बरपेटा में बेकी नदी जे किनारे ते

अंबिया ख़ातून जी अछी, पुराणी साढ़ीअ जे आंचल (पलांद) ते ठहियल वाङड़ाई रंग जा गुल नवम्बरु जी हीर में उॾामंदड़ भासिजनि पिया, जॾहिं हूअ पंहिंजो मथो ढकण जी सांदहि कोशिश करे रही हूंदी आहे। परदो रखण लाइ संदसि सॼो हथु मथे ॾांहुं वधे थो,जॾहिं त बि॒ए हथ सां हूअ सिणी जे मुंझियल धाग॒नि खे वटंदी आहे, उन में मोती पोए थी ऐं ॻंढू विझे थी। संदसि कचो घरु धुॿण वारी ज़मीन जे किनारे ते आबादु आहे, जितां लंघंदड़ मर्दनि जूं निगाहूं अंबिया खे भलीअ भिति सुञाणनि थियूं। इहो इलाइक़ो बेकी नदीअ जे कप ते आबादु आहे, जिते मिटीअ जो कटाउ घणो वधीक आहे। इन इलाइक़े में, ख़ासिकरे चौमासे में ॿोॾि दौरान हिते निवेकलाई में रहण मुमकिनु नाहे।

पंहिंजे घर जे पट ते वेही, अंबिया सीका [छिको] (जंहिं खे सीगा बि चयो वेंदो आहे) ठाहे रही आहे – इहे सिणी मां ठहियल सजावटी टंगिड़ियूं आहिनि, जेके बासण, ॿिज, कपड़ा, गादेला ऐं ज़ेवर टंगणु लाइ कमु ईंदियूं आहिनि। सीको रुॻो घरु सजाइण जी शइ नाहे, पर सक़ाफ़ती तौर ते तमाम ज़रूरी आहिनि। इहे आसाम जे मियां मुसलमाननि ऐं अॼोके बंगलादेश जे हारियुनि में तमामु घणो मशहूर आहिनि। ॿोॾि वारनि इलाइक़नि में, सीको शयुनि खे पाणी खां बचाए रखण में मददु कंदो आहे।

71 सालनि जी माहिरी कारीगरु अंबिया जो कमु असुर वेले ई शुरू थी वेंदो आहे। घर जा सभेई कम कार निबेरणु बैदि हूअ सिको जोड़ण में लॻी वेंदी आहे। हूअ पंहिंजे घर जे आतण में कमु करे थी, जेको कदू जे वण जी छांव में ठहियल टीन ऐं छपरु वारे हिक कमरे जो मकानु आहे। साए रंग जे वेकिरे छटीनुमा पननि जी छांव मां छणी ईंदड़ उस में रंगीन मोती चमकी वेंदा आहिनि।

अंबिया खार बल्ली में रहे थी, जिते घणाई में मियां मुसलमान हारी रहंदा आहिनि। बेकी नदी – जेका ब्रह्मपुत्र नदीअ जी हिक अहमु शाख़ आहे – बरपेटा ज़िले जे हिन ॻोठ मां वहे थी ऐं हर सालु ॿोॾि जो सबबि थींदी आहे। “ॿोॾि मुंहिंजो घरु 25 भेरा तबाहु करे चुकी आहे। हाणे मां इमदादी कैम्पुनि में बि नथी वञां। खाधो मिले या न मिले, मां हिते ई रहंदी आहियां।” पंहिंजे ज़मीन जे नंढे टुकर जो ज़िक्रु कंदे अंबिया इहो पारी खे ॿुधाए थी जिते संदसि घरु बि आहे ऐं ब॒नी बि मौजूदु आहे। – इहा अधु बीघा (अटिकल 0.16 एकड़) ज़मीन खेसि हिकु सख़ी ॻोठाणे ॾिनी हुई।

