سنگل اسکرین پر ممبئی سنیما کا جادو

’’فلم میں ہونا چاہیے لو اسٹوری، کچھ جذباتی سا [فلم کی کہانی عشقیہ اور جذباتی ہونی چاہیے]،‘‘ شیام سنگھ (۳۶ سالہ) کہتے ہیں، جو ممبئی کے گرانٹ روڈ علاقہ میں واقع سنگل اسکرین سینما گھر، الفریڈ ٹاکیز کے باہری ہال میں بیٹھے ہیں۔ ’’لڑائی اور ایکشن کے مناظر تو ٹھیک ہیں، لیکن مجھے عشقیہ کہانی پسند ہے،‘‘ وہ مسکراتے ہوئے مزید کہتے ہیں۔

یہ دسمبر کی دوپہر ہے، دھوپ کھلی ہوئی ہے اور شیام دوپہر ۳ بجے کے شو کے شروع ہونے کا انتظار کر رہے ہیں۔ بلاک بسٹر فلم ’رام تیری گنگا میلی‘ کا ہاتھ سے پینٹ کیا ہوا بینر عمارت کے دروازے پر لٹکا ہوا ہے۔ بالی ووڈ کی یہ کامیاب فلم تقریباً چار دہائی قبل ۱۹۸۵ میں ریلیز ہوئی تھی، اور اب بھی ناظرین کی خاصی تعداد کو اپنی طرف متوجہ کرتی ہے۔

الفریڈ ٹاکیز کے داخلی دروازہ پر لگے ایک بورڈ پر ہندی اور اردو میں لکھا ہے ’’روزانہ ۳ کھیل‘‘۔ اس بورڈ پر تین شوز کی روزانہ اسکریننگ کے شیڈول کی تشہیر کی جاتی ہے: پہلا شو دوپہر کو، دوسرا سہ پہر ۳ بجے اور آخری شام ۶ بجے۔

’’ہمیں مووی (فلمیں) دیکھنے کا شوق ہے،‘‘ شیام کہتے ہیں، جو تین سال پہلے بہتر اجرت کی تلاش میں نیپال سے ممبئی ہجرت کر کے آئے تھے۔

’’الفریڈ ٹاکیز میں ٹکٹ سستے ہیں،‘‘ وہ کہتے ہیں، ’’اس لیے ہم جب چاہیں یہاں آ سکتے ہیں۔‘‘ یہاں ایک ٹکٹ کی قیمت ۳۵ روپے ہے۔ ’’میری اتنی کمائی نہیں ہوتی کہ میں مہنگے تھیٹروں میں جا کر فلمیں دیکھ سکوں۔‘‘

شیام برہن ممبئی میونسپل کارپوریشن (بی ایم سی) میں ایک کنٹریکٹ ورکر ہیں اور کیٹرنگ میں کام کرتے ہیں۔ ان کی ذمہ داریوں میں تقریبات کے لیے چیزیں تیار کر کے پیش کرنا اور صفائی کرنا شامل ہیں۔ وہ گرانٹ روڈ علاقہ کے قریب رہتے ہیں اور تقریباً ۹۰۰۰ روپے ماہانہ کماتے ہیں۔ ان کی فیملی نیپال کے بُٹوَل شہر میں مقیم ہے۔

الفریڈ ٹاکیز میں عام طور میں بالی ووڈ کی مشہور پرانی فلمیں دکھائی جاتی ہیں، یا ایسی ہندی، بھوجپوری، تیلگو اور تمل میں ​​ریلیز ہونے والی نئی فلمیں دکھائی جاتی ہیں جن کا کامیاب آغاز ہو چکا ہوتا ہے۔ اس سنیما گھر کے سب سے وفادار سرپرست عموماً مرد تارکین وطن ہوتے ہیں، جو یومیہ اجرت پر کام کرنے والے یا قلیل مدتی کنٹریکٹ ورکر ہوتے ہیں۔

