दिव्यांग मन के संग फेरफार

“ये ह जियादा ले जियादा घंटा भर मं 10 कोस जाय सकथे,फेर ये ह 9 कोस ले जियादा नइ चले सकय.”

येकर बाद घलो, वसीम कुरैशी अपन गाड़ी ला एक पईंत अऊ चलत देख के खुस हवय. 34 बछर के वसीम कुरैशी ये बैटरी वाले तीन चक्का के सइकिल मं काम करे बर आथे-जाथे.

जइसनेच वो ह अपन तीन चक्का के बैटरी वाले सइकिल मं चघथे, वो ह मोला बताथे के वायरिंग मं अभू घलो दिक्कत हवय, ब्रेक मारे बखत वोला चेते रहे ला परही. तीन चक्का के सीट मं आराम ले बइठके, वो ह मोला सीट के तरी बैटरी अऊ ओकर राखे के जगा ला दिखाय बर झुकथे.

वसीम गाड़ी ला चालू करथे, अऊ वो ह हरियाणा के मंडीखेड़ा मं अपन गाँव ले कुछेक फर्लांग दूरिहा (एक किमी), दिल्ली-अलवर नेशनल हाईवे के किनारा मं रुख तरी मं बने अपन नानकन मोबाइल रिपेयर के दुकान मं जाथे. मंय देखत हवं के ओकर परोस के लइका मन ओकर पाछू दऊड़त हवंय, हांसत हवंय अऊ ओकर ट्राइसाइकिल के पाछू बने नानकन जगा मं चढ़ जाथें. वोला कोनो फरक नइ परय, वो ह घलो ओकर मन के संग हंसे लागथे.

एक बखत रहिस जब वोला खराब लगत रहिस.

वसीम जब पांच बछर के रहिस,वोला भारी जर धरिस अऊ वो ह रेंगे घलो नइ सकत रहिस. ओकर 55 बछर के दाई अनवरी सुरता करथे, “वो ह दुवार मं गिर गीस. वो ह उठे नइ सकत रहिस.” वो ह कहिथे, “जइसने कोनो हवा लग गे होय.”

वसीम कहिथे, पोलियो मारा था (मोला पोलियो होगे रहिस).”

ओकर ददा वोला स्कूटर मं स्कूल ले जावत रहिस. लहूटे बखत ओकर भैय्या वोला अपन पीठ मं बोहके ले आवत रहिस, “पिद्दीकरके”, वो ह कहिथे. कभू-कभार जब वो ह अकेल्ला घर लहूटत रहय, त लोगन मन ला कहत सुनय: देखो बपरा, कइसने रेंगथे.” वो बात सुरता करत आज घलो दुख होथे.

पोलियो (पोलियोमाइलाइटिस) भारी जियादा बगरेइय्या बीमारी आय जेन हा पांच बछर ले कम उमर के लइका मन के उपर मार करथे, वो ह अधिकतर मल अऊ मुंह के रद्दा ले बगरथे, अऊ नस मन के उपर मार करके लकवा के कारन बन सकथे. साल 1995 मं देस भर मं सुरु होय मुंह मं दवई पिलाय के बाद, भारत ला साल 2014 मं पोलियो मुक्त घोसित करे दे गीस.

फेर येकर पहिली साल 1991 मं जन्मे बसीम उपर ये जानलेवा वायरस सेती ओकर देह के तरी के हिस्सा अऊ हाथ मं खराबी आगे रहिस, अऊ वो ह बिन सहारा के रेंगे अऊ खड़े नइ हो पावत रहिस. जब ये होइस तब वो ह सिरिफ चार पांच बछर के रहिस, तब ले वो ह अपन रोज के काम बर अपन मयारू परिवार के भरोसे हवय. थोकन दूरिहा जाय बर, वसीम अपन हाथ मं चप्पल पहिरथे, अऊ अपन बाहर ला संभालत आगू चलत जाथे.

