‘तब ले घलो हमर हाथ चलत रहिथे’

मुचमुच ले हांसत कृष्णवती कहिथे, “खटिया बुनइ मोर खून मं हवय.” थारू आदिवासी समाज के 45 बछर के कृष्णावती बताथे, “मोर बिहाव घलो अइसने मइनखे ले होय हवय जेन ला ये कला के शौक हवय!”

करीबन 30 बछर ले कृष्णावती अऊ ओकर घरवाला चंद्रपाल सिंह राणा रस्सी वाले खटिया बनावत हवंय – जेन मं गूँथई रस्सी के होथे. वो मन लकरी के पाया-पाटी बनाथें अऊ ओकर बाद रस्सी ले बुनथें.

घाम मं जब गरमी बढ़ जाथे त लोगन मन ला पलंग ला छोड़ खटिया भाथे, येकरे सेती कारीगर ह बइसाख ले भादो (मई ले सितंबर) तक ले ये काम करथे; बाकि बखत बनिहारी करथे. कृष्णावती 350 रूपिया रोजी कमाथे अऊ चंद्रपाल ओकर ले सौ रूपिया जियादा. ओ मन ला करीबन 120-150 दिन काम बूता मिलथे.

ये जोड़ा कैथुलिया गाँव के बासिंदा आय, जिहां के आबादी करीबन 1,200 हवय अऊ इहाँ के अधिकतर बासिंदा छोटे जाट वाले जमीन मं खेती करथें. अपन पक्का घर ले करीबन कोस भर दूरिहा, कृष्णावती अऊ चंद्रपाल करा एक एकड़ खेत हवय, जेन मं वो ह सियारी अऊ उन्हारी कमाथे. दू झिन लइका के महतारी कृष्णवती कहिथे, “हमन अपन खाय बर गहूँ अऊ धान कामथन.”

वो ह कहिथे के खटिया बनाय ले बछर भर मं करीबन 50,000 रूपिया के कमई हो जाथे. कृष्णावती कहिथे, “जब पूरा गांव सो जाता है, तब भी हमारा हाथ चलते रहते हैं,चाहे आधा रात होय धन दू बजे, खटिया पूरा बनायच ले परथे.”

ये जोड़ा ह बीते 10 बछर मं 1,600 ले जियादा खटिया बनाय हवय – यानि ह्रेके बछर करीबन 160 ठन खटिया. वो ह एक ठन खटिया के 400-500 रूपिया लेथे.

लेवाल मन तीर-तखार के क़स्बा अऊ गाँव, जइसने टिकुली, नागरा, सारोंजा अऊ बिछुआ ले आथें; ये सब्बो जगा तीन कोस के दायरा मं हवय. जेन मन ऑर्डर देथें, ओ मन रस्सी अऊ लकरी घलो खुदेच देथें – अक्सर शीशम (डालबर्गिया सिसू) के लकरी काम मं ले जाथे काबर के ये ह मजबूत अऊ टिकाऊ होथे, फेर आम धन लीम के लकरी ले घलो बनाय जाथे काबर के ये ह सुभीता ले मिल जाथे.

पहिली काम आय खटिया के फ्रेम बनाय, जेन ला चंद्रपाल लकरी के चार ठन टुकड़ा ले बनाथे – दू ठन छै फिट के अऊ दू ठन तीन फीट के. येकर बाद, खटिया के चारों पाया नानकमत्ता मं एक झिन बढ़ई करा भेजे जाथे, जेन ह ओला कुरथे अऊ छेदा करथे जेकर ले फ्रेम बढ़िया ढंग ले खुसर जाय. येकर बाद, चंद्रपाल खटिया के पाटी अऊ पाया ला चमकाय बर पेंट करथे.

बुनई बर, चंद्रपाल डेरी ले जउनि डहर प्लास्टिक के रस्सी बांधके दावन बनाथे. येकर बाद कृष्णावती के पारी आथे.

वो ह कहिथे, “मंय दिन भर मं दू ले तीन ठन खटिया बुन लेथों.” जंजीरी खटिया बुने मं तीन घंटा लागथे. वो ह बतावत जाथे, “सौकेदार (सूत ले बुनई वाले) खटिया बड़े अऊ भारी होथे, ते पायके मोर घरवाला अऊ मंय मिलके ओला बुनथन.” कृष्णावती ह तीसरी क्लास मं रहे बखत स्कूल छोड़ दे रहिस अऊ अधिकतर बखत अपन ददा संग बितावत रहिस. “जब वो ह बुनत रहय, त मंय रस्सी ला धरे रहंव. मंय हर घड़ी ये देखे बर आतुर रहंव के बने के बाद खटिया कइसने दिखही.”