इहो ई हंधु आहे जिते अंबिया केतिरनि ई क़िस्मनि जा सीका ठाहींदी आहे – खेतार सीका (रिलियूं ऐं पथराणियूं रखण जे लाइ), थालीर सीका (थाल्हियूं ऐं बासण रखण जे लाइ), गमसार सीका (टुवाल रखण जे लाइ), बिसोनेर सीका (विञणियूं रखण लाइ), झुहा सीका (थांव रखण या ॿिज सांढण वारो सेट), ऐं ॿिया केतिराई, जिनि मां हर हिकु 400 खां 1,500 रुपयनि में विकामिजे थो।

जिनि नियाणियुनि जो विहांउ थियण वारो हूंदो आहे, उन्हनि जा माउ-पीउ सिणी जूं इहे टंगणियूं ठाहिराइण जे लाइ अंबिया वटि ईंदा आहिनि। धीअ जे परिणे में शीतल पाटी (हथनि जा ठहियल तॾा) डि॒यण सां गॾु इन्हनि खे बि घुरिबलु सूखिड़ी मञियो वेंदो आहे।

शादियुनि जी सीज़न में हूअ वधीक मश्गू़लु रहे थी। अंबिया चवे थी, “अघुन माश थेके माग माश पर्जतों, प्रोत्येक ग्रामे 10-12 बिए थाके, ताइना? मेयर बापे जाने जे सिका देउन लागबोई मेयर घर शाजाबार जोन्ने [नाहरी खां वठी मांघ ताईं , हर ॻोठ में हर महीने 10 खां 12 शादियूं थींदियूं आहिनि, बराबर न? छोकिरियुनि जे अबनि खे इहो मइलूमु आहे त धीअरुनि खे नएं घर खे सजाइण वास्ते सिका डि॒यणा ई पवंदा आहिनि।”

जॾहिं हूअ नंढी हुई, संदसि नज़र तेज़ हुई ऐं हूअ घणी देरि ताईं वेही सघंदी हुई, तॾहिं हूअ हिकु सुहिणो ऐं सजावटी सीको रुॻो ॿिनि खां टिनि ॾींहनि में तयार करे वठंदी हुई। जॾहिं ओचितो का शादी अची वेंदी हुई, त अंबिया गास्लेटु जो ॾीओ ॿारे सॼी राति नक्सी सीगा उणंदी हुई। नक़्सी या नक़्शा जो मतिलबु आहे फ़नकाराणो नमूनो या सजावट। सुॼाण औरतूं सिणी जे तांदूरनि खे वटे, उणे ऐं गंढियूं ॾेई केतिरनि ई क़िस्मनि जा सीका ठाहींदियूं हुयूं।

उमिरि वधणु ऐं चेलह जे सूर जे करे, हूअ हाणे घणी देरि ताईं वेही नथी सघे ऐं हाणे हिकु सीको तयार करणु में खेसि ॿिनि महीननि जो वक़्तु लॻी वञे थो।

संदसि चुस्त आङुरियूं लाॻितो सिणी जे मुंझियल तांदूरनि खे वटंदियूं रहंदियूं आहिनि, जॾहिं हूअ रंगीनु धाॻनि खे वेढ़ंदे मोती पोए थी ऐं उन्हनि खे वटे करे जुदा-जुदा क़िस्मनि जूं ॻंढियूं डि॒ए थी। अंबिया चवे थी,“ हिन सां आङुरियुनि ते तमामु घणो दॿाउ पवे थो। जॾहिं मां सिधो खणणु वेंदी आहियां त मुंहिंजियूं आङुरियूं कमु न कंदियूं आहिनि।” हूअ इन ॻाल्हि ॾांहुं इशारो करे रही हुई त कीअं बायोमेट्रिक मशीनूं संदसि आङुरियुनि जा निशान झलण में नाकामु थी वेंदियूं आहिनि।

सीको ठाहिण जे कम खे हाणे जवान नारियुनि जो कमु समुझियो वेंदो आहे । माण्हू खांउसि इहा उमेद रखंदा आहिनि त हूअ बसि आराम सां वेही रहे ऐं पंहिंजो मानी टुकरु खाए! अंबिया अहिड़नि ताननि खे नज़रअंदाज़ु कंदे पुछे थी, “अमी की ओगोर बाड़ीत थाइके खेये आइसि [छा मां उन्हनि जे घर जो खायां पेई]।”