वसीम कहिथे, मोर ददा [वहीद कुरैशी] ह मोला कभू अपन भाई मन ले अलग मसूस करे नइ दीस.” वो ह अपन 11 भाई-बहिनी मन ले अकेल्ला आय जेन ला पोलियो मारे रहिस. एक पईंत, जब ओकर भाई मं वोला छोड़के नगीना मं रामलीला देखे चले गीन, त वो ह अतक रोइस के ओकर ददा ह वोला अपन स्कूटर मं बइठा के उहाँ लेके गीस.

बरसात के सीजन मं, ओकर ददा अक्सर वोला लकठा के मिठाई दुकान मं घेवर खवाय ले जावत रहिस. वसीम सुरता करथे, वो ह हलवाई ले कहत रहिस के वोला जतक मिठाई खाय के मन करत हवय, खवा. जेन बखत मंय अपन घर के मुहटा मं कलेचुप बइठे रहंव, वो ह आके पूछय, “काय होइस? काय तोला पइसा चाही? अऊ मोर हाथ मं सौ रूपिया नोट धरा देवय.”

वो ह कहिथे, “अल्लाह का शुक्र है [भगवान के किरपा हवय] मोर जनम अइसने घर मं होइस जिहां हर कोनो मोर संग दया-मया राखथे.”

कुरैशी परिवार कसाई समाज ले हवय, अऊ एक जमाना मं नूह शहर (पहिली मेवात जिला) मं भंइस अऊ मेढ़ा के खाल मं नून लगाके, वोला उत्तर प्रदेश के हापुड़ के चमड़ा बजार मं बेचके गुजारा करत रहिन.

जब वसीम ला पोलियो होइस, त ओकर जिनगी छिही-बिही हो गीस. तीर-तखार के डाक्टर मन कहिन के येकर इलाज नइ होय सकय, फेर ओकर दाई-ददा ह हार नइ मानिस. इलाज करवाय बर, परिवार ह नूह शहर के अपन पुरखौती के घर ला छोड़ दीस अऊ 12 कोस दूरिहा गूजर नागल गाँव चले गीस; वो मन ममा घर मं रहिन. लकठा के गाँव नूह में, एक झिन देसी हकीम (बइद) ह वो नानकन लइका के इलाज करे सुरु करिस, जेन ह चले-फिरे नइ सकत रहिस.

जब वो मन वसीम के इलाज करवात रहिन, तब परिवार ह नवा काम-धंधा करके नवा जिनगी सुरु करिस. ओकर ददा, वहीद कुरैशी ह टीना पीपा ला सुधारके बेचे ला सुरु करिस अऊ बाद मं तीर के मंडीखेड़ा मं एक ठन घर बनाइस.

परिवार अगोरत देखत रहय, पूजा-पाठ करय अऊ भरोसा रखे रहय.

ओकर दाई अनवरी सुरता करत कहिथे, “मंय वोल दीन भर मं नौ बखत दवई देवत रहिस, लीम के पानी मं नुहलवाय अऊ हकीम (बइद) के देय तेल ले मालिस करत रहंय.”

वसीम कहिथे, “मोर अम्मी (दाई) सब्बो कुछु करके देखिस. आज ओकरे सेती मोर हाथ ठीक होगे हवय अऊ ,मंय बइठ सकत हवं.” वोला सुरता आथे के तइल के संगे संग वो ह मेढ़ी के दूध ले घलो ओकर मालिस करत रहिस, काबर के कसाई समाज मं येला पौष्टिक माने जाथे.

