समाज कठोर, देह कमजोर, बाकिर हिम्मत पुरजोर

“एकर अधिकतम गति 30 किलोमीटर प्रति घंटा हवे, बाकिर ई 27 से ऊपर ना जाले.”

तब्बो वसीम कुरैशी अपनी गाड़ी के फिर से काम करे के लेके खुश बाड़ें. मोटर से चले वाली ए तिपहिया के उपयोग 34 बरिस के वसीम अपनी काम पर जाए आ वापस आवे खातिर करेलन.

जइसहीं बाइक पर चढ़ेलन, उ हमके बतावेलन कि वायरिंग अभी तनी गड़बड़ बा आ ब्रेक के उपयोग करत के सावधान रहे के पड़ी. तिपहिया साइकिल पर लागल कुर्सी में आराम से बैठ के उ हमके सीट के नीचे बैटरी आ पीछे एगो छोट स्टोरेज कम्पार्टमेंट देखा रहल बाड़ें.

वसीम बाइक स्टार्ट करेलन आ अपनी छोट मोबाइल रिपेयर करे वाला दुकान की ओर निकल जालें. उनकर दुकान हरियाणा के मांडीखेड़ा के उनकरी गांव से एक किलोमीटर से भी कम दूरी पर दिल्ली-अलवर राष्ट्रीय राजमार्ग के किनारे पेड़न के नीचे छिपल बा. हम देखतानी कि उनकरी मोहल्ला के बच्चा कुल उनकी पीछे दौड़ रहल बाड़ें सन, हंसत बाड़ें सन आ उनकी तिपहिया के पीछे छोट कम्पार्टमेंट में चढ़ जातारें सन. बाकिर उ बुरा नईखन मानत, बल्कि उहो उन्हनी के हंसी में शामिल हो जातारें.

एक समय रहे जब उनके ई कुल से फरक पड़त रहे.

वसीम खाली पांच साल के रहलें जब तेज बुखार भईल आ उ चले-फिरे से लाचार हो गइलन. “उ आंगन में गिर गईलें. उठ ना पवलें,” उनकर 55 बरिस में माई अनवारी याद करेली. “जैसे कोई हवा लग गयी हो (जईसे कवनो हवा लाग गईल होखे),” उ कहेली.

“पोलियो मारा था (हमके पोलियो भईल रहे),” वसीम कहेलन.

उनकर पिताजी उनके स्कूटर पर स्कूल ले के गईलें. वापस आवत के उनकर बड़ भाई अपनी पीठ पर उनके ले के अईलें, जे के उ ‘पिद्दी करके,” कहेलन. कुछ दिन दुपहरिया में उ घर में अकेले रहलें त सुनलें: “देखा बेचारा के, कईसे चल रहल बा.” उ बोली आज भी उनके चोट पहुंचावेला.

पोलियो (पोलोयोमायलिटिस) एगो अत्यधिक संक्रामक वायरल बेमारी हवे जवन पांच बरिस से कम उमिर के बच्चन के होखेला. मुख्य रूप से मल आ मौखिक मार्ग से फईलेला आ तंत्रिका तंत्र में प्रवेश कर के लकवा तक ले जा सकेला. भारत के 2014 में पोलियो मुक्त घोषित कर दिहल गईल रहे. ई 1995 में शुरू भईल एगो राष्ट्रीय मौखिक टीकाकारण अभियान के बाद के उपलब्धि रहे.

बाकिर तब ले ना जब ले 1991 में जनमल वसीम ओ घातक वायरस के चपेट में ना आ गईलें जेकरी वजह से उनकरी निचला शरीर आ बांह में स्थायी विकृति पैदा भईल जवन बिना मदद के उनके खड़ा होखे आ चले में असमर्थ बना दिहलस. जब ई घटना भईल तब उनके उमिर चार-पांच साल के रहे आ तब्बे से उ अपनी रोज के कामन खातिर अपनी परिवार पर निर्भर बाड़ें जवन उनसे बहुत प्रेम करेला. छोट दूरी खातिर वसीम अपनी हाथन में चप्पल पहिनेलें आ अपनी वजन के हाथन पर संतुलित कर के आगे बढ़ेलें.

