‘मोर जइसने मन देंवता नइ बने सकंय‘

नामघर के भूंइय्या माटी के कतको दीया ले सजे हवय जेन ह भूंइय्या ला धीरे-धीरे उजेला करत हवंय, अऊ धीरे-धीरे अवेइय्या देखेइय्या मन ला रद्दा दिखावत हवय. गायन (गायक) अऊ बायन (ढोल बजेइय्या) धार धरे ठाढ़े हवंय: ढोल बजेइय्या अपन सीना मं पारंपरिक असमिया बाजा खोल ला लटकाय हवंय; जइसने बजेइय्या बजाय ला सुरु करथें, पीतल के बड़े झांझ (बर ताल) दीया के बरत उजियार मं झिलमिलावत हवंय.

संझा के सूत्रधार, कथावाचक, बोले सुरु करथे त खोली मं चुप्पी छा जाथे.बिपुल दास उजियार मं आथे.

अऊ रात भर चलेइय्या भाओना- असम के पारंपरिक वैष्णव धरम के थियेटर रंगमंच – एक जीता जागता अऊ गहिर भाव के संग सुरु होथे. नाटक अधिकतर महाकाव्य रमायन अऊ महाभारत उपर रहिथे, अऊ एक ठन प्रसंग ला नाटक करके दिखाय जाथे.

बिपुल के पसंदीदा किरदार महाभारत के पांडव मन के महतारी कुंती आय. वो ह मुचमुचावत कहिथे, “गाँव के लोगन मन मोला कुंती कहिथें.” बेवा महतारी के हाथ पले-बढे, वो ह कहिथे के महतारी के मया ले ओकर सहज लगाव हवय. मोला बिस्वास हवय के मोर भीतरी एक झिन महतारी हवय, जेन ह मोला कुंती के किरदार ले जोड़थे.” वो ह अपन पसंद के गीत के दू लाइन गाथे:

बिपुल बचपना मं भाओना नृत्य देखत रहय. वो ह कहिथे, “मोर गाँव मं पहिलीच ले भाओना संस्कृति के रंग चढ़े रहिस,” अऊ कचू गाँव मं ओकर परोसी मन वो मन ला नृत्य करे बर आगू बढ़ाइन. वो ह कहिथे, “ वो मन मोर हुनर ला चिन्हीन अऊ मोला भरपूर मदद करिन. नाटक ले लेके पहिनावा अऊ आवाज बदले तक ले, मोर गाँव के लोगन मन मोला ये कला सिखाय हवंय.”

15 बछर के उमर मं अपन पहिली किरदार बर – वो ह केसरिया अऊ उज्जर रंग के लुगरा पहिरे रहिस अऊ ‘सीता हरण’ नाटक मं देवी सेती के किरदार मं स्टेज मं आइस

अब, वइसे करीबन 20 बछर गुजर चुके हवय, जब वो ह वो पहिली दिन के बात कहिथे त ओकर आंखी मं वो सुग्घर सुरता ले चमके उठथे: “ मोला भारी बढ़िया लगिस. लोगन मन मोर नाटक मं मोर काम ला देख के सराहना करिन.”

भओना कलाकार असम के लखिमपुर जिला मं अपन घर मं ये रिपोर्टर ले गोठियावत हवय. ओकर कैवर्त समाज (राज सरकार मं जाति के रूप मं सूचीबद्ध) के करीबन 70 ठन घर, दबंग जात के मोहल्ला ले थोकन दूरिहा मं हवय. ओकर समाज के अधिकतर परिवार बनी-भूति, थोर-बहुत खेती धन छोट-मोट बेवसाय करके गुजारा करथें.

