मुंबई के सिंगल स्क्रीन सिनेमा के जादू

“फिल्म में होना चाहिए लव स्टोरी, कुछ इमोशनल सा (फिलिम में प्रेम कहानी होखे के चाहीं, कुछ भावुक करे वाला),” मुंबई के ग्रांट रोड इलाका में स्थित सिंगल स्क्रीन सिनेमाहाल अल्फ्रेड टाकिज के सामने वाला हिस्सा में बईठल 36 बरिस के श्याम सिंह कहेलन. “मारधाड़ आ एक्शन वाला सीन ठीक लागेला, बाकिर हमके प्रेम कहानी ढेर पसंद आवेला,” उ हंसत के कहेलन.

ई दिसम्बर के घाम वाला दुपहरिया बा आ श्याम तीन बजे वाला शो के शुरू भईला के इंतजार कर रहल बाड़ें. इमारत के प्रवेश द्वार पर ब्लाकबस्टर फिलिम ‘राम तेरी गंगा मैली’ के हाथ से बनावल बैनर लटकल बा. बॉलीवुड के ई हिट फिलिम 1985 में रिलीज भईल रहे आ अब्बो बहुत दर्शकन के आकर्षित करेले.

अल्फ्रेड टाकिज के प्रवेश द्वार पर हिंदी आ उर्दू में एगो बोर्ड पर ‘रोजाना तीन खेल’ लिखल बा. रउआ समझ सकत बानी कि इहंवा रोज तीन गो शो चलेला – पहिला दुपहरिया में, दुसरका 3 बजे आ आखिरी सांझी के 6 बजे से.

“हमें मूवी देखने का शौक है (हमके फिलिम देखल पसंद हवे),” श्याम कहेलन जे तीन साल पहिले बेहतर काम के तलाश में नेपाल से मुंबई आईल रहलें.

“एइजा एल्फ्रेड टाकिज में टिकट सस्ता बा,” उ कहेलन, “एसे हमनी के जब मन करेला तब एइजा चल आवेनी जा.” एगो टिकट के दाम 35 रुपिया बा. “हम एतना ना कमायेनी कि महंगा थियेटर में जा के फिलिम देख सकीं.”

श्याम मुंबई महानगरपालिका (बीएमसी) के संघे अनुबंधित कर्मचारी के तौर पर कैटरिंग के काम करेलन. उनकर काम हवे कार्यक्रमन खातिर सामग्री तैयार कईल, परोसल आ साफ़-सफाई कईल. उ ग्रांट रोड एरिया के लगे रहेलन आ लगभग 9,000 रुपिया महीना कमायेलें. उनकर परिवार अब्बो नेपाल के बुटवल शहर में रहेला.

अल्फ्रेड टाकिज में आमतौर पर लोकप्रिय पुरान बॉलीवुड फिलिम या जल्दिये रिलीज भईल हिंदी, भोजपुरी, तेलुगु आ तमिल फिलिम देखावल जाला जवन एक बेर सफलतापूर्वक चल चुकल रहेला. एमे आवे वाला सबसे नियमित दर्शक प्रवासी लोग हवें, ज्यादातर मरद लोग जे दैनिक मजदूरी करे वाला या अल्पकालिक अनुबंध कर्मचारी हवें.

टाकिज में 938 लोगन के बइठे के सुविधा बा – 596 सीट मेन एरिया में बा आ 342 सीट बालकनी में बा. हालांकि महंगा बालकनी वाला सेक्शन के कोविड-19 के महामारी के बाद बंद कर दिहल गईल. आज ई थियेटर हर दिन लगभग 80-100 दर्शक लोगन के आकर्षित करेला आ हर शो में लगभग 25-30 लोग आवेलें.

सिंगल स्क्रीन थियेटरन के भारत के अरबों डॉलर के फिलिम इंडस्ट्री में किनारे कर दिहल गईल बा जवन दुनिया के सबसे बड़ उद्योगन में से एक हवे जहां हर साल लगभग 1,500-2,000 फिलिम बनेला. शहर में एकरी निहर बहुत सा थियेटरन के बंद करे के पड़ल बा. अल्फ्रेड टाकिज से 100 मीटर से भी कम दूरी पर न्यू रोशन टाकिज हवे जेके हाले में साल 2024 में ध्वस्त कईल गईल ह.

