خطرے میں ہیں معدوم ہوتے بھیڑیوں کی پناہ گاہیں

گزشتہ ۱۳ برسوں سے نَورادیہی جنگلاتی حیات کی پناہ گاہ (وائلڈ لائف سینکچوری) میں بطور وَن رکشک کام کر رہے تاراچند گونڈ نے بھیڑیوں (انڈین گرے وولف) کے بجائے اس علاقہ میں شیروں (ٹائیگرز) کو کہیں زیادہ تعداد میں منڈلاتے دیکھا ہے۔ تقریباً ۳۴ سالہ تاراچند اس المیہ پر مسکراتے ہیں، اس دوران چشمے کے پیچھے سے جھانکتی ان کی آنکھیں چمکتی ہوئی دکھائی دیتی ہیں۔

انہیں اس لیے حیرانی ہوتی ہے، کیوں کہ وہ ہندوستان کے سب سے پرانے اُس پارک میں کھڑے ہو کر یہ بات کر رہے ہیں، جو خاص طور پر معدومیت کے شکار بھیڑیوں کے لیے بنا ہے؛ یہاں شیر تو حال ہی میں، یعنی سال ۲۰۱۸ میں لائے گئے تھے۔ انڈین گرے وولف (کینیس لوپَس پیلی پیس) بر صغیر ہند میں پائی جانے والی بھیڑیوں کی ایک بہت پرانی نسل ہے، لیکن انہیں دیکھ پانا کافی مشکل ہے۔ ملک میں بھورے رنگ کے ان بھیڑیوں کی تعداد صرف تین ہزار کے آس پاس ہے، جو ۲۰۲۲ میں ہوئی شیروں کی گنتی (۳۶۸۲) سے بھی کم ہے۔

تاراچند کو آج بھی یاد ہے کہ انہوں نے گرے وولف کو پہلی بار کب دیکھا تھا۔ تاراچند، جو ایک گونڈ آدیواسی ہیں، بتاتے ہیں، ’’جنگل میں گشت لگانا شروع کرنے کے دو سال بعد میں نے پہلی بار بھیڑیا دیکھا تھا۔‘‘ وہ مزید بتاتے ہیں، ’’میں بھرائی سرکل میں ایک سینئر رینجر کے ساتھ تھا، تبھی دور سے ہمیں یہ جانور دکھائی دیا۔ وہ ہم سے دور بھاگ رہا تھا۔ میں نے ان سے پوچھا کہ یہ کون سا جانور ہے، تو انہوں نے کہا، ’یہ بھیڑیا ہے‘۔ یہی وہ جانور ہے، جس کے لیے یہ پناہ گاہ (سینکچوری) بنائی گئی ہے۔‘‘

نورادیہی میں کافی لمبے وقت تک صرف بھیڑیے ہی بڑے شکاری رہے ہیں۔ مدھیہ پردیش کی جنوبی وندھیہ پہاڑیوں میں پھیلے اس جھاڑی دار جنگل کے وہ ایک طرح سے مالک ہوا کرتے تھے۔ بھیڑیے کافی شرمیلے ہوتے ہیں، اس لیے انہیں دیکھ پانا ہمیشہ سے مشکل رہا ہے اور اکثر لوگ انہیں سِیار سمجھ لیتے ہیں۔ سُرکشا شرمک (جنگل کے چوکیدار) شُبھم رائکوار کہتے ہیں، ’’اگر کبھی دکھائی بھی دیتے ہیں، تو بھاگتے ہوئے یا تو ان کی پیٹھ دکھائی دیتی ہے یا پھر ہم بغل سے ان کی بس ایک جھلک ہی دیکھ پاتے ہیں۔‘‘

تقریباً ۷۰۰ بھیڑیوں کے ساتھ مدھیہ پردیش کسی بھی ریاست کے مقابلے سب سے زیادہ بھیڑیوں والی ریاست ہے۔ اس کے باوجود، ’’اسے کیمرے میں قید کرنا یا اپنی آنکھوں سے دیکھ پانا بہت مشکل ہے۔ میں آپ کو بتا رہا ہوں، بھیڑیا شیر سے بھی زیادہ چالاک ہوتا ہے!‘‘ یہ کہنا ہے ڈاکٹر انیرودھ مجومدار کا۔ وہ جبل پور میں واقع اسٹیٹ فاریسٹ ریسرچ انسٹی ٹیوٹ میں وائلڈ لائف بائیولوجسٹ ہیں اور نورادیہی وائلڈ لائف ڈویژن میں چار سال کے ایک پروجیکٹ کے تحت بھیڑیوں کے برتاؤ کا مطالعہ کر رہے ہیں۔ اس پروجیکٹ کا نام ہے: ’’ایکولوجی آف دی انڈین وولف اینڈ اِٹس کنزرویشن امپلی کیشنز اِن نورادیہی وائلڈ لائف ڈویژن۔‘‘

