துவரைக்கு இது நல்ல காலமில்லை

வித்தல் சவான் இரண்டு மாதங்களாக அழைப்பிற்காக காத்திருக்கிறார். அரசு தன்னிடமுள்ள ஒன்பது குவிண்டால் துவரம் பருப்பை கொள்முதல் செய்யும் என்ற நம்பிக்கையில் அவர் ஃபிப்ரவரி 28ஆம் தேதி உஸ்மானாபாத்தின் கலம்ப் தாலுக்காவில் உள்ள NAFED மையத்திற்கு சென்று பதிவு செய்திருந்தார். ஆனால் அலுவலர் அவரது பெயர் மற்றும் மொபைல் எண்ணை ஒரு நோட்டில் குறித்துக் கொண்டு, “உங்களுக்கு அழைப்பு வரும்,“ என்றுக் கூறினார்.

“நான் அவ்வப்போது அவர்களுக்கு அழைத்துப் பார்த்தேன். ஃபிப்ரவரி 28-ம் தேதிக்கு பிறகு 4-5 முறை மையத்திற்கு நேரிலும் சென்று வந்தேன்,“ எனும் அவர், மே மாத தொடக்கத்தில் கடுமையான வெயிலில் மையத்தின் அலுவலக மேசை அருகே அமர்ந்திருக்கிறார். வித்தலுக்கு பங்கானில் ஒன்பது ஏக்கர் விவசாய நிலம் உள்ளது. அவர் 25 கிலோமீட்டர் பயணித்து கலம்பிற்கு மீண்டும் வந்து தனது துவரம் பருப்பு கொள்முதல் செய்யப்படுமா என கேட்க வந்துள்ளார். அவரைப் போன்று பல விவசாயிகளை அங்கு காண முடிந்தது. “அவர்கள் கிடங்கு நிரம்பிவிட்டது அல்லது போதிய சாக்கு பை இல்லை என்கின்றனர். இப்போது காலக்கெடு முடிந்துவிட்டது, என்னிடம் பதிவு செய்ததற்கான எந்த ஆதாரமும் கிடையாது.“

கடந்த ஆண்டு துவரம் பருப்பின் அமோக விளைச்சல் காரணமாக 2016 டிசம்பர் மத்தியில் மகாராஷ்டிரா அரசு பல்வேறு மாவட்டங்கள் மற்றும் தாலுகாக்களில் இந்திய தேசிய வேளாண் கூட்டுறவு சந்தைப்படுத்தல் கூட்டமைப்பு (NAFED) மையங்களை அமைத்தது. விவசாயிகளிடமிருந்து விளைபொருட்களை கொள்முதல் செய்யும் வியாபாரிகள், அபரிமிதமான பருப்புக்கு அடிமாட்டு விலை கொடுத்து கொள்ளையடிக்காமல் தடுக்கும் நோக்கில்.

ஆனால் NAFED மையங்கள் இதற்கு முழுமையாக தயாராகவில்லை. கலம்ப் மைய அலுவலர் இதை மறுக்கவில்லை. அவர் கலம்பின் வேளாண் உற்பத்தி சந்தைப்படுத்தல் குழுவின் செயலாளர் எஸ். சி. சவானிடம் ஆலோசனையில் ஈடுபட்டார். “நாங்கள் அறிக்கை தயாரித்து அரசுக்கு அனுப்புகிறோம்,“ என்கிறார் சவான். “விவசாயிகள் பலர் காலக்கெடுவிற்கு முன்பே தங்கள் துவரம் பருப்பை கொண்டு வந்துவிடுகின்றனர். சில காரணங்களால் எங்களால் அதை ஏற்க முடியவில்லை. அரசு இதற்கு உடனடியாக பதிலளித்தால், நாங்கள் அதற்கேற்ப நடப்போம்.“

மாநில அமைச்சர் (கூட்டுறவு, ஜவுளி மற்றும் சந்தைப்படுத்தல்) சுபாஷ் தேஷ்முக் ஒவ்வொரு மணி துவரம் பருப்பையும் வாங்குவதாக அரசு உறுதியளித்த பின்னர், NAFED மையங்களின் காலக்கெடு மார்ச் 15, மார்ச் 31 மற்றும் ஏப்ரல் 22 வரை நீட்டிக்கப்பட்டது. தங்கள் வீடுகளில் பருப்பு மூட்டைகளை அடுக்கி வைத்து அதை பதிவு செய்ய போராடிய விவசாயிகளுக்கு இது ஒரு நிவாரணமாக இருந்தது.