सिंगल स्क्रीन थियेटर के लोकप्रियता आ एसे मिले वाला फायदा खास तौर पर ओटीटी (ओवर द टॉप) स्ट्रीमिंग प्लेटफ़ॉर्मन आ मल्टीप्लेक्सन के उदय के बाद घट गईल बा जहां एक समय में कई गो शो देखावल जाला.

बाकिर अल्फ्रेड टाकीज में जब दुपहरिया के मैटिनी शो खातिर शटर फिर से खुलेला त ए जगह के एगो नया जीवन मिल जाला.

“जितना कमाते हैं, उसमें गुजारा चलता है (जेतना कमायेनी जा, ओमे गुजारा कईल जाला),” श्याम कहेलन. टाकिज में 35 रुपिया के टिकट लिहल उ अपनी मेहनत के कमाई के बढ़िया उपयोग मानेलन. “हमनी के 2 से 2.5 घंटा ले आपन मनोरंजन करेनी जा, हंसेनी जा...हमनी के मूड बढ़िया हो जाला. पैसा वसूल हो जाला.” एही खातिर श्याम हफ्ता में 2 से 3 बेर अल्फ्रेड टाकिज में चक्कर लगा लेवेलन. अगर कवनो फिलिम बढ़िया लाग जाए त ओके उ दू बेर देखे आवेलन.

श्याम इहे मनोरंजन करे मल्टीप्लेक्स में जाएं त एकरे खातिर उनके हर बेर 200-250 रुपिया खर्चा करे के पड़ी. स्मार्टफोन पर फिलिम देखला के कवनो सवाले ना उठेला काहें कि उनकी लगे अइसन कवनो फोने नईखे. “हम लोग मेहनत मजदूरी करते हैं, बड़े फोन नहीं रख सकते. बटन वाले छोटे मोबाइल रखते हैं (हमनी के मेहनत मजदूरी करेनी जा, बड़ फोन ना रख सकेनी जा. बटन वाला छोट फोन रखेनी जा).”

सिंगल स्क्रीन थियेटरन के स्थिति कोविड-19 महामारी के वजह से अउरी खराब हो गईल. “जब लॉकडाउन के घोषणा भईल त ज्यादातर प्रवासी मजदूर लोग अपनी मूल जगहन पर लौट गईलें आ लॉकडाउन हटला के तुरंत बाद वापस ना अईलें,” अल्फ्रेड टाकिज के मैनेजर हुजेफा बूटवाला कहेलन जे 1979 से एइजा काम कर रहल बाड़ें.

“अगर आप छव महीना बाद वापस आईं त हो सकेला हमके या फिर अल्फ्रेड टाकिज के एइजा ना पाईं,” 70 बरिस के हुजेफा मुस्करात के कहेलन.

उ याद करेलन कि पहिले फिलिम ही मनोरंजन के मुख्य स्रोत रहे. “नब्बे के दशक में टेलीविजन लोकप्रिय भईल, फिर वीसीआर (विडिओ कैसेट रिकॉर्डर) आईल. जवनी लोगन में कीने के क्षमता रहे उ लोग एके कीन के घरे ले आईल. ए कुल के असर सिनेमा हाल में दर्शकन के संख्या पर पड़ल,” हुजेफा बतावेलन. “बाकिर एगो स्थिर गिरावट आईल ह लगभग 2012-2013 के आसपास जब स्मार्टफोन लोकप्रिय होखे लागल. अब लोग बस अपनी फोन पर फिलिम डाउनलोड कर के देखेला.”

उ हमनी के बतावेलन कि कई अइसन जमीनन के बड़ रियल स्टेट डेवलपर्स के बेच दिहल गईल बा जहां सिंगल स्क्रीन थियेटर रहे. पीवीआर जइसन बड़ चेन अब सीधे निर्माता लोगन से फिलिम के अधिकार प्राप्त करेला जेसे फिलिम के वितरक लोगन के निष्क्रिय होखे के पड़ेला. एकर परिणाम ई होला कि सिंगल स्क्रीन थियेटर पूरी तरह से फिलिम रोल के वितरण से बाहर हो जाला. अल्फ्रेड जईसन थियेटर तब पुरान फिलिम के रोल के कॉपियन पर निर्भर रहेला.

