سِکا بنانے میں ماہر، بارپیٹا کی انبیاء خاتون

انبیاء خاتون اپنی سفید رنگ کی بوسیدہ ساڑی کے جامنی پھول والے آنچل سے اپنے بالوں کو ڈھانپنے کی پوری کوشش کر رہی ہیں، لیکن نومبر کے مہینہ میں چلنے والی تیز ہوا انہیں ایسا کرنے سے روک رہی ہے۔ وہ اپنے دائیں ہاتھ سے سر کو بار بار ڈھانپنے کے ساتھ ساتھ الجھے ہوئے جوٹ کے ریشوں کو لپیٹنے، موتی پرونے اور گرہیں لگانے کا کام بھی کر رہی ہیں۔ انبیاء اس بات سے بخوبی واقف ہیں کہ دلدلی علاقہ کے کنارے واقع ان کے عارضی گھر کے پاس سے گزرنے والے مردوں کی نظریں ان پر جمی ہوئی ہیں۔ بیکی دریا کے کٹاؤ زدہ کناروں پر، خاص طور پر مانسون کے سیلابی دنوں میں، رازداری اور تنہائی تقریباً ناپید ہو جاتی ہے۔

اپنے گھر کے فرش پر بیٹھی انبیاء سِکا (جسے سِگا بھی کہا جاتا ہے) بنا رہی ہیں۔ یہ جوٹ کے ریشوں سے تیار کیے جانے والے آرائشی ہینگر ہوتے ہیں، جن پر برتن، بیج، کپڑے، گدے، بلکہ زیورات تک لٹکائے جاتے ہیں۔ سِکا محض ایک آرائشی چیز نہیں، بلکہ ثقافتی اہمیت رکھنے والا ایک ہنر پارہ ہے، جو آسام کے میاں مسلمانوں اور موجودہ بنگلہ دیش کے دیہی کسانوں میں مقبول ہے۔ سیلاب سے متاثرہ ان علاقوں میں سِکا اشیاء کو نمی اور پانی سے محفوظ رکھنے میں بھی مدد کرتا ہے۔

ماہر دستکار انبیاء خاتون (۷۱) اپنے گھریلو کام کاج نمٹانے کے بعد، صبح سویرے سے ہی سِکا بنانے میں مصروف ہیں۔ وہ یہ کام ایک کمرہ کے اپنے ٹن اور پھوس سے بنے گھر کے صحن میں کرتی ہیں، جو سفید کدو کی بیلوں کے سائے میں واقع ہے۔ سبز اور چوڑے پتوں سے ڈھکی بیلوں کے درمیان سے چھن کر آنے والی دھوپ میں رنگ برنگے موتی چمک اٹھتے ہیں، جو ان کی دستکاری کو مزید دلکش بنا دیتے ہیں۔

انبیاء خاتون، بارپیٹا ضلع کے کھربلّی گاؤں میں رہتی ہیں، جہاں کی اکثریت میاں مسلم کسانوں پر مشتمل ہے۔ دریائے بیکی، جو دریائے برہم پتر کی ایک اہم معاون ندی ہے، اس گاؤں سے گزرتا ہے اور ہر سال سیلاب لے کر آتا ہے۔

پاری سے بات کرتے ہوئے انبیاء کہتی ہیں، ’’سیلاب میرے گھر کو اب تک ۲۵ مرتبہ تباہ کر چکا ہے۔ اب تو میں امدادی کیمپوں میں بھی نہیں جاتی۔ کھانا ملے یا نہ ملے، میں یہیں رہتی ہوں۔‘‘ وہ اس آدھا بیگھہ (تقریباً ۱۶ء۰ایکڑ) زمین کی طرف اشارہ کرتی ہیں جو گاؤں کے ایک فیاض آدمی نے انہیں دی تھی، اور جو آج ان کے لیے گھر بھی ہے اور کھیتی باڑی کا واحد سہارا بھی۔

اسی مختصر سے قطعۂ زمین پر انبیاء خاتون سِکا کی کئی قسمیں تیار کرتی ہیں، جن میں کھیتار سِکا (لحاف اور بستر رکھنے کے لیے)، تھالیر سِکا (تھالیاں اور برتن لٹکانے کے لیے)، گمشار سِکا (تولیے رکھنے کے لیے)، بیسونیر سِکا (ہاتھ کے پنکھے رکھنے کے لیے)، جھوہا سِکا (برتن رکھنے یا بیج محفوظ کرنے کے لیے استعمال ہونے والا سیٹ) اور اس کے علاوہ بھی کئی اقسام شامل ہیں۔ ان میں سے ہر ایک کی قیمت ۴۰۰ سے ۱۵۰۰ روپے کے درمیان ہوتی ہے۔

