के छेड़ रहल बा गुलामी के मंच पर आजादी के तान

नामघर के भुइंया पर टिमटिमात माटी के दिया भीतरी आवे वाला के रस्ता देखा रहल बा. गायन (गायक) आ बायन (ढोल बजावे वाला) मंच पर कतार में ठाड़ बा, ढोलकिया लोग आपन पारंपरिक असमिया वाद्य, खोल छाती पर टिकइले बा, संगीत सुरु होखते पीतल के बड़-बड़ झांझ (बोर ताल) दीया के मद्धम अंजोर में झिलमिलाए लागता.

आज सांझ के कथा सुनावे वाला सूत्रधार बोले के सुरु करत बाड़न. माहौल एकदम शांत हो जाता. ओही घरिया बिपुल दास प्रकाश में मंच पर उतरत बाड़न.

रात भर चले वाला असम के वैष्णव नाट्य परंपरा, भाओना गरिमा आ उजास संगे शुरु हो जात बा. रामायण आ महाभारत के प्रसंग एक के बाद एक, मंच पर प्रस्तुत कइल जाता.

महाभारत में पांडव के माई, कुंती बनल बिपुल के सबले जादे भावेला. ऊ तनी मुस्कात कहलन, “गांव में हमरा लोग कुंती पुकारेला.” अकेला माई के अंचरा में पोसाइल बिपुल के कहनाम बा कि ई रोल करे से उनका माई जइसन रिश्ता से खास जुड़ाव महूसस होखेला. “हम मानिला कि हमरा भीतरी एगो माई बाड़ी, जे कुंती के किरदार से तुरंत जुड़ जाली.” ऊ आपन मनपसंद गीत गुनगुनावे लगलन:

बिपुल लरिकाइए से भाओना नाटक देखत रहस. “हमनी के गांव में भाओना के रीत जमाना से चलल आ रहल बा,” ऊ इयाद करत कहलन, आउर उनकर पड़ोस में रहे वाला काचू गांव उनका नाटक करे खातिर हमेसा प्रोत्साहित करे. “ऊ लोग हमार काबिलियत भांप लले रहे, आ हमार बहुते साथ देवत रहे. एक्टिंग से लेके कॉस्ट्यूम आउर बोले के तरीका बदले तक, हर चीज गांव के लोग हमरा सिखइलक.”

पनरह बरिस के उमिर में ऊ पहिल बेर मंच पर केसरिया आ उज्जर रंग के साड़ी में उतरलन. ‘सीता हरण’ नाटक में ऊ माता सीता बनल रहस.

आज भले ओह बात के बीस बरस बीत गइल होखे, ऊ दिन इयाद करते उनकर आंख चमक उठेला. “बड़ा मजा आइल रहे. नाटक में हमार रोल बहुत पसंद कइल गइल रहे.”

भाओना कलाकार असम के लखीमपुर जिला में एह रिपोर्टर से बात करत बाड़न. उनकर कैबर्ता समुदाय के कोई 70 घर, जे अनुसूचित जाति में आवेला, मुख्य जाति वाला लोग के इलाका से दूर बसल बा. इहंवा जादेतर लोग दिहाड़ी मजूरी करके, चाहे खेता आ छोट-मोट ब्योपार करके गुजारा करेला.

“छोट जात वाला हमार टाइटिल चलते केतना बेरा भाओना में हमरा आखिर में छांट देवल गइल,” दलित कलाकार पारी के बतइलन. “बाकिर हमनी के लोग सांस्कृतिक रूप से ओह लोग से बहुत संपन्न बा,” बिपुल गर्व से बतइलन. “हमनी के अब ओह लोग के बोलाहट ना चाहीं. हमनी अब आपन नामघर आ सांस्कृतिक मंच तइयार कर लेले बानी. हमनी आजाद बानी.”

भाओना से कोई 1,000 से 1,500 तक के आमदनी हो जाला, बाकिर अक्सरहा बखत पर ना मिले. वइसे बिपुल केतना बेरा बिना पइसा के नाटक करेलन.

काम के तंगी चलते ई दलित लगातार कइएक किरदार अकेले निभावेलन. तैंतीस बरिस के बिपुल दिन में खेती करेलन आ सांझ में ट्यूशन पढ़ावेलन. आपन परिवार के तीन एकड़ जमीन पर ऊ घर खातिर धान आउर बेचे खातिर सरसों उगावेलन. सांझ के ऊ आपन मोहल्ला में स्कूल के बच्चा सब के हिंदी, विज्ञान आ गणित पढ़ावेलन. अक्सरहा उनकर रात ऊन बीनत बीतेला. रात में स्वेटर बीने घरिया कांटा के आपस में टकराए के लयबद्ध आवाज शांत घर में गूंजत रहेला.