साल 2011 के जनगणना के मुताबिक, देस (भारत) मं करीबन 26 करोड़ 80 लाख लोगन, धन आबादी के 2.21 फीसदी, अपंगता के संग जीथें. ये मन ले, करीबन हर पाँच झिन ले एक झिन मइनखे ला चले-फिरे के दिक्कत जइसने सेरेब्रल पाल्सी धन लकवा हवय. हरियाणा मं, ये आंकड़ा राष्ट्रीय औसत के बरोबर हवय. करीबनन 546,000 लोगन मन धन राज के आबादी के 2.2 फीसदी, अपंगता संग जिनगी गुजारथें. अऊ चले-फिरे मं अपंगता सब्बो मामला के करीबन एक चौथाई हिस्सा आय.

साल 20 22 मं वसीम ह अपन मयारू सितारा ले बिहाव करिस. दूनों के भेंट पारिवारिक नाता-रिस्ता मन के जरिया ले होइस अऊ जल्दीच वो मन के सगाई हो गीस, फेर अचानक सगाई टूट गीस.

सितारा कहिथे, “मोर भाई ला लगय के ओकर परिवार हमन ले बनेच दूरिहा मं रहिथे.” वो ह उत्तर प्रदेश के गाजियाबाद जिला के लोनी मं अपन मायका के बात करत रहिस, जेन ह इहाँ ले 33 कोस ले घलो जियादा दूरिहा हवय. इहाँ ओकर ददा अऊ चार झिन भाई फल बेचथें.

फेर दूनों झिन एक-दूसर ले बात करे बंद नइ करिन, “चोरी से,” वसीम एक-दूसर ले चोरी छुपे करे गोठ-बात ला बतावत रहिस.

26 बछर के सितारा पलंग मं बइठे लजावत कहिथे, “ मंय वोला अपन अब्बू (ददा) के फोन ले फोन करंव.” सितारा के पाँव मं दू बछर के उमर मं पोलियो होय सेती दिक्कत हवय, अऊ वोला चले-फिरे मं दिक्कत होथे.

जब ओकर दाई ला आखिर मं पता चलिस, त घर के लोगन मन बिहाव बर राजी हो गीन. जोड़ा के दू बछर के बेटा मोहम्मद अज़हर अऊ तीन महीना के बेटी इकरा हवय.

वसीम वोला चिढ़ावत कहिथे, “कोनो घलो लइका मोर जइसने नइ दिखय.”

“मोर बेटा अपन ममा जइसने दिखथे,” वो ह मोला कहिथे.

“ मोला पता हवय, तंय मोर ले जियादा सुग्घर हस,“ सितारा हँसत कहिथे.

मांडीखेड़ा गाँव अरावली के डोंगरी मन के खाल्हे मं बसे हवय. परिवार के सात झिन भाई-बहिनी इहाँ एके संग रहिथें. बिहाव करे हरेक भाई के अपन एक ठन खोली हवय, जिहां वो ह अपन सुवारी अऊ लइका मन के संग रहिथे. कुल मिलाके, 19 परानी वाले ये ह सामिलात परिवार आय.

वसीम अऊ सितारा दूनों बगेर सहारा के चले नइ सकंय, ते पायके वो मन के खोली अऊ टॉयलेट मं फर्नीचर ला अइसने राखे गे हवय के वो मं खुदेच चले सकंय. सोफा अऊ खटिया एक-दूसर ले लगे हवंय, जेकर ले वो मन धरके उठ सकेंय. सितारा करा वॉकर हवय फेर दू बेर जब पारी आय रहिस, त वो ह येकर सहारा नइ लेवत रहिस.

वसीम ह सुरु मं अपन तीन भाइ के संग मिलके टीन पीपा ला सुधार के बेचत रहिस. कुछेक बछर पहिली, वो ह मोबाइल दुकान सुरु करिस जेन ला वो ह खुदेच संभालथे. हरेक बिहनिया 8 बजे खोलके, संझा 4 बजे बढ़ाथे, खाय बखत घंटा भर सुस्ताय के संग, वो ह दिन भर मं 300 ले 500 रूपिया कमा लेथे, फेर ओकर कहना आय के येकर ले रोज के खरचा मुस्किल ले चलथे. करीबन 5,000 रूपिया महिना के भाड़ा, बिजली अऊ पानी मं खरचा मं चले जाथे.

