बेकी नदिया के कछार मं

अंबिया खातून के उज्जर, जुन्ना लुगरा के पल्लू मं बने फूल नवंबर (कातिक-अगहन) के हवा मं लहरावत हवय, वो ह अपन केस ला तोपे के कोसिस करत हवय. परदा डारे बर ओकर जउनि हाथ मुड़ कोती जाथे, फेर वो ह जूट (पटवा) के रेशा मन ला बरे, चोटी/ बेनी बनाय अऊ गांठ लगाय के काम करत रहिथे. अंबिया ला डबरी तीर मं बने अपन कुरिया के तीर ले होवत जावत मरद लोगन मन के नजर के गम हवय. बेकी नदिया के कटाव वाले पार मं बरसा के बाढ़/ पुर आय बखत परदा (अकेल्ला) जइसने कोनो चीज नइ रहि जाय.

अपन घर के भूंइय्या मं बइठे अंबिया सिके (जेन ला 'सिगे' घलो कहिथें) मतलब छींका/छिहँटा /छिंतरा बनावत हवय. ये जूट के रेशा ले बने टाँगे के सजावटी जिनिस आय, जेन ला बर्तन, बीजा, कपड़ा, गद्दा अऊ इहाँ तक के गहना लटकाय बर घलो बउरे जाथे. सिके सिरिफ सजावट भर के जिनिस नो हे, फेर सांस्कृतिक रूप ले एक ठन खास जिनिस आय. ये ह असम के मिया मुसलमान अऊ आज के बांग्लादेश के किसान मन मं भारी चलन मं हवय. बाढ़ वाले ये इलाका मन मं सिके जिनिस मन ला सूखाय के काम मं घलो काम आथे.

71 बछर के ये माहिर कारीगर बिहान होय के पहिलीच काम मं लाग जाथे अऊ ये काम सुरु करे के पहिली अपन घर के जम्मो बूता काम ला निपटा लेथे. ओकर बूता करे ठीहा ओकर एक खोली के घर के आगू के परछी हवय, जेन ह टीना अऊ पैरा ले बने हवय अऊ छानी मं रखिया के नार छवाय हवय. रखिया के चाकर, हरियर घन पाना ले होके आबत घाम ले रंग-बिरंगा मोती चमके लगथे.

अंबिया खार बोली मं रहिथे, जेन ह जादा करके मिया मुसलमान किसान मन के बस्ती आय. बारपेटा जिला के ये गाँव ले ब्रह्मपुत्र के एक ठन बड़े सहायक नदिया, बेकी जाथे अऊ इहाँ हरेक बछर बाढ़ धन पुर आथे. अंबिया पारी ला बताथे, “बाढ़ ह मोर घर ला 25 बेर बरबाद करे हवय. अब तो मंय राहत कैंप घलो नइ जावंव. खाय के मिले धन नइ मिले, मं इहींचे रहिथों.” वो ह वो नान कन जमीन के टुकड़ा के बात करत हवय जिहां ओकर घर घलो हवय अऊ खेत घलो – ये जमीन गाँव के एक झिन मयारू मइनखे ह ओला दे रहिस, ये ह आधा बीघा (0.16 एकड़) हवय.

इहींचे अंबिया कतको किसम के सिके बनाथे – जइसने खेतेर सिके (रज़ाई अऊ सुपेती बर), थालीर सिका (थारी अऊ बरतन राखे बर), कामसा सिके (गमछा/फरिया राखे बर), बिसोनार सिके (हाथ के पंखा राखे बर),जोहा सिके (बरतन धन बीजा संभाल के राखे बर) अऊ घलो बनेच कुछु; जेकर दाम 400 ले 1,500 रूपिया तक ले होथे.

जउन नोनी मन के बिहाव होवेइय्या हे, ओकर दाई-ददा मन खास जूट ले टाँगे के जिनिस बर ओकर करा आथें – ये टाँगे के ह बिहाव मं नोनी मन ला शीतलपाटी (हाथ ले बुने पारंपरिक सरकी) के संग दहेज के एक ठन जरूरी जिनिस आय.

