शौक आ परंपरा सहेजत सिकहर

नवंबर के हवा में अम्बिया खातून के उज्जर घिसाइल लुगा के अंचरा पर बनल बैंगनी फूल हवा में उधियात लागता. ऊ माथा झांपे के बेर-बेर कोसिस कर रहल बाड़ी. ऊ पटुआ (जूट) के अझुराइल सन (रेशा) सब के लपेटत, गूंथत, मोती पिरोवत, गांठ लगावत जात बाड़ी. बीच-बीच में दहिना हाथे माथो झांपत जात बाड़ी. दलदली जमीन किनारे बनल आपन कामचलाऊ घर लगे से आवत-जात मरद लोग के नजर ऊ खूब पहचानेली. बेकी नदी के किनारे बसल एह इलाका में माटी के कटाव बहुते जादे बा. इहंवा, खास करके जब बरसात में बाढ़ आवेला, हर बात पर जइसे सबके नजर होखेला.

आपन घर में जमीन पर बइठल अम्बिया सिका (जेकरा सिगा भी कहल जाला) बनावत बाड़ी. ई पटुआ के रेसा से बनल लटकावे वाला सजावती सामान (हैंगर) होखेला. एकरा में बरतन, बिया, कपड़ा, गद्दा आ गहना तक घर के भीतरी टांग के रखल जाला. सिका खाली सजावटी चीज नइखे, बलुक आपन परंपरा संस्कृति के पहचान बा. असम के मिया मुसलमाने ना, मौजूदा बांग्लादेश के किसान लोग भी एकरा बहुते पसंद करेला. सिका बाढ़ प्रभावित इलाका में चीज सब के भींजे से बचा कर रखे के काम भी आवेला.

71 बरिस के ई माहिर कलाकार किरिन फूटे से पहिले से काम पर लग जाली. घर के रोज के काम निपटावेली आ सिका बीने बइठ जाली. ई काम ऊ आपन फूस आ टीना से बनल घर के अंगना में छानी के नीचे करेली. छानी पर लतराएल पेठा के लत्तर के हरियर, चौकोर-चौकोर पत्ता से छन के आवत घाम में रंग-बिरंग के मोती सब चमक रहल बा.

अम्बिया मिया मुस्लिम किसान लोग के इलाका, खर बल्ली गांव में रहेली. बेकी, ब्रह्मपुत्र के प्रमुख सहायक नदी, बेकी बरपेटा जिला के एह गांव से गुजरेला. एकरा चलते इहंवा हर साल बाढ़ आवेला. ऊ पारी के बतइली, “ई बाढ़ अबले हमार घर पचीस बेर उजाड़ चुकल बा. अब त हम राहतो शिविर ना जाएनी. खाए के मिले, चाहे ना मिले, हम इहंई रहिला.” उनकर इशारा जमीन के ओह छोट टुकड़ा ओरी रहे, जे उनकर घरो बा, आ इहंई ऊ खेतियो करेली. ई आधा बीघा (कोई 0.16 एकड़) जमीन उनका गांवे के एगो नेकदल आदमी देले रहे.

अम्बिया इहंई कइएक तरह के सिका बनाके बेचेली. रजाई आ बिछौना रखे वाला खेतार सिका, थरिया बरतन रखे वाला थालिर सिका, गमछा लटकावे वाला गामसार सिका, हाथ वाला पंखा खातिर बिसोनर सिका, बिया जोगा के रखे वाला झूहा सिका. आउर अइसन कइएक गो तरह-तरह के सिका. एगो सिका 400 से 1500 रुपइए बिकाला.

आपन लइकी के बियाह में लइका पक्ष के देवे खातिर लोग जूट के हैंगर बनवावेला. एकरा शीतल पाटी (हाथ से बीनल पारंपरिक दरी) के साथे-साथे, सादी बियाह में भेंट में देवल जाए वाला जरूरी चीज मानल जाला.

लगन में उनका बइठे के तनिको समय ना होखे. “अगघन से मास ले हर गांव में हर महीना 10 से 12 बियाह होखेला. लइकी के बाप घर सजावे खातिर आपन बेटी के जूट के हैंगर जरूर देवेला,” अम्बिया बतइली.