ٹاکیز میں بیٹھنے کے لیے ۹۳۸ سیٹیں ہیں، جس میں۵۹۶ مرکزی حصے میں ہیں اور ۳۴۲ بالکونی میں۔ تاہم، بالکونی والے منہگے حصہ کو کووڈ۔۱۹ کی وبا کے بعد بند کر دیا گیا تھا۔ آج تھیٹر میں روزانہ ۸۰ سے ۱۰۰ ناظرین آتے ہیں۔ ہر شو میں تقریباً ۲۵ سے ۳۰ افراد کی موجودگی رہتی ہے۔

ہر سال تقریباً ۱۵۰۰ سے ۲۰۰۰ فلمیں تیار کرنے والی دنیا کی سب سے بڑی فلمی صنعتوں میں سے ایک ہندوستان کی ملٹی بلین ڈالر فلمی صنعت میں سنگل اسکرین والے سنیما گھروں کو نظر انداز کر دیا گیا ہے، جس کی وجہ سے پورے شہر میں ایسے بہت سے سنیما ہالوں کو بند کرنا پڑا ہے۔ الفریڈ ٹاکیز سے محض ۱۰۰ میٹر سے بھی کم فاصلہ پر واقع نیا روشن ٹاکیز کو ۲۰۲۴ میں تازہ تازہ منہدم کیا گیا تھا۔

بیک وقت کئی شو دکھانے کی صلاحیت رکھنے والے آن لائن او ٹی ٹی (اوور دی ٹاپ) اسٹریمنگ پلیٹ فارموں اور ملٹی پلیکسوں کے عروج کے بعد سنگل اسکرین تھیٹروں کی مقبولیت اور منافع میں خاصی کمی واقع ہوئی ہے۔

لیکن الفریڈ ٹاکیز میں جب دوپہر کے میٹنی کے لیے شٹر دوبارہ کھلتے ہیں، تو اس مقام کو ایک نئی زندگی مل جاتی ہے۔

شیام کہتے ہیں، ’’جتنا کماتے ہیں، اُسی میں گزارہ چل جاتا ہے۔‘‘ انہیں اس ٹاکیز میں ۳۵ روپے کا ٹکٹ خریدنا اپنی محنت کی کمائی کا اچھا مصرف معلوم ہوتا ہے۔ ’’دو سے ڈھائی گھنٹے تک ہماری تفریح ہو جاتی ہے، ہم ہنستے ہیں…یہ ہمارے مزاج کو بہتر بناتا ہے۔ پیسہ وصول ہو جاتا ہے۔‘‘ اور اسی لیے شیام ہفتہ میں ۲ سے ۳ بار الفریڈ ٹاکیز کا دورہ کرتے ہیں۔ اگر کوئی فلم انہیں پسند آ گئی، تو وہ اسے دو بار دیکھنے آتے ہیں۔

ملٹی پلیکس میں اسی طرح کی تفریح کے لیے ​​شیام کو ۲۰۰ سے ۲۵۰ روپے خرچ کرنے پڑیں گے۔ چونکہ ان کے پاس اسمارٹ فون نہیں ہے اس لیے اسمارٹ فون پر فلمیں دیکھنے کا سوال ہی پیدا نہیں ہوتا ہے۔ ’’ہم لوگ محنت مزدوری کرتے ہیں، بڑے فون نہیں رکھ سکتے۔ میں بٹن والا چھوٹا موبائل رکھتا ہوں۔‘‘

سنگل اسکرین تھیٹروں کی مانگ کووڈ۔۱۹ وبا کی وجہ سے کم ہوگئی۔ سال ۱۹۷۹ سے یہاں کام کرنے والے الفریڈ ٹاکیز کے مینیجر حذیفہ بوٹ والا کہتے ہیں، ’’جب لاک ڈاؤن کا اعلان ہوا تو زیادہ تر تارکین وطن مزدور اپنے آبائی علاقوں کو واپس چلے گئے اور لاک ڈاؤن اٹھائے جانے کے فوراً بعد واپس نہیں آئے۔‘‘

’’اگر آپ چھ ماہ کے بعد واپس آئیں تو شاید آپ مجھے یا الفریڈ ٹاکیز کو نہ پائیں،‘‘ ۷۰ سالہ حذیفہ طنزیہ مسکراہٹ کے ساتھ کہتے ہیں۔