“मोर [ छोटे जात] सरनेम सेती, मोला आखिरी बखत मं कतक भाओना ले निकार देय गीस,” ये दलित कलाकार ह पारी ला बताइस. “फेर हमर लोगन मन सांस्कृतिक रूप ले समृद्ध हवंय, ओकर मन ले घलो अगर-उछर, विपुल गरब ले कहिथे. “आमाक तेओँलोकर निमन्त्रणर प्रयोजन नाइ. आमि आमार निजस्व आरु सांस्कृतिक मञ्च गढ़ि तुलिछो. आमि स्वाधीन.” [हमन ला अब वो मन के नेवता के जुरत नइ ये. हमन अपन नामघर अऊ सांस्कृतिक मंच बना ले हवन, हमन आजाद हवन].”

भाओना करके होवेइय्या कमाई 1,000-1,500 रूपिया के बीच मं होथे अऊ ये हमेसा बखत मं नइ मिलय; बिपुल अक्सर ये काम फोकट मं करथे.

काम-बूता के कमी सेती, ये दलित कलाकार ह कतको किसम के किरदार ला करथे. 30 बछर के ये कलाकार दिन मं किसान आय, घर के तीन एकड़ के खेत मं बूता करते जिहां वो ह अपन खाय बर धान अऊ बेचे बर सरसों कमाथे. संझा के, असमिया मं एम.ए. करे ये कलाकर ट्यूसन पढ़ाथे. वो अपन इलाका के स्कूली लइका मन ला हिंदी, विज्ञान अऊ गनित पढ़ाथे. रतिहा अक्सर बुनई मं गुजर जाथे, अऊ ऊन के सलाई ले होवेइय्या खट-खट के आवाज सुन्ना घर मं गूंजत रहिथे. “ ये बखत मंय अपन बर एक ठन स्वेटर बनावत हवं,” वो ह कहिथे, ओकर अंगुरी मं फंदा डारत हवंय. “फेर मंय वो मन ला बेचे घलो सुरु करे ला चाहत हवं.”

भाओना के सीजन आतेच सात सब्बो कुछु बदल जाथे. पुह ले च’त (अग्घन (दिसंबर) ले फागुन (मार्च) तक, बिपुल एक कलाकार बन जाथे. एक कहिनीकार, एक महतारी.

भाओ धन भावना के अभिव्यक्ति – भाओना - असम के पारंपरिक बैष्णवाइट धार्मिक रंगमंच आय. कवि, संत, समाज सुधारक अऊ विद्वान श्रीमंत शंकरदेव ह 15 वीं सदी मं सुरु करे गे ये अभियास ह असल मं बाम्हनवादी प्रभुत्व के विरोध रहिस. वइसे, बखत के संगे संग, शंकरदेव के विरासत ह समानता के भाव ला गंवा दीस, अऊ दलित अऊ आदिवासी मन ला येकर ले बहिर कर दिस, अऊ आज घलो करे जावत हवय.

बहिर करे के सुरवात नाटक करे के जगा ले होथे – गाँव के नामघर (पूजा के जगा धन) पवित्र जगा माने जाथे जिहां पूजा अऊ नाटक संग संग होथे. फेर येकर काम सिरिफ धरम के कामेच तक ले नइ ये. येला समाजिक भवन के रूप मं घलो काम मं लाय जाथे जिहां पढ़ई–लिखई, राजनीतिक, सांस्कृतिक अऊ दीगर काम–धाम ला लेके लोकतांत्रिक ढंग ले चर्चा करे जाथे. सोचे के बात ये आय के अब येकर उदेश्य के दायरा सिमट के रहिगे हवय.

ऐतिहासिक रूप ले, नामघर ऊंच जात के जगा रहिस, जिहां जात के मुताबिक पूजा अऊ रंगमंच दूनों ला काबू मं रखे रहिस.

पूजा घर के माटी के भिथि मन, जेन ह कतको बछर ले धूप बाती के धुंवा ले हल्का रंगे हवय, बीते कतको बछर मं करेगे नाटक के गूँज ला समेटे, जेन ह बखत के संग भिथि मं लिखा गे हवय. जोरहाट जिला के मधुसूदन सांस्कृतिक भओना मंडली के सदस्य कंकन महंत कहिथें, “पूजा घर ले नाटक के गहिर ले नाता हवय. एक ठन गहिर ले नाता, अऊ भाओना हमेसा नामघर मेंच होथे. कहूँ अऊ येकर इजाजत नइ रहिस.” महंत समाज पारंपरिक रूप ले असम के परमुख वैष्णव सत्र (सांस्कृतिक केंद्र) मं ले जुड़े रहे हवय.

