مِنتی کی خوشیوں کی اڑان

منتی مارڈی ایک پرفضا ماحول میں رہتی ہے۔ اجے ندی اس کے گھر کے قریب سے بہتی ہے، اور ریلوے ٹریک تک پہنچنے کے لیے اسے کمل کے تالابوں کو پار کرنا پڑتا ہے۔

لیکن ریڑھ کی ہڈی اور ٹانگوں کی تپ دق کے ساتھ پیدا ہونے والی یہ پانچ سالہ منتی صرف دور سے ہی یہ نظارہ دیکھ سکتی تھی۔ وہ مغربی بنگال کے بیر بھوم ضلع میں واقع اپنے گاؤں مہولا کے ارد گرد چہل قدمی کرنے یا گھومنے پھرنے سے قاصر تھی۔

’’اس کی ریڑھ کی ہڈی میں شدید خرابی پیدا ہوگئی تھی،‘‘ اس کی دادی جبا مارڈی یاد کرتے ہوئے بتاتی ہیں۔ ’’اسے اس قدر تکلیف تھی کہ ہمیں نہیں لگتا تھا کہ وہ زندہ بچے گی۔‘‘

سنتھال (جسے سنتال بھی کہا جاتا ہے) ریاست کی آدیواسی آبادی کا تقریباً نصف حصہ ہیں، اور تقریباً مکمل طور پر دیہی علاقوں میں آباد ہیں۔ یہ لوگ اپنی طبی ضروریات کے لیے مقامی ڈاکٹروں پر انحصار کرتے ہیں۔ اس ریاست میں صحت کی نگہداشت کی سہولیات، جیسے پرائمری ہیلتھ سینٹر (پی ایچ سی)، میں ملازمین کی شدید کمی ہے (دیہی صحت کی شماریات۲۰۲۱-۲۲)۔

جب ننھی منتی کو سانس کی شدید تکلیف ہونے لگی تو اس کے گھر والوں نے مقامی ڈاکٹر سے رجوع کیا۔ انہیں معلوم نہیں تھا کہ آیا وہ سند یافتہ میڈیکل پریکٹیشنر ہے یا نہیں۔ بیر بھوم ضلع کے سیوڑی-۱ بلاک کے اس دور افتادہ علاقے میں ان کے لیے یہ جاننا ناممکن تھا۔ جبا کا کہنا ہے کہ انہیں نہیں معلوم تھا کہ کسی قابل ڈاکٹر کی خدمات کہاں سے حاصل کی جائے۔

ٹی بی کی بیماری ہزاروں سالوں سے موجود رہی ہے۔ اسے جہاں مصر اور پیرو (۹۰۰۰ قبل مسیح) کی ممیوں میں دیکھا گیا تھا، وہیں ہندوستانی طبی صحیفوں میں اس کی نشاندہی ’یکشما‘ کے طور پر کی گئی تھی، جو اس کے وقوعہ کو ۱۰۰۰ اور ۶۰۰ قبل مسیح میں نشان زد کرتے ہیں۔

مائیکو بیکٹیریم ٹیوبر کلوسس کی وجہ سے ہونے والی ریڑھ کی ہڈی کی ٹی بی غیر پلمونری ٹی بی کی سب سے عام شکل ہے۔ جب یہ بچوں کو اپنی گرفت میں لیتی ہے تو انہیں شدید طور پر متاثر کرتی ہے۔ اس کی وجہ سے بچوں کی لچکدار ریڑھ کی ہڈیوں میں ناقابل علاج خرابی کا زیادہ خطرہ لاحق ہوتا ہے، یہ باتیں ۲۰۱۴ میں شائع ہونے والے مقالہ ’ٹیوبرکولر اسپونڈا لائٹس ان چلڈرن‘ میں کہی گئیں ہیں۔