ये ह ओकर बर सबले जियादा कामवाले सीजन आय. अंबिया कहिथे, अघुन माश थाइके माघ माश परजन्तो, प्रत्येक ग्रामे 10 -12 बिया थाके, ताइने? मेयेर बापे जाने जे सिका देउन लागबोई मेयेर घर सजाबार जन्ने [अग्घन महीना ले माघ महीना तक, हरेक गाँव मं 10-12 ठन बिहाव होथे, है ना? नोनी के ददा ह जानथे के बेटी के घर ला सजाय बर सिका दहेज मं देच लागही].”

जब वो ह कम उमर के रहिस, ओकर नजर बढ़िया रहिस अऊ बनेच बखत तक ले बइठ जावत रहिस, त वो ह दू तीन दिन मं एक ठन सजावटी सिके बना लेवत रहिस. जब अचानक ककरो बिहाव होवत रहिस, त अंबिया ला माटी तेल के ढिबरी बार के जम्मो रतिहा नक्सीसिके बनावत रहय. नक्सी धननक्शा के मतलब आय कलात्मक डिज़ाइन धन सजावट. हुनरमंद माइलोगन मन जूट के रेशा मन ला बरके, गूँथके अऊ गांठ पार के कतको किसम के सिके बनावंय.

सियान होवत जाय अऊ पीठ पीरा सेती, वो ह अब जियादा बखत बइठे नइ सकय अऊ एक ठन सिके बनाय मं वोला दू महीना तक ले लग जाथे.

रंगीन धागा मन ला गूंथके अऊ कतको किसम के गाँठ पारके मनका पिरोय अऊ धागा लपेटे बखत, ओकर फुर्तीला अंगरी मन ला सरलग जूट के रेशा मन ला बरे ला परथे. अंबिया कहिथे, एकर [ओकर अंगरी मन मं ] बहुते दुवाब रहिथे. जब मंय रासन ले बर जाथंव त मोर अंगरी मन काम नई करय,” अंबिया ह अपन अंगरी कोती आरो करत कहिथे कि कइसन बायोमेट्रिक रीडिंग मसीन मन ओकर अंगरी के चिन्हा ला पढ़े नइ सकंय.

सिके के काम ला कम उमर के माइलोगन मन के काम माने जाथे, ओकर कहना आय के लोगन मन बस ओला ठलहा बइठ के खाय ला कहिथें! ये बात ला चेत नइ धरे अंबिया कहिथे, “आमी की ओगोर बारीत थाइके खेये आइसी [काय मंय ओकर घर मं जाके खाके आय हवंव?

अंबिया बर जूट के छींका/छिहँटा /छिंतरा बनाय सिरिफ पइसा कमाय के साधन भर नो हे; ये ह ओकर बर अपन मन के बूता अऊ वो बखत के सुरता आय जब वो ह बड़े सामिलात परिवार मं रहत रहिस. इहाँ के अदालत मं अफसर रहे के बेटी अंबिया कहिथे, “मंय अपन दाई, भऊजी अऊ काकी मन ला सिके बनावत देख के ये हुनर सीखेंय. मोर ददा घंटों उहाँ बइठ के येला देखय अऊ मजा लेवय, जइसने ये ह कोनो मन बहलाय के साधन होय – सुग्घर गांठ पारे के काम.”

“अब सब्बो झिन गुजर चुकव हवंय अऊ जमीन घलो हाथ ले चले गे.” गूंथत ओकर हाथ नइ थिरके, फेर ओकर हँसी फीका पर जाथे. फेर जब वो ह आगू बतावत जाथे, त हँसी लहूँट आथे: “जब घलो कोनो मजलिस (सभा/ गुड़ी बइठका) होवय, त लोगन मन मोर ले रंधवाय बर कहेंय; ओ मन बिहाव मन मं खास करके बलावंय अऊ ये तय करेंय के मंइच राधों.”

सिके बनाय के शुरुआत गाँव मं जूट के रेशा जुटाय ले होथे. वो ह बताथे, “मोर भतीजी दमान ह मोला ये जूट दिस. पहिली हमन खुदेच कमावत रहेन, फेर जमीन के कटाव मं हमर 50 बीघा (करीबन 17 एकड़) खेत बोहागे. अब लोगन मन फोकट मं जूट देथें.” वो ह किसान मन के गरीब परिवार मन ला दू तीन किलो जूट दान करे के परंपरा के बात करत रहिस. ये बखत वो ह जतक काम करे सकथे, ओकर बर ये ह भरपूर आय.

