‘उ घर त कुल्ही समुन्दर में बूड़ गईल’

गूगल मैप से पता चलता कि हम सही जगह पहुंच रहल बानी. बाकिर जेतना मन परता, इ इलाका तानियेक बदलल-बदलल बुझाता. समुन्दर के अरिया ऊ खोंखड़ जइसन घर नइखे लउकत जेकर पता हम पहिले उप्पडा आये पर अपना फोन में सहेजले रहनीं. टी. मरम्मा बंगाल के खाड़ी से आवत एगो धार के ओर देखावत अनमनाइल, ढंग से बतवली, ”आरे ऊ घर? अब त उ समुन्दर में बूड़ गईल. देखा, ऊहां !”

हमरा अब्बो उ पुरान उजरल घर इयाद बा, जौन देखे में बहुत सुन्नर बाकिर उदास लउके. मार्च 2020 में तालाबंदी होखे से कुछ हफ्ता पहिले जब हम उप्पडा गईल रहनी, उंहा हम मरम्मा अउरी उनका घर के लोग के फोटो खिंचले रहनी, उनका पाछे उहे घर रहे. समुन्दर के अरिया एगो दोगा में बनल इ लमहर-चाकर घर के एगो छोटहन हिस्सा बांचल बा, जहां मरम्मा के परिवार (2000 के सुरुआती साल ले) रहत रहे.

मरम्मा के उमिर इहे कौनो 50 से 60 बरीस के बीच में बा. उ अपना जगह के नेता हइ. उ पहिले मछरी बेचत रहली. उ बतावेली, “इ 8 कोठरी के एगो बड़का घर रहे, जहवां (जनरवन के) तीन गो बाड़ा रहे. इंहवा सौ गो ले लोग रहत रहे.” 2004 के सुनामी के ठीक पहिले उप्पडा में आइल एगो बौड़ेरा के चलते घर के एगो बड़हन हिस्सा टूट गईल, जेसे उनकर बड़का परिवार के फरके-फरके रहे खातिर मजबूरी हो गईल. मरम्मा कुछ साल ले ओही टूटल–टाटल घर में रहली, फेर बाद में ओकरा लगहीं एगो नया घर में रहे चल गईली.

अइसन खाली मरम्मा आ उनकर परिवारे के साथे ना भईल, उप्प्डा में लमसम सब लोग उफनात समुंदरी धार के कर्ते कम से कम एक बेर त आपन घर छोड़े खातिर मजबूर भईल बा. आपन घर छोड़े के सही बेरा के अकाने ला उ लोग आपन अनुभव के ध्यान में राखेला, ओ जगह के लोग के समुन्दर के धार के समझ प् भरोसा करेला. ओ. शिव (14 बरीस), जेकरा समुन्दरी लहर से बांचे ला पहिलहिये एक बेर घर छोड़े के परल रह, बतावेले, “जब समुन्दर के धार आगे बढ़े लागेला, तब हमनी बूझ जानी कि घर ओकरा चपेट में आवे वाला बा. तब हमनी आपन बर्तन औरी बाकी सब सामान एक जघे गोट्टा क देनी जान. (औरी रहे खातिर किराया के एगो अस्थाई मकान खोजल सुरु क देनी जान. एक महीना के भीतर पुरनका घर (समुन्दर में) कहीं भुला जाला.”

पुरबी गोदावरी जिला में औरी आंध्रप्रदेश के 975 किलो मीटर लमहर आर से लागल उप्पडा गांव बहुत समय से बढ़त समुंदरी तट के कटाव के मस्किल से जूझता. इहां रहे वाला लोग बतावेला कि उ लोग जबसे होस सम्हरले बा, अपना गांव के इ खतरा से भिड़ंत देखता.