بیٹیوں کی شادی کے موقع پر والدین خصوصی طور پر انبیاء خاتون سے جوٹ کے یہ آرائشی ہینگر بنواتے ہیں، کیونکہ سِکا، روایتی سیتل پاتی (ہاتھ سے بنی ٹھنڈی چٹائی) کے ساتھ، دلہن کو دیے جانے والے لازمی تحفوں میں شمار ہوتا ہے۔

سال کا یہی عرصہ ان کے لیے سب سے زیادہ مصروف ہوتا ہے۔ ’’اگہن ماس تھائیکے ماگھ ماش پورجونتو، پرتیک گرامے ۱۰-۱۲ بیا تھاک، تینے؟ مے ییر باپے جنے جے سِکا دیون لاگبوئی مے ییر گھر سجابر جونّے [اکتوبر کے دوسرے نصف سے لے کر جنوری تک، ہر گاؤں میں ہر مہینے ۱۰-۱۲ شادیاں ہوتی ہیں۔ دلہن کے والد جانتے ہیں کہ بیٹی کو رخصت کرتے وقت سِکا ضرور دینا ہے، تاکہ وہ اپنے نئے گھر کو سجا سکے،‘‘ انبیاء کہتی ہیں۔

جوانی کے دنوں میں، جب انبیاء خاتون کی بینائی تیز تھی اور وہ گھنٹوں یکسوئی کے ساتھ بیٹھی کام کر سکتی تھیں، تو صرف دو یا تین دن میں ایک نفیس آرائشی سِگا تیار کر لیتی تھیں۔ اگر اچانک کسی شادی کی تیاری آن پڑتی تو وہ مٹی کے تیل کا چراغ روشن کرتیں اور پوری رات جاگ کر نقشی سِگا بُنتی رہتیں۔ نقشی یا نقشہ سے مراد وہ باریک اور دلکش آرائشی ڈیزائن ہیں جو جوٹ کے ریشوں کو بل دے کر، گوندھ کر اور مختلف انداز سے گرہیں لگا کر تیار کیے جاتے ہیں۔ ماہر خواتین اپنے ہاتھوں کی مہارت سے جوٹ کے سادہ ریشوں کو خوبصورت نمونوں میں ڈھال دیتی تھیں۔

مگر اب عمر کے ساتھ ساتھ کمر کا درد بھی ان کا مستقل ساتھی بن چکا ہے۔ وہ زیادہ دیر تک بیٹھ کر کام نہیں کر سکتیں، اس لیے ایک ہی سِکا مکمل کرنے میں دو ماہ تک لگ جاتے ہیں۔

سِکا بنانا صبر، مہارت اور مسلسل محنت کا تقاضا کرتا ہے۔ انبیاء خاتون کی پھرتیلی انگلیاں جوٹ کے الجھے ہوئے ریشوں کو برابر لپیٹتی رہتی ہیں، ان میں رنگ برنگے دھاگے اور موتی پروتی ہیں اور ایک کے بعد ایک نفیس گرہیں بناتی جاتی ہیں۔ وہ اپنی انگلیوں کی طرف اشارہ کرتے ہوئے کہتی ہیں، ’’بہت زیادہ دباؤ پڑتا ہے [ان کی انگلیوں پر]۔ جب میں راشن لینے جاتی ہوں تو میری انگلیاں کام نہیں کرتیں۔‘‘ ان کا مطلب یہ ہے کہ بایومیٹرک مشینیں ان کی انگلیوں کے نشانات پڑھنے میں ناکام رہتی ہیں۔

ان کے گاؤں میں سِکا بننا عموماً نوجوان عورتوں کا کام سمجھا جاتا ہے۔ انبیاء خاتون بتاتی ہیں کہ لوگ اب ان سے توقع کرتے ہیں کہ اس عمر میں وہ صرف آرام کریں اور سکون سے کھانا کھائیں۔ مگر وہ ان طنزیہ باتوں کو خاطر میں نہیں لاتیں اور مسکراتے ہوئے جواب دیتی ہیں، ’’آمی کی اوگور باریت تھائیکے کھے یے آئیسی [کیا میں ان کے گھر کا کھانا کھاتی ہوں]؟‘‘

