“ఫిల్మ్ మే హోనా చాహియే లవ్ స్టోరీ, కుచ్ ఎమోషనల్ సా [సినిమాలో ప్రేమకథ ఉండాలి, ఎంతో కొంత భావోద్వేగమూ ఉండాలి] అన్నారు ఆల్ఫ్రెడ్ టాకీస్ ఆవరణలో కూర్చొనివున్న 36 సంవత్సరాల శ్యామ్ సింగ్. ఆ సింగిల్ స్క్రీన్ సినిమా హాలు ముంబైలోని గ్రాంట్ రోడ్ ప్రాంతంలో ఉంది. “ఫైటింగులూ యాక్షన్ సీన్లూ ఉండొచ్చు, కానీ నాకు మాత్రం ప్రేమకథలంటేనే ఇష్టం,” అన్నారాయన ఇకిలిస్తూ.
చక్కటి ఎండ కాస్తోన్న ఆ డిసెంబర్ మధ్యాహ్నం వేళ, 3 గంటల ఆట మొదలుకావడానికి వేచి ఉన్నారు శ్యామ్. ఆ భవనం ప్రవేశద్వారం దగ్గర, రంగులతో చిత్రించిన రామ్ తేరీ గంగా మైలీ’ బ్లాక్బస్టర్ సినిమా పోస్టర్ ఒకటి వ్రేలాడుతోంది. దాదాపు నాలుగు దశాబ్దాల క్రితం, 1985లో విడుదలైన ఈ బాలీవుడ్ హిట్ సినిమా, ఇప్పటికీ చెప్పుకోదగినంతమంది ప్రేక్షకులను ఆకర్షిస్తూనే ఉంది.
“రోజానా 3 ఖేల్” [రోజుకు 3 ఆటలు] అంటోంది ఆల్ఫ్రెడ్ టాకీస్ ప్రవేశద్వారం దగ్గర హిందీ, ఉర్దూ భాషల్లో రాసి ఉన్న ఒక ప్రకటన. మొదటి ఆట మధ్యాహ్నం, రెండో ఆట మధ్యాహ్నం 3 గంటలకు, చివరి ఆట సాయంత్రం 6 గంటలకు అంటూ రోజూ జరిగే ప్రదర్శనల సమయాలను వివరిస్తోంది.
“హమేఁ మూవీ దేఖ్ నే కా షౌక్ హై [నాకు సినిమాలు చూడటం ఇష్టం],’ మూడేళ్ళ క్రితం, మెరుగైన సంపాదన వెతుక్కుంటూ నేపాల్ నుంచి ముంబైకి వలస వచ్చిన శ్యామ్ అన్నారు.
“ఈ ఆల్ఫ్రెడ్ టాకీస్లో టికెట్లు చవక,” అన్నారాయన. “అందుకే ఎప్పుడు కావాలంటే అప్పుడు రాగలుగుతాం.” ఒక టికెట్ ధర రూ. 35. “ఖరీదైన థియేటర్లకు వెళ్ళి సినిమా చూసేందుకు సరిపోయేంత సంపాదన లేదు నాకు.”
బృహన్ముంబై మునిసిపల్ కార్పొరేషన్ (బిఎమ్సి) లో కాంట్రాక్ట్ కార్మికుడైన శ్యామ్, కాటరింగ్ పనుల్లో భాగంగా ఈవెంట్లకు దినుసులు/వంటకాలు తయారుచెయ్యడం, వడ్డించడం, శుభ్రం చెయ్యడం వంటి పనులు చేస్తారు. గ్రాంట్ రోడ్కు దగ్గర్లో నివసించే ఆయన సంపాదన నెలకు దాదాపు రూ. 9000. ఆయన కుటుంబం మాత్రం నేపాల్లోని బుట్వల్ అనే నగరంలోనే నివసిస్తోంది.