وہ یاد کرتے ہیں کہ کس طرح فلمیں پہلے تفریح ​​کا بنیادی ذریعہ ہوا کرتی تھیں۔ ’’سال ۱۹۹۰ کی دہائی میں، ٹیلی ویژن مقبول ہوا، پھر وی سی آر آیا۔ جو لوگ ان کی استطاعت رکھتے تھے، وہ انہیں گھر لے آئے۔ ان سب نے سنیما گھروں کی آمد کو متاثر کیا،‘‘ حذیفہ بتاتے ہیں۔ ’’لیکن اس میں بھاری کمی بعد میں آئی جب ۲۰۱۲-۲۰۱۳ کے قریب اسمارٹ فون مقبول ہونے لگے۔ اب لوگ اپنے فون پر فلمیں ڈاؤن لوڈ کر کے دیکھتے ہیں۔‘‘

وہ ہمیں بتاتے ہیں کہ ایسے بہت سے پلاٹ جہاں سنگل اسکرین تھیٹر ہوا کرتے تھے، اب بڑے رئیل اسٹیٹ ڈیولپرز کو فروخت کر دیے گئے ہیں۔ پی وی آر جیسی بڑی کمپنیاں اب فلموں کی تقسیم کے حقوق براہ راست پروڈیوسروں سے حاصل کرتی ہیں، جس کی وجہ سے فلم ڈسٹری بیوٹرز بے روزگار ہو جاتے ہیں۔ اس کا لازمی نتیجہ یہ بھی ہوتا ہے کہ فلم رولز کے سرکولیشن سے سنگل اسکرینں مکمل طور پر علاحدہ ہو جاتی ہیں اور الفریڈ جیسے تھیٹر پرانے فلمی رولز کی کاپیوں پر انحصار کرنے لگتے ہیں۔

’’مجھے پہلے کی فلمیں [پرانی فلمیں] زیادہ پسند ہیں،‘‘ الفریڈ ٹاکیز میں دوپہر کے میٹینی شو کے حاضرین میں سے ایک، ۵۵ سالہ چندر کمار گونڈ کہتے ہیں۔ ’’نئی فلموں میں معنی تلاش کرنا مشکل ہے۔‘‘

گونڈ ۱۹۹۶ میں کام کی تلاش میں مدھیہ پردیش کے جبل پور سے ممبئی آئے تھے۔ اب وہ ایک پرائیویٹ کمپنی میں بطور پینٹر کام کرتے ہیں اور ہر ماہ ۱۸ ہزار روپے کی مقررہ اجرت حاصل کرتے ہیں۔

’’میں ایکشن فلموں سے لطف اندوز ہوتا ہوں کیونکہ ان میں وہ چیزیں دکھائی جاتی ہیں جنہیں آپ حقیقی زندگی میں نہیں کرسکتے،‘‘ گونڈ کہتے ہیں۔ وہ دانا بندر میں تنہا رہتے ہیں اور جس دن کام نہیں رہتا اس دن وہ الفریڈ ٹاکیز کا دورہ کرتے ہیں۔ وہ بالی ووڈ کے سخت دلدادہ ہیں اور چیلنج کرتے ہوئے کہتے ہیں، ’’آپ کسی بھی گیت کا نام بتائیں اور میں آپ کو بتا دوں گا کہ وہ کس فلم کا ہے۔‘‘

لکشمن نارائن شنکر (۵۰ سالہ) کے لیے سنیما دیکھنا واحد تفریحی مشغلہ ہے۔ ’’پہلے لوگ بڑی تعداد میں ٹکٹ خریدنے کے لیے قطار میں کھڑے ہوتے تھے،‘‘ لکشمن کہتے ہیں۔ وہ ممبئی میں ۳ سال سے زیادہ عرصے سے مقیم ہیں اور فی الحال زیادہ تر کیٹرر کے طور پر کام کرتے ہیں۔ ’’فلموں کے ٹکٹ بلیک میں بھی فروخت ہوتے تھے، تقریباً ۳۰-۳۵ سال پہلے فلموں کی اس قدر مانگ تھی۔‘‘