सुक्खा अऊ झुरी बंधाय जूट ला पहिली खंभा मं टाँगे जाथे अऊ ओकर बाद बेनी कस गुंथे के काम सुरु होथे. अंबिया पहिली तरी के हिस्सा बनाथे अऊ तहां ले चोटी/ बेनी मन ला चार आना के सिक्का के आकार के गाँठ पारके पिरोथे. येला “टेहा गिरो (सिक्का वाले गांठ) कहे जाथे. पिरोय के काम पूरा होय के बाद चीज मन इहींचे अपन जगा मं बइठ जाथे.”

काबर के ये जिनिस मं अक्सर दुल्हिन बर बनाय जाथे, येला अऊ सजाय-संवारे के जरूरत परथे, ते पायके ये मं लगेइय्या मोती अऊ गांठ मन के नांव माइलोगन मन के गहना उपर राखे गे हवय. जूट के पहिली चोटी, जेकर कुछेक हिस्सा रंगीन धागा ले लिपटे होथे अऊ जेन ह टेहा गिरो ले लटके रहिथे, ओला सितीबाटी कहिथें – ये वो गहना आय जेन ह बीच मांग मं पहिरे जाथे. पिंयर, सुनहरा अऊ हरियर रंग मं लिपटे तीन मोती – जेन ह चार (नदिया के बीच वाले बालू के टीला) मं उगेइय्या सरसों के झाड़ कस दिखथे अऊ दुल्हिन अऊ हरियर खेत मन के चिन्हारी आय – ये मिलके सितीबाटी बनाथें.

अक्सर एक ठन सिके मं सुरू ले आखिरी तक सितीबाटी के तीन जोड़ी होथे. आदरफ़ाना चूरी के आकार के होथे अऊ मंदरस गुड़ा जइसने दिखथे, बुल्लाक नाक के एक ठन जेवर आय.

गाँव के लोगन मन ये सिके मन ला बरतन, सुपेती, हाथ के पंखा अऊ पाके बड़े सब्जी जइसने रखिया, लौकी, कुम्हड़ा अऊ बीजा वाले सब्जी ला राखे बर बउरत रहिन, येला पाटी धन मियार ले लटका के राखे जावत रहिस जेकर ले बाढ़ के पानी ले कोनो नुकसान झन होय.

40 बछर के ओकर बहिनी जाबेदा खातून कहिथे, “ हमन कतको बाढ़/पुर देखे हवन अऊ तेजी ले बोहावत पानी ला खेत-खार ला बोहावत ले जावत. दूनों बहिनी सुरता करथें के ओ मन ला घेरी बेरी जगा बदले ला परय. “उहाँ स्कूल नइ रहिस, ते पायके हमन पढ़े छोड़ देन अऊ आज घलो इहीच हवय; एकरे सेती चार (नदिया के बीच मं बालू के टीला) मं रहेइय्या लइका मन पढ़े लिखे-नइ यें.” बाढ़ ले जमीन के होय नुकसान के आखिरी रिकार्ड के आंकड़ा घलो बीस बछर ले जियादा जुन्ना हवय, जेकर मुताबिक, “असम मं चार वाले इलाका 3.60 लाख हेक्टेयर मं बगरे हवंय अऊ इहाँ 24.90 लाख लोगन मन रहिथें. साल 1950 के बाद ले राज ह 4.27 हेक्टेयर जमीन गंवा दिस, जेन ह ओकर कुल जमीन के 7.40 फीसदी आय.”

अंबिया कहिथे, “बाढ़ आय ले घलो हमन कहूँ नइ जान. अल्लाह जानथे के हमन ला कब जाना हे अऊ कब तक जिये -खाय हवय. हमन इहींचे रहिथन.” वो ह रंग-बिरंगा धागा, कबाड़ धन नजार ले लाय गिल्टर ले सिके बनावत रहिथे.

अंबिया बताथे, “ये मं भारी मिहनत लागथे, ते पायके मंय एक ठन सिके बर 400 ले 500 रूपिया लेथों.” बारपेटा के ओकर घर मं 12 ठन सिके बिन बेचाय रखाय हवय; वो ह उहाँ अपन घरवाला महिबुर के संग रहिथे.

ठान के वो ह कहिथे, “भलेच कोनो झन बिसोय, मंय सिके बनावत रइहूँ अऊ अपन जिनिस मन ला वो मं राखत रइहूँ.”