ننگل کی عورتیں چاہتی ہیں منشیات سے پاک گاؤں

’’اِتھے روٹی کَتھ مِلدِی ہے، چِٹّا سرعام مِلدَا ہے [یہاں کھانے کی قلت ہے، لیکن ہیروئن آسانی سے دستیاب ہے]۔“

ہر ونس کور کا اکلوتا بیٹا منشیات کا عادی ہے۔ ’’ہم نے اسے روکنے کی کوشش کی، مگر وہ آج بھی جھگڑا کرتا ہے، سارے پیسے لے جاتا ہے اور نشہ آور چیزوں پر خرچ کر دیتا ہے،‘‘ یہ کہنا ہے ۲۵ سال کے ایک نوجوان لڑکے کی بے بس ماں کا، جو حال ہی میں باپ بنا ہے۔ ہروَنس بتاتی ہیں کہ ان کے گاؤں میں چِٹاّ (ہیروئن)، انجکشن اور نشہ آور دواؤں کی گولیاں آسانی سے دستیاب ہیں۔

’’اگر حکومت چاہے تو نشیلی دواؤں کے غلط استمعال کو روک سکتی ہے، ورنہ ہماری اولادیں تباہ ہو جائیں گی۔ ہرونس کور ایک دِہاڑی مزدور ہیں، جو راؤکے کلاں گاؤں میں آلو کے گودام میں مزدوری کرتی ہیں۔ ان کو آلو کی ایک بوری بھرنے کے عوض ۱۵ روپے ملتے ہیں اور وہ دن میں تقریباً ۱۲ بوریاں بھر لیتی ہیں۔ نتیجاً روزانہ تقریباً ۱۸۰ روپے ان کی آمدنی ہو جاتی ہے۔ ان کے شوہَر سکھدیو سنگھ جو ۴۵ سال کے ہیں، نہال سنگھ والا کے ایک گودام میں یومیہ اجرت پر کام کرتے ہیں۔ یہ جگہ ان کے گاؤں ننگل سے ۴ کلومیٹر دور ہے۔ کام دستیاب ہونے پر وہ بھی گیہوں اور چاول کی بوریاں بھرتے ہیں، جس سے انہیں روزانہ ۳۰۰ روپے کی آمدنی ہو جاتی ہے۔ ان کی اسی آمدنی پر پورے گھر کا خرچ چلتا ہے۔

پنجاب کے موگا ضلع کے اس گاؤں میں ان کی پڑوسن کرن کور سیدھے اصل بات پر آتے ہوئے کہتی ہیں، ’’جو بھی ہمارے گاؤں سے منشیات کے خاتمہ کا وعدَہ کرے گا، ہم اسی کو ووٹ دیں گے۔‘‘

ظاہر ہے کہ کرن کی صاف گوئی ان کے شوہر کے نشہ کا عادی ہونے سے جڑی ہوئی ہے۔ ان کے دو بچے ہیں – ایک ۳ سال کی بیٹی اور دوسرا چھ مہینے کا بیٹا۔ وہ کہتی ہیں، ’’میرے شوہر ایک دِہاڑی مزدور ہیں اور منشیات کے عادی ہیں۔ وہ گزشتہ تین سالوں سے اس میں مبتلا ہیں۔ جو بھی کماتے ہیں، نشہ آور دواؤں پر اڑا دیتے ہیں۔‘‘

موگا ضلع کا ننگل گاؤں فریدکوٹ پارلیمانی حلقہ میں آتا ہے، جہاں یکم جون کو ووٹ ڈالے جائیں گے۔

چھ ماہ قبل، ننگل گاؤں کا ایک ۲۴ سالہ لڑکا نشیلی دواؤں کی زیادہ مقدار لینے کی وجہ سے مر گیا۔ ایک جوان آدمی کا اتنی کم عمر میں مر جانا گاؤں والوں کی یادوں میں اب بھی تازہ ہے۔ ’’ ایک تو بے روزگاری ہے اور زیادہ تر نوجوان بیکار بیٹھے ہوئے ہیں، جس کی وجہ سے وہ بری صحبت میں پڑ جاتے ہیں،‘‘ پرم جیت کور کہتی ہیں، جو ٢٠٠٨ سے ننگل گاؤں میں آشا (منظور یافتہ سماجی صحت کارکن) کے طور پر کام کر رہی ہیں۔

وہ مزید کہتی ہیں، ”صرف حکومت ہی اس صورتحال [منشیات] کو قابو میں کر سکتی ہے۔‘‘ سال ۲۰۲۲ میں، پنجاب میں ۱۴۴ افراد (سبھی مرد) کی زیادہ مقدار میں نشیلی دوائیں لینے سے موت ہو گئی تھی (نیشنل کرائم ریکارڈز بیورو)۔