जवान रहस, त आंख से नीमन लउकत रहे. खूब देर-देर ले बइठ के बीनत रहस. खाली दू से तीन दिन में एगो सजावटी सिगा पूरा कर लेत रहस. अचानक बियाह में देवे खातिर सिगा के ऑर्डर आवे, त ऊ माटी के तेल के ढिबरी बना के रात भर बइठस आ सिगा तइयार कर देस. नक्शी, चाहे नक्शा मतलब कलात्मक डिजाइन, चाहे सजावट होखेला. गुनी मेहरारू लोग पटुआ के रेसा के मोड़के, गूंथ के आउर गांठ लगा के तरह-तरह के सिका बनावेला.

बुढ़ापा आउर पीठ में दरद चलते अब ऊ जादे देर ले बइठ ना पावस. अब उनका एगो सिगा पूरा करे में दू महीना लाग जाला.

फुरती में चले वाला उनकर अंगुरी पटुआ के अझुराइल सन सब के बांटेला, संगे रंग-बिरंग के तागा में लपेटत मोती पिरोअत जाला आ एकरा गूंथके अलग-अलग तरह के गांठ बनावेला. अम्बिया कहेली, “एकरा (अंगुरी) पर बहुते जोर पड़ेला. रासन लेवे जाइला त अंगुरी कामे ना करे,” ऊ बतावेली. बायोमेट्रिक मसीन उनकर अंगुरी के निसान ना पढ़ पावे.

सिका बनावल अब नया उमिर के लइकी लोग के काम मानल जाला. उनकर कहनाम बा कि लोग उनका आराम से बइठे आ अच्छा से खाए-पिए के कहेला. ऊ लोग के ताना अंठियावत कहेली, “का हम ओह लोग के घर के खा के जियतानी?”

अम्बिया खातिर सिका खाली पइसा कमाए के जरिया नइखे. ऊ उनकर शौक बा. पुरान दिनन के याद बा, जब ऊ एगो बड़ संयुकत परिवार में रहत रहस. उनकर बाऊजी स्थानीय कानून के जानकार होखत रहस. ऊ कहेली, “हम आपन मतारी (महतारी), भौजाई आ फुआ लोग के देख-देख के सिका बनावे के सीखनी. बाऊजी हमनी के सिका बनावत घंटो देखस. सुन्नर सुन्नर गांठ बनावे के काम देखल उनका खातिर एगो मनोरंजन जइसन रहे.”

“अब त सब लोग चल गइल, जमीनो सब ना बचल,” ई कहत उनकर अंगुरी जूट त बीनत रहल, बाकिर चेहरा पर के हंसी मेहरा गइल. बाकिर अचके उनकर मुस्कान लउट आवता, जब ऊ कहेली, “लोग जब मजलिस करे, त हमरा खाना बनावे के बोलावे. खास करके बियाह-सादी में बोलावल जाए आउर खाना बनावे के कहल जाए.”

सिका बनावे के खातिर सबसे पहिल काम गांव में पटुआ के रेसा के इंतजाम कइल होखेला. “ई जूट हमार भतीज दामाद देले रहस. पहिले हम अपने जूट उगावत रहीं. बाकिर नदी के कटाव में हमार 50 बीघा (मोटा-मोटी 17 एकड़) जमीन चल गइल. अब त लोग जूट मुफ्त में दे देवेला.” ऊ बतावेली कि किसान गरीब परिवार सब के दू से तीन किलो जूट दान में दे देवेला. जेतना मिलेला, ऊ उनकर आपन काम खातिर पर्याप्त होखेला.

सूखल आ बान्हल पटुआ के सन के पहिले एगो डंडा से लटकावल जाला. तब एकरा में मोती पिरोए के सुरु होखेला. अम्बिया पहिले निचलका हिस्सा बीनेली. ओकरा बाद एक आना (25 पइसा) के सिक्का जेतना बड़ गांठ लगाके एकरा में मोती पिरोएली. एकरा के “तेहा गिरो (सिक्का वाला गांठ)” कहल जाला. मोती के पूरा कड़ी अंत में आके एही गांठ सब पर टिकेला.