जब लमसम 50 बरीस पहिले मरम्मा के परिवार ओ बेर के आपन नवका घर में रहे गईल, त उ समुन्दर से बेसी दूर रहे. ओ. चिन्नाबाई, जे शिव के दादा अउरी मरम्मा के चाचा हंउवें, इयाद करत बतवलें,” जब हमनी आर पर से आपिस घरे आईं जां, हमनीके गोड़ में बहुत दरद होखे.” 70 चाहे 80 के उमिर प पहुंचल चिन्नाबाई, समुन्दर के भीतरी तल से मछरी पकड़े वाला मलाह रहलन. उनकरा इयाद बा कि उनका घर से ले के समुन्दर के आर ले ढेर मकान, दोकान आ सरकारी मकान कुल रहे. चिन्नाबाई दूर घट्टा ओर इशारा करतारें, जहां संझलौका के अंजोर में जहाज गायब गो गईल बा, उंहा आर रहे.“

मरम्मा इयाद क के बतावातारी, “हम्नीके नवका घर आ समुद्र के आर के बीच दूर–दूर ले बालू पसरल रहे. जब हम लईका रहनी, तब हमनी इ बालू के डूह, टीला के राह से चली जां, त उंहा खेली जान.”

उप्पडा के इ सब पुरान इयाद अब समुन्दर के धार में दफ़न हो गईल बा. 1989 से 2018 के बीच, उप्पडा के आर हर साल मोटा- मोटी 1.23 मीटर सिकुड़ल बा. विजयवाड़ा में आंध्रप्रदेशप्रदेस अन्तरिक्ष अनुप्रयोग केंद्र के सोधकर्तालोग आपन एगो अध्ययन में पवलेबा कि साल 2017-18 में, आर के कटाव 26.3 मीटर गहीर रहे. एगो दूसर अध्ययन के अनुसार,पाछे के चालीस बरीस में काकीनाडा क्षेत्र के लमसम 600 एकड़ जमीन समुंदरी पानी के कर्ते नास हो गईल बा, एमे से खाली उप्पडा गांव के बात कईल जाय, त ओकर एक चौथाई हिस्सा अब समुन्दर के धार में भुला गईल बा- उप्पडा, काकीनाडा जिला के कोतापल्ली मंडल में एगो गांव ह. साल 2014 के एगो अध्ययन में काकीनाडा के उत्तर में आर के कगरी रहे वाला मलाहन ओर से कहल गईल बा कि समुंदरी आर कई सौ मीटर सिकुड़ गईल बा.

विशाखा पट्टनम के आंध्र विश्वविद्यालय में जियो– इंजीनियरिंग बिभाग के प्रोफेसर (सेवानिवृत्त) ककनी नागेश्वर राव कहतारें कि “उप्पडा, जौन काकीनाडा सहर के उत्तर में कुछ किलोमीटर के दूरी प बा, में आर के कटाव के मुख्य कारन हॉप आइलैंड के निरमान ह,जेकरा के वैज्ञानिक रूप से ‘स्पिट’ कहल जाला, जौन सरल रेखीय आकार के 21 किलोमीटर लमहर एगो बालू के ढांचा ह. इ स्पिट प्राकृतिक रूप से निलारेवु नदी (गोदावरी के एगो सहयक नदी) के मुहाना से सुरु होला. “कई साल से आंध्रप्रदेस के तटीय रूप आ प्रकिरिया के महीनी से अध्ययन करे वाला प्रोफ़ेसर राव के मोताबिक, “इ स्पिट से समुंदरी धार भुला के उप्पडा के आर से टकरायेला, जेसे ओकर छरन होखेला. बुझाता कि एक सदी पहिले से हो रहल बा, 1950 के बेर से हम इ स्पिट के एबेरा के अपना रूप में देखतानी.”

पुरनका मानल आंकड़ा के टोईं जान त, 20वीं सदी के के सुरुआते में उप्पडा के समस्या के चीन्ह लहल रहे. उदाहरण ला, 1970 के गोदावरी जिला के गजट में लिखल गईल बा कि 1900 से अब ले समुंदरी धार उप्पडा में 50 गज से बेसी जमीन के नास क देले बा. दोसरका ढंग से कहल जाय, ओ सात बरीस में गांव हर साल आपन सात मीटर जमीन भुलवा देलस.

डॉक्टर राव के कहनाम बा, “चूंकि अरिया के इलाका तनी गतिशील होलें कुल, जे विश्व, क्षेत्र आ स्थान के घटन कुल के गहीर प्रभाव के सामना करेला. उप्पडा में हो रहल आर के कटाव के कई ओर से कारन बा.” बंगाल के खाड़ी में बढ़त बौन्ड़ेरा तूफ़ान कुल के अलावे विश्व के तापमान में बढ़ोतरी, धुर्वीय क्षेत्रन में ग्लेसियर के टघरल आ समुंदरी पानी के स्तर के लगातार बढ़ल, इ कुछ कारन बा जेकरा चलते आर के कटाव के समस्या लगातार बढ़ते जा रहल बा. गोदावरी बेसिन में बनावल जात बांध के कारन नदी के मुहाना पर तलछट के माटी (गाद) कम भईल जाता, जेसे इ समस्या गंभीर भईल जाता.