سال ۲۰۲۳ میں نورادیہی اور پاس کی رانی دُرگاوتی وائلڈ لائف سیکنچوری (جن کے درمیان کھلے گھاس کے میدان اور گاؤں ہیں) کو ملا کر ویرانگنا دُرگاوتی ٹائیگر ریزرو (وی ڈی ٹی آر) بنایا گیا۔ یہ نام گونڈوانہ سلطنت کی ملکہ رانی دُرگاوتی کے نام پر رکھا گیا ہے اور یہ ہندوستان کا ۵۴واں ٹائیگر ریزرو ہے۔ ملک میں شیروں کی تعداد بڑھ کر ۳۶۸۲ ہو جانے کی وجہ سے (اسٹیٹس آف ٹائیگرز ۲۰۲۲) اس نئے علاقہ کی ضرورت تو تھی، لیکن اس کے کچھ سنگین نتائج بھی سامنے آئے ہیں۔ تعداد میں اضافہ ہونے کے سبب پیدا ہوئے مسائل کی وجہ سے ۲۰۲۵ میں ۱۶۶ شیروں کی موت ہوئی، جن میں سے ۸۹ شیر اس جنگلی حیات کی پناہ گاہ کے باہر مارے گئے۔ اس ملک گیر رپورٹ کے مطابق، سینکچوری سے باہر نکل آئے شیروں کی وجہ سے کتنے انسانوں کی جان گئی، اس کا کوئی ڈیٹا دستیاب نہیں ہے۔

تقریباً ۱۲۰۰ کلومیٹر میں پھیلے اس ٹائیگر ریزرو میں بارہ سنگا، ہرن، رینگنے والے جانور، بر بحری (جل تھلیے) اور مچھلیوں کے ساتھ ساتھ کئی قسم کے پرندے بھی پائے جاتے ہیں۔ اس کی کئی ندیوں میں مگرمچھ بھی ہیں۔ یہاں ۴۰ سے زیادہ گاؤوں بھی ہیں، جنہیں شیروں اور آگے چل کر چیتوں کی بازآبادکاری کے لیے ہٹایا جائے گا۔ یہ ایک الگ کہانی ہے...

وی ڈی ٹی آر میں اس وقت شیروں کی تعداد ۲۴ ہے۔ سال ۲۰۲۶ میں یہاں افریقہ سے آٹھ چیتے لائے جانے کی امید ہے۔ اس کے لیے بوتسوانہ میں معاہدہ پر خود صدر جمہوریہ دروپدی مُرمو نے دستخط کیے تھے۔

اس کے ساتھ ہی، خود کے علاقہ میں رہنے والا یہ مقامی بھیڑیا حاشیہ پر چلا گیا ہے۔ یہ کہانی ہندوستان کی کئی معدومیت کی شکار انواع کی ہے، جن کی طرف نہ تو حکومت کی پوری توجہ ہوتی ہے اور نہ ہی ضروری وسائل حاصل ہوتے ہیں۔

’چالاک‘ بھیڑیا عام طور پر جنگل کی کہانیوں میں وِلین کے طور پر دکھایا جاتا ہے۔ قدیم جاتک کتھاؤں میں ’چالاک بھیڑیا (دی کنِنگ وولف)‘ جیسی کہانیاں ملتی ہیں، جن میں یہ بدمعاش شکاری جنگل کے شریف اور دوستانہ جانوروں کو دھوکہ دے کر ان پر حملہ کرتا ہے۔ زیادہ تر کہانیوں میں بھیڑیے کی شبیہ اچھی نہیں ہے۔ روڈیارڈ کِپلِنگ کی ’دی جنگل بُک‘ ایک استثنا ہے، جس کے مرکزی کردار، یتیم موگلی کی پروروش بھیڑیوں کے ایک گروہ کے ذریعہ کی جاتی ہے۔

جہاں کپِلِنگ نے ان جانوروں کو شائستہ سماجی اقدار کی علامت کے طور پر دکھایا، وہیں نوآبادیاتی دور میں کئی انگریز افسر بھیڑیوں کا بے رحمی سے شکار کروا رہے تھے۔ اُس وقت بھیڑیا مارنے پر ملنے والا انعام تیندوئے کے مقابلے زیادہ ہوا کرتا تھا۔