سال ۲۰۲۲ کے اسمبلی انتخابات کے پرچار کے دوران عام آدمی پارٹی کے قومی کنوینر اور دہلی کے وزیر اعلی اروند کجریوال نے ان کی پارٹی کے اقتدار میں آنے پر پنجاب کو تین مہینے کے اندر منشیات سے پاک کر دینے کی قسم کھائی تھی۔ بعد میں وزیر اعلی بھگونت مان نے پٹیالہ میں ۱۵ اگست ۲۰۲۳ کو دی گئی یوم آزادی کی اپنی تقریر میں یہ اعلان کیا تھا کہ ریاست ایک سال کے اندر منشیات سے پاک ہو جائے گی۔

ریاستی حکومتیں ریاست کے محکمہ آبکاری کی معرفت نشہ آور دواؤں کی فروخت، استمعال، کھپت اور نقل و حمل کو کنٹرول کرتی ہیں۔ لیکن مقامی لوگوں کا کہنا ہے کہ نشیلی دواؤں کی خرید و فروخت اور اس کا کاروبار ایک منظم مافیا کے تحت چلتا ہے۔ ’’ہمارے گاؤں کے باہر سے وہ لوگ جن کے موگا، لدھیانہ، برنالہ اور دیگر مقامات سے روابط ہیں، وہاں سے ہمارے گاؤں میں نشیلی دوائیں لاتے ہیں،‘‘ بوٹا ننگل کہتے ہیں۔ وہ ننگل میں کسان مزدور سنگھرش کمیٹی کے ممبر ہیں۔

منشیات اور نشیلی دواؤں (این ڈی پی ایس) سے متعلق قانون، ۱۹۸۵ کے مطابق، ہندوستان میں نشیلی دواؤں کا استمال اور انہیں رکھنا ایک جرم ہے۔ ’’لیکن پولیس پر بھی کچھ کارروائی نہ کرنے کا دباؤ رہتا ہے،‘‘ یہ کہنا ہے کمیٹی کے رکن سکھ چین سنگھ کا۔ وہ مزید کہتے ہیں، ’’اگر ایم ایل اے چاہے، تو وہ ہمارے گاؤں میں نشَہ آوَر مادّوں کا آنا بند کروا سکتا ہے۔‘‘ سابق سَرپَنچ لکھبیر سنگھ، جو اب کانگریس پارٹی میں ہیں، اس بات سے متفق ہوتے ہوئے کہتے ہیں، ’’پِیچھے توہ سَرکار روکے تیئی رکوگا [حکومت کی مداخلت ہی اسے روک سکتی ہے]۔‘‘

ننگل کی رہائشی کمل جیت کور کا کہنا ہے کہ سیاست داں اس مسئلہ کو حل نہیں کر رہے ہیں۔ ان کا کہنا ہے کہ فریدکوٹ کے آپ پارٹی کے امیدوار کرم جیت انمول نے اپنی ریلی میں نشہ آور اشیاء کےغلط استمعال پر کچھ نہیں کہا۔ ’’انہوں نے صرف ہم سے ووٹ مانگے، عورتوں سے ووٹ دینے کے عوض کئی فائدے مہیا کرانے کا وعدہ کیا۔‘‘ یہ کہنا ہے ۴۰ سال کی کمل جیت کور کا جن کا تعلق دلت مذہبی سکھ برادری سے ہے۔ ’’بدقسمتی سے، کسی بھی [سیاسی] پارٹی نے اس پر بات نہیں کی،‘‘ وہ چلتے چلتے مزید کہتی ہیں۔ وہ کانگریس کے ذریعہ اپنے گاؤں میں مئی میں منعقد ہونے والے پارٹی کارکنان کے عام اجلاس میں شریک ہونے جا رہی ہیں۔

اپنے شوہر کی نشہ کی عادت کے سبب فیملی کے اخراجات کا بوجھ کرن پر آ گیا ہے، جو زمینداروں کے کھیتوں میں مزدوری کرتی ہیں۔ کرن (۲۳) کو فروری ۲۰۲۴ میں اپنی پچھلی اجرت ملی تھی، جب انہوں نے آلو کھود کر نکالے تھے۔ وہیں ان کا نوزائیدہ بچہ ان کے پاس ہی درخت کے نیچے پلاسٹک کے بورے پر لیٹا رہتا تھا۔ وہ کام ۲۰ دنوں تک چلا، جس کے لیے ان کو ۴۰۰ روپے یومیہ کے حساب سے مزدوری دینے کی بات ہوئی تھی، لیکن آخر میں انہیں بطور اجرت ۳۰۰ روپے ہی دیے گئے۔

ان کی دوست اور پڑوسن امن دیپ کور، جو ان کے ساتھ ہی کام کرتی ہیں، بتاتی ہیں کہ اونچی ذات کے کسان ان کا استعمال احتجاجی مظاہروں میں لے جانے کے لیے کرتے ہیں، لیکن ان کے جیسے زرعی مزدوروں کو مناسب اُجرت نہیں ملتی۔ ’’ہمارے ساتھ کون کھڑا ہوتا ہے؟ کوئی نہیں۔ وہ ہم سے پیچھے کھڑے رہنے کو کہتے ہیں، کیوں کہ ہم پچھڑی ذات کے ہیں، پھر بھی ہم سب سے زیادہ کام کرتے ہیں۔‘‘