“हमार पिता (वाहिद कुरैशी) हमके अपनी बाकी भाइयन से कब्बो अलग ना महसूस होखे दिहलें,” वसीम कहेलन. उ अपनी 11 भाइयन में से अकेल हवें जिनके पोलियो भईल. एक बेर जब उनकर भाई लोग उनकरी बिना नगीना में रामलीला देखे चल गईलें सन त उ एतना रोवलें कि उनकर पिता उनके अपनी स्कूटर पर ओइजा ले के गईलें.

मानसून के मौसम में, उनकर पिता अक्सर उनके पास के मिठाई के दुकान पर उनके घेवर खियावे ले जाएं. “उ हलवाई से कहें कि हमके जेतना मिठाई चाहीं ओतना खिया देव. ओ समय हम जब घर के दरवाजा पर चुपचाप बईठल रहीं त उ आवें आ पूछें, “का भईल? पइसा चाहीं का?” आ हमरी हथेली में सौ रुपिया के नोट पकड़ा देवें,” वसीम याद करत के कहेलन.

“अल्लाह का शुकर है (भगवान के कृपा बा) कि हम अइसन परिवार में पैदा भईनी जहां सब केहू हमसे अच्छा व्यहवार करेला,” उ कहेलन.

कुरैशी परिवार कसाई समुदाय से सम्बन्ध रखेला आ एक समय में ई लोग नूह सिटी (पहिले मेवात जिला) में भैंस आ भेड़ के खाल में नमक लगावे आ उत्तर प्रदेश के हापुड़ के चमड़ा बाजार में बेच के आजीविका चलावें लोग.

वसीम जब पोलियो के शिकार भईलें त उनकर जिनगी पूरा तरीका से बदल गईल. आसपास के डॉक्टर लोग कहल कि एकर इलाज संभव नईखे. बाकिर माता-पिता हार माने खातिर तैयार ना रहे लोग. इलाज के खोज में परिवार अपनी पैतृक नगर नूह सिटी के छोड़ के 35 किलोमीटर दूर गूजर नागल गांव में चल गईल आ ओइजा ओकरी मामा के इहां रुकल. पड़ोस के गांव खेरली नूह में एगो देसी हकीम (परम्परागत चिकित्सक) चले में असमर्थ ए बच्चा के इलाज शुरू कईलस.

ओने वसीम के इलाज होखे शुरू भईल आ एने परिवार एगो नया जिनगी बनावे शुरू कईलस. उनकर पिता वाहिद कुरैशी टाट के झोला सीए आ बनावे बेचे के काम शुरू कईलें आ बाद में नजदीक के मांडीखेरा में एगो घर बनववलें.

परिवार इंतजार करत रहे, प्रार्थना करत रहे आ वसीम के ठीक हो गईला में विश्वास करत रहे.

“हम ओके दिन में नौ बेर दवाई देत रहनी, नीम के पानी से नहवावत रहनी आ हकीम के दिहल तेल से मालिश करत रहनी,” उनकर माई अनवारी चबाये खातिर सुपारी तूरत के याद करेली.

“हमार अम्मी (माई) सब कुछ आजमा के देखली. इहे वजह बा कि हमार हाथ में सुधार आईल आ हम बैठ सकेनी,” वसीम कहेलन. उ याद करेलन कि तेल के संघे-संघे उनकर भेड़ के दूध से भी मालिश होखे काहेंकि उनकी मुस्लिम कसाई समुदाय में एके पोषक मानल जाला.