جنگل کے چوکیدار شُبھم بتاتے ہیں کہ وہ یہیں بڑے ہوئے ہیں اور مقامی بندیل کھنڈی زبان میں لوگوں کو بھیڑیے کو ’’حرام خور‘‘ کہتے ہوئے سنتے آئے ہیں۔ جب چراگاہوں کے پاس بھیڑیے کی آہٹ ہوتی ہے، تو چرواہے ڈر کے مارے ’’بِگنا آوو [بھیڑیا آ رہا ہے]‘‘ چلاّتے ہیں۔ حالیہ برسوں میں پاس کے اتر پردیش میں بھیڑیوں کے ذریعہ بچوں کو اٹھا لے جانے کی خبریں بھی سرخیوں میں رہی ہیں۔

وائلڈ لائف بائیو لوجسٹ مجومدار کہتے ہیں کہ انہیں اس شکاری کی سماج میں بنی خراب شبیہ کا گہرا احساس ہے، جس میں بڑے بلّی نما جانوروں جیسی خوبصورتی نہیں ہے۔ وہ چاہتے ہیں کہ بھیڑیوں کو بچانے میں مقامی لوگ سرگرمی کے ساتھ شامل ہوں۔ لیکن انہیں ان بھیڑیوں کی فکر رہتی ہے، جو محفوظ علاقوں سے باہر نکل جاتے ہیں اور ڈر کے مارے لوگ یا آوارہ کتے انہیں جلد ہی مار دیتے ہیں۔

کتوں کی فیملی سے تعلق رکھنے والی یہ نسل – بھیڑیا درحقیقت گھریلو کتّوں کا جد امجد ہے، اور جنگلی حیات کے تحفظ کا (ترمیمی) قانون، ۲۰۲۲ کے شیڈول ۱ میں شامل ہے۔ اس زمرہ میں شامل جانور معدومیت کے شکار تصور کیے جاتے ہیں اور انہیں سب سے ترجیحی تحفظ فراہم کیا جاتا ہے۔ اس لیے ان کے شکار اور کاروبار پر پوری طرح پابندی ہے اور دونوں کے لیے سخت سزا مقرر کی گئی ہے۔

ڈاکٹر یادویندر دیو جھالا یاد دلاتے ہیں، ’’بھیڑیوں کی حالت بھی شیروں جتنی ہی نازک ہے، لیکن ان کے لیے مرکوز تحفظاتی کوشش تقریباً نہیں کے برابر ہے۔ یہ دنیا میں گرے وولف بھیڑیوں کی سب سے پرانی زندہ بچ جانے والی نسل ہے۔‘‘ وہ بنگلورو میں واقع نیشنل سنٹر فار بائیولوجیکل سائنسز (این سی بی ایس) میں سینئر سائنس داں ہیں اور انڈین گرے وولف بھیڑیوں پر انہوں نے کافی تفصیل سے لکھا ہے۔

تحفظ کے لیے ایسی پناہ گاہ بیحد ضروری ہوتی ہے، جہاں بھیڑیوں کی اچھی تعداد برقرار رہ سکے، تاکہ افزائش نسل اور تعداد میں اضافہ ممکن ہو سکے۔ لیکن جھالا کے تحقیقی مقالہ ’اسٹیٹس، ایکولوجی اینڈ کنزرویشن آف دی انڈین وولف‘ میں بتایا گیا ہے کہ ترقیاتی منصوبوں، کتوں کے ساتھ دوغلائیت (دو نسلوں کے ساتھ تولیدی ملاپ)، سڑکوں، بیماریوں اور چرواہوں اور دیگر لوگوں کے ذریعہ کیے گئے مظالم و استحصال کے سبب بھیڑیوں کی رہاہش گاہیں لگاتار کم ہوئی ہیں۔ کئی جگہ لوگ ان کے بلوں میں دھواں بھر کر بھیڑیے کے بچوں کو باہر نکالتے ہیں اور پھر انہیں گولی مار دیتے ہیں یا زہر دے دیتے ہیں۔ انہوں نے پیپلز آرکائیو آف رورل انڈیا سے کہا، ’’انسانوں کی آبادی بڑھنے کے سبب بڑے پیمانے پر ان کی پناہ گاہوں کا نقصان ہوا ہے اور بدلہ لینے کی نیت سے کیے گئے شکار، بھیڑیوں کی آبادی میں آئی شدید کمی کی بڑی وجہ رہی ہے۔‘‘

وَن رکشک کے طور پر تاراچند کو قانون پر کچھ حد تک بھروسہ ہے۔ وہ کہتے ہیں، ’’سب کو قانون کا علم ہے۔ جب کہیں بِگنا [بھیڑیے کے لیے گونڈی زبان کا لفظ] دکھائی دیتا ہے، تو لوگ ہمیں خبر کر دیتے ہیں۔‘‘