انبیاء خاتون کے لیے جوٹ کے یہ آرائشی ہینگر بنانا محض روزی کمانے کا ذریعہ نہیں، بلکہ ان دنوں کی ایک خوش گوار یاد بھی ہے جب وہ ایک بڑے مشترکہ خاندان میں رہتی تھیں۔ وہ بتاتی ہیں، ’’میں نے اپنی ماں، بھابیوں اور چچی کو دیکھ دیکھ کر سِکا بُننا سیکھا۔ میرے والد گھنٹوں بیٹھے رہتے اور ہماری بنائی ہوئی خوبصورت گرہیں دیکھ کر ایسے محظوظ ہوتے جیسے کوئی دلچسپ تماشہ دیکھ رہے ہوں۔‘‘ انبیاء ایک ایسے شخص کی بیٹی ہیں جو کبھی اپنے علاقہ میں ایک معزز مقامی منصف کے طور پر جانے جاتے تھے۔

’’اب وہ سب اس دنیا میں نہیں رہے، اور وہ زمین بھی ہمارے ہاتھ سے نکل گئی۔‘‘ ان کے ہاتھ بدستور جوٹ کے ریشے بُنتے رہتے ہیں، مگر مسکراہٹ کچھ لمحوں کے لیے ماند پڑ جاتی ہے۔ پھر اچانک یادوں کی ایک کرن ان کے چہرے کو روشن کر دیتی ہے، جب وہ کہتی ہیں، ’’جب بھی گاؤں میں کوئی مجلس ہوتی، لوگ مجھے کھانا پکانے کے لیے بلاتے تھے۔ شادی بیاہ میں بھی خاص طور پر میری دعوت ہوتی اور اس بات کا اہتمام کیا جاتا کہ کھانا میں ہی پکاؤں۔‘‘

سِکا بنانے کا عمل گاؤں میں جوٹ کے ریشے حاصل کرنے سے شروع ہوتا ہے۔ انبیاء خاتون بتاتی ہیں، ’’یہ جوٹ مجھے میرے دیور کے بیٹے نے دیا ہے۔ پہلے، دریا کے کٹاؤ سے ہماری ۵۰ بیگھہ (تقریباً ۱۷ ایکڑ) زمین بہہ جانے سے قبل، ہم خود جوٹ کی کاشت کرتے تھے۔ اب گاؤں کے لوگ ہمیں مفت میں جوٹ دے دیتے ہیں۔‘‘ ان کا اشارہ اس مقامی روایت کی طرف ہے جس کے تحت کسان غریب خاندانوں کو دو سے تین کلو جوٹ بطور عطیہ دیتے ہیں۔ موجودہ حالات میں یہی مقدار ان کے کام کے لیے کافی ثابت ہوتی ہے۔

خشک کر کے بنڈل کی صورت میں باندھے گئے جوٹ کو سب سے پہلے ایک بانس یا لکڑی کے ڈنڈے سے لٹکایا جاتا ہے، جس کے بعد اس میں موتی پرو نے کا مرحلہ شروع ہوتا ہے۔ انبیاء خاتون سِکا کا نچلا حصہ پہلے تیار کرتی ہیں، پھر مختلف رنگوں کے موتیوں کو ایسی گرہوں کے ذریعہ پروتی جاتی ہیں جن کا حجم پرانے ۲۵ پیسے کے سکّے کے برابر ہوتا ہے۔ ان گرہوں کو ’’تیہا گیرو [سکّے جیسی گرہ] کہا جاتا ہے۔ یہ وہ حصہ ہوتا ہے جہاں موتی پرو نے کا کام مکمل ہونے کے بعد تمام ڈیزائن آ کر ٹھہرتا ہے۔‘‘

چونکہ سِکا عموماً دلہنوں کے لیے تیار کیا جاتا ہے، اس لیے اس کی آرائش میں بننے والی گرہوں اور نقش و نگار کے نام بھی خواتین کے زیورات سے ماخوذ ہیں۔ جوٹ کی پہلی چوٹی، جس کے کچھ حصے پر رنگین دھاگہ لپیٹا جاتا ہے اور جو تیہا گیرو سے نیچے لٹکتی ہے، سیتِی باتی کہلاتی ہے۔ یہ نام اس زیور سے لیا گیا ہے جو خواتین مانگ کے درمیان پہنتی ہیں۔ زرد، سنہرے اور سبز رنگ کے تین موتیوں کا امتزاج، جو دریا کے کنارے واقع چار (ریتیلے جزائر) میں لہلہاتے سرسوں کے کھیتوں کی یاد دلاتا ہے، سیتِی باتی بناتا ہے۔ اس میں سنہرا رنگ دلہن کی خوشیوں کی علامت ہے، جبکہ سبز رنگ سرسبز کھیتوں کی نمائندگی کرتا ہے۔