अंबिया लाइ, सिणी जूं इहे टंगिणियूं ठाहिणु रुॻो कमाई जो ज़रियो नाहे, इहो हुन जो शौक़ु आहे ऐं उन ज़माने जूं यादिगिरियूं बि, जॾहिं हूअ हिक वॾे गॾियल ख़ानदान में रहंदी हुई। हूअ चवे थी, “मूं पंहिंजी माउ, भाॼायुनि ऐं चाचियुनि खे ॾिसी सीको उणण सिखियो हो। मुंहिंजो बाबा कलाकनि जा कलाक वेही इन खे निहारींदो रहंदो हो। सिणीअ जे तांदूरनि में सुहिणियूं गंढियुनि खे पवंदो डि॒सी गदि गदि थींदो हो - ॼण त इहा विंदुर हुजे।” अंबिया जो पीउ क़ानून जो हिकु मकानी माहिरु हो।

“हाणे सभु गुज़ारे विया आहिनि ऐं ज़मीन बि नाहे।” इहो चवंदे महिलु संदसि आङुरियूं त उणंदियूं रहनि थियूं पर मुंहं जो पनो लही थो वञेसि। लहज़ीअ में ई मुर्कंदे चयाईं, “जॾहिं बि का मजलिस थींदी हुई, त माण्हू मूंखे विहांउ में ख़ासि तौर ते सॾाईंदा हुआ ऐं चवंदा हुआ त रधि-पचाउ मां ई कयां।

सीको बणाइण जी शुरूआति ॻोठ मां सिणी हासुलु करण सां थींदी आहे अंबिया चवे थी, “इहा सिणी मूंखे मुंहिंजे भाइटीअ जे मुड़िसु (नाठी) ॾिनी हुई। असां पंहिरीं पाण पोखींदा हुआसीं। पर असांजी 50 बीघा (क़रीब 17 एकड़) ज़मीन दरियाहु पाए छॾी। हाणे माण्हू सिणी मुफ़्त में ॾेई छॾींदा आहिनि।” हूअ हारियुनि पारां ग़रीबु ख़ानदाननि खे ॿिनि खां टिनि किलो सिणी दान ॾियण वारी रिवायत बाबति ॿुधाए थी। इहो मिक़दारु इन कम लाइ काफ़ी आहे जेको हूअ हाणे करे सघे थी।

सुकल ऐं ॿधलु सिणीअ खे पहिरीं हिकिड़े लकुण ते टंगियो वेंदो आहे ऐं पोइ उन में मोती पोइण जो कमु शुरू थींदो आहे। अंबिया पहिरीं हेठाहों हिस्सो उणे थी। इन बैदि हूअ 25 पैसनि जे सिके जी साइज़ जूं ॻंढियूं ॾेई उन में मोतियुनि खे पोए थी। “इन खे तेहा गिरो [सिके जहिड़ियूं ॻंढियूं] चयो वेंदो आहे। मोती पोइण जो कमु पुरो थियण खां पोइ ही इहो ई हिस्सो आहे जिते शयूं बीहारबियूं आहिनि।”

छाकाणि त सीको अक्सरि कुंवारियुनि जे लाइ ठाहियो वेंदो आहे ऐं उन में सजावट जी ज़रूरत हूंदी आहे, इनकरे मोतियुन ऐं ॻंढियुनि जा नाला औरतुनि जे ज़ेवरनि ते रखिया विया आहिनि। सिणी जी पहिरीं चोटी सितिबाती चवाराईंदी आहे, जंहिं जो कुझु हिसो रंगीनु धाॻे में वेढ़ियल हूंदो आहे ऐं इहा तेहा गिरो सां लटकंदी आहे। इन जो नालो मथे जी चिंदीअ ते पियो आहे जेका ज़ालुनि जी सींध में सजंदी आहे। पीला, सोनहरी ऐं साए धाग॒न में वेढ़ियल टिन्ही मोतियुनि सां सितिबाती ठहे थी। हर रंग जी पंहिंजी अहमियत आहे - सोनहरी सोन वरनी कुंवारि जो प्रतीकु आहे ऐं साओ सावक जो प्रतीकु आहे। पीलो रंगु चर [तड़] ते उपंदड़ सरिहं जो प्रतीकु आहे।