منتی میں ٹی بی کی علامتیں سال ۲۰۱۰ میں ان کے پیدا ہونے کے فوراً بعد ظاہر ہونے لگی تھیں۔ ’’اس کی شروعات سانس لینے میں دشواری سے ہوئی،‘‘ منتی کے والد گوپال مارڈی اس بیماری کے آغاز کو یاد کرتے ہوئے کہتے ہیں۔ ’’ہم نے دیکھا کہ اس کی ریڑھ کی ہڈی خمیدہ تھی، اور وہ اپنی ٹانگوں کی طاقت کھو چکی تھی۔ میں بہت خوفزدہ تھا۔ مجھے نہیں معلوم تھا کہ میں کیا کروں۔‘‘ منتی کی پیدائش کے فوراً بعد ان کی ماں کی موت کے بعد گوپال دونوں والدین کے فرائض تنہا ادا کر رہے تھے۔

منتی کی صنف نے بھی ان کے خلاف کام کیا – کسی نے بھی ننھی لڑکی پر زیادہ توجہ نہیں دی۔ ’’بہت سے لوگ لڑکیوں کو بوجھ سمجھتے ہیں اور طبی امداد حاصل کرنے میں ہماری حوصلہ شکنی کرتے ہیں،’’ جبا کہتی ہیں۔ ’’یہ بھی ممکن ہے کہ بہت سے لوگوں کو لگتا ہو کہ وہ زیادہ دن تک زندہ نہیں رہ پائے گی، کیونکہ وہ بہت زیادہ تکلیف میں تھی،‘‘ وہ مزید کہتی ہیں۔

اس کے علاج کے اخراجات اٹھانا ایک بے زمین کسان گوپال مارڈی کے بس کی بات نہیں تھی۔ ان کی آمدنی کا واحد ذریعہ دوسروں کی زمینوں پر موسمی فصلوں کی کاشت ہے، جس میں سے زمیندار کو اس کا حصہ دینا ہوتا ہے۔ ’’ابھی میں نے آلو کی فصل لگائی ہے۔ تین مہینے بعد فصل تیار ہونے پر میں تقریباً۲۰ ہزار روپے کی آمدنی حاصل کروں گا، لیکن مجھے اسی رقم سے بیج اور حشرہ کش ادویات کی قیمت اور فصلوں کو ہونے والے کسی نقصان کی بھرپائی بھی کرنی پڑے گی،‘‘ وہ پاری کو بتاتے ہیں۔

گوپال کا کہنا ہے کہ وہ سال میں تقریباً ۴۰-۵۰ ہزار روپے کما سکتے ہیں۔ ’’اتنی کم آمدنی سے میں اسے صحت مند کیسے رکھ سکتا ہوں، اور اس کے طبی اخراجات کیسے برداشت کرسکتا ہوں؟‘‘ وہ پوچھتے ہیں۔

جب کہ منتی کی حالت میں بہتری کے کوئی آثار نظر نہیں آرہے تھے اور مقامی ڈاکٹر اس کا علاج کرنے سے قاصر تھے، تو ’’ہم اسے کولکاتا میں ڈاکٹروں کے پاس لے گئے،‘‘ جبا مارڈی یاد کرتی ہیں۔

جب ڈاکٹروں نے منتی کا معائنہ کیا تو اس کا وزن صرف ۱۰ کلو گرام تھا – جو پانچ سال کے دیگر بچوں کے اوسط وزن سے نصف سے بھی کم تھا۔

’’ہم اس کی حالت دیکھ کر سکتہ میں آ گئے تھے۔ وہ شدید سوء تغذیہ کا شکار تھی،‘‘ ڈاکٹر سومیہ جیت باسو یاد کرتے ہیں۔ ’’ہمیں معلوم تھا کہ اس کی جان بچانے کے لیے ہمیں کئی سرجریاں کرنی پڑیں گی، لیکن اس کی حالت بالکل ٹھیک نہیں تھی۔‘‘ باسو ایک مشہور اسپائن سرجن اور کولکاتا میں اسپائن ریسرچ فاؤنڈیشن (ایس آر ایف) کے بانی ٹرسٹی ہیں۔