کرن اور امن دیپ جیسے دلت پنجاب کی آبادی کا ۹۴ء۳۱ فیصد ہیں – جو ملک کی کسی بھی ریاست کے مقابلے سب سے زیادہ تعداد ہے (مردم شماری ٢٠١١ کے مطابق)۔ احتجاجی مظاہروں کے دوران دلت مزدوروں کا سب سے بڑا مطالبہ یومیہ اجرت کو کم از کم ۷۰۰ روپے سے بڑھا کر ۱۰۰۰ روپے کر دینے کا تھا۔

خواتین مزدوروں کے لیے کام کا اگلا موقع خریف سیزن کی شروعات کے ساتھ جون میں آئے گا، جب انہیں دھان بونے کے لیے ہر ایکڑ پر ۴۰۰۰ کے حساب سے کام پر رکھا جائے گا۔ اس حساب سے ہر مزدور کے لیے ایک دن کا ۴۰۰ روپے بنتا ہے۔ ’’اس کے بعد ہم کو جاڑے بھر کام نہیں ملے گا،‘‘ امن دیپ کہتی ہیں۔

ان کے لیے دوسرا متبادل مہاتما گاندھی قومی دیہی روزگار گارنٹی (منریگا) پروگرام ہے، جس سے ہر فیملی کو ایک سال میں ۱۰۰ دنوں کا کام ملنے کی ضمانت ملتی ہے۔ حالانکہ، کرن کی ساس بلجیت کور، جو ۵۰ سال کی ہیں، کا کہنا ہے کہ ان کو اپنے گاؤں میں اس اسکیم کے تحت ۱۰ دنوں سے زیادہ کا کام نہیں ملتا۔

روزمرہ کا خرچ چلانے کے لیے بلجیت ایک نام نہاد اونچی ذات والے گھر میں ٢٠٠ روپے یومیہ کے حساب سے کام کرتی ہیں۔ امن دیپ کو جلد سازی کے لیے فی کتاب ۲۰ روپے ملتے ہیں۔ ان خواتین کا کہنا ہے کہ ۲۰۲۲ کے اسمبلی انتخابات میں عام آدمی پارٹی نے ۱۰۰۰ روپے کی اضافی آمدنی کا جو وعدہ کیا تھا، وہ واقعی مددگار ثابت ہوتا۔ ’’ہم نے محنت سے کمائے گئے ۲۰۰ روپے دے کر اس کا فارم بھرا تھا، مگر کوئی نتیجہ نہیں نکلا،‘‘ بلجیت کور کہتی ہیں۔

پریشان حال بلجیت اپنی سب سے چھوٹی بیٹی، ۲۴ سالہ سربجیت کور کو نوکری کے لیے برطانیہ بھیجنے کی تیاری کر رہی ہیں۔ یہ ایک ایسا خواب ہے، جس کی قیمت ان کی فیملی نے ۱۳ لاکھ روپے دے کر چُکائی ہے۔ اس رقم کا انتظام انہوں نے اپنی کار اور موٹر سائیکل بیچنے کے بعد ساہوکاروں سے قرض لے کر کیا ہے۔

سربجیت نے دو سال پہلے بی ایڈ کیا تھا، لیکن تب سے انہیں کوئی نوکری نہیں ملی ہے۔ ’’یہاں پنجاب میں اپنا وقت ضائع کرنے کا کوئی فائدہ نہیں ہے، کیوں کہ یہاں نوکریاں ہی نہیں ہیں۔ یہاں صرف منشیات کا غلط استعمال [نشہ] ہوتا ہے،‘‘ وہ کہتی ہیں۔

سربجیت نوکری ملنے تک اپنے دوستوں کے ساتھ رہیں گی: ’’بچپن سے ہی میں [ملک سے] باہر جانے کا خواب دیکھتی تھی۔ اب یہ خواب ایک ضرورت بن گئی ہے۔‘‘ ان کی فیملی آس پاس کے گاؤں میں دودھ دے کر روزانہ تقریباً ۱۰۰۰ روپے کما لیتی ہے، جو قرض کی رقم ادا کرنے اور گھر کا خرچ چلانے کے کام آتا ہے۔

’’ماں باپ ہونے کے ناطے ہم کو اس کی شادی کر کے رخصت تو کرنا ہی تھا، مگر اب ہم اسے باہر بھیج رہے ہیں۔ کم از کم وہاں پر رہ کر وہ کچھ بن جائے گی اور پھر اپنی پسند کے آدمی سے شادی کرے گی،‘‘ بلجیت کور کہتی ہیں۔

ترجمہ نگار: کرن وانی