لکشمن بھی سنگل اسکرین سنیما کے زوال کو کووڈ۔۱۹ وبائی مرض سے منسوب کرتے ہیں۔ ’’لاک ڈاؤن نے سب کچھ تباہ کر دیا۔ زیادہ تر تھیٹر بند ہو چکے ہیں اور صرف گنتی کے ہی ہیں جو چل رہے ہیں، جیسے الفریڈ، میٹرو، سپر وغیرہ،‘‘ وہ کہتے ہیں۔

ایک دو منزلہ عمارت میں واقع الفریڈ ٹاکیز کا انتظام آٹھ افراد دیکھتے ہیں اور روزانہ شو چلاتے ہیں۔ ان میں حذیفہ کے ساتھ دو آپریٹرز، ایک گارڈ، صفائی کا عملہ، ٹکٹ فروخت کرنے والے اور ایک نشستوں تک راستہ دکھانے والا۔ اس عمارت نے واضح طور پر بہتر دن دیکھے ہیں، جیسا کہ حذیفہ بتاتے ہیں، ’’ایک زمانہ تھا جب ہمارے یہاں ۲۹ اراکین پر مشتمل عملہ کام کرتا تھا۔‘‘

تھیٹر بند ہونے سے نہ صرف ناظرین متاثر ہوتے ہیں بلکہ ان پر انحصار کرنے والوں کا معاش بھی متاثر ہوتا ہے۔ سنتوش کمار (۴۵ سالہ) سال ۲۰۰۲ سے الفریڈ ٹاکیز میں کام کر رہے ہیں، پہلے ان-ہاؤس کینٹین میں (جو ۲۰۱۵ میں بند ہو گئی) اور اب نشستوں تک راہ دکھانے والے ٹکٹ چیکر کے طور پر۔

سنتوش کہتے ہیں، ’’میں بھی دوسروں کی طرح نوکری اور مواقع کی تلاش میں بمبئی آیا تھا، جن کی ہمارے علاقے میں کمی تھی۔ ان کا کنبہ اور بچے اب بھی مشرقی اتر پردیش کے مئو شہر میں اپنے گھر پر رہتے ہیں۔ ’’سیٹھ [مالک] ہمیں ہال کے اندر سونے کی اجازت دیتا ہے۔ ہم جلدی اٹھ کر تھیٹر صاف کرتے ہیں، پھر اپنا کام شروع کر دیتے ہیں۔ مینیجر اپنے گھر سے آتا ہے،‘‘ وہ بتاتے ہیں۔ ’’کھانے جیسے بڑے اخراجات کے بعد میں ہر ماہ تقریباً ۱۰ ہزار روپے بچا لیتا ہوں،‘‘ سنتوش مزید کہتے ہیں۔

سنگل اسکرین ان دکانداروں کو بھی روزگار فراہم کرتی ہے، جو فلمیں دیکھنے آنے والے ناظرین کی خدمت کرتے ہیں۔ کریم احمد (۳۴ سالہ) گزشتہ ۱۸ سالوں سے الفریڈ ٹاکیز کے باہر کھانے کا ایک عارضی اسٹال چلا رہے ہیں۔ انہیں یہ کاروبار اور اس کی مہارت اپنے ماموں سے وراثت میں ملی تھی۔

کریم تیزی سے آملیٹ بناتے ہیں اور انہیں تازہ بریڈ میں لگاتے ہیں، اور وقفوں کے دوران فلم کے ناظرین یا اگلے شو کا انتظار کرنے والوں کو انڈا پاؤ فروخت کرتے ہیں۔ پچیس روپے فی پاؤ کے حساب سے وہ ہر روز ۵۰ سے ۶۰ انڈا پاؤ فروخت کر لیتے ہیں۔ انڈا پاؤ بنانے کی چیزیں، گیس اور یہاں تک کہ پولیس کے جرمانے اور رنگداری بھتہ جیسے اخراجات کا حساب کرنے کے بعد وہ مہینہ میں ۱۲ سے ۱۵ ہزار روپے کے درمیان آمدنی حاصل کر لیتے ہیں۔