बेटी के ससुराल भेजे खातिर अक्सरहा सिका तइयार कइल जाला. आउर एकरा वइसहीं सजावलो जाला. एही से एकरा में मोती आ गांठ के नाम मेहरारू लोग के गहना के नाम पर रखल गइल बा. जूट के पहिल चोटी सितिबाती कहाला. एकर कुछ हिस्सा रंगीन तागा से लिपटल रहेला आ ई तेहा गिरो से लटकल रहेला. एकर नाम ओह गहना के नाम पर रखल गइल बा, जेकरा लइकी लोग मांग के बीच पहिरेला. पियर, सोनहरा आ हरियर रंग के तागा में गूंथल तीन टो मोती मिल के एगो सितिबाती बनावेला. हर रंग के आपन मतलब बा. सुनहरा रंह दुल्हिन के गहना के प्रतीक बा, पियर, खेत में उगावल सरसों के फुल जइसन लउकेला, आ हरियर रंग खेत के हरियाली बतावेला.

आमतौर पर सिका में ऊपर से नीचे ले तीन सेट सितिबाती होखेला. आदरफाना चूड़ी के आकार के होखेला आउर देखे में मधुमक्खी के छत्ता जइसन लउकेला. उहंई बुल्लाक, नाक में पहिरल जाए वाला गहना बा.

गांव के लोग सिका के बरतन-बासन, रजाई-दरी, हाथ के पंखा, बिया खातिर पूरा तइयार भइल पेठा आ कोहरा आ दोसर तरकारी रखे खातिर काम में लावेला. एकरा छत से टांग देवल जाला, ताकि बाढ़ अइला पर ई ओकर पहुंच से दूर रहो.

चालीस पार कर चुकल उनकर बहिन जबेदा खातून के कहनाम बा, “हमनी त केतना बाढ़ देख चुकल बानी. तेज बहत पानी हमार जमीन आउर घर दुनो काट के ले गइल.” दूनो बहिन लोग इयाद करता कि ऊ लोग के कइसे बेर-बेर रहे के ठिकाना बदले पड़त रहे. “उहंवा स्कूल ना रहे. एही से हमनी के पढ़ाई छूट गइल. आजो उहे हाल बा. एहि से चर (नदी के बीच बनल टापू सब) में रहे वाला बहुते लरिका लोग पढ़-लिख ना पावे.” बाढ़ से जमीन के केतना नुकसान होखेला, एकर उपलब्ध अंतिम सरकारी जानकारी कोई दू दसक से भी पुरान बा. उनका हिसाब से, “असम में चर (नदी के रेत वाला टापू) कोई 3.60 लाख हेक्टेयर के इलाका में फइलल बा. उहंवा 24.90 लाक लोग रहेला. सन् 1950 से अब ले राज्य के आपन कुल भूमि के 4.27 लाख हेक्टेयर, यानी 7.40 प्रतिशत हिस्सा बरबाद हो चुकल बा”

“बाढ़ अइला पर हमनी कहूं ना जाईं. अल्लाहे जानेला ऊ हमनी के कब अपना लगे बोलाई आ कबले जिंदा रखी. हमनी इहंई रहिला,” अम्बिया कहेली. ऊ आजो सिका बनावेली. एकरा खातिर ऊ रंगीन तागा आ चमक वाला सजावटी सामान सब कबो कबाड़ी वाला से, त कबो बजार से जुटावेली.

ऊ बतावेली, “एगो सिका बनावे में बहुते मिहनत लागेला. हम एगो सिका के मिहनताना 400 से 500 लीहिला.” बरपेटा के उनकर गांव में, जहंवा ऊ आपन घरवाला महिबुर संगे रहेली, अइसन 12 सिका अबहियो नइखे बिकल, रखल बा.

ऊ जोर देके कहली, “कोई नाहियो कीनी, तबो हम सिका बनावत रहम आउर आपन घर के सामान एकरा में रखम.”