ ایسا کام کرنے والا کوئی آدمی بغیر غسل کیے سو سکتا ہے کیا؟ ان دنوں میں سو بھی نہیں سکتی۔ مجھے اپنے جسم پر گندگی محسوس ہوتی ہے۔‘‘

وہ نارن پورہ میں ایک فٹ پاتھ پر رہتی ہیں۔ عوامی باتھ روم میں ۱۰ روپے ادا کرکے وہ کسی نہ کسی طرح نہانے اور کپڑے دھونے کا انتظام کرتی ہیں۔

’’میں بمشکل اتنا کماتی ہوں کہ کھانا کھا سکوں۔‘‘ اپنی ساڑی میں بندھے ہوئے چپس کا پیکٹ کھولتے ہوئے وہ کہتی ہیں، ’’میں نے تین دن سے کھانا نہیں کھایا۔ میرے صاحب کو پتہ چلا تو انہوں نے مجھے چپس کا یہ پیکٹ خرید دیا۔‘‘

وہ اپنے بازوؤں پر لگے کئی زخموں کو دکھاتی ہیں، ’’پڑوس میں ہر شخص جانتا ہے کہ میرا شوہر مجھے مارتا پیٹتا ہے۔ لیکن وہ کچھ نہیں کر سکتے۔ وہ نشہ میں دھت ہو کر مجھے مارتا ہے، وہ برتن پھینک کر بھی مارتا ہے۔‘‘

’’وہ پیسہ کماتی ہیں لیکن ان کا شوہر شراب پر خرچ کر دیتا ہے۔ کیا یہ انصاف ہے؟‘‘ شاردابین کہتی ہیں، جو ریتربین کی ۷۰ سالہ پڑوسن ہیں اور کباڑ چننے کا کام کرتی ہیں۔

’’میں اپنے لیے کسی ایسے کام کی تلاش میں ہوں، جو میں کر سکوں۔ اگر مجھے کوئی اچھا کام مل جائے تو میں اپنے شوہر سے دور ہو سکتی ہوں۔ میرے پاس سارا احمد آباد ہے، میں ایسا کیوں نہ کروں؟‘‘ ریتربین کہتی ہیں۔

’’لیکن ہمیں یہ کام کرنا ہے،‘‘ شاردابین کہتی ہیں، ’’ہم ہریجن ہیں، یہی وہ کام ہے جو ہم کرتے ہیں۔‘‘