“চিনেমাত থাকিব লাগে লাভ ষ্টৰি, ইমোচনেল টাইপৰ,” ৩৬ বৰ্ষীয় শ্যাম সিঙে আলফ্ৰেড টকিজৰ ফয়াৰত বহি কয়। আলফ্ৰেড টকিজ মুম্বাইৰ গ্ৰাণ্ট ৰোড এলেকাত থকা এখন পৰ্দাৰ ছবিগৃহ। “ফাইট চিন আৰু এক্সন চিন ঠিকে আছে, কিন্ত মই আকৌ প্ৰেম কাহিনীহে ভাল পাওঁ,” তেওঁ মিচিককৈ হাঁহি মাৰি কয়।
ডিচেম্বৰৰ আবেলিৰ সময়, শ্যামে তিনি বজাৰ দৰ্শনীৰ বাবে ৰৈ আছে। ৰাম তেৰী গংগা মেইলি ব্লকবাষ্টাৰ হিট চিনেমাখনৰ হাতেঅঁকা বেনাৰখন ছবিগৃহটোৰ প্ৰৱেশদ্বাৰতে লগোৱা আছে। বলিউডৰ এই হিট চিনেমাখন চাৰিটা দশক পূৰ্বে ১৯৮৫ত মুক্তি দিয়া হৈছিল। এতিয়াও চিনেমাখন চাবলৈ মানুহ আহি থাকে।
“ৰোজানা তিন খেল” বুলি আলফ্ৰেড টকিজৰ প্ৰৱেশদ্বাৰত হিন্দী আৰু উৰ্দু ভাষাত লিখা আছে। তাৰমানে দিনে তিনিটা দৰ্শনী। প্ৰথমটো দৰ্শনী দুপৰীয়া বাৰ বজাত, দ্বিতীয়টো ৩ বজাত আৰু শেষৰটো সন্ধিয়া ৬ বজাত।
“হমে মুভি দেখনে কা চৌক হ্যে (মোৰ চিনেমা চোৱাৰ চখ এটা আছে),” তিনি বছৰ আগতে ভাল মজুৰিৰ সন্ধানত নেপালৰ পৰা মুম্বাইলৈ অহা শ্যামে কয়।
“আলফ্ৰেড টকিজত টিকট সস্তা,” তেওঁ কয়। “সেয়ে আমি মন গ’লে ইয়ালৈ গুছি আহো।” এটা টিকটৰ দাম ৩৫ টকা। “মহঙা চিনেমা হলত গৈ চিনেমা চাব পৰাকৈ মোৰ উপাৰ্জন সিমান নহয়।”
শ্যাম বৃহনমুম্বাই পৌৰ নিগম (বিএমচি)ৰ এগৰাকী ঠিকাভিত্তিক শ্ৰমিক। তেওঁ ইভেণ্টৰ সামগ্ৰী সাজু কৰা, পৰিৱেশন কৰা আৰু চাফাইৰ কাম কৰে। গ্ৰাণ্ট ৰোডৰ কাষতে তেওঁ থাকে আৰু উপাৰ্জন মাহে প্ৰায় ৯,০০০ টকা। তেওঁ পৰিয়াল নেপালৰ বুটৱাল চহৰত থাকে।