जइसे-जइसे समुंदरी धार के दबाव में उप्पडा के जमीन खतम भईल जाता, उंहा के निवासी के इयाद में उप्पडा अलगे-अलगे ढंग से जघ़े बनावता.

गांव वाला लोग में से केहू हमरा के तेलुगु सिनेमा नाकु स्वन्त्रम वाचिंदी देखे के कहल, जेकरा से हम उप्पडा से लागल पुरनका इयाद औरी कथा के एगो झलकी देख सकीं. साल 1975 के ओ सिनेमा में उप्पडा गांव के एगो दुसरे तस्वीर देखाई देता, जहां खूब दूर ले पसरल एगो सुन्नर बलुआ आर गांव आ समुन्दर के फरके करता. फिलिम समुन्दर आ बलुआ आर के एक्के गो फ्रेम में देखावता, जहंवा आर-कगार इतना चाकर रहे कि कैमरा चालक दल उंहा अलगे-अलगे कोना से दृश्य के फिल्मांकन कर सकत रहे. इ दृश्य फिलिम के महत्त वाला हिस्सा में दिखाई देला.

68 बरीस के एस. कृपाराव, जे उप्पडा के चर्च में पादरी हउवें, कहेलें, “हम एगो फिलिम के सूटिंग देखले बानी. इहंवा सूटिंग करे आइल कलाकार लोग इहां के गेस्ट हाउस में विलमल रहे लोग. अब उ कुल्ही समुंदर में बूड़ गईल बा. इहां ले कि उ गेस्टो हाउस.”

साल 1961 में छपल पुरबी गोदावरी के जिला जनगणना के पुस्तक में एगो गेस्ट हाउस के चर्चा कईल बा, “समुन्दर के कगरी से खाली एक फर्लांग (लमसम 200 मीटर) के दूरी प इहां एगो सानदार यात्री बंगला बा. इहां कोठरी कुल के दू गो (खूब नीमन सरियावल) सुइट बा. अइसन कहल जाला कि समुंदरी धार से पुरान बंगला के खतम हो गयीला के बाद एकरा के बनवावल गयील रहे. “एहिसे जहां ‘नाकु स्वतंत्रम वाचिंदी’ के कलाकार लोग बिलमल रहे, उ कम से कम दूसर अइसन बंगला रहे जौन समुंदरी धार से खतम हो गयील.

समुंदरी धार से खतम भईल कलाकृति कुल आ घर मकान के निसान अब अभिलेख आ ओ जघे के लोग के इयाद में बा, जेकरा के आगे के पीढ़ी खातिर सहेज के राखल बा. गांव के पुरनिया लोग के इयाद बा कि ओ लोग के बाबा – ईया चाहे माई-बाप समुन्दर में बूड़ल एगो बड़का पाथर (पेड्ड रई) के बारे में कई साल ले बतियावे लोग. साल 1970 के गजट में कुछ अइसने लिखल मिलता, “समुन्दर में आधा मील के दूरी पर बूड़ल एगो खान्खर में मलाहन के जाल अझुरा जाला, अउरी लईका कुल सिक्का के खोजे समुन्दर के आर प आ जालें कुल. काहे से कि समुन्दर अपना धार के संघे अइसनो चीज बहवा के ले आवेला जौन सायद कवनो बूड़ल सहर के कारन समुन्दर में छींटाइल बा.”

साल 1961 के हैंडबुक में इ खांखर के चर्चा भेंटाला, “बूढ़ मलाहन के कहनाम बा कि जब उ लोग मछरी पकड़े ला आपन नाव चाहे बेड़ा में जात रहे, त आर से एक मील दूर प ओ लोग के जाल इमारत के नोकदार जघे चाहे गाछ के डाढ़ में अझुरा जाये. एकरा अलावे ओ लोग के आपन जानकारी से समुन्दर ओ लोग के गांव के आपन कब्ज़ा में त लेते रहल बा.”