ஆனால் ஏப்ரல் 22ஆம் தேதிக்கு பிறகு விவசாயிகளிடமிருந்து துவரம் பருப்புகளை வாங்க மகாராஷ்டிரா அரசு மறுத்துவிட்டது. இந்த காலக்கெடு மேலும் நீட்டிக்கப்படாது என்று கூறிவிட்டது. மையங்களில் அதிகாரப்பூர்வமாக பதிவு செய்து பருப்பை இறக்கிச் சென்ற விவசாயிகளிடம் மட்டுமே ஏற்க முடியும் என்று கூறிவிட்டது.

வித்தல் சவானின் சரக்கு இந்த தொகுப்பில் இல்லை. இருப்பினும் அவரும் - மற்ற விவசாயிகளைப் போலவே - காலக்கெடுவுக்கு முன்பே பருப்பு வகைகளை மையத்திற்கு கொண்டு வந்திருந்தார். ஆனால் அதிகாரியின் முறைசாரா குறிப்பை மட்டுமே வைத்துக்கொண்டு, வித்தல் சரியான நேரத்தில் மையத்திற்கு வந்தார் என்பதை நிரூபிக்க முடியாது. "நான் அவர்களை எப்படி நம்புவது?" என்று அவர் கவலையுடன் கேட்கிறார். "என் பெயர் எழுதப்பட்ட பக்கத்தை அவர்கள் கிழித்துவிட்டால் என்ன செய்வது? அறுவடை செய்து பல மாதங்கள் ஆகிவிட்டன. 45,000 ரூபாய் மதிப்புள்ள கையிருப்பு எனது வீட்டில் கிடக்கிறது. அவர்கள் அதை வாங்கவில்லை என்றால், நான் அதை அடிமாட்டு விலைக்கு விற்க வேண்டியிருக்கும் (குவிண்டாலுக்கு 1,000 ரூபாய் என்ற குறைந்த விலையில் இருந்தாலும் கூட). பருவமழை தொடங்கிவிட்டால் துவரம் பருப்பு கெட்டுப் போய்விடும்."

பல ஆண்டுகளுக்குப் பிறகு, கடந்த முறை மராத்வாடாவில் பல விவசாயிகள் அதிக நீர் தேவைப்படும் கரும்பு பயிரை விடுத்து, மாற்றாக பாரம்பரிய உணவுப் பயிரான துவரை விதைத்தனர். முந்தைய ஆண்டுகளை விட 2016 ஆம் ஆண்டில் வறட்சி மிக கடுமையாக இருந்ததால் இந்த மாற்றம். 2015 ஆம் ஆண்டில் 4.4 லட்சம் மெட்ரிக் டன் ஆக இருந்த விளைச்சல் தற்போது (மாநிலம் முழுவதும்) 20 லட்சம் மெட்ரிக் டன் என அமோக விளைச்சலைப் பெற்றுள்ளன என்று சுபாஷ் தேஷ்முக் கூறுகிறார்.

கரும்பிலிருந்து நிலையான உணவுப் பயிருக்கு விவசாயிகள் மாறியது காலப்போக்கில் தண்ணீரைப் பாதுகாக்க உதவியது. எனினும், கொள்முதலில் அரசின் அலட்சியத்தால் குறைந்தது ஓராண்டிற்கு சந்தையில் மிக மலிவுப் பொருளாக துவரம் பருப்பை மாற வாய்ப்புள்ளது.