ابتدائی طور پر ڈاکٹروں کی ٹیم نے مِنتی کی خمیدہ ریڑھ کی ہڈی کو ٹھیک کرنے کے لیے ایک بریس (تسمہ) میں ڈالا، اس دوران ان کی غذائیت کو بہتر بنانے کے لیے خوراک پر کام کیا گیا۔ یہ غیرسرکاری تنظیم مالی طور پر کمزور پس منظر والے افراد کی ریڑھ کی ہڈی کی مہنگی سرجریوں کے لیے فنڈز فراہم کرتی ہے، جو بصورت دیگر سرکاری ہسپتالوں میں اپنی باری کے انتظار میں قیمتی وقت ضائع کر دیتے ہیں۔ سالانہ طور پر ایس آر ایف پسماندہ بچوں کی۶۰ سے زیادہ ریڑھ کی ہڈی کی سرجری کرتا ہے۔ ظاہر ہے ۱۶ سال قبل اس کی شروعات کے بعد سے یہ ایک بڑی چھلانگ ہے۔

دو ماہ بعد ۲۸ جولائی ۲۰۱۵ کو منتی کی دو سرجریوں میں سے پہلی سرجری کی گئی۔ آٹھ گھنٹے کی سرجری کے بعد اسے باز آبادکاری کے لیے بھیج دیا گیا۔ اگلے مہینہ دوسری سرجری ہوئی اور اس بار، ’’منتی پیدل چل کر اپنے گھر واپس گئی،‘‘ ڈاکٹر باسو کہتے ہیں۔

لیکن پانچ سالہ بچی کو بریس کی ضرورت تھی۔ اس کا استعمال ناپختہ ہڈیوں والے مریضوں میں غیر طبعی نمو کو دور کرنے یا روکنے کے لیے کیا جاتا ہے۔ بریسنگ کمزور پٹھوں کو سہارا دے کر غیرطبعی گھماؤ پر دباؤ کو درست کرسکتی ہے۔

ایک بریس کی قیمت لگ بھگ ۳ء۱ لاکھ روپے ہوتی ہے۔ ’’ہمیں بچی کے کنبے کی مالی حالت کا علم تھا، اس لیے ہم نے سرجری کے تمام اخراجات (تقریباً آٹھ لاکھ روپے، اور باز آبادکاری کے دیگر اخراجات) اٹھائے،‘‘ ڈاکٹر ترنجن سارنگی، اینستھیزیالوجسٹ اور اسپائن ریسرچ فاؤنڈیشن (ایس آر ایف) کے بانی ٹرسٹی کہتے ہیں۔

منتی کو چھٹی دے دی گئی اور ایک کار کے ذریعہ اس کے گاؤں بھیج دیا گیا۔ یہ کنبہ مٹی سے بنے ایک عام سنتھالی گھر میں رہتا ہے جس کی دیواروں پر نقش و نگار بنے ہوئے ہوتے ہیں۔ اس کے اندر ایک کمرہ آباء و اجداد کی روحوں کو بلانے اور ان کی تعظیم کے لیے عبادت گاہ کے طور پر استعمال ہوتا ہے، اس کے علاوہ اس میں ایک بیڈ روم، گائے کا شیڈ، باورچی خانہ اور صحن ہے۔ گھر پر اس نے اپنی دوائیاں، فزیو تھراپی اور کونسلنگ جاری رکھی۔

جب پاری کی منتی سے ملاقات ہوئی، تو اب ۱۳ سالہ لڑکی اپنے گھر والوں، بشمول اس کے والد کی دوسری بیوی پال منی مارڈی، کے گھیرے میں کھڑی تھی۔ ان کا پیار دیکھتے ہوئے منتی مسکراتے ہوئے کہتی ہے، ’’میری ماں نے بھی میرا بہت خیال رکھا۔‘‘

پال منی مارڈی نے اس رپورٹر کو بتایا، ’’میری بیٹی بہت بہادر ہے۔ وہ اتنی پراعتماد ہے کہ ہم نے اس طویل جنگ کو لڑنے کی ہمت کی۔ اب وہ بالکل ٹھیک ہے۔ وہ کچن میں میری مدد کرتی ہے اور سائیکل چلا کر اسکول جاتی ہے۔‘‘

بڑی ہوتی ہوئی لڑکی کو پیار سے دیکھتے ہوئے وہ مزید کہتی ہیں، ’’مجھے امید ہے کہ بزرگوں اور ڈاکٹروں کی دعائیں ہمارے ساتھ رہیں گی۔‘‘

ترجمہ نگار: شفیق عالم