ایک مکمل سِکا میں عموماً آغاز سے اختتام تک سیتِی باتی کے تین مجموعے بنائے جاتے ہیں۔ اسی طرح آدرفن چوڑی کی شکل میں شہد کے چھتے سے مشابہ ایک نقش ہوتا ہے، جبکہ بُلّک ناک میں پہنے جانے والے زیور (نتھ یا لونگ) کی طرز پر بنایا جانے والا آرائشی نمونہ ہے۔

گاؤوں میں یہ سِکا برتن، بستر، ہاتھ کے پنکھے اور مکمل طور پر تیار ہو جانے والی سبزیوں، مثلاً سفید کدو، لوکی، کدو اور ایسی دوسری سبزیوں کو محفوظ رکھنے کے لیے استعمال کیے جاتے تھے جن کے بیج بعد میں کاشت کے لیے سنبھال کر رکھے جاتے تھے۔ ان اشیاء کو سِکا میں رکھ کر چھت سے لٹکا دیا جاتا تھا، تاکہ وہ سیلابی پانی کی پہنچ سے محفوظ رہیں۔

چالیس کی عمر پار کر چکیں ان کی بہن زبیدہ خاتون کہتی ہیں، ’’ہم نے نہ جانے کتنے سیلاب دیکھے ہیں، اور اپنی آنکھوں کے سامنے دریا کے تیز بہاؤ کو ہماری زمین اور گھر نگلتے ہوئے دیکھا ہے۔‘‘ دونوں بہنیں ان دنوں کو یاد کرتے ہوئے بتاتی ہیں کہ انہیں بار بار اپنا ٹھکانہ بدلنا پڑتا تھا۔ ’’اس وقت یہاں اسکول نہیں تھے، اس لیے ہماری تعلیم ادھوری رہ گئی۔ آج بھی چار [دریا کے بیچ بننے والے ریتیلے جزائر] میں بسنے والے بچوں کے ساتھ یہی ہوتا ہے، اسی وجہ سے وہاں شرحِ خواندگی بہت کم ہے۔‘‘ سیلاب کے باعث زمین کے نقصان سے متعلق سرکاری اعداد و شمار دو دہائیوں سے بھی زیادہ پرانے ہیں۔ ان کے مطابق، ’’آسام میں چار (دریائی ریتیلے جزائر) تقریباً ۶۰ء۳ لاکھ ہیکٹیئر رقبہ میں پھیلے ہوئے ہیں، جہاں تقریباً ۹۰ء۲۴ لاکھ افراد آباد ہیں۔ سال ۱۹۵۰ سے اب تک یہ ریاست سیلاب اور دریائی کٹاؤ کے نتیجہ میں ۲۷ء۴ لاکھ ہیکٹیئر، یعنی اپنی کل اراضی کا ۴۰ء۷ فیصد کھو چکی ہے۔‘‘

’’جب سیلاب آتا ہے تو ہم کہیں نہیں جاتے۔ اللہ ہی بہتر جانتا ہے کہ ہمیں کب اپنے پاس بلانا ہے اور کب زندہ رکھنا ہے۔ ہم تو یہیں رہتے ہیں،‘‘ انبیاء خاتون کہتی ہیں۔ تمام تر مشکلات کے باوجود وہ سِکا بنانا نہیں چھوڑتیں۔ ان کی دستکاری میں استعمال ہونے والے رنگ برنگے دھاگے، چمکدار سجاوٹی سامان اور دیگر آرائشی اشیاء کبھی فالتو یا ضائع شدہ مواد سے حاصل ہوتی ہیں اور کبھی بازار سے خریدی جاتی ہیں۔

’’اس کام میں بہت زیادہ محنت لگتی ہے، اسی لیے ایک سِکا کی قیمت ۴۰۰ سے ۵۰۰ روپے رکھتی ہوں،‘‘ انبیاء کہتی ہیں۔ بارپیٹا میں اپنے شوہر مجیبر کے ساتھ واقع گھر میں اس وقت ان کے تیار کردہ ۱۲ سِکا ایسے ہیں جو ابھی تک فروخت نہیں ہو سکے۔

’’اگر انہیں کوئی خریدے نہیں، تب بھی میں سِکا بناتی رہوں گی اور انہی میں اپنا سامان محفوظ رکھوں گی،‘‘ وہ پورے یقین کے ساتھ کہتی ہیں۔