மகாராஷ்டிராவில் துவரையின் மொத்த சந்தை விலை 2014-15 ஆம் ஆண்டில் குவிண்டாலுக்கு சுமார் 10,000 ரூபாயாக இருந்தது, நல்ல விளைச்சலால் வீழ்ச்சியடைந்தது. அரசு NAFED மையங்களைத் தொடங்கி, குறைந்தபட்ச ஆதரவு விலையை [விவசாயிகளுக்கு ஆதரவளிக்க மாநில அரசு முடிவு செய்த MSP] ரூ.5,050 என நிர்ணயிக்காமல் போயிருந்தால், விளைச்சல் அமோகமாக இருந்ததைத் தொடர்ந்து சந்தை விலை குவிண்டாலுக்கு ரூ.3,000-க்கும் கீழே என வீழ்ந்திருக்கும்.

ஆனால் விசித்திரம் என்னவென்றால், விளைச்சல் சிறப்பாக இருக்கும் என தெளிவாகத் தெரிந்த பிறகும், இந்திய அரசு பிற நாடுகளில் இருந்து 57 லட்சம் டன் துவரம் பருப்பை குவிண்டாலுக்கு ரூ.10,114 என்ற அடிப்படையில் இறக்குமதி செய்தது - ஒவ்வொரு ஆண்டும் வெவ்வேறு அளவுகளில் இறக்குமதி செய்தும் வருகிறது.

எனினும், மகாராஷ்டிரா விவசாயிகளின் விளைபொருட்களில் NAFED 25 சதவீதத்தை விட அதிகமாக கொள்முதல் செய்துள்ளதாக அரசு ஒரு GR (அரசு தீர்மானம்)-ல் தெரிவித்துள்ளது. ஏப்ரல் மாதத்திற்குள், 4 லட்சம் மெட்ரிக் டன் துவரம் பருப்பு ஏற்கனவே வாங்கப்பட்டுள்ளது என்று தேஷ்முக் கூறுகிறார், மேலும் 1 லட்சம் மெட்ரிக் டன் கொள்முதல் செய்ய பதிவு செய்யப்பட்டுள்ளது. "விவசாயிகளுக்கு அவர்களின் நிலுவைத் தொகை கிடைப்பதை உறுதி செய்வதற்காக உரிய நடைமுறையைப் பின்பற்றியுள்ளோம்," என்று அவர் கூறுகிறார்.

ஆனால் அதிகாரப்பூர்வ பதிவில் உற்பத்தி எண்ணிக்கை 20 லட்சம் மெட்ரிக் டன்னுக்கு குறைவாகவே உள்ளன. துவரை பெரும்பாலும் ஓர் 'ஊடு' பயிராக விதைக்கப்படுகிறது - கரும்பு அல்லது பிற பயிர்களின் இடையே வளர்வதால் இதற்கு அதிக தண்ணீர் தேவையில்லை, சுமார் நான்கு மாதங்களில் அறுவடை செய்யப்படுவதால் இது ஒரு கூடுதல் இலாபமாக கருதப்படுகிறது. இதனால் தான் பல விவசாயிகள் தங்கள் நில ஆவணங்களில் முக்கிய பயிராக இதை குறிப்பிடுவதில்லை. துவரம் பருப்பு என விவசாயிகளின் ஆவணங்களில் குறிப்பிடப்பட்ட உற்பத்தியை மட்டுமே அரசு கணக்கிடுகிறது. இந்த ஆண்டு பதிவு செய்யப்பட்டதை விட குறைந்தது மூன்று மடங்கு பருப்பு விவசாயிகளிடம் தேங்கி கிடப்பதாக அறிக்கைகள் தெரிவிக்கின்றன.