“हमके पहिले के फिलिम (पुरान फिलिम) ढेर पसंद आवेला,” चन्द्र कुमार गोंड (55) कहेलन जे अल्फ्रेड टाकिज में दुपहरिया के मैटिनी में शामिल भईल बाड़ें. “नया फिलिमियन में अर्थ खोजल बहुत मुश्किल बा.”

गोंड साल 1996 में मध्य प्रदेश के जबलपुर से काम के तलाश में मुंबई अईलें. अब उ एगो निजी कंपनी में पेंटर के रूप में काम करेलन आ हर महीना 18,000 रुपिया के निश्चित वेतन पावेलन.

गोंड कहेलन, “हमके एक्शन फिलिम पसंद आवेला काहे कि एमे अइसन काम होला जवन आप असली जिनगी में ना कर सकेनी.” उ दाना बंदर में अकेले रहेलन आ जब उनके लगे काम ना होला त अल्फ्रेड टाकीज पहुंचेलन. कट्टर बॉलीवुड प्रेमी के रूप में उ चुनौती देलें, “बस कवनो गाना के बोल बताईं आ हम बता देब कि कवनी फिलिम के गाना हवे.”

लक्ष्मण नारायण शंकर (50) खातिर सिनेमा देखल उनकर एकमात्र शौक हवे. “लोग टिकट कीने खातिर बड़ी संख्या में लाइन लगावल करें,” लक्ष्मण कहेलन जे मुंबई में 30 बरिस से अधिका समय से रहि रहल बाड़ें आ ज्यादातर समय केटरर के काम कईले बाड़ें. “पहिले फिलिम के टिकट ब्लैक में भी बिकाईल करे, 30-35 साल पहिले मांग एतना अधिक रहे.”

लक्ष्मण भी सिंगल स्क्रीन सिनेमाघरन में गिरावट के कोविड-19 महामारी से जोड़ेलन. “लॉकडाउन सब बर्बाद कर दिहलस. ज्यादातर थियेटर बंद हो गईल आ हमनी के लगे कुछ ही बचल बा जवन अब्बो चल रहल बा: अल्फ्रेड, मेट्रो, सुपर..” उ कहेलन.

अल्फ्रेड टाकीज दू मंजिला इमारत में बा. एकरा आठ लोग मिल के चलावेला- हुजेफा के संघे दू गो ऑपरेटर, एगो गार्ड, सफाई कर्मचारी, टिकट विक्रेता आ एगो टिकट चेक करे वाला. हुजेफा के कहनाम बा कि ई जगह बहुत बढ़िया समय देख चुकल बा. “एक समय हमनी के 29 सदस्यन के स्टाफ काम करत रहे.”

सिनेमाघरन के बंद भईला के असर खाली दर्शकन पर ना पड़ेला बल्कि ओ लोगन के जिंदगियन पर भी पड़ेला जे अइसन जगहन पर निर्भर रहेला. संतोष कुमार (45) अल्फ्रेड टाकीज में 2002 से काम कर रहल बाड़ें, पहिले इन-हाउस कैंटीन (जवन 2015 में बंद हो गईल) में काम करत रहें फिर अब टिकट चेक करे वाला के रूप में काम करेलन.

“हम बॉम्बे अउरी लोगन निहर काम आ मौका के खोज में अईनी जवन अपनी घर ओरी ना मिलेला,” संतोष कहेलन. उनकर परिवार आ बच्चा कुल उत्तर प्रदेश के पूर्वी हिस्सा के मऊ शहर में बाड़ें सन. “सेठ (मालिक) हमनी के हॉल के भीतर सुते के इजाजत देला. हमनी के सबेरे जल्दी जागेनी जा आ थियेटर साफ़ करेनी जा फिर अपनी काम पर जायेनी जा. मैनेजर अपनी घर से आवेला,” उ कहेलन. “खईला पियला जईसन बड़ खर्चन के बाद हम हर महीना लगभग 10,000 रुपिया बचावेनी,” संतोष बतावेलन.