तब से ले के अभिन ले गांव के एगो बड़का हिस्सा समुन्दर में समा गईल बा, एकर लमसम सब समुंदरी आर, कई गो घर, कम से कम एगो मंदिर औरी मस्जिद समुंदरी धार से खतम हो चुकल बा. पाछे के दस साल में, समुंदरी धार के कर्ते 1463 मीटर लमहर ‘जियोट्यूब‘ भी खतम हो चुकल बा. एकरा 2010 में उप्पडा गांव के बचावे खातिर 12.16 करोड़ ले रोपया से बनवावल गईल रहे. जियोट्यूब बड़का नली जइसन लउकत कंटेनर होलें कुल जौन बालू आ पानी के घोल से भरल होला. एकरा तटरेखा संरक्षण आ भूमि सुधार खातिर काम में लावल जाला. एही गांव में रहे वाला 24 बरीस के डी. परसाद, जे कब्बो-कब्बो मछरी पकड़े के कार करेलें, कहेलें, “पाछे के पनारे बरीस में, समुंदरी धार के मर से दू बर्ग फीट क्षेत्रफल वाला दू गो बड़का चट्टानी पत्थर के हम छह इंच के कंकर में बदलत देखले बानी.”

साल 2021 में आईल तेलगु फिलिम उप्पेना में उप्पडा गांव के बदलल रूप देखावल गइल बा. एकरा में गांव, जे पहिले समुंदर किनारे रहे, ओकरा के समुंदरी धार से बचावे ला चट्टान आ पाथर के टेका के रखल बा. साल 1975 के फिलिम के ठीक उल्टा, समुन्दर आ गांव के एक्के फ्रेम में देखावे ला घट्टा से (चाहे एगो खास कोना से) से दृश्य कुल के फिल्मावल गईल, काहे से कि कैमरा धरे खातिर तटरेखा पर ठीकठाक जघे ना रहे.

अभिये के समय में उप्पडा के तबाही के सायद सबसे बड़का कारन पर साल के सितम्बर महीना के आखिर में आईल चक्रवात गुलाब रहे, जब समुंदरी धार कुल कम से कम तीस घर के लील गईल. फेर दिसंबर महीना में आईल चक्रवात जवाद उप्पडा–काकीनाडा सड़क के सफ्फा जरजर क देहलस. इ एगो नया सड़क रहे, जेकरा के बवंडर से आईल तबाही जतरा के लिहाज से असुरक्षित बना देहलस.

इ चक्रवाती तूफ़ान के बाद समुन्दर बिकराल रूप ले लहलास, आ अक्तूबर माह के सुरुआत में मरम्मा के परिवार के पुरान घर के बांचल-खुचल खांखरो ढाह देलस. धार कुल मरम्मा के घरो के बहवा ले गईल, जहंवां उ आ उनकर मरद रहत रहे लोग.

मरम्मा साल 2021 में आइल तबाही के इयाद क के कांप जाली, “चक्रवाती तूफ़ान गुलाब के तबाही के बाद हमनी में से कई लोग के दूसर लोग के घर के सामने बनल उंच चबूतरा प सूते के परल.”

साल 2024 के बाद से, जब उनकर चक्रवाती तूफ़ान के चलते आपन पुस्तैनी घर के छोड़े के परल, मरम्मा आ उनकर मरद टी. बाबई (जे बहुत गहीर समुन्दर में मछरी पकड़े वाला मलाह हउंवें) दू गो घर में रह चुकल बा लोग. पहिले एगो किराया के घर में, आ ओकरा बाद अपना घर में. पर साल के चक्रवाती तूफ़ान में उनकर घर बह गईल. अब, उ लोग अपना पड़ोस में एगो संबंधी के घर के बहिरा एगो चउतरा प खुलहे में रहता लोग.

मरम्मा कहेली, “एगो बेरा रहे, जब हम धनिक रहनी (तनियक नीमन प्इसा वाला लोग, आ हमनी के के साख रहे.) बेर-बेर के खदेराइल आ फेर-फेर घर बनवला के चलते उ हैरान रहबे कईली, ओकरा साथही चार गो बिटियन के बियाह में भईल खर्चा उनकरा परिवार के बचत के सफ्फा खतम क के ध देले बा.