உஸ்மானாபாத்தில் உள்ள தனோரா கிராமத்தைச் சேர்ந்த 58 வயதாகும் விவசாயி மேக்நாத் ஷெல்கி, NAFED மையத்திற்கு பலமுறை நேரில் சென்றும் தனது ஆறு குவிண்டால் துவரம் பருப்பை பதிவு செய்ய முடியவில்லை. “ஒருமுறை எடை இயந்திரம் இல்லை என என்னை திருப்பி அனுப்பினர். சரக்குகளை இங்கு விட்டுச் சென்றால் திருடி விடுவார்கள். மையம் பொறுப்பேற்காது என்றனர்,“ என்றபடி தனது வீட்டின் சிறிய அறையில் ஆறு மூட்டை துவரம் பருப்பு அடுக்கி வைக்கப்பட்டுள்ளதை அவர் சுட்டிக்காட்டுகிறார். “ஒரு மாதமாக மையம் மூடப்பட்டு கிடந்தது. அதை ஒருபோதும் தொடர்ச்சியாக திறந்தது கிடையாது.“

துவரையுடன் சோயாபீன், பருத்தி ஆகியவற்றையும் தனது எட்டு ஏக்கர் நிலத்தில் ஷெல்கி பயிரிட்டுள்ளார். ஒவ்வொரு முறை NAFED மையத்திலிருந்து திருப்பி அனுப்பும்போதும் அவர் ஆறு குவிண்டால் மூட்டைகளையும் 10 கிலோமீட்டர் தொலைவில் உள்ள வீட்டிற்கு எடுத்து வர வேண்டும். “போக்குவரத்திற்கே [டெம்போ வண்டியில்] நான் நூற்றுக்கணக்கான ரூபாய் செலவிட்டுவிட்டேன்,“ என்கிறார். “ஒவ்வொரு துவரை மணியையும் வாங்கிக் கொள்வதாக அரசு உறுதி அளித்தது. அரசால் உறுதிமொழியை காப்பாற்ற முடியாவிட்டால், சம்பா பருவ ஏற்பாட்டில் எங்களுக்கு பெரும் பின்னடைவு ஏற்படும்.“

வித்தல் முயற்சியை கைவிட்டு மதியம் பங்கான் திரும்ப முடிவு செய்துவிட்டார். “விளைச்சல் தோற்றாலும், அமோக விளைச்சல் என்றாலும் நாங்கள் சாக தான் வேண்டும்,“ என்கிறார். ஏற்கனவே கடனில் சிக்கியுள்ளனர், நடவு பருவம் நெருங்கி வருகிறது, இந்நிலையில் துவரம் பருப்பு தேக்கம் மகாராஷ்டிரா விவசாயிகளுக்கு பாரத்தை இன்னும் கூட்டியுள்ளது.

NAFED மையத்தில் அரை நாளை கழித்த பிறகும் தனது துவரம் பருப்பை அவர்கள் ஏற்பார்களா என்று வித்தலுக்கு தெரியவில்லை. அங்கிருந்து புறப்படும்போது, அவர் மீண்டும் எப்போது வருவது எனக் கேட்கிறார், “உங்களுக்கு அழைப்பு வரும்,“ என்று அவர்கள் கூறுகின்றனர்.

பின்குறிப்பு: இக்கட்டுரை வெளியானபோது, மகாராஷ்டிரா அரசு காலக்கெடுவை மே 31 வரை நீட்டித்திருந்தது. இது விவசாயிகள் ஏற்கனவே அனுபவித்து வரும் துன்பத்தை மாற்றியமைக்காது அவர்களின் பிரச்னைக்கு நிலையான ஒரு தீர்வு தரும் உத்தரவாதத்தையும் அளிக்காது.

வித்தல் சவான் சொல்கிறார், கலம்பில் உள்ள NAFED மையம் மூடப்பட்டுவிட்டது, அவரது துவரை கொள்முதல் செய்யப்படவில்லை. இதுகுறித்து அலுவலரிடம் சவான் தொலைப்பேசியில் கேட்டபோது, அவரிடமிருந்து தெளிவான பதில் கிடைக்கவில்லை.

தமிழில்: சவிதா