हरेक महीना राज सरकार डहर ले मिलेइय्या 3,000 रूपिया के विकलांग पेंशन थिर आमदनी आय. वसीम कतको महीना ले अपन घरवाली बर घलो ये पेंसन बर लगे हवय. फेर ये मं एक ठन अड़चन हवय. ओकर नांव अभू घलो ओकर मायका, उत्तर प्रदेश मं दिव्यांग लोगन मन के सूची मं लिखाय हवय. वसीम कहिथे, “येला इहाँ सुरु करवाय बर, पहिली ओकर नांव उहाँ ले हटाय ला परही. कोनो ला लकठा के सरकारी अस्पताल मं जाके ये करवाय ला परही.”

दूनों सितारा के घर के लोगन मन ले ये काम ला करवाय ला कहत हवंय, फेर सितारा कहिथे, “ककरो करा बखत नइ ये” अऊ हंसत कहिथे, “मंय अतक लंबा बखत ले कहत हवं ... तब तक ले मंय दू लइका के महतारी बनगे हवं.”

वसीम अपन दूनों लइका ला पढ़ाय ला चाहत हवय. वो खुद बने करके स्कूल मं पढ़े नइ रहिस - नेशनल इंस्टीट्यूट ऑफ़ ओपन स्कूलिंग (एनआईओएस) ले 10 वीं क्लास पास करे के पहिली वो ह कतको बेर स्कूल छोड़े रहिस. अपन ददा के एक ठन फोटो दिखावत, जेन हा साल 2021 मं गुजरगे, वो ह भारी मया ले कहिथे. “मया-दुलार सेती ददा ह मोला स्कूल छोड़े सेती कभू नइ खिसियाइस.”

साल 2011 के जनगणना के मुताबिक, देस (भारत) मं 10 झिन ले करीबन तीन झिन दिव्यांग लइका कभू स्कूल नइ गीन, अऊ 12 फीसदी स्कूल जाय छोड़ देथें. संविधान के आर्टिकल 21 ए शिक्षा ला बुनियादी अधिकार के रूप मं गारंटी देथे. डिसेबिलिटीज़ एक्ट, 2016 के कहना आय के शिक्षा अऊ खेल-कूद अऊ मनोरंजन के मऊका आने मन के बरोबर मिले ला चाही अऊ बिल्डिंग, कैंपस अऊ दीगर कतको सुविधा दिव्यांग लोगन मन ला सुभीता ले मिले ला चाही.

वसीम के स्कूल मं बिल्डिंग भीतरी जाय बर रैंप रहिस, फेर क्लास मं जाय बर कोनो रैंप नइ रहिस – सीढ़ी ले होवत जाय ला परत रहिस. ये सरकारी स्कूल मं व्हीलचेयर नइ रहिस. वो ह खुदेच टॉयलेट जावत रहिस, दिव्यांग लइका मन के मदद बर कोनो करमचारी नइ रहिस.

वसीम ह मोला बताथे, “दिक्कत तो होती थी” अऊ ये घलो बताइस के वोला स्कूल मं मजा नइ आवत रहिस.

बाद मं घलो वसीम ला अपन परिवार के मदद लेके आय-जाय परिस.

कोनो घलो वोला व्हीलचेयर नइ दिस, न बैंक मं अऊ न अस्पताल मं.

ये बछर (2025) धूपक्ल्ला मं, वसीम अधिकतर घरेच मं रहे लगिस, अऊ अपन खोली ले भारी कम निकरत रहिस. ओकर बड़े भाई, मोहम्मद तौशिक, जेन ह ओकर खोली के आगू मं रहिथे, बतावत रहिस के वसीम “डिप्रेशन” मं जावत रहिस.