تاراچند ریاست کے شمالی حصہ کی مَیہر تحصیل میں، جنگلوں کے پاس ہی پلے بڑھے۔ ان کے ماں باپ نے اچھی تعلیم کے لیے سات سال کی عمر میں ہی انہیں شہر میں رہنے والی اپنی شادی شدہ بہن کے گھر بھیج دیا۔ آگے چل کر انہوں نے تاریخ میں ایم اے کیا۔ وہ یاد کرتے ہیں کہ وردی کے شوق نے ہی انہیں فاریسٹ سروس کا امتحان دینے کے لیے آمادہ کیا۔ مسکراتے ہوئے وہ کہتے ہیں، ’’مجھے لگا، پولیس کی نوکری بہت زیادہ بھاگ دوڑ والی ہوگی۔‘‘

لیکن وَن رکشک (فاریسٹ گارڈ) کی زندگی بھی کم بھاگ دوڑ والی نہیں ہے۔ وہ اپنے ساتھیوں کے ساتھ سرکاری کوارٹر میں رہتے ہیں، صبح پانج بجے اٹھتے ہیں اور ایک گھنٹہ کے اندر اپنے ساتھی کے ساتھ جنگل میں گشت پر نکل جاتے ہیں۔ وہ ہر دو تین مہینے میں ایک بار گھر جاتے ہیں اور کچھ دن رہ کر واپس لوٹ آتے ہیں۔ ہنستے ہوئے وہ کہتے ہیں، ’’میری چار سال کی بیٹی کہتی ہے، ’میرے پاپا ٹائیگر ہیں‘۔‘‘

پاس کے دیوری گاؤں کے رہنے والے ۳۰ سالہ شُبھم رائکوار بچپن سے ہی جنگل کو اچھی طرح جانتے تھے۔ مسکراتے ہوئے وہ یاد کرتے ہیں، ’’جب ہم چھوٹے تھے، تو یہاں طرح طرح کی دلچسپ چیزیں کیا کرتے تھے۔‘‘ لیکن ۱۲ویں کے بعد وہ کام کے لیے کھنڈوا چلے گئے۔ سال ۲۰۱۸ میں گھر آئے، تو انہیں پتہ چلا کہ محکمہ جنگلات کو ایسے نوجوانوں کی ضرورت ہے جو یہاں لائے جا رہے شیروں کی نگرانی کر سکیں۔ اس پارک میں دو شیر لائے گئے تھے – کانھا ٹائیگر ریزرو سے این۔۱، ایک مادہ یتیم بچہ جس کی ماں کو زہر دے دیا گیا تھا، اور باندھو گڑھ سے این۔۲، ایک نر شیر۔

جب این۔۱ نے پہلا شکار کیا، تو افسران جنگلات کو کسی ایسے شخص کی ضرورت تھی، جو پاس جا کر حالات کا جائزہ لے سکے اور ڈرے نہیں۔ شُبھم کو بلایا گیا اور ہاتھی پر بھیجا گیا۔ وہ کہتے ہیں، ’’مجھے اسے دیکھنا تھا اور واپس آ کر رپورٹ دینی تھی۔ میری حفاظت کے لیے پورا سامان موجود تھا اور میں نے زیادہ تر وقت درخت پر بیٹھ کر ہی گزارا۔‘‘

سرکاری نوکری میں کسی اونچے عہدہ کے لیے درخواست کرنے کے بارے میں پوچھنے پر شُبھم مسکراتے ہوئے کہتے ہیں، ’’میں نے آگے پڑھنے کے بارے میں سوچا تو ہے، لیکن زیادہ تر وقت تحفظاتی کاموں میں ہی نکل جاتا ہے، پڑھائی کے لیے وقت ہی نہیں بچتا۔‘‘

تاراچند اور شُبھم جیسے وَن رکشک اور وَن چوکیدار دن رات گشت کرتے رہتے ہیں اور روزانہ پیدل ۵ سے ۹ کلومیٹر تک چلنا ان کا کام ہے۔ وہ شکاری جانوروں اور شکار نسلوں کی موجودگی کے نشان تلاش کرتے ہیں، اور ساتھ ہی غیر قانونی شکار اور درختوں کی کٹائی پر بھی نظر رکھتے ہیں۔ وہ ہندوستان کے جنگلات کے پیدل سپاہی ہیں، جو چوبیسوں گھنٹے زمین پر رہ کر تحفظاتی اہداف کو پورا کرتے ہیں۔

وہ بھیڑیوں پر بھی نظر رکھتے ہیں اور کہتے ہیں کہ معدومیت کے خطرے سے دوچار اس جانور کے بارے میں ون رکشکوں اور ون چوکیداروں کے لیے ہونے والی باضابطہ سرکاری ورکشاپ واقعی میں مددگار ثابت ہوتی ہیں۔ تاراچند کہتے ہیں، ’’یہ ان کا گھر ہے۔ ہمیں اس کا خیال رکھنا ہے۔‘‘

ترجمہ نگار: قمر صدیقی