एम. पोलेश्वरी इहां के एगो मलाह परिवार से बाड़ी, उहो मरम्मा के जइसन बिपत में बाड़ी, ”हमनी आपन घर बनावे खातिर कर्जा ले ले रहनी, बाकिर ऊ घर त डूब गईल. हमनी फेर कर्जा ले के घर बनवाई, त उ फेर से डूब जाई.” पोलेश्वरी के अबले दू गो घर समुंदरी धार के भेंट चढ़ गईल बा. अब उ एगो तीसरका घर में रहतारी, आ अपना परिवार के आर्थिक स्थिति आ पति के सुरक्षा खातिर हमेसा चिंता फिकिर में रहेली, काहे से कि उनकर मरद बहुत गहीर समुन्दर में मछरी पकड़े वाला मलाह हउवें. ”जदी उनका बहरा गईला पर चक्रवात आवता, त उनकर मौत हो सकेला, आ हमनी अउरी का कर सकेनी जान? समुन्दरे नू हमनीके भरन-पोसन के एकमातर जरिया बा.”

आय के दूसरो जर मूल खतम हो रहल बा. परसाद इयाद क के बतवलें ज्वार के कम भईला प उ अपना लायिकायीं में आपन संघाती संघे समुन्दर में सीपी आ केकड़ा पकड़े जात रहलें, जवन बेच के उ आपन जेब खर्चा निकाल लेस. बालू वाला आर के बिलाते सीपीयो कुल बिला गईली सन. जल्दिये खरीदारों बाजार से चल गईल.

पोलेश्वरी आपना घर के बहिरा घाम में सूखत सीपी के देख के कहली, “हमनी इ सीपिन के गोट्टा कईले रहनी, कि एकरा के बेच सकीं जान. पहिले इहां सीपी कीने वाला लोग बहुत आवे. अब त उहो लोग कम आवेला.”

साल 2021 के चक्रवाती तूफ़ान के बाद मरम्मा आ मलाह कॉलोनी के लमसम 290 दूसर लोग आंध्र परदेस के मुख्यमंत्री जगन रेड्डी के पाती लिख के उनकर के आपन गांव में बढ़त खतरा आ संकट के ब्तावावल लोग. उ पाती में कहल गईल, “एकरा से पहिले श्री वाई. एस. राजशेखर रेड्डी गारू(पूर्व मुख्यमंत्री) मलाहन के गांव के उप्पडा से लागल तटरेखा प बड़का-बड़का पाथर धरवइलें रहलन आ गांव के समुन्दर में बूड़े से बचवले रहलन. इ पाथर कुल हमनीके आये वाला चक्रवाती तूफ़ान सा सुनामी से बचाई.”

“अब मने बेर-बेर तूफ़ान आवता, अरिया धयिल पाथर दूसरा जघे चल गईल, आ खतम हो गईल बा. एहिसे कगरी बनल मकान आ मड़ई समुन्दर में डूब रहल बा. समुन्दर के अरिया रहे वाला लोग डर में जीयता.” एकरा अलावे, उ लोग पुरान पत्थर हटा के नया पाथर के रखवावे के मांगो कईल.

अइसे, डॉक्टर राव के मानी त, ए बात के पूरा सबूत नईखे कि इ चट्टान कुल से समुन्द्र के रोकल जा सकेला. बेसी से बेसी इ एगो अ स्थाई उपाय कहल जा सकेला. उ कहलें, “आपन घर के बचावे के परयास मत करा लोग. आर के बचावा. काहे से कि एहिसे टहनी के घर बांची. समुन्दर में अपतटीय बाधा के चलते उप्पडा में तट के क्षरण के रोकल जा सकेला. अब जइसे, जापान में बड़का-बड़का पत्थर जइसन बनावट समुंदरी धार खातिर रोक के काम करेला, जेकरा कारन काई के समुन्दर तट प आवे वाला धार गति मध्धिम हो जाला.”