’’اب تو دھندہ ایک دم سست ہو گیا ہے،‘‘ کریم کہتے ہیں۔ ان کی یومیہ آمدنی ایک دہائی قبل ۱۰۰۰ روپے تھی، جو اب کم ہو کر بمشکل ۵۰۰ روپے رہ گئی ہے۔ کریم بتاتے ہیں کہ کس طرح ایک دہائی قبل الفریڈ ٹاکیز کے قریب آرٹ ڈیکو عمارتوں کے باہر اسٹریٹ فوڈ کے ۴۰ سے ۵۰ اسٹال ہوا کرتے تھے۔

’’دن بھر میں دو کلو چنا نکالنا بھاری ہے [ایک دن میں دو کلو چنا فروخت کرنا بھی مشکل ہے]،‘‘ دلیپ گپتا (۵۹ سالہ) کہتے ہیں، جو تھیٹر کے باہر بھنے ہوئے چنے بیچتے ہیں۔ وہ کہتے ہیں کہ ٹاکیز کے زوال نے ان کی کمائی کو کافی حد تک متاثر کیا ہے۔ اپنی ٹانگ میں دائمی درد اور معذوری کی وجہ سے، وہ کسی نئے مقام پر اپنا اسٹال لگانے سے ہچکچاتے ہیں۔ ان کی آمدنی ٹانگوں کی سرجری کروانے کے لیے ناکافی ہے۔

پورے شہر میں سنگل اسکرین تھیٹر بند ہونے کے بعد، الفریڈ ٹاکیز بہت سے لوگوں کے لیےغنیمت ہے۔ دھاراوی کے رہائشی منٹو پاسوان کہتے ہیں، ’’الفریڈ ٹاکیز کافی پرانا ہے اور ابھی تک چل رہا ہے۔‘‘ پاسوان (۴۵ سالہ) اس ٹاکیز میں فلمیں دیکھنے کے لیے اپنی چھٹی کے دن دھاراوی سے گرانٹ روڈ کا تقریباً ۱۰ کلومیٹر کا فاصلہ طے کر کے آتے ہیں۔

منٹو ۱۵ سال کی عمر میں اتر پردیش کے گونڈا ضلع سے ممبئی ہجرت کر کے آئے تھے۔ وہ روزی روٹی کے لیے ایک چھوٹی فیکٹری میں سوٹ کیس بناتے ہیں، اور اپنے ذریعہ بنائے گئے سوٹ کیسوں کی تعداد کی بنیاد پر تقریباً ۱۴ ہزار روپے ماہانہ کماتے ہیں۔ وہ شہر میں تنہا ہی رہتے ہیں اور فلمیں دیکھنے کے لیے وہ اپنے ہفتہ وار چھٹی والے دن کا انتظار کرتے ہیں۔

دوپہر کے تقریباً ۳ بجے ہیں اور دوپہر کا شو شروع ہونے والا ہے۔ نشستوں تک راستہ دکھانے والا دربان الفریڈ ٹاکیز کے باہری ہال میں انتظار کر رہے ناظرین کو اندر بلانا شروع کر دیتا ہے۔ اسکریننگ روم میں قدم رکھنے سے پہلے منٹو کہتے ہیں، ’’یہ ایک ’تھرڈ کلاس‘ ہال ہے، یہاں کوئی بھی اچھی گاڑی والا فلم دیکھنے نہیں آئے گا۔ اگر کوئی آتا ہے تو یہ محض اتفاق کی بات ہوگی۔‘‘

’’ہم ’تھرڈ کلاس‘ لوگ یہاں آتے ہیں، وہ لوگ جو فٹ پاتھ پر سوتے ہیں، کارخانوں میں کام کرتے ہیں، کباڑ ڈیلر ہیں۔ باقی لوگ عمدہ تھیٹروں کو ترجیح دیتے ہیں،‘‘ مدھم روشنی والے اسکریننگ روم کی بھیڑ میں شامل ہوتے ہوئے منٹو کہتے ہیں۔

ترجمہ نگار: شفیق عالم