वसीम सुरता करथे, “ मोला ककरो ले मिले धन बहिर जाय के मन नइ करत रहय. मोला पता नइ रहय के मोर मन मं काय चलत हवय. मोला अपन संगवारी मन ले गोठ बात करे के मन नइ करत रहिस. ये सब वो बखत सुरु होइस जब मंय बीमार पर गेंय.” मार्च 2025, पेट मं बीमारी सेती वो ह कुछु बखत बर भारी कमजोर होगे रहिस. कुछेक बखत बाद, ओकर बैटरी वाले तीन चक्का के सइकिल खराब होगे, अऊ वो ह अपन दुकान नइ जाय सकिस अऊ घरेच मं रहिगे.

जब कुछु घलो काम नइ आइस, त वो ह एक झिन हकीम ले गला मं पहिरे के एक ठन नक्श (तावीज) लिस. येकर ले वोला बहिर निकरे के हिम्मत मिलिस, वइसे वो ह वो बखत घलो अपन गाड़ी बगेर दुकान जाय के हिम्मत जुटाय नइ सकत रहय.

वसीम ह आखिर अक्टूबर मं नगीना मं एक झिन मैकेनिक ले ट्राइसाइकिल ला सुधरवा लीस. नवा बैटरी लगाय मं वोला 5,000 रूपिया लगिस, अऊ वायरिंग मं सुधार के कुछेक हजार खरचा होइस.

ये बैटरी वाले तीन चक्का के सइकिल वोला करीबन चार बछर पहिली नूह जिला कलेक्टर के दफ्तर मं बांटे गे कैंप मं देय गे रहिस. वोला पक्का पता नइ के ये ह वोला कइसने मिले रहिस.दिव्यांग मन के काम आय के जिनिस असिस्टेंस टू डिसेबल्ड पर्सन्स फॉर परचेज़/फिटिंग ऑफ़ एड्स एंड अप्लायंसेज स्कीम (एडीआईपी) के तहत देय जाथे, जेन ह एनजीओ अऊ डिस्ट्रिक्ट डिसेबिलिटी रिहैबिलिटेशन सेंटर जइसने येकर काम करेइय्या संस्था मन ला दिव्यांग लोगन मन बर समान बिसोय अऊ बांटे के अनुदान देथे.

ये स्कीम के तहत, साल 2014 ले अब तक करीबन 29 लाख दिव्यांग लोगन मन ला काम के साजो-सामान (एडीआईपी 2025) देय गे हवय. ये मन मं 65,000 बटरी वाले तीन चक्का के सइकिल रहिस.

वसीम केंद्र सरकार के दिव्यांगजन स्वावलंबन योजना के तहत 50 लाख रूपिया तक के लोन लेगे के पात्र हवय. येला दिव्यांग लोगन मन के एम्पावरमेंट डिपार्टमेंट के तहत नेशनल हैंडीकैप्ड फाइनेंस एंड डेवलपमेंट कॉर्पोरेशन (एनएचएफडीसी) देथे. ये लोन दिव्यांग लोगन मन ला गाड़ी बिसोय धन छोटे-मोटे काम धंधा सुरु करे बर देय जाथे. फेर वसीम ला समझ नइ आवत हवय के आवेदन कइसने करे अऊ येकर बर वोला लोगन के मदद के जरूरत परही.

वसीम कहिथे, “मंय अपन मोबाइल बिजनेस ला होलसेल बिजनेस करे ला चाहत हवं, अऊ तीर तखार के लोकं दुकान मन मं सप्लाई करे ला चाहत हवं.” धन वो ह ये पइसा ले मोबाइल दुकान के जग मरद लोगन मन के कपड़ा के दुकान करे ला चाहत हवय .

“काय तुमन घर जाके मोर मृवर ले मिले ला चाहू?” वो ह पूछथे, अऊ बैटरी वाले अपन तीन चक्का के सइकिल मं बइठ के आगू तेजी ले निकर परथे.

अनुवाद: निर्मल कुमार साहू