भले समुंदरी अधिकई के चलते गांव समुन्दर के भीतरी धंसल जाता, बाकिर उंहा होखे वाला सामाजिक बदलाव के नजरंदाज नईखे कईल जा सकत. उप्पडा हाथ से बीनल बहुत अच्छा सिल्क के साड़ी ला नामी बा. इहां जोलहा समाज 1980 के बेर में अरिया के इलाका से हट के गांव के भीतरी इलाका में जा के बस गईल लोग. उंहा सरकार ओ लोग के कुछ जमीन सरकार पट्टा प दहलस. धीरे-धीरे गांव के धनिक लोग, खास कर के बड़का जात के लोग समुन्दर से दूर जा के बसे लागल लोग. बाकिर मलाह लोग के लगे उंहा रहे के अलावे दूसर चारा ना रहे. काहे से कि समुन्दरे ओ लोग के एकमात्र जीउका ह.

बड़का जात सुरक्षित जघे के खोज में तट के इलाका के छोड़ के जा रहल ब. एकरा से जाति व्यवस्था से जुड़ल रीत-रिवाज आ बात-बेवहार कमजोर होखे लागल. मिसाल खातिर, मलाह समाज प बड़का जात के लोगन आ ओ लोग के जग -परोजन ला आपन माल सेतियां में देवे के दबाव खतम हो ग्ईल. धीरे-धीरे, मलाह लोग इसाई धरम के माने लागल लोग. पादरी कृपाराव कहेलें, “कई लोग आजाद होखे खातिर इसाई धरम के मानल.” इहां के बेसी लोग बहुते गरीब बा अउरी बहुत छोट जात के ह लोग. कृपाराव के इसाई धरम माने के पहिले कई तरे के जात-पात वाला भेदभाव आ हिनाई से जूझे के परल.

चिन्नाबाई के बेटा, ओ दुर्ग्य्या कहेलें, ”20 से 30 साल पहिले गांवाला लोग में बेसी हिन्नू रहे. गांव के लोग गांव के देवी के परब हर साल मनावे लोग. अब गांव में बेसी लोग इसाई बा.” टोला के लोग 1990 के पहिले देवी के पूजा खातिर हर बियफे के छुट्टी लेट रहे लोग, अब चर्च जाये ला अतवार के छुट्टी करेला लोग. गांव के लोग के कहनाम बा कि कुछ दसेक बरीस पहिले त गांव में मुसलमानों लोग रहत रहे, लेकिन गांव के मस्जिद डूब गईला के बाद उ लोग इहां से चल गईल.

गांव में जे लोग बांचल बा ओ लोग खातिर समुन्दरे जीउका ह, भले उ केतनो खतरनाक होखे. आ उहे जिनगी के सबको पढ़ा के जाता. के. कृष्णा नाम के एगो मलाह हमरा के बतवलन, ”खतरा त चिन्हल जा सकेला. पत्थर कुल से एगो खास ‘घोल्लू घोल्लू‘ जइसन बोली सुनाये लागेला. पहिले, हमनी तारा के देख के धार के अकान लीँ जान, उ कुछ अलगहीं ढंग से चमके लागे. अब मोबाइल फोन इ कुल हम्नीके बता देता.”हम उनका से 2019 में आपन पहिलका जतरा में उनका से भेंटायिल रहनी. उनके मेहरारू के. पोलेरू कहली, ”कब्बो-कब्बो जब खेत ओर से पुरवा हवा बहेला, त मलाहन के तनियक्को आमदनी ना होला (ओ लोग के एक्को मछरी ना भेंटाला)“ हम मलाह टोला के अरिया बनल उनके मड़इ से समुन्दर के धार देखत रहनी. साल 2021 में आईल चक्रवात गुलाब के कर्ते उनके मड़इ टूट गईल त उ तब से दूसर मड़इ में रहे लागल लोग.

ए बीचे मरम्मा अपना संबंधी के घर के बहिरा चउतरा प रहे ला मजबूर बाड़ी. उनके बोली के थरथरी से उनके तकलीफ आ उनकर नोकसान के साफ़ पता चलत रहे. उ कहेली, “इ समुन्दर हमनी के दू घर के खा गईल बा, हम नईखी जानत कि हमनी फेर एगो अउरी घर बना पावल जाई कि ना.”

पारी के जलवायु परिवर्तन प केन्द्रित राष्ट्रव्यापी रिपोर्टिंग के प्रोजेक्ट, यूएनडीपी समर्थित ओ पहल के हिस्सा ह. जेकरा में साधारण लोग के जिनगी औरी ओकरा अनुभव से पर्यावरण में होत बदलाव के लिखल जाला.