सिंगल स्क्रीन थियेटर ओ विक्रेता लोगन खातिर भी आजीविका के साधन देवेला जे फिलिम के मजा लेवे आवे वाला दर्शकन के सेवा प्रदान करेला. करीम अहमद (34) पिछला 18 बरिस से अल्फ्रेड टाकीज के बाहर एगो अस्थायी खाद्य स्टाल चला रहल बाड़ें. उनके ई व्यवसाय आ एकर कुशलता अपनी मामा से विरासत में मिलल बा.

करीम ऑमलेट बना के ओके ताजा ब्रेड में भर देलें आ फिलिम देखे वालन के इंटरवल में या अगिला शो के इंतजार कर रहल लोगन के अंडा पाव बेचेलन. हर दिन उ 25 रुपिया प्रति पीस के हिसाब से एक दिन में 50-60 गो अंडा पाव बेच लेलें. एक महीना में उ लगभग 12,000 से 15,000 रुपिया के कमाई करेलन जेमे खाना पकावे के गैस, बाकी सामान आ पुलिस से जुरमाना आ वसूली तक ले शामिल बा.

“अब तो धंधा एकदम स्लो हो गया है (अब त धंधा एकदम बेकार हो गईल बा),” करीम कहेलन. उनकर एक दिन के कमाई 1,000 रुपिया से गिर के 500 रुपिया हो गईल बा. करीम बतावेलन कि एक दशक पहिले अल्फ्रेड टाकीज के लगे आर्ट डेको इमारतन के बाहर 40 से 50 तक ले स्ट्रीट फूड के स्टाल रहे.

“दिन भर में दो किलो चना निकालना भारी है (एक दिन में दू किलो चना बेचल मुश्किल बा),” दिलीप गुप्ता (59) कहेलन जे थियेटर के बाहर भूजल चना बेचेलन. उनकर कहनाम बा कि टाकीज के पतन से उनकी आमदनी पर बहुत असर पड़ल बा. अपनी पैर में लगातार दर्द आ शारीरिक अक्षमता चलते दिलीप कवनो नया जगह पर आपन स्टाल लगावे में हिचकिचाएलें. उनकर आमदनी उनकी सर्जरी करवावे खातिर पर्याप्त नईखे.

शहर में सिंगल स्क्रीन सिनेमाघरन के बंद होखे के दौर में अल्फ्रेड टाकीज बहुत लोगन खातिर फुरसत के एकमात्र साथी बचल बा. धारावी के रहे वाला मिन्टू पासवान कहेलन, “अल्फ्रेड टाकीज बहुत पुरान हवे आ अभी भी बाचल बा.” मिंटू (45) धारावी से ग्रांट रोड तक लगभग 10 किलोमीटर के दूरी तय करेलन ताकि एइजा देखावल जाए वाला फिलिम देख सकें.

मिंटू 15 बरिस के उमिर में उत्तर प्रदेश के गोंडा जिला से मुंबई अईलें. उ एगो छोट फैक्ट्री में सूटकेस बना के आजीविका चलावेलन आ सूटकेस बनावे के संख्या के अनुसार लगभग 14,000 रुपिया महीना कमायेलें. उ शहर में अकेले रहेलन आ अपनी साप्ताहिक छुट्टी के इंतजार करेलन ताकि फिलिम देख सकें.

लगभग 3 बज गईल बा आ दुपहरिया के शो के शुरू होखे के समय हो गईल बा. टिकट चेक करे वाला हॉल में इंतजार कर रहल दर्शकन के बोलावे शुरू कर देले बा. स्क्रीनिंग रूम में कदम रखे से पहिले मिंटू कहेलन, “ई एगो थर्ड क्लास हॉल हवे. बढ़िया कार वाला कवनो एइजा फिलिम देखे ना आई आ अगर कब्बो अइबो करी त संजोग से आई.”

“एइजा हमनी निहर फुटपाथ पर सुते वाला ‘थर्ड क्लास’ के ही लोग आवेला. जईसे फैक्ट्री में काम करे वाला, मजदूर, कबाड़ बेचे वाला. बाकी लोग बढ़िया वाला थियेटर में जाला,” मिंटू कहेलन आ हल्का रौशनी वाला स्क्रीनिंग रूम में भीड़ में शामिल हो जालें.

अनुवाद: विमल चन्द्र पाण्डेय