आमतौर ते हिकु सीके में शुरूआति खां वठी आख़िर ताईं सितीबाटी जा टे सेट हूंदा आहिनि। हिकु आदरफानो चूड़ी जी शिकिलि जो हूंदो आहे जेको डि॒सण में मखि जे मानारे जहिड़ो हूंदो आहे, जड॒हिं त बुल्लाक [बेसरि] नक में पहिरण वारे ज़ेवर जो नालो आहे।

ॻोठाणा इन्हनि सीकनि जो इस्तेमाल बासण, विछाणा, विञणियूं, लौकी, कदू जहिड़ियूं पकल भाॼियूं रखण जे लाइ कंदा हुआ ऐं उन्हनि भाॼियुनि खे बि रखण जे लाइ कंदा हुआ जेके पोइ बिज॒नि जे लाइ कमु ईंदियूं हियूं। इन्हनि खे छिति ते टंगी रखिबो हो जीअं ॿोॾि जो पाणी इन्हनि खे छीहो न रसाए सघे।

हाणे चालीहारे वही जी संदसि भेण जबेदा ख़ातून चवे थी, “न ॼाण केतिरियूं ॿोॾूं ॾिठियूंसीं। दहिशती वहिकरे ज़मीन ऐं घरु बि॒न्ही खे पाए छॾियो।” बि॒न्ही भेनरुनि खे पूर पवनि था त कीअं उन्हनि वरि-वरि पंहिंजा घर मटिया हुआ। “हुते स्कूल ई न हुआ, इन करे असीं पढे़ ई न सघियूसीं।अॼु बि अहिड़ो ई हालु आहे, इन करे ॿेटारियुनि ते रहंदड़ ॿार पढ़ाई नथा करे सघनि।” ॿोॾि सां ज़मीनी नुक़्सान जा मौजूदु आख़िरीं सरकारी अंग-अखरि ॿिनि ॾहाकन खां वधीक पुराणा आहिनि। हुन ते चयो वेंदो आहे, “आसाम में चर [ॿेटारियूं] लॻभॻि 3.60 लखु हेक्टेयर जी एराज़ीअ में पखिड़ियल आहिनि ऐं हुते 24.90 लखु माण्हू रहनि था। सालु 1950 खां अञा ताईं सूबे जी पंहिंजी कुलु ज़मीन जो 4.27 लखु हेक्टेयर, याने 7.40 सेकिड़ो हिस्सो विञाइजो वियो आहे।”

अंबिया ऐं मजीबुर जो हिकु कमरे वारो घरु, जंहिं खे उन्हनि अटिकल 20 साल अॻु ॿोॾि जे सरकारी इमदाद सां ठाहियो हो

अंबिया चवे थी,”जॾहिं ॿोॾि ईंदी आहे त असीं केॾाहुं बि न वेंदा आहियूं। ज़िंदगी ऐं मौत जो फ़ैसिलो अलह जे हथ में आहे। असीं हिते ई रहंदा आहियूं।”हूअ अञा ताईं सीका उणण जो कमु कंदी पेई अचे। इन जे लाइ रंगीन धाग॒नि ऐं चिमकंदड़ शयूं कॾहिं रदी मां, त कॾहिं बाज़ारि मां हथि कंदी आहे।

अंबिया ॿुधाए थी,“इन में तमामु घणी महिनत लॻंदी आहे, इन करे मां हिकु सीके जा 400 खां 500 रुपया वठंदी आहियां।”संदसि घरु बरपेटा में, जिते हूअ पंहिंजे मुड़िसु मजीबुर सां गॾु रहे थी,हुन में 12 अणिविकामयल सीका पिया आहिनि।

हूअ हौसले सां चवे थी, “भले को ख़रीदु न करे, त बि मां सीका ठाहींदी रहंदसि ऐं पंहिंजियूं शयूं उन्हनि में सांढींदी रहंदसि।”