भारत में 2011 के जनगणना अनुसार 26.8 मिलियन लोग यानि कुल आबादी के 2.21 प्रतिशत लोग कवनो न कवनो तरह के अक्षमता के शिकार बा. एमे से लगभग हर पांचवा व्यक्ति चले फिरे के अक्षमता जईसे मष्तिष्क पक्षाघात या लकवा से पीड़ित बा. हरियाणा में भी संख्या राष्ट्रीय औसत के अनुरूप बा. लगभग 546,000 लोग यानि राज्य के आबादी के 2.2 प्रतिशत कवनो न कवनो अक्षमता के संघे जीवन बिता रहल बा जेमे लगभग एक चौथाई मामला में चले फिरे के अक्षमता शामिल बा.

वसीम 2022 में अपनी प्रेमिका सितारा से बियाह कईलें. दूनो के मुलाकात पारिवारिक सम्बन्ध के माध्यम से भईल रहे आ जल्दिये दूनो के सगाई हो गईल बाकिर अचानक सगाई तोड़ दिहल गईल.

“हमरी भाई के बुझाये कि उनकर परिवार हमनी से बहुत दूर रहेला,” सितारा कहेली. उनकर माता पिता के घर 100 किलोमीटर दूर उत्तर प्रदेश के गाजियाबाद जिला में लोनी में बा जहां उनकर पिता आ चार गो भाई फल बेचेला.

बाकिर दूनो के आपसी बातचीत बंद ना भईल. “चोरी से,” वसीम कहेलन कि उ लोग गुप्त रूप से बतियावल जारी राखल.

“हम ओके अपनी अब्बू (पिता) के फोन से कॉल कईल करीं,” 26 साल के सितारा बिस्तर पर बईठल लजात के कहेली. सितारा जब दू साल के रहली त पोलियो से उनकी गोड़ में खराबी आ गईल आ उनके चले में दिक्कत होला.

जब उनकी माई के पता चलल त दूनो परिवार बियाह के सहमति दे दिहलस. ए जोड़ी के दू साल के बेटा अजहर आ तीन महीना के बेटी इकरा बिया.

“कवनो बच्चा हमरी में नईखे पड़ल,” वसीम ओके चिढ़ा रहल बाड़ें.

“हमार बेटा अपनी मामा निहर ढेर लउकेला,” उ बतावेलन.

“हमरा पता बा, तूं बहुत हैण्डसम बाड़ा,” सितारा मुस्कियात के कहेली.

मांडीखेरा गांव अरावली के पहाड़ियन के नीचे स्थित बा. परिवार के साथ भाई बहिन एइजा संघे रहेला लोग. हर शादीशुदा भाई के आपन कमरा बा आ एइजा उ अपनी मेहरारू बच्चा संघे रहेला. कुल मिला के ई 19 सदस्यन के एगो संयुक्त परिवार हवे.

वसीम आ सितारा दूनो बिना मदद के ना चल सकेलें एसे उनकरी कमरा में फर्नीचर आ टॉयलेट ए तरह से रखल गईल बा कि उ लोग आपन काम अपने से कर सकें. सोफा आ पलंग एक दूसरा के करीब राखल गईल बा ताकि उ अपनी हाथ के मदद से उठ सकें. सितारा के लगे वाकर बा बाकिर पारी जब दू बेर उनसे मिलल त एक्को बेर एकर उपयोग ना कईल गईल.

वसीम शुरू में अपनी तीन भाईयन संघे काम कईलें जे धातु के कनस्तर (पीपा) के मरम्मत कर ओके फिर से बेचें लोग. कुछ साल पहिले उ एगो मोबाइल के दुकान शुरू कईलें जेके उ स्वतन्त्र रूप से चलावेलें. हर सबेरे 8 बजे से शुरू होके एक घंटा के लंच ब्रेक के बाद 4 बजे बंद भईला ले उ दिन के 300 से 500 रुपिया ले कमायेलें. हालांकि उनकर कहनाम बा कि एसे रोज के खर्चा पानी बहुत मुश्किल से चलेला. मासिक किराया, बिजली आ पानी में करीब 5,000 रुपिया के खर्चा होला.