कंकन के गाँव, तितावर ब्लॉक के चिपोहा (बगार गाँव सरकारी नांव आय) मं, गोस्वामी अऊ महंत जइसने ऊंच जात के वैष्णव मन लंबा बखत ले भाओना के संरक्षक रहे हवंय. ऊँच जात के कलाकार कंकन के बिचार आय के भाओना ला नामघर के भीतरेच रहे ला चाही, जिहां मरद लोगन मन पारंपरिक रूप ले माइलोगन मन के किरदार करथें, वो ह ये रिपोर्टर ला मुचमुचावत कहिथे.

जइसने-जइसने चिपोहा मं बेर बूड़त जाथे, नामघर ले दूरिहा ले झांझ के झंकार सुनाई देथे. भीतरी, फरफरावत कपड़ा पहिरे मरद मन अपन अपन किरदार के अभियास करथें – वो मन के आवाज थिर ताल के संग लय मं बढ़त जाथे – आस्था अऊ बहिष्कार ले जुड़े अपन परंपरा ला निभावत.

दिगन्त टाइड भाओना कलाकार आंय. मिचिं जनजाति के दिगन्त टाइड पारी ला बताथें के ओकर पुरखा मन ला नाटक खेले ले रोके गे रहिस – वो मन न तो भओना देख सकत रहिन अऊ न वो मन वो मं किरदार करे सकत रहिन.ओकर अनुभव घलो कुछु अलग नइ रहिस: असम के लखिमपुर के 29 बछर के टाइड कहिथे, “ जब मंय अपन प्रदर्सन करथों, त वो मन मोला सुरता कराथें के मंय को अवं.” हमन ओकर घर—चां घर—सोवणशिरि नदिया पार मं खंभा मं टिके पारंपरिक बाँस के घर मं गोठ बात करत हवन. वो ह इहाँ अपन घरवाली, तीन बछर के बेटी अऊ अपन दाई–ददा संग रहिथे.

मिचिं असम के मूल बासिंदा तिब्बती-बर्मी जातीय समूह आय, जेन ह खास करके ब्रह्मपुत्र के धनहा इलाका मं रहिथे. पढ़व: माजुली मं मिसिंग जनजाति के अपोंग

दिगन्त के समाज अब अपन भाखा मं अपन भाओना दिखाथें. वो ह कहिथे, “हमन मिचिं मं भाओना करे येकरे सेती सुरू करेन काबर के हमन दरकिनार करे जाय ले थक चुके रहेन. जब हमन अपन कला खुदेच गढ़े सकथन त वो मन के माने ला काबर अगोरबो?” दिगंत अपन कला बर पइसा ले ले मना कर देथें; वो ये काम फोकट मं करथें.

दिगन्त लकठाच के गाँव नामनि बर्षामुख गाँव के एक ठन निजी स्कूल मं पढ़ाथें. वो ह किसान घलो आंय अऊ अपन परिवार के मालिकाना हक के 20 एकड़ जमीन के देखरेख करथें, ये मं वो ह धान अऊ सरसों कमाथें. सरसों के खेती ले वोला बछर भर मं करीबन एक लाख रूपिया के आमदनी होथे.

संझा मं, दिगन्त भाओना के अभियास करथें. ओंकर बोले जवेइय्या असमिया मं ओकर महतारी भाखा मिसिंग के लहजा हवय - एक ठन अइसने जिनिस जेन ला ऊंच जात के कलाकार वो मन ला कभू भूलाय नइ देवंय. वो ह ये रिपोर्टर ला बताइस, “ वो मन मोर लहजा अऊ उच्चारन के मजाक उड़ाथें. येकरे सेती मोला छोटे किरदार देय जाथे.”

इहाँ तक के जब वो मन ला कोनो किरदार करे देय जाथे, त ओकर घलो कुछु नियम होथे. वो मन रावण धन असुर बन सकथें – फेर कृष्ण नई. राम तो बिल्कुले नइ.

वो ह कहिथे, “मोर जइसने मन देंवता नइ बने सकंय.”

16 वीं सदी के असम के सत्र मन मं ऐतिहासिक रूप ले ऊंच जात के वैष्णव भिक्षु मन के कब्जा रहे हवय, जेन मन भाओना के अभियास करत रहिन. येकरे सेती ये माने लगिस के ये कला के देंवता मन के किरदार बर मूल असमिया जात जरूरी आय – जेन ला परंपरा के रूप मं अपनाय जाथे. ते पायके मिचिं अऊ दीगर जनजाति के लोगन मन ला बाहिरी माने जावत रहे हवंय.

माइलोगन मन ला घलो पारंपरिक रूप ले भाओना करे के मनाही हवय.

बिपुल, जेन ला माईलोगन मन के किरदार ला भारी पसंद करे जावत रहे हवय, बताथे, “ वो मन अइसने टूर ला पसंद करथें जेकर मं माइलोगन कस गुन हो. वो ह बतावत जाथे, गर वो मन के दिखावा ला देखहू, त वो मन हमन ला स्टेज मं ‘देवी’ कहिके बलाथें, फेर स्टेज के बहिर ‘माई’ अऊ ‘हिजड़ा’ कहिथें.”

ओकर कहना आय के कोनो घलो नाटक ओकर ले “दक्ष्य़ यज्ञ” ले जियादा कुछु नइ मांगय. भाव ले हरे ये नाटक मं वो ह शिव के सुवारी सती के किरदार करत हवंय – ये किरदार वोला हरेक बखत भारी थका देथे. वो ह कहिथे, “ ये चुनोती वाले आय काबर के मोला रोये-कलपे, नरियाय अऊ कतको अकन भाव उजागर करे ला परथे.” वो ह आगू बताथे, “चाहे मंय कतको घलो कोसिस करंव, मंय मरद अवं. एक झिन माईलोगन के आवाज निकारे मुस्किल आय, ते पायके मंय महीनों तक ले अभियास करथों.”

लखिमपुर के एक झिन रिटायर गुरूजी थानेश्वर बरा कहिथें के पवित्र नामघर मन मं माइलोगन मन के प्रदर्सन के सवालेच नइ उठत रहिस अऊ अब घलो नइ उठय. वैष्णव धरम के इहाँ के इतिहासकार कहिथें, “माईलोगन मन ला उहाँ जाय के इजाजत नइ ये, न छोटे जात मन ला.”

गुवाहाटी यूनिवर्सिटी के महिला अध्ययन विभाग के प्रोफ़ेसर डॉ. पॉली वौक्यूलाइन कहिथें के असम मं वैष्णव धरम हमेसा लेच पुरुष-केंद्रित रहे हवय. “नृत्य अऊ नाटक मन मं घलो, येकर प्रदर्सन सिरिफ मरद लोगन मन करत रहिन. ये संप्रदाय मध्यकाल मं बाम्ह्नवाद ले लड़े बर उभर के आइस, जब माईलोगन मन के हालत सबले निम्न स्तर मं रहिस. वो ढांचा बने रहिगे.”

असम मं धार्मिक काम-धाम, नृत्य अऊ नाटक मन के अगुवई हमेसा मरद लोगन मन करे हवंय, माइलोगन मन के हाथ बनेच कम रहे हवय. ये पुरुष-प्रधान बेवस्था आज घलो चलन मं हवय.

फेर भाओना कलाकार कंकन के मानना आय के “बदलाव होवत हवय. भओना अब स्टेज मं आगे हवय, अऊ माइलोगन मन घलो येला करत हवंय.”

परिस्मिता कलिता गिनती के वो माइलोगन मन ले एक आय जेन ह स्टेज तक ले हबरे हवय. अंगरेजी साहित्य मं एम ए, 26 बछर के कलिता सरकारी नउकरी करे बर लगे हवय. वो ह देशाइकाष बामुन गाँव के तीर गरखीया डोल के अपन घर मं घर के काम बूता मं लगे रहिथे.

वो ह एक ठन गोमोचा ला तह करके पठेरा उपर राख देथे, अऊ ओकर बाद रसोई मं जाय के पहिली पीतल के थारी ला साफ करथे. ओकर बखत अइसनेच गुजरथे – घर के काम बूता मं लगे, अपन कायस्थ समाज के अवेइय्या तीज-तिहर धन बर-बिहाव ला अगोरत, जब वोला बहिर निकरे के मऊका मिलथे.

जब वो ह अपन घर के लोगन मन ला भाओना करे के अपन इच्छा ला बताइस, त सुरू मं घर के लोगन मन हिचकिचाईन. वो ह पारी ला बताइस, “वो मन मान गीन, फेर कुछेक पाबंदी के संग. माइलोगन ला माइलोगन कस दिखे अऊ बेवहार करे ला परही. मरद मन के किरदार करे के इजाजत नइ रहिस.”

जौरहाट जिला मं पले-बढ़े सेती, वो ह कभू घलो ये सवाल नइ करिस के ये सब्बो किरदार सिरिफ मरद लोगन मन काबर करथें. साल 2017 में ये बात बदल गे जब वो ह एक झिन माईलोगन ला भाओना मं दक्ष यज्ञ करत देखिस. वो ह कहिथे, “ये नवा रहिस. मंय पहिली कभू अइसने भाओना देखे नइ रहेंय, अऊ कहूँ न कहूँ मोर भीतरी उहाँ जाय, वो मं भाग लेय के भारी इच्छा रहिस. येला देखके मोला खुदेच बिस्वास होईस के मंय घलो येला करे सकथों.”

असम मं लंबा बखत ले चले आवत वैष्णव परंपरा मन मं लिंग अऊ जात ला लेके कड़ा सोच रहे हवय, अऊ पारंपरिक रूप ले ये तय करे गे हवय के कोन स्टेज मं होय ला चाही अऊ कोन भीतरी मं. फेर बिपुल, दिगन्त अऊ परिस्मिता जइसने कलाकार येला चुनोती देवत हवंय. दलित, आदिवासी अऊ महिला कलाकार तउन जगा मन मं फरत- फूलत हवंय जिहां ले वो मन ला कभू बहिर राखे गे रहिस, हरेक किरदार मं ढलत हवंय अऊ वोला जीवंत बनावत हवंय. उहाँ, वो मन हवंय, दिखत हवंय, अऊ सिरिफ किरदार निभाय ले कहूँ बड़े बात के हिस्सा आंय जेन ह वो मन ला कभू बहिर रखे के कोसिस करे हवय.

बिपुल मंच ला एक ठन अभयारण्य अऊ युद्धक्षेत्र दूनों मानथे. वो ह कहिथे, “ मंय इहाँ तक ले हबरे मं अकेल्ला हवं,” अऊ ताना/ गारी, बहिर करे धन आखिरी बखत मं निकारे जाय के बात मन ला धियान नइ देवय. पोसाक भर ले हवय, अऊ बोल के पांत मन ला सुरता कर ले हवय. गर वो मन वोला बलाहीं, त वो मन वोला रानी, देवी, माई किरदार दिहीं. गर वो मन नइ बलावंय, त वो ह घर लहूट जाही, अपन बुनाइ के सलाई धरही, अऊ एक ठन अऊ स्वेटर बनाय सुरु कर दिही.

वो ह कहिथे, वो मन मोला हांसथे. फेर ओकर बाद घलो देखे बर आथें.”

“अऊ अइसने, नाटक चलत रहिथे.”

अनुवाद: निर्मल कुमार साहू