भाओना के मौसम आवते माहौल बदल जाला. पूह से सोत (दिसंबर से मार्च ले) के बीच बिपुल कलाकार के रूप धर लेवेलन. कबो एगो कथावाचक, कबो महिला के.

भाओना, माने भाव से भरल, असम के पुरान वैष्णव धार्मिक नाट्य परंपरा बा. पनरहमा शताब्दी में कवि, संत, समाज सुधारक आ पंडित श्रीमंत शंकरदेव के सुरु कइल एह परंपार में मूल रूप से ब्राह्मणवादी वर्चस्व के चुनौती देवल गइल रहे. पर बाद में शंकरदेव के एह बिरासत से समानता के भाव गायब हो गइल. दलित आ आदिवासी के एकरा से दूर रखल जाए लागल. इहे स्थिति आजो बा.

आदिवासी आ मेहरारू लोग के बहिष्कार के सुरुआत गांव के नामघरे से हो जाला. नामघर के पूजनीय आ पवित्र स्थान मानल जाला. इहंई सभे नाटक आ पूजा-पाठ कइल जाला. बाकिर पहिले एकर मकसद खाली धरामिक ना रहे, ई लोग के मिले-जुले के भी केंद्र रहे. इहंवा शिक्षा, राजनीति, संस्कृति आ समाज के विषय पर बहुते लोकतांत्रिक ढंग से बातचीत होखत रहे. बाकिर अफसोस कि अब ई खाली धार्मिक आ संकुचित अर्थ तक सीमित होके रहल गइल बा.

इतिहास पलट के देखल जाव, त नामघर ऊंच जात के स्थान रहे. इहंवा जाति के हिसाब से पूजा आ नाटक करे के अनुमति रहे.

प्रार्थना सभा के माटी के देवाल पर बरसन के अगरबत्ती-धूप आ धुआं के छाप आ नाट्य प्रदर्शनी के स्मृति जइसे अभियो टंगल बा. “प्रदर्शन हमेसा नामघर में होखेला. दुनो में अटूट संबंध बा. भाओना हमेशा नामेघर में भइल, कहूं आउर ना,” जोरहाट के मधुसूदन सांस्कृतिक भाओना मंडली के सदस्य कंकन महंत कहेलन. महंत समुदाय पारंपरिक रूप से असम के वैष्णव सत्र (राज्य के सांस्कृतिक केंद्र) से जुड़ल रहल बा.

कंकन के गांव सिपोहा (जेकर आधिकारिक नाम बोगर गांव बा), तीताबर ब्लॉक में, ऊंच जात के गोस्वामी आ महंत जइसन वैष्णव लोग लंबा समय से भाओना के संरक्षक रहल बा. ऊंच जात के कलाकार कंकन मानेलन कि भाओना के नामेघर ले सीमित रहे के चाहीं, आ मरदाना लोग के औरत के रूप धरे के जे परंपरा बा, ऊ जारी रहे के चाहीं. ऊ तनी मुस्कात कहलन.

सांझ ढले लागल बा. सिपोहा के नामघर से झांझ के आवाज आवता. भीतरी आस्था आ बहिष्कार खातिर पहचानल जाए वाला एह परंपरा के आगू बढ़ावत, लहरात पोशाक में मरद लोग आपन भूमिका के तइयारी करता.

दिगंत ताइद भाओना कलाकार बानी. मिसिंग जाति से आवे वाला दिगंत पारी के बतावत बानी कि उनकर पुरखा लोग के भाओना से हमेशा दूर रखल गइल. “ऊ लोग ना त एकरा देख सकत रहे, ना एह में हिस्सा ले सकत रहे.” उनकर आपनो अनुभव एकरा से अलग ना रहल. “मंच पर जात रहीं, त लोग याद दिलावे कि हम के हईं,” असम के लखीमपुर के रहे वाला 29 बरिस के दिगंत कहेलन. दिगंत से उनकर घर पर बातचीत हो रहल बा. पारंपरिक रूप से बनल बांस के चांग घर जे सुबनसिरी नदी किनारे खंभा पर ठाड़ बा. इहंई ऊ आपन घरवाली, तीन बरिस के लइकी आ माई-बाऊजी संगे रहेलन.

मिसिंग लोग असम के एगो स्वदेशी तिब्बती-बर्मी जनजाति के लोग बा, जे ब्रह्मपुत्र के उपजाऊ घाटी सब के किनारे बसल बा. पढ़ी: जेकर दू घूंट नसे ना, दवाइयो बा

अब दिगंत के समाज आपन भाषा में आपन भाओना प्रस्तुत करेला. ऊ कहेलन, “एह लोग से दबत-दबत थक गइनी, एह से हमनी आपन मिसिंग भाषा भाओना करे लगनी. अब आउर ना. हमनी जब आपन रस्ता खुद बना सकत बानी त ओह लोग के मंजूरी काहे चाहीं.” दिंगत आपन कलाकारी खातिर कवनो तरह के पइसा ना लेवेलन, ई काम ऊ मुफ्त करेलन.

दिगंत लगे के नामोनी बोरखामुख गांव में एगो प्राइवेट स्कूल में पढ़ावेलन. एकरा अलावे ऊ खेतियो करेलन. परिवार के 20 एकड़ जमीन संभारेलन, जेकरा पर धान आ सरसों उगावल जाला. सरसों से उनका सलाना कोई एक लाख रुपइया आमदनी हो जाला.

सांझ होखते दिगंत भाओना के अभ्यास सुरु कर देवेलन. उनकर बोली में असमिया आ उनकर माईबोली मिसिंग, दुनो के टोन बा. आउर इहे बात ऊंच जात के कलाकार के खटकेला. ऊ बतावेलन, “ऊ लोग हमार उच्चारण आ टोन के मजाक उड़ावेला. एहि से अक्सरहा हमरा छोट रोल देवल जाला.”

नाटक में चाहे कवनो रोल मिले, नियम तय रहेला. ऊ रावण, चाहे असुर (राक्षस) बन सकेलन, बाकिर कृष्ण ना बन सकस, आ राम तो कब्बो ना

“हमनी जइसन लोग देवता के रूप ना धर सके,” ऊ कहलन.

सोलहमा शताब्दी में असम में सत्र (वैष्णव मठ) पर ऊंच जात के वैष्णव सन्यासी लोग के कब्जा रहे, उहे लोग भाओना के अभ्यास करे. एकरा से लोग में बिस्वास जनम लेलक कि पवित्र भूमिका करे खातिर “जातीय असमिया” चाहीं. ई बात एतना बेरा दोहरावल गइल कि परंपरा बन गइल. आउर एह तरहा मिसिंग आ दोसर जनजाति के लोग के बाहरी समझल गइल.

इहे अन्याय मेहरारुवो लोग संगे कइल गइल आ पारंपरिक रूप से भाओना के मंच से दूर रखल गइल.

“ऊ लोग नाटक में मेहरारू बनावे खातिर लइकी जइसन लउके वाला लइका चुनत रहे,” बिपुल कहलन. ऊ अपनो इहे तरह के भूमिका खातिर प्रसिद्ध बाड़न आउर एकरा खातिर उनकर मजाको उड़ावल जाला. “ई लोग के पाखंड देखीं, मंच पर ‘देवी पुकारी आ मंच से उतरते ‘मउगी’ आ ‘हिजड़ा’ कहे लागी,” ऊ बतावेलन.

उनका हिसाब से, उनका खातिर दक्ष यज्ञ सबले कठिन नाटक बा. भाव से भरल एह प्रभावशाली नाटक में ऊ सती, माने भगवान शिव जी के पत्नी बनेलन. “ई किरदार चुनौती भरल बा. हमरा रोवे, चिल्लाए आ बहुत दोसर कुछ करे पड़ेला,” ऊ कहेलन. “केतना जोर लगा लीं, बानी त हम मरदे नू. हमरा खातिर औरत जेका आवाज निकालल मुस्किल होखेला, महीनन ले रियाज करे पड़ेला.”

पवित्र नामघर में मेहरारू लोग के घुसे के मनाही बा, लखीमपुर के एगो रिटायर मास्टर थानेश्वर बोरा कहलन. इलाका के वैष्णव इतिहासकार बोरा के कहनाम बा, “उहंवा मेहरारू आ निचला जात के जाए के सवाले नइखे.”

गुवाहाटी यूनिवर्सिटी के महिला अध्ययन विभाग के प्रोफेसर डॉ. पॉली वोकलीन कहेली, “असम में वैष्णव परंपरा के केंद्र में हमेसा पुरुष लोग रहल. नाच, नाटक सभे उहे लोग करत आइल. ई संप्रदाय मध्यकाल में ब्राह्मणवाद के प्रतिकार करे खातिर उभरल रहे. बाकिर उहो घरिया मेहाररू लोग के स्थिति समाज में दोयम रहे. उहे परंपरा आज ले चल रहल बा.”

असम में धरम से जुड़ल काम, नाच आ नाटक में पुरुषे लोग हरमेसा आगू रहल. मेहरारू लोग के एह में जादे घुसे ना देवल गइल. ई पुरुखवादी ढांचा आजो बरकरार बा.

बाकिर भाओना कलाकार कंकन महंत मानेलन कि “बदलाव के बयार चल पड़ल बा. अब भाओना मंचों पर प्रस्तुति हो रहल बा, आ मेहरारू लोग भी अभिनय कर रहल बा.”

मंच पर आपन दखल बनावे वाला कुछ मेहरारू लोग में से परिस्मिता कलितो बाड़ी. अंगरेजी साहित्य से स्नातकोत्तर परिस्मिता (26 बरिस) सरकारी नौकरी खोजत बाड़ी. ऊ आपन गांव गोरखिया डोल देसाइकश बामुन गांव लगे गोरखियाडोल में दिन भर घर के काम में लागल रहेली.

ऊ गोमासा के तह करके अलमारी में धरत बाड़ी, पीतल के थरिया साफ करत बाड़ी आ फेरु चौका में जात बाड़ी. उनकर पूरा दिन एहि तरहा घर के काम-धाम में बीत जाला. उनका इंतजार रहेला कि अब कवन त्योहार आवे वाला बा, लगन कब सुरु होखे वाला बा. तब उनका आपन कायस्थ समुदाय के कार्यक्रम में बाहर निकले के मौका मिलेला.

ऊ जब आपन परिवार के एक्टिंग करे के बारे में बतइली, त परिवार के लोग पहिले तइयार ना भइल. “अंत में ऊ लोग हां बोल देलक, बाकिर कुछ शर्त के साथे. उनका मेहरारुए के भूमिका करे पड़ी, पुरुष बने के अनुमति ना रही,” ऊ पारी के बतइली.

जोरहाट जिला में पलाएल-पोसाएल परिस्मिता पहिले कबो सवाल ना उठइली कि सभे भूमिका पुरुषे लोग काहे करेला. उनकर नजरिया 2017 बें बदलल. तब ऊ मेहरारू लोग के कइल जाए वाला प्रस्तुति दक्ष यज्ञ भाओना में देखली. “ई हमरा ला एकदम नया रहे,” ऊ कहेली. “हम पहिल बेर भाओना देखनी. हमरा भीतरी कुछ जागल आउर फेरु एकरा में भाग लेवे के तीव्र इच्छा भइल. ओकरा देख के हमरा बिस्वास हो गइल कि हमहूं कर सकत बानी.”

असम में सदियन से चलल आ रहल वैष्णव परंपरा लिंग आ जात के सख्त दायरा में बन्हल बा. इहे तय करेला के मंच पर जाई आ के परदा के पाछू रही. बाकिर बिपुल, दिगंत आ पस्मिता जइन कलाकार लोग अब एह दायरा के तुड़ रहल बा. दलित, आदिवासी आ महिला कलाकार लोग ओह मंच पर फुला रहल बा, जहंवा ओह लोग के कबो घुसे ना देवल गइल. ऊ लोग हर भूमिका में प्राण फूंक रहल बा. मंच पर ऊ लोग अब खुल्लमखुल्ला आवता, देखाई दे रहल बा. आउर अब ऊ लोग मंचे पर ना, समाजो में आपन जगह बना लेले बा, उहे जगह पर जहंवा पहिले ओह लोग के घुसहूं ना देवल जात रहे.

बिपुल खातिर मंच उनकर शरणस्थली आ युद्धस्थली दुनो बा. “एह राह पर हम अकेला बानी,” ऊ कहलन. टोंट कसल, दुत्कारल जाए से लेके रोके-टोके जइसन बात के अब ऊ परवाह ना करस. पोशाक सब समेटल बा, डायलॉग याद बा. बोलावल जइहन त ऊ रानी, देवी, मेहरारू सभे बने के तइयार बाड़न. ना बोलावल जइहन, त घरे लउट अइहन. ऊन-कांटा उठइहन आ एगो आउर स्वेटर बीने में लग जइहन.

“ऊ लोग हमरा पर हंसेला, बाकिर तबो देखे आवेला,” ऊ कहलन.

“आउर खेला जारी बा.”

अनुवाद: स्वर्ण कांता