एकमात्र धन जवन नियमित रूप से आवेला उ उनकर विकलांगता पेंशन हवे जवन राज्य सरकार से हर महीने 3,000 रुपिया मिलेला. महीनन से वसीम अपनी मेहरारू सितारा खातिर भी अइसने पेंशन शुरू करवावे के कोशिश कर रहल बाड़ें बाकिर ओमे एगो अड़चन बा. उनकर नाम अब्बो उनकी गृह राज्य उत्तर प्रदेश में विकलांग लोगन के श्रेणी में सूचीबद्ध बा. “एइजा एके शुरू करवावे खातिर उनकर नाम पहिले ओइजा से हटवावे के पड़ी. केहू के ओइजा के नजदीकी सरकारी अस्पताल जाए के होई आ ई काम करवावे के होई,” वसीम कहेलन.

ई दंपत्ति सितारा के परिवार से ई काम करवावे के कह रहल बा बाकिर “केहू के लगे समय नईखे,” सितारा कहत के हंसे लागेली, “हम एतना समय से ई लोगन से ई काम करवावे के कहि रहल बानी... तब से हम दू गो बच्चन के माई बन चुकल बानी!”

वसीम अपनी दुनू बच्चन के पढ़ावे के ले के उत्सुक बाड़ें. उनकर खुद के पढ़ाई अधूरा रहि गईल बा – उ कई बेर स्कूल छोड़लें आ फिर राष्ट्रीय मुक्त विद्यालयी शिक्षा संस्थान (एनआईओएस) के माध्यम से कक्षा 10 के पढ़ाई पूरा कईलें. अपनी पिता, जिनकर देहांत 2021 में हो गईल रहे, के तस्वीर देखावत के उ प्रेमपूर्वक कहेलन, “हमसे स्नेह के वजह से पापा हमके स्कूल छोड़ला खातिर कब्बो ना डंटलें.”

वर्ष 2011 के जनगणना के अनुसार भारत में लगभग शारीरिक रूप से अक्षम 10 गो बच्चन में से तीन बच्चा कब्बो स्कूले ना गईलें आ 12 प्रतिशत बच्चा स्कूल छोड़ देलें सन. संविधान के अनुच्छेद 21ए में शिक्षा के मूलभूत अधिकार के रूप में गारंटीकृत कईल गईल बा. शारीरिक अक्षमता अधिनियम 2016 के अनुसार, शिक्षा, खेल आ मनोरंजन के अवसर सबकी निहर सामान रूप से दिहल जाए के चाहीं आ भवन, कैम्पस आ विभिन्न सुविधा शारीरिक रूप से अक्षम लोगन खातिर सुलभ होखे के चाहीं.

वसीम के स्कूल में ईमारत में जाये खातिर एगो रैंप रहे बाकिर कक्षा तक पहुंचे खातिर कवनो रैंप ना रहे – ओइजा सीढ़ी के उपयोग करे के पड़े. ए सरकारी संस्था में व्हील चेयर उपलब्ध ना रहे आ ना ही अइसन कवनो स्टाफ रहे जवन शारीरिक रूप से अक्षम बच्चन के मदद खातिर नियुक्त कईल गईल होखे.

“दिक्कत तो होती थी (ई मुश्किल रहे),” वसीम हमके बतावेलन आ कहेलन कि उनके स्कूल पसंद ना रहे.

जीवन में बाद में भी, वसीम के परिवार के मदद से आपन उठल बईठल संभारे के पड़ल.

केहू ओके कब्बो व्हीलचेयर भी ना ऑफर कईलस, ना त बैंक में आ न ही कवनो अस्पताल में.

ए साल के गर्मियन (2025) में वसीम घर पर ही ढेर समय बितावे लगलें आ शायद ही कब्बो अपनी कमरा से बाहर निकलें. उनकर बड़ भाई मोहम्मद तौशिक जवन उनकी सामने वाला कमरा में रहें, समझत रहलें कि वसीम ‘अवसाद’ में जात रहलें.

“हमके केहू से मिले चाहे बाहर जाए के मन ना करे. हमके ना पता चलल कि हमरी दिमाग में का होत रहे. हमके दोस्तन से भी बात करे के मन ना करे. ई कुल शुरू भईल जब हम बेमार पड़नी,” वसीम कहेलन. मार्च 2025 में पेट के फ्लू की वजह से उ कुछ समय खातिर कमजोर हो गईल रहलें. एकरी कुछ समय बाद, उनकर मोटर वाला तिपहिया खराब हो गईल आ उ खुद के फंसल पवलें, उ अपनी दुकान तक ना पहुंच पावत रहलें.

जब कुछु से फायदा ना भईल त उ एको हकीम से अपनी गला में पहिने खातिर एगो नक्श (तावीज) लिहलें. एसे उनके बाहर कदम रखे के बस थोड़ा सा हिम्मत मिलल हालांकि अब्बो उ बिना अपनी वाहन के दुकान जाए के हिम्मत ना कर पावेलन.

वसीम आखिरकार नगीना में अक्टूबर महीना में एगो मैकेनिक से अपनी तिपहिया के ठीक करवा लिहलें. नया बैटरी के दाम उनके 5,000 रुपिया देवे के पड़ल आ कुछ हजार और वायरिंग में खर्चा भईल.

मोटर वाला तिपहिया उनके लगभग चार साल पहिले नूह जिला कलेक्टर के कार्यालय में आयोजित एगो वितरण शिविर में दिहल गईल रहे. उनके अंदाजा नईखे कि इ उनके कईसे मिलल. सहायक उपकरण आम तौर पर शारीरिक रूप से अक्षम लोगन के सहायता/ उपकरणन के खरीद आ फिटिंग योजना (एडीआईपी) के तहत दिहल जाला जवन उपकरणन के खरीद आ वितरण खातिर एनजीओ आ जिला विकलांग पुनर्वास केंद्रन जईसन लागू करे वाला एजेंसियन के अनुदान देला.

ए योजना के तहत 2014 से अब ले लगभग 29 लाख विकलांग लोगन के सहायक उपकरण आ सहायता (एडीआईपी 2025) प्रदान कईल जा चुकल बा. एमे से 65,000 मोटर वाला तिपहिया रहे.

वसीम केंद्र सरकार के योजना दिव्यांगजन स्वालंबन योजना के तहत 50 लाख रुपिया के पात्र हवें. एके शारीरिक रूप से अक्षम लोगन के सशक्तिकरण विभाग के तहत राष्ट्रीय विकलांग वित्त आ विकास निगम (एनएचएफडीसी) द्वारा लागू गईल बा, ई ऋण शारीरिक रूप से अक्षम लोगन के वाहन कीने आ छोट मोट उद्यम शुरू करे खातिर दिहल जाला. बाकिर वसीम के जानकारी नईखे कि उ आवेदन कईसे करें आ एकरा खातिर उनके लोगन के मदद के भी जरूरत पड़ी.

“हम आपन मोबाइल बिजनेस थोक व्यवसाय में बदलल चाहतानी आ स्थानीय दुकानन के सप्लाई कईल चाहतानी,” वसीम कहेलन. या फिर उ पैसा के उपयोग अपनी दुकान के आदमी लोगन के कपड़ा के दुकान में बदले में कर सकेलें.

“आप घरे आ के परिवार से मिले चाहतानी?” उ पूछेलन आ अपनी तिपहिया साइकिल पर बैठ के दूर निकल जालें.

अनुवाद: विमल